ഗണപതിയെ എന്തുകൊണ്ടാണ് വിഘ്നേശ്വരൻ എന്ന് വിളിക്കുന്നത്?

ഗണപതി വിഘ്നങ്ങളെ നീക്കം ചെയ്യുകയും വിഘ്നങ്ങൾ ഉണ്ടാക്കുകയും ചെയ്യുന്നു.

എന്തിനാണ് ഭഗവാൻ വിഘ്നങ്ങൾ ഉണ്ടാക്കുന്നത്?

ബ്രഹ്‌മാവ്‌ സൃഷ്ടി ചെയ്യാൻ തുടങ്ങുകയായിരുന്നു.

പക്ഷേ ഗണേശപൂജ ചെയ്തില്ല.

ബ്രഹ്മാവ് കരുതി, 'ഞാനല്ലേ എല്ലാറ്റിന്‍റെയും സ്രഷ്ടാവ്. ഞാനാരെ പൂജിക്കണം? എല്ലാരിലും മികച്ചവൻ ഞാനായതുകൊണ്ടല്ലേ സൃഷ്ടിയുടെ ചുമതല എന്നെ ഏൽപ്പിച്ചിരിക്കുന്നത്?'

താമസിയാതെ ഗണപതിയുടെ ഗണങ്ങൾ പ്രത്യക്ഷപ്പെട്ടു, ഭയാനകമായ രൂപങ്ങൾ -  ചിലർക്ക് മൂന്ന് കണ്ണുകൾ, ചിലർക്ക് അഞ്ച് കണ്ണുകൾ, ചിലർക്ക് പുറകിൽ കണ്ണുകൾ, ചിലർക്ക് പത്ത് തലകൾ, ചിലർക്ക് ആയിരം തലകൾ....

അവർ ബ്രഹ്മാവിനെ പീഡിപ്പിക്കാൻ തുടങ്ങി. തല്ലുകയും ചവിട്ടുകയും ചെയ്തു. അങ്ങോട്ടും ഇങ്ങോട്ടും വലിച്ചെറിഞ്ഞു. ബ്രഹ്മാവിൻ്റെ അഹങ്കാരം ഇല്ലാതായി.

എന്തിനാണ് ഗണപതി ഭഗവാൻ ഇങ്ങനെ ചെയ്തത്? എന്തിനാണ് ബ്രഹ്മാവിനെ തടസ്സപ്പെടുത്തിയത്?

അഹങ്കാരത്തോടെ ബ്രഹ്മാവ് പ്രപഞ്ചത്തെ സൃഷ്ടിച്ചിരുന്നുവെങ്കിൽ എന്ത് സംഭവിച്ചിരിക്കും ?

അഹങ്കാരം ആസുരീഭാവത്തിന്‍റെ ലക്ഷണമാണ്. സൃഷ്ടികർമ്മം ആസുരീഭാവത്തോടെ ചെയ്തിരുന്നെങ്കിൽ പ്രപഞ്ചത്തിൽ അഹങ്കാരം, വഞ്ചന, കാപട്യം, ക്രൂരത തുടങ്ങിയ ദുർഗ്ഗുണങ്ങൾ മാത്രമേ ഉണ്ടാകുമായിരുന്നുള്ളു. 

വിഘ്നം വന്നപ്പോൾ ബ്രഹ്മാവ് ആത്മപരിശോധന ചെയ്തു. ബ്രഹ്മാവിന് തന്‍റെ  തെറ്റ് മനസ്സിലായി. ബ്രഹ്മാവ് തന്‍റെ തെറ്റ് തിരുത്തി.

വിഘ്നങ്ങൾ ഉണ്ടാക്കുന്നതിലൂടെ ഗണപതി ഭഗവാൻ നമ്മോട് പറയുകയാണ്, 'നിനക്ക് തെറ്റുപറ്റിയിരിക്കുന്നു. ചിന്തിച്ചു നോക്കുക. തെറ്റ് തിരുത്തി മുന്നോട്ടു പോകുക.'

സ്വഭാവത്തിൽ മാത്രമല്ല ഇത്.

ഒരു പുതിയ ജോലിക്കായി ശ്രമിക്കുമ്പോൾ തടസ്സം വരുന്നുവെന്ന് വിചാരിക്കുക. ചിലപ്പോൾ എല്ലാ വരുംവരായ്കളെയും പറ്റി ചിന്തിച്ചിട്ടുണ്ടാവില്ല. ചിന്തിക്കാൻ വേണ്ടിയാണ് ഭഗവാൻ തടസ്സം ഉണ്ടാക്കുന്നത്. വേണ്ടവിധം ചിന്തിച്ചാൽ ചിലപ്പോൾ തീരുമാനം തന്നെ മാറ്റും.

അതുകൊണ്ട് തടസ്സങ്ങളെ എപ്പോഴും നെഗറ്റീവ് ആയി മാത്രം കാണരുത്. തടസ്സങ്ങൾ നമ്മെ ആത്മപരിശോധന നടത്തുവാനും ചിന്തിച്ച് നല്ല മാർഗം തിരഞ്ഞെടുക്കുവാനും ഗണപതി ഭഗവൻ തരുന്ന അനുഗ്രഹമാണ്.

Ramaswamy Sastry and Vighnesh Ghanapaathi