കൃഷ്ണ മംഗള സ്തോത്രം

സർവേ വേദാഃ സാംഗകലാപാഃ പരമേണ
പ്രാഹുസ്താത്പര്യേണ യദദ്വൈതമഖണ്ഡം .
ബ്രഹ്മാസംഗം പ്രത്യഗഭിന്നം പുരുഷാഖ്യം
തസ്മൈ ശ്രീകൃഷ്ണായ നമോ മംഗളധാമ്നേ ..

മായാധിഷ്ഠാനം പരിശുദ്ധം യദവിദ്യാ
സൂതേ വിശ്വം ദേവമനുഷ്യാദിവിഭേദം .
യസ്മിൻ ജ്ഞാതേ സാ ശശശൃംഗേണ സമാ സ്യാത്
തസ്മൈ ശ്രീകൃഷ്ണായ നമോ മംഗളധാമ്നേ ..

ശ്രീവൈകുണ്ഠേ ശ്രീധരണീലാളിതപാദഃ
സർവൈർവേദൈർമൂർതിധരൈഃ സംസ്തുതകീർതിഃ .
ആസ്തേ നിത്യം ശേഷശയോ യഃ പരമാത്മാ
തസ്മൈ ശ്രീകൃഷ്ണായ നമോ മംഗളധാമ്നേ ..

ധർമത്രാണായൈവ കൃതാനേകവിഭൂതിഃ
ശ്വേതദ്വീപേ ക്ഷീരപയോധൗ കൃതവാസഃ .
യോ ഭൃത്യാനാമാർതിഹരഃ സത്ത്വസമൂഹ-
സ്തസ്മൈ ശ്രീകൃഷ്ണായ നമോ മംഗളധാമ്നേ ..

ക്ഷീരാംഭോധേസ്തീരമുപാവ്രജ്യ സുരേശൈ-
ര്ബ്രഹ്മേശാനേന്ദ്രാദിഭിരാമ്നായശിരോഭിഃ .
ഭൂമേഃ സൗഖ്യം കാമയമാനൈഃ പ്രണതോ യ-
സ്തസ്മൈ ശ്രീകൃഷ്ണായ നമോ മംഗളധാമ്നേ ..

സർവാത്മാപി സ്വാശ്രിതരക്ഷാപരതന്ത്ര-
ശ്രീദേവക്യാം യോ വസുദേവാദവതീർണഃ .
ചക്രേ ലീലാഃ ശ്രോതൃമനോനന്ദവിധാത്രീ-
സ്തസ്മൈ ശ്രീകൃഷ്ണായ നമോ മംഗളധാമ്നേ ..

പുത്രം മത്വാ യം പരമേശാനമജാതം
പൂർണം മായോപാത്തശരീരം സുഖരൂപം .
നന്ദോ മുക്തിം പ്രാപ യശോദാ വ്രജപുര്യാം
തസ്മൈ ശ്രീകൃഷ്ണായ നമോ മംഗളധാമ്നേ ..

ഗോപ്യോ ഗോപാ ഗോപകുമാരാശ്ച യദീയം
രൂപം ദൃഷ്ട്വാ സുന്ദരമിന്ദീവരനീലം .
മന്ദസ്മേരം കുന്ദരദം പ്രീതിമവാപു-
സ്തസ്മൈ ശ്രീകൃഷ്ണായ നമോ മംഗളധാമ്നേ ..

ബാലോ ഭൂത്വാ മാസവയാ യോഽപിബദഗ്നേ
പ്രാണൈഃ സാകം സ്തന്യമസുര്യാഃ കുലടായാഃ .
സ്വരസ്ത്യാകാങ്ക്ഷന്നാത്മജനാനാം ജഗദീശ-
സ്തസ്മൈ ശ്രീകൃഷ്ണായ നമോ മംഗളധാമ്നേ ..

പദ്ഭധാം ജഘ്നേഽനോഽസുരമുദ്യമ്യ തൃതീയേ
മാസേ ദേവോ യോഽഖിലമായാവിനിഹന്താ .
സന്താപഘ്നഃ സാധുജനാനാമമരേശ-
സ്തസ്മൈ ശ്രീകൃഷ്ണായ നമോ മംഗളധാമ്നേ ..

കണ്ഠേ ബദ്ധ്വാ മൂർധ്നി വിനിർഭിദ്യ നിരസ്തഃ
ദുഷ്ടോ ഗോഷ്ഠേ യേന തൃണാവർതസുരാരിഃ .
സർവജ്ഞേനാനന്തബലേനാതിവിമൂഢ-
സ്തസ്മൈ ശ്രീകൃഷ്ണായ നമോ മംഗളധാമ്നേ ..

ഗോപാലാർഭൈശ്ചാരണലീലാം വിദധാനോ
ഗോവത്സാനാം യോ ബകദൈത്യം വിദദാര .
ആസ്യാദാരമ്യോദരമത്യുന്നതസത്ത്വം
തസ്മൈ ശ്രീകൃഷ്ണായ നമോ മംഗളധാമ്നേ ..

മാത്രേ ദൈത്യാച്ഛങ്കിതവത്യൈ ദയയാ യോ
ഗോപ്യൈ ലോകാൻ സ്വാത്മസമേതാൻ മുഖപദ്മേ .
സ്വീയേ സൂക്ഷ്മേഽദർശയദവ്യാഹതശക്തി-
സ്തസ്മൈ ശ്രീകൃഷ്ണായ നമോ മംഗളധാമ്നേ ..

നവ്യം ഗവ്യം ക്ഷീരമനീരം നവനീതം
ഭുങ്ക്തേ പ്രീത്യാ ദത്തമദത്തം ച യഥേച്ഛം .
സ്വാത്മാരാമാഭ്യർചിതപാദോഽപി ച ഗോഷ്ടേ
തസ്മൈ ശ്രീകൃഷ്ണായ നമോ മംഗളധാമ്നേ ..

കാളീയോഽഹിഃ കല്പിതശിക്ഷാഭയദാന-
സ്ത്യക്ത്വാ തീർഥം യാമുനമാത്മീയമവാപ .
ദ്വീപം യേനാനന്തബലേനാഥ സസൈന്യ-
സ്തസ്മൈ ശ്രീകൃഷ്ണായ നമോ മംഗളധാമ്നേ ..

ഗോപാൻ യോഽപാദാപദ ഉദ്ധൃത്യ ദവാഗ്നേ-
ര്മുഗ്ധാൻ സ്നിഗ്ധാൻ പവിത്രാമലലക്ഷ്മീഃ .
അഷ്ടൈശ്വര്യോഽവ്യാഹതലക്ഷ്മീപതിരാദ്യ-
സ്തസ്മൈ ശ്രീകൃഷ്ണായ നമോ മംഗളധാമ്നേ ..

പാപാചാരോഽഘാസുരനാമാഹിശരീരഃ
ശൈലാകാരോ യേന ഹതോ മൂർധ്നി വിഭിന്നഃ .
പ്രാപാത്മൈക്യം ബ്രഹ്മവിദാമേവ തു ഗമ്യം
തസ്മൈ ശ്രീകൃഷ്ണായ നമോ മംഗളധാമ്നേ ..

ഗോഗോപാനാം ശ്രോത്രമനോനേത്രസുഖാനി
പ്രാദുഷ്കുർവൻ ഗോപവധൂനാം വ്രജമധ്യേ .
ലീലാനാട്യാന്യദ്ഭുതരൂപാണി യ ആസ്തേ
തസ്മൈ ശ്രീകൃഷ്ണായ നമോ മംഗളധാമ്നേ ..

വ്യത്യസ്താംഭോജാതപദോ വേണുനിനാദൈഃ
സർവാഁല്ലോകാൻ സാതിശയാൻ കർമസു മൂഢാൻ .
ചക്രേഽത്യന്താനന്ദവിധാനേന വനേ യ-
സ്തസ്മൈ ശ്രീകൃഷ്ണായ നമോ മംഗളധാമ്നേ ..

Ramaswamy Sastry and Vighnesh Ghanapaathi

Other stotras