సర్వే వేదాః సాంగకలాపాః పరమేణ
ప్రాహుస్తాత్పర్యేణ యదద్వైతమఖండం .
బ్రహ్మాసంగం ప్రత్యగభిన్నం పురుషాఖ్యం
తస్మై శ్రీకృష్ణాయ నమో మంగలధామ్నే ..

మాయాధిష్ఠానం పరిశుద్ధం యదవిద్యా
సూతే విశ్వం దేవమనుష్యాదివిభేదం .
యస్మిన్ జ్ఞాతే సా శశశృంగేణ సమా స్యాత్
తస్మై శ్రీకృష్ణాయ నమో మంగలధామ్నే ..

శ్రీవైకుంఠే శ్రీధరణీలాలితపాదః
సర్వైర్వేదైర్మూర్తిధరైః సంస్తుతకీర్తిః .
ఆస్తే నిత్యం శేషశయో యః పరమాత్మా
తస్మై శ్రీకృష్ణాయ నమో మంగలధామ్నే ..

ధర్మత్రాణాయైవ కృతానేకవిభూతిః
శ్వేతద్వీపే క్షీరపయోధౌ కృతవాసః .
యో భృత్యానామార్తిహరః సత్త్వసమూహ-
స్తస్మై శ్రీకృష్ణాయ నమో మంగలధామ్నే ..

క్షీరాంభోధేస్తీరముపావ్రజ్య సురేశై-
ర్బ్రహ్మేశానేంద్రాదిభిరామ్నాయశిరోభిః .
భూమేః సౌఖ్యం కామయమానైః ప్రణతో య-
స్తస్మై శ్రీకృష్ణాయ నమో మంగలధామ్నే ..

సర్వాత్మాపి స్వాశ్రితరక్షాపరతంత్ర-
శ్రీదేవక్యాం యో వసుదేవాదవతీర్ణః .
చక్రే లీలాః శ్రోతృమనోనందవిధాత్రీ-
స్తస్మై శ్రీకృష్ణాయ నమో మంగలధామ్నే ..

పుత్రం మత్వా యం పరమేశానమజాతం
పూర్ణం మాయోపాత్తశరీరం సుఖరూపం .
నందో ముక్తిం ప్రాప యశోదా వ్రజపుర్యాం
తస్మై శ్రీకృష్ణాయ నమో మంగలధామ్నే ..

గోప్యో గోపా గోపకుమారాశ్చ యదీయం
రూపం దృష్ట్వా సుందరమిందీవరనీలం .
మందస్మేరం కుందరదం ప్రీతిమవాపు-
స్తస్మై శ్రీకృష్ణాయ నమో మంగలధామ్నే ..

బాలో భూత్వా మాసవయా యోఽపిబదగ్నే
ప్రాణైః సాకం స్తన్యమసుర్యాః కులటాయాః .
స్వరస్త్యాకాంక్షన్నాత్మజనానాం జగదీశ-
స్తస్మై శ్రీకృష్ణాయ నమో మంగలధామ్నే ..

పద్భధాం జఘ్నేఽనోఽసురముద్యమ్య తృతీయే
మాసే దేవో యోఽఖిలమాయావినిహంతా .
సంతాపఘ్నః సాధుజనానామమరేశ-
స్తస్మై శ్రీకృష్ణాయ నమో మంగలధామ్నే ..

కంఠే బద్ధ్వా మూర్ధ్ని వినిర్భిద్య నిరస్తః
దుష్టో గోష్ఠే యేన తృణావర్తసురారిః .
సర్వజ్ఞేనానంతబలేనాతివిమూఢ-
స్తస్మై శ్రీకృష్ణాయ నమో మంగలధామ్నే ..

గోపాలార్భైశ్చారణలీలాం విదధానో
గోవత్సానాం యో బకదైత్యం విదదార .
ఆస్యాదారమ్యోదరమత్యున్నతసత్త్వం
తస్మై శ్రీకృష్ణాయ నమో మంగలధామ్నే ..

మాత్రే దైత్యాచ్ఛంకితవత్యై దయయా యో
గోప్యై లోకాన్ స్వాత్మసమేతాన్ ముఖపద్మే .
స్వీయే సూక్ష్మేఽదర్శయదవ్యాహతశక్తి-
స్తస్మై శ్రీకృష్ణాయ నమో మంగలధామ్నే ..

నవ్యం గవ్యం క్షీరమనీరం నవనీతం
భుంక్తే ప్రీత్యా దత్తమదత్తం చ యథేచ్ఛం .
స్వాత్మారామాభ్యర్చితపాదోఽపి చ గోష్టే
తస్మై శ్రీకృష్ణాయ నమో మంగలధామ్నే ..

కాలీయోఽహిః కల్పితశిక్షాభయదాన-
స్త్యక్త్వా తీర్థం యామునమాత్మీయమవాప .
ద్వీపం యేనానంతబలేనాథ ససైన్య-
స్తస్మై శ్రీకృష్ణాయ నమో మంగలధామ్నే ..

గోపాన్ యోఽపాదాపద ఉద్ధృత్య దవాగ్నే-
ర్ముగ్ధాన్ స్నిగ్ధాన్ పవిత్రామలలక్ష్మీః .
అష్టైశ్వర్యోఽవ్యాహతలక్ష్మీపతిరాద్య-
స్తస్మై శ్రీకృష్ణాయ నమో మంగలధామ్నే ..

పాపాచారోఽఘాసురనామాహిశరీరః
శైలాకారో యేన హతో మూర్ధ్ని విభిన్నః .
ప్రాపాత్మైక్యం బ్రహ్మవిదామేవ తు గమ్యం
తస్మై శ్రీకృష్ణాయ నమో మంగలధామ్నే ..

గోగోపానాం శ్రోత్రమనోనేత్రసుఖాని
ప్రాదుష్కుర్వన్ గోపవధూనాం వ్రజమధ్యే .
లీలానాట్యాన్యద్భుతరూపాణి య ఆస్తే
తస్మై శ్రీకృష్ణాయ నమో మంగలధామ్నే ..

వ్యత్యస్తాంభోజాతపదో వేణునినాదైః
సర్వాఀల్లోకాన్ సాతిశయాన్ కర్మసు మూఢాన్ .
చక్రేఽత్యంతానందవిధానేన వనే య-
స్తస్మై శ్రీకృష్ణాయ నమో మంగలధామ్నే ..

Ramaswamy Sastry and Vighnesh Ghanapaathi