ಯೋಗನಿದ್ರಾದೇವಿ: ನಿದ್ರೆಯ ಅಧಿದೇವತೆ

ಯೋಗನಿದ್ರಾ ದೇವಿಯು ವಿಶ್ರಾಂತಿ ಮತ್ತು ನಿದ್ರೆಯ ನಿಯಾಮಕ ಶಕ್ತಿ. ಕೆಳಗಿನ ಕಥೆಯು ಬ್ರಹ್ಮಾಂಡವನ್ನು ಉಳಿಸುವಲ್ಲಿ ಅವಳ ಶಕ್ತಿ ಮತ್ತು ಪಾತ್ರವನ್ನು ತೋರಿಸುತ್ತದೆ.

ಬಹಳ ಹಿಂದೆಯೇ ಮೂರೂ ಲೋಕಗಳು ನೀರಿನಲ್ಲಿ ಮುಳುಗಿದ್ದವು. ಭಗವಾನ್ ವಿಷ್ಣುವು ಆದಿಶೇಷನ ಮೇಲೆ ಮಲಗಿದ್ದನು. ಅವನ ಕಿವಿಯಲ್ಲಿದ್ದ ಕೊಳೆಯಿಂದ ಮಧು ಮತ್ತು ಕೈಟಭ ಎಂಬ ಇಬ್ಬರು ರಾಕ್ಷಸರು ಜನಿಸಿದರು. ಅವರು ವಿಷ್ಣುವಿನ ಹೊಕ್ಕುಳದಿಂದ ಬರುವ ಕಮಲದ ಮೇಲೆ ಕುಳಿತಿರುವ ಬ್ರಹ್ಮನನ್ನು ನೋಡಿದರು. ಅಹಂಕಾರದಿಂದ ತುಂಬಿದ ಅವರು ಬ್ರಹ್ಮನನ್ನು ನಾಶಮಾಡಲು ಆಕ್ರಮಣ ಮಾಡಿದರು.

ಬ್ರಹ್ಮನು ವಿಷ್ಣುವನ್ನು ಸಹಾಯಕ್ಕಾಗಿ ಪ್ರಾರ್ಥಿಸಿದನು, ಆದರೆ ವಿಷ್ಣುವು ಗಾಢ ನಿದ್ರೆಯಲ್ಲಿದ್ದನು. ಈ ನಿದ್ರೆ ಸಾಮಾನ್ಯವಾಗಿರಲಿಲ್ಲ. ಯೋಗ ನಿದ್ರಾ ದೇವಿಯ ಮಹಿಮೆಯಿಂದ ಮಹಾವಿಷ್ಣುವು ಯೋಗನಿದ್ರೆಯಲ್ಲಿ ಮುಳುಗಿದ್ದ. ಅವಳು ವಿಷ್ಣುವನ್ನು ಸಹ ಆಳುತ್ತಾಳೆ ಎಂದು ಬ್ರಹ್ಮನು ಅರಿತುಕೊಂಡನು. ‘ವಿಷ್ಣವೇ ಅವಳ ಹತೋಟಿಯಲ್ಲಿದ್ದರೆ ನಾನೂ ಸೇರಿದಂತೆ ಎಲ್ಲ ದೇವತೆಗಳೂ ಅವಳಿಗೆ ಅಧೀನವಾಗಿರಬೇಕು’ ಎಂದು ಯೋಚಿಸಿದ ಬ್ರಹ್ಮನು ಯೋಗನಿದ್ರಾದೇವಿಯನ್ನು ಪ್ರಾರ್ಥಿಸಿದನು. ಅವಳ ಶ್ರೇಷ್ಠತೆಯನ್ನು ಕೊಂಡಾಡಿದನು ಮತ್ತು ವಿಷ್ಣುವನ್ನು ಎಬ್ಬಿಸುವಂತೆ ಬೇಡಿಕೊಂಡನು. ದೇವಿಯು ವಿಷ್ಣುವಿನ ದೇಹದಿಂದ ಹೊರಬಂದಳು. ಅವಳ ಪ್ರಭಾವದಿಂದ ಮುಕ್ತನಾದ ವಿಷ್ಣುವು ಎಚ್ಚರಗೊಂಡು ಅಪಾಯವನ್ನು ಅರಿತನು.

ವಿಷ್ಣುವು ಮಧು ಮತ್ತು ಕೈಟಭರೊಡನೆ ಭೀಕರ ಯುದ್ಧ ಮಾಡಿದನು. ತನ್ನ ಮಹಾಶಕ್ತಿಯನ್ನು ಬಳಸಿ ಅವರನ್ನು ಸೋಲಿಸಿ ಬ್ರಹ್ಮನನ್ನು ರಕ್ಷಿಸಿದನು. ವಿಶ್ವದಲ್ಲಿ ಕ್ರಮವನ್ನು ಪುನಃಸ್ಥಾಪಿಸಲಾಯಿತು.

ಈ ಕಥೆಯು ಯೋಗನಿದ್ರಾದೇವಿಯ ಪರಮ ಶಕ್ತಿಯನ್ನು ತೋರಿಸುತ್ತದೆ. ದೇವಾನು ದೇವತೆಗಳು ಸಹ ಅವಳ ನಿಯಂತ್ರಣದಲ್ಲಿದ್ದರು. ಸೃಷ್ಟಿಯ ಸ್ಥಿತಿ ಸ್ಥಾಪಕತ್ವವನ್ನು ಸಾಧಿಸಿವಲ್ಲಿ ಅವಳ ಪಾತ್ರ ಮುಖ್ಯವಾಗಿದೆ. ಅವಳು ಪ್ರಸನ್ನಳಾಗದೆ, ವಿಷ್ಣುವು ಎಚ್ಚರಗೊಳ್ಳಲು ಸಾಧ್ಯವಿಲ್ಲ, ಮತ್ತು ಬ್ರಹ್ಮಾಂಡವು ವಿನಾಶವನ್ನು ಎದುರಿಸುತ್ತಿತ್ತು.

ಯೋಗನಿದ್ರಾ ದೇವಿ ಕೇವಲ ವಿಶ್ರಾಂತಿ ಮತ್ತು ನಿದ್ರೆಯ ದೇವತೆಯಲ್ಲ. ಅವಳು ಬ್ರಹ್ಮಾಂಡದ ಸುಗಮ ಕಾರ್ಯನಿರ್ವಹಣೆಯನ್ನು ಖಾತ್ರಿಪಡಿಸುವ ಶಕ್ತಿ. ಅವಳ ಕಥೆಯು ಅವಳ ಸಾಟಿಯಿಲ್ಲದ ಶಕ್ತಿ ಮತ್ತು ಪ್ರಾಮುಖ್ಯತೆಯನ್ನು ನಮಗೆ ನೆನಪಿಸುತ್ತದೆ.

Ramaswamy Sastry and Vighnesh Ghanapaathi