భగవద్గీత - అధ్యాయం 12
అథ ద్వాదశోఽధ్యాయః .
భక్తియోగః .
అర్జున ఉవాచ -
ఏవం సతతయుక్తా యే భక్తాస్త్వాం పర్యుపాసతే .
యే చాప్యక్షరమవ్యక్తం తేషాం కే యోగవిత్తమాః ..
శ్రీభగవానువాచ -
మయ్యావేశ్య మనో యే మాం నిత్యయుక్తా ఉపాసతే .
శ్రద్ధయా పరయోపేతాః తే మే యుక్తతమా మతాః ..
యే త్వక్షరమనిర్దేశ్యమవ్యక్తం పర్యుపాసతే .
సర్వత్రగమచింత్యంచ కూటస్థమచలంధ్రువం ..
సన్నియమ్యేంద్రియగ్రామం సర్వత్ర సమబుద్ధయః .
తే ప్రాప్నువంతి మామేవ సర్వభూతహితే రతాః ..
క్లేశోఽధికతరస్తేషామవ్యక్తాసక్తచేతసాం .
అవ్యక్తా హి గతిర్దుఃఖం దేహవద్భిరవాప్యతే ..
యే తు సర్వాణి కర్మాణి మయి సంన్యస్య మత్పరాః .
అనన్యేనైవ యోగేన మాం ధ్యాయంత ఉపాసతే ..
తేషామహం సముద్ధర్తా మృత్యుసంసారసాగరాత్ .
భవామి నచిరాత్పార్థ మయ్యావేశితచేతసాం ..
మయ్యేవ మన ఆధత్స్వ మయి బుద్ధిం నివేశయ .
నివసిష్యసి మయ్యేవ అత ఊర్ధ్వం న సంశయః ..
అథ చిత్తం సమాధాతుం న శక్నోషి మయి స్థిరం .
అభ్యాసయోగేన తతో మామిచ్ఛాప్తుం ధనంజయ ..
అభ్యాసేఽప్యసమర్థోఽసి మత్కర్మపరమో భవ .
మదర్థమపి కర్మాణి కుర్వన్సిద్ధిమవాప్స్యసి ..
అథైతదప్యశక్తోఽసి కర్తుం మద్యోగమాశ్రితః .
సర్వకర్మఫలత్యాగం తతః కురు యతాత్మవాన్ ..
శ్రేయో హి జ్ఞానమభ్యాసాజ్జ్ఞానాద్ధ్యానం విశిష్యతే .
ధ్యానాత్కర్మఫలత్యాగస్త్యాగాచ్ఛాంతిరనంతరం ..
అద్వేష్టా సర్వభూతానాం మైత్రః కరుణ ఏవ చ .
నిర్మమో నిరహంకారః సమదుఃఖసుఖః క్షమీ ..
సంతుష్టః సతతం యోగీ యతాత్మా దృఢనిశ్చయః .
మయ్యర్పితమనోబుద్ధిర్యో మద్భక్తః స మే ప్రియః ..
యస్మాన్నోద్విజతే లోకో లోకాన్నోద్విజతే చ యః .
హర్షామర్షభయోద్వేగైర్ముక్తో యః స చ మే ప్రియః ..
అనపేక్షః శుచిర్దక్ష ఉదాసీనో గతవ్యథః .
సర్వారంభపరిత్యాగీ యో మద్భక్తః స మే ప్రియః ..
యో న హృష్యతి న ద్వేష్టి న శోచతి న కాంక్షతి .
శుభాశుభపరిత్యాగీ భక్తిమాన్యః స మే ప్రియః ..
సమః శత్రౌ చ మిత్రే చ తథా మానాపమానయోః .
శీతోష్ణసుఖదుఃఖేషు సమః సంగవివర్జితః ..
తుల్యనిందాస్తుతిర్మౌనీ సంతుష్టో యేన కేనచిత్ .
అనికేతః స్థిరమతిర్భక్తిమాన్మే ప్రియో నరః ..
యే తు ధర్మ్యామృతమిదం యథోక్తం పర్యుపాసతే .
శ్రద్దధానా మత్పరమా భక్తాస్తేఽతీవ మే ప్రియాః ..
ఓం తత్సదితి శ్రీమద్భగవద్గీతోపనిషత్సు
బ్రహ్మవిద్యాయాం యోగశాస్త్రే శ్రీకృష్ణార్జునసంవాదే
భక్తియోగో నామ ద్వాదశోఽధ్యాయః ..
Other stotras
