എന്തുകൊണ്ടാണ് ഹനുമാൻ തന്‍റെ നെഞ്ച് പിളർന്ന് കാണിച്ചത് ?

നിങ്ങൾ ഈ ഫോട്ടോ കണ്ടിരിക്കുമല്ലോ - ഹനുമാൻ തന്‍റെ നെഞ്ച് പിളരുന്നു. ഭഗവാൻ ശ്രീരാമന്‍റെ രൂപം അതിനുള്ളിലുണ്ട്.

ഇതിന്‍റെ പശ്ചാത്തലം അറിയാമോ?

ശ്രീരാമ പട്ടാഭിഷേകം നടക്കുകയായിരുന്നു. ഭഗവാൻ സിംഹാസനത്തിൽ ഇരിക്കുന്നു. ഹനുമാൻ ഭഗവാന്‍റെ കാലുകൾക്ക് സമീപം തറയിൽ ഇരിക്കുന്നു, ഭഗവാന്‍റെ വലത് കാൽ ഹനുമാന്‍റെ കൈത്തലങ്ങളിൽ  വിശ്രമിക്കുന്നു. ഭഗവാൻ സീതാ ദേവിയോട് പറഞ്ഞു, 'ഹനുമാന് എന്തെങ്കിലും നൽകണമെങ്കിൽ അത് ഇപ്പോൾ നൽകാം'.

ദേവി അവരുടെ കഴുത്തിൽ നിന്ന് മനോഹരവും വിലമതിക്കാനാവാത്തതുമായ മുത്തുമാല എടുത്ത് ഹനുമാന്‍റെ കഴുത്തിൽ അണിയിച്ചു. എല്ലാവരും മാലയെ പ്രശംസിക്കാൻ തുടങ്ങി, അത് വളരെ വിലമതിക്കാനാവാത്തതും വിലപ്പെട്ടതുമാണെന്ന് പറഞ്ഞു.

ഹനുമാൻ ചിന്തിക്കാൻ തുടങ്ങി-ഈ ലോകത്തിൽ, ഏത് വസ്തുവുമാകട്ടെ, ഉള്ളിൽ ഈശ്വരചൈതന്യമുണ്ടെങ്കിൽ മാത്രമേ വിലപ്പെട്ടതാകൂ. 

ഹനുമാന് കൌതുകം തോന്നി, 'അപ്പോൾ ഈ മുത്തുകളുടെ ഉള്ളിൽ ഭഗവാൻ  ഉണ്ടായിരിക്കും.’

ഭഗവാൻ ഉള്ളിലുണ്ടോ എന്ന് പരിശോധിക്കാൻ ഹനുമാൻ പല്ലുകൾ കൊണ്ട് മാലയിലെ മുത്തുകളിലൊന്ന് സൌമ്യമായി പൊട്ടിച്ചു. 

ഇല്ല, ഭഗവാൻ അതിൽ ഉണ്ടായിരുന്നില്ല. പിന്നെ അദ്ദേഹം മറ്റൊരു മുത്ത് പൊട്ടിച്ചു നോക്കി. 

ഇല്ല, ഭഗവാൻ അതിലുമില്ല..

അപ്പോഴേക്കും വിഭീഷണൻ ഇടപെട്ടു. 'ഹനുമാൻ, നീയെന്താണ് ചെയ്യുന്നത്? എന്തിനാണ് നീ ആ വിലയേറിയ മാല നശിപ്പിക്കുന്നത്?

ഹനുമാൻ മറുപടി നൽകി, 'ഇത് എനിക്ക് വിലപ്പെട്ടതായി തോന്നുന്നില്ല. ഇതിനുള്ളിൽ എന്‍റെ ഭഗവാനില്ല.

'അങ്ങനെയാണെങ്കിൽ, നിന്‍റെ ശരീരത്തിൽ ഭഗവാൻ ഉണ്ടെന്ന് നിനക്ക് ഉറപ്പുണ്ടോ?’

'എനിക്കറിയില്ല. എന്നാൽ ഭഗവാൻ ഇല്ലെങ്കിൽ, എനിക്ക് ഈ ശരീരം ഇനി ആവശ്യമില്ല.'

സ്വന്തം നഖങ്ങളാൽ ഹനുമാൻ തന്‍റെ നെഞ്ച് കീറി. 

ഭഗവാൻ സിംഹാസനത്തിൽ ഇരിക്കുന്നതുപോലെ ഹനുമാന്‍റെ നെഞ്ചിനുള്ളിൽ എല്ലാവർക്കും കാണാൻ കഴിഞ്ഞു. പുറത്തെന്നപോലെ ഹനുമാന്‍റെ നെഞ്ചിനുള്ളിലും ഭഗവാനെ  കാണാമായിരുന്നു.

ഭഗവാൻ എല്ലായ്പ്പോഴും ഹനുമാന്‍റെ ഹൃദയത്തിലുണ്ടെന്ന് ഉറപ്പായി.

പിന്നീട്, ഭഗവാൻ സ്വന്തം കൈകൊണ്ട് ഹനുമാന്‍റെ നെഞ്ചിൽ സ്പർശിച്ചു, ഒരു പാട് പോലും അവശേഷിച്ചില്ല. തുടർന്ന് ഭഗവാൻ തന്നെ ഹനുമാന്‍റെ കഴുത്തിൽ മാല അണിയിച്ചു.

പാഠങ്ങൾ-

• ഹനുമാൻ്റെ ഭക്തി -  അചഞ്ചലമായ ഭക്തിയേയും ശ്രീരാമനോടുള്ള ഹനുമാന്‍റെ സ്നേഹത്തേയും സമർപ്പണത്തേയും ഈ കഥ വ്യക്തമാക്കുന്നു.
• ശ്രീരാമന്‍റെ അനുകമ്പ -  ഇത് ആത്മാർത്ഥരായ ഭക്തരോടുള്ള ശ്രീരാമന്‍റെ സ്നേഹത്തെ പ്രതിഫലിപ്പിക്കുന്നു, ഈശ്വരൻ ശുദ്ധഹൃദയങ്ങളിൽ വസിക്കുന്നുവെന്ന് ഊന്നിപ്പറയുന്നു.
• ഭൌതിക മൂല്യത്തേക്കാൾ ആത്മീയ മൂല്യം വലുത് -  ബാഹ്യസമ്പത്തിനെക്കാൾ ആത്മീയ സമ്പത്ത് തേടാൻ ഈ കഥ പ്രോത്സാഹിപ്പിക്കുന്നു, യഥാർത്ഥ മൂല്യം കണ്ടെത്തേണ്ടത് ആന്തരികമായ ദൈവിക സാന്നിധ്യത്തിലാണെന്ന് പഠിപ്പിക്കുന്നു.

Ramaswamy Sastry and Vighnesh Ghanapaathi