ഭക്തിയിൽ കൃതജ്ഞതയുടെ പങ്ക്

കൃതജ്ഞത ഭക്തിയുടെ ഒരു പ്രധാന ഭാഗമാണ്. അത് ഭക്തനും ഈശ്വരനും തമ്മിൽ ശക്തമായ ഒരു ബന്ധം കെട്ടിപ്പടുക്കുന്നു. നന്ദിയുള്ളവരായിരിക്കുക എന്നത് ഈശ്വരന്‍റെ അനുഗ്രഹങ്ങളെ നാം വിലമതിക്കുകയും ബഹുമാനിക്കുകയും ചെയ്യുന്നുവെന്ന് കാണിക്കുന്നു. കൃതജ്ഞതയില്ലാത്ത ഭക്തി അപൂർണ്ണമാണ്.

മനുഷ്യർക്കിടയിൽ പോലും, കൃതജ്ഞത പ്രധാനമാണ്. ആരെങ്കിലും നമ്മെ സഹായിക്കുകയും അവരുടെ പരിശ്രമത്തെ നാം അവഗണിക്കുകയും ചെയ്താൽ, അവർ വീണ്ടും നമ്മെ സഹായിച്ചേക്കില്ല. ലളിതമായ ഒരു നന്ദിപ്രകടനം അവരെ കൂടുതൽ ചെയ്യാൻ പ്രോത്സാഹിപ്പിക്കുന്നു. ഇതേ തത്ത്വം ഈശ്വരനും ബാധകമാണ്. ഈശ്വരൻ നമ്മെ ദിവസവും പലവിധത്തിൽ സഹായിക്കുകയും സംരക്ഷിക്കുകയും ചെയ്യുന്നു. നാം ശ്വസിക്കുന്ന വായു, നാം കഴിക്കുന്ന ഭക്ഷണം, നാം സ്നേഹിക്കുന്ന ആളുകൾ എന്നിവയെല്ലാം ഈശ്വരന്‍റെ അനുഗ്രഹങ്ങളാണ്. എന്നാൽ നമ്മൾ പലപ്പോഴും അത് മനസ്സിലാക്കുന്നില്ല. 

ഈശ്വരന്‍റെ അനുഗ്രഹങ്ങളെ തിരിച്ചറിയുന്നത് നമ്മെ വിനീതരാക്കുന്നു. നമുക്ക് ഇല്ലാത്തതിനെക്കാൾ ഉള്ളതിൽ ശ്രദ്ധ കേന്ദ്രീകരിക്കാൻ ഇത് നമ്മെ സഹായിക്കുന്നു. നമ്മൾ ഒറ്റയ്ക്കല്ലെന്ന് അത് നമ്മെ ഓർമ്മിപ്പിക്കുന്നു. നമ്മൾ എപ്പോഴും ഈശ്വരന്‍റെ സംരക്ഷണത്തിലാണ് എന്ന വീക്ഷണം നമ്മുടെ വിശ്വാസത്തെ ശക്തിപ്പെടുത്തുന്നു. കൃതജ്ഞത നമ്മുടെ ഹൃദയത്തെ കൂടുതൽ സ്വീകരിക്കാൻ പ്രാപ്തമാക്കുന്നു. ഈശ്വരന്‍റെ സഹായത്തെ വിലമതിക്കുന്നവരെ ഈശ്വരൻ കൂടുതൽ പിന്തുണയ്ക്കുന്നു.

കൃതജ്ഞത മനസ്സിനെ ശുദ്ധീകരിക്കുന്നു. അത് അഹങ്കാരത്തേയും അത്യാഗ്രഹത്തേയും  ഇല്ലാതാക്കുന്നു. നന്ദി പറയുന്നതിലൂടെ ഈശ്വരന്‍റെ പരമമായ ശക്തിയെ നാം അംഗീകരിക്കുന്നു. ആത്മസമർപ്പണം ഭക്തിയുടെ ഒരു പ്രധാന ഭാഗമാണ്. അത് ഈശ്വരന്‍റെ പദ്ധതിയിലുള്ള നമ്മുടെ വിശ്വാസത്തെ കാണിക്കുന്നു.

ലളിതമായ പ്രവൃത്തികളിലൂടെ നന്ദി പ്രകടിപ്പിക്കാൻ കഴിയും. ഈശ്വരന് മുന്നിൽ ഒന്ന് തല കുനിക്കുക അല്ലെങ്കിൽ ഒരു പുഷ്പം സമർപ്പിക്കുക എന്നിവയൊക്കെ കൃതജ്ഞത പ്രകടിപ്പിക്കാൻ പര്യാപ്തമാണ്. 

ഗീതയിൽ ഭഗവാനിത് എടുത്തു പറയുന്നുണ്ട് -

പത്രം പുഷ്പം ഫലം തോയം യോ മേ ഭക്ത്യാ പ്രയച്ഛതി.

തദഹം ഭക്ത്യുപഹൃതമശ്നാമി പ്രയതാത്മനഃ.. 

ഒരു പുഷ്പമോ, ഒരിലയോ, ഒരു പഴമോ മതി ഭഗവാനെ തൃപ്തിപ്പെടുത്താൻ.

അല്ലെങ്കിൽ ഈശ്വരനാമത്തിൽ മറ്റുള്ളവരെ സഹായിക്കാം. നല്ലതും അല്ലാത്തതുമായ സമയങ്ങളിൽ ഈശ്വരന്‍റെ  അനുഗ്രഹങ്ങളെ ഓർമ്മിക്കുന്നത് നമ്മെ ഈശ്വരനിലേക്ക് കൂടുതൽ അടുപ്പിക്കുന്നു. എല്ലാറ്റിലും ഈശ്വരനെ  കാണാൻ കൃതജ്ഞത നമ്മെ സഹായിക്കുന്നു.

കൃതജ്ഞത എന്നത്  ഒരു ജീവിതരീതിയാണ്. ഈശ്വരന്‍റെ നിരന്തരമായ സാന്നിദ്ധ്യത്തേയും മാർഗ്ഗനിർദ്ദേശത്തേയും കുറിച്ച് അത് നമ്മെ ഓർമ്മിപ്പിക്കുന്നു. നന്ദിയുള്ളവർ മാത്രമേ യഥാർത്ഥത്തിൽ ഈശ്വരകൃപ തുടർന്നും അനുഭവിക്കൂ. ഈശ്വരന്‍റെ എണ്ണമറ്റ അനുഗ്രഹങ്ങൾക്ക് എപ്പോഴും നന്ദി പറയാം.

Ramaswamy Sastry and Vighnesh Ghanapaathi