ಕೃಷ್ಣ ಮಂಗಲ ಸ್ತೋತ್ರ

ಸರ್ವೇ ವೇದಾಃ ಸಾಂಗಕಲಾಪಾಃ ಪರಮೇಣ
ಪ್ರಾಹುಸ್ತಾತ್ಪರ್ಯೇಣ ಯದದ್ವೈತಮಖಂಡಂ .
ಬ್ರಹ್ಮಾಸಂಗಂ ಪ್ರತ್ಯಗಭಿನ್ನಂ ಪುರುಷಾಖ್ಯಂ
ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಮಾಯಾಧಿಷ್ಠಾನಂ ಪರಿಶುದ್ಧಂ ಯದವಿದ್ಯಾ
ಸೂತೇ ವಿಶ್ವಂ ದೇವಮನುಷ್ಯಾದಿವಿಭೇದಂ .
ಯಸ್ಮಿನ್ ಜ್ಞಾತೇ ಸಾ ಶಶಶೃಂಗೇಣ ಸಮಾ ಸ್ಯಾತ್
ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಶ್ರೀವೈಕುಂಠೇ ಶ್ರೀಧರಣೀಲಾಲಿತಪಾದಃ
ಸರ್ವೈರ್ವೇದೈರ್ಮೂರ್ತಿಧರೈಃ ಸಂಸ್ತುತಕೀರ್ತಿಃ .
ಆಸ್ತೇ ನಿತ್ಯಂ ಶೇಷಶಯೋ ಯಃ ಪರಮಾತ್ಮಾ
ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಧರ್ಮತ್ರಾಣಾಯೈವ ಕೃತಾನೇಕವಿಭೂತಿಃ
ಶ್ವೇತದ್ವೀಪೇ ಕ್ಷೀರಪಯೋಧೌ ಕೃತವಾಸಃ .
ಯೋ ಭೃತ್ಯಾನಾಮಾರ್ತಿಹರಃ ಸತ್ತ್ವಸಮೂಹ-
ಸ್ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಕ್ಷೀರಾಂಭೋಧೇಸ್ತೀರಮುಪಾವ್ರಜ್ಯ ಸುರೇಶೈ-
ರ್ಬ್ರಹ್ಮೇಶಾನೇಂದ್ರಾದಿಭಿರಾಮ್ನಾಯಶಿರೋಭಿಃ .
ಭೂಮೇಃ ಸೌಖ್ಯಂ ಕಾಮಯಮಾನೈಃ ಪ್ರಣತೋ ಯ-
ಸ್ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಸರ್ವಾತ್ಮಾಪಿ ಸ್ವಾಶ್ರಿತರಕ್ಷಾಪರತಂತ್ರ-
ಶ್ರೀದೇವಕ್ಯಾಂ ಯೋ ವಸುದೇವಾದವತೀರ್ಣಃ .
ಚಕ್ರೇ ಲೀಲಾಃ ಶ್ರೋತೃಮನೋನಂದವಿಧಾತ್ರೀ-
ಸ್ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಪುತ್ರಂ ಮತ್ವಾ ಯಂ ಪರಮೇಶಾನಮಜಾತಂ
ಪೂರ್ಣಂ ಮಾಯೋಪಾತ್ತಶರೀರಂ ಸುಖರೂಪಂ .
ನಂದೋ ಮುಕ್ತಿಂ ಪ್ರಾಪ ಯಶೋದಾ ವ್ರಜಪುರ್ಯಾಂ
ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಗೋಪ್ಯೋ ಗೋಪಾ ಗೋಪಕುಮಾರಾಶ್ಚ ಯದೀಯಂ
ರೂಪಂ ದೃಷ್ಟ್ವಾ ಸುಂದರಮಿಂದೀವರನೀಲಂ .
ಮಂದಸ್ಮೇರಂ ಕುಂದರದಂ ಪ್ರೀತಿಮವಾಪು-
ಸ್ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಬಾಲೋ ಭೂತ್ವಾ ಮಾಸವಯಾ ಯೋಽಪಿಬದಗ್ನೇ
ಪ್ರಾಣೈಃ ಸಾಕಂ ಸ್ತನ್ಯಮಸುರ್ಯಾಃ ಕುಲಟಾಯಾಃ .
ಸ್ವರಸ್ತ್ಯಾಕಾಂಕ್ಷನ್ನಾತ್ಮಜನಾನಾಂ ಜಗದೀಶ-
ಸ್ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಪದ್ಭಧಾಂ ಜಘ್ನೇಽನೋಽಸುರಮುದ್ಯಮ್ಯ ತೃತೀಯೇ
ಮಾಸೇ ದೇವೋ ಯೋಽಖಿಲಮಾಯಾವಿನಿಹಂತಾ .
ಸಂತಾಪಘ್ನಃ ಸಾಧುಜನಾನಾಮಮರೇಶ-
ಸ್ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಕಂಠೇ ಬದ್ಧ್ವಾ ಮೂರ್ಧ್ನಿ ವಿನಿರ್ಭಿದ್ಯ ನಿರಸ್ತಃ
ದುಷ್ಟೋ ಗೋಷ್ಠೇ ಯೇನ ತೃಣಾವರ್ತಸುರಾರಿಃ .
ಸರ್ವಜ್ಞೇನಾನಂತಬಲೇನಾತಿವಿಮೂಢ-
ಸ್ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಗೋಪಾಲಾರ್ಭೈಶ್ಚಾರಣಲೀಲಾಂ ವಿದಧಾನೋ
ಗೋವತ್ಸಾನಾಂ ಯೋ ಬಕದೈತ್ಯಂ ವಿದದಾರ .
ಆಸ್ಯಾದಾರಮ್ಯೋದರಮತ್ಯುನ್ನತಸತ್ತ್ವಂ
ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಮಾತ್ರೇ ದೈತ್ಯಾಚ್ಛಂಕಿತವತ್ಯೈ ದಯಯಾ ಯೋ
ಗೋಪ್ಯೈ ಲೋಕಾನ್ ಸ್ವಾತ್ಮಸಮೇತಾನ್ ಮುಖಪದ್ಮೇ .
ಸ್ವೀಯೇ ಸೂಕ್ಷ್ಮೇಽದರ್ಶಯದವ್ಯಾಹತಶಕ್ತಿ-
ಸ್ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ನವ್ಯಂ ಗವ್ಯಂ ಕ್ಷೀರಮನೀರಂ ನವನೀತಂ
ಭುಂಕ್ತೇ ಪ್ರೀತ್ಯಾ ದತ್ತಮದತ್ತಂ ಚ ಯಥೇಚ್ಛಂ .
ಸ್ವಾತ್ಮಾರಾಮಾಭ್ಯರ್ಚಿತಪಾದೋಽಪಿ ಚ ಗೋಷ್ಟೇ
ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಕಾಲೀಯೋಽಹಿಃ ಕಲ್ಪಿತಶಿಕ್ಷಾಭಯದಾನ-
ಸ್ತ್ಯಕ್ತ್ವಾ ತೀರ್ಥಂ ಯಾಮುನಮಾತ್ಮೀಯಮವಾಪ .
ದ್ವೀಪಂ ಯೇನಾನಂತಬಲೇನಾಥ ಸಸೈನ್ಯ-
ಸ್ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಗೋಪಾನ್ ಯೋಽಪಾದಾಪದ ಉದ್ಧೃತ್ಯ ದವಾಗ್ನೇ-
ರ್ಮುಗ್ಧಾನ್ ಸ್ನಿಗ್ಧಾನ್ ಪವಿತ್ರಾಮಲಲಕ್ಷ್ಮೀಃ .
ಅಷ್ಟೈಶ್ವರ್ಯೋಽವ್ಯಾಹತಲಕ್ಷ್ಮೀಪತಿರಾದ್ಯ-
ಸ್ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಪಾಪಾಚಾರೋಽಘಾಸುರನಾಮಾಹಿಶರೀರಃ
ಶೈಲಾಕಾರೋ ಯೇನ ಹತೋ ಮೂರ್ಧ್ನಿ ವಿಭಿನ್ನಃ .
ಪ್ರಾಪಾತ್ಮೈಕ್ಯಂ ಬ್ರಹ್ಮವಿದಾಮೇವ ತು ಗಮ್ಯಂ
ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ಗೋಗೋಪಾನಾಂ ಶ್ರೋತ್ರಮನೋನೇತ್ರಸುಖಾನಿ
ಪ್ರಾದುಷ್ಕುರ್ವನ್ ಗೋಪವಧೂನಾಂ ವ್ರಜಮಧ್ಯೇ .
ಲೀಲಾನಾಟ್ಯಾನ್ಯದ್ಭುತರೂಪಾಣಿ ಯ ಆಸ್ತೇ
ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

ವ್ಯತ್ಯಸ್ತಾಂಭೋಜಾತಪದೋ ವೇಣುನಿನಾದೈಃ
ಸರ್ವಾಁಲ್ಲೋಕಾನ್ ಸಾತಿಶಯಾನ್ ಕರ್ಮಸು ಮೂಢಾನ್ .
ಚಕ್ರೇಽತ್ಯಂತಾನಂದವಿಧಾನೇನ ವನೇ ಯ-
ಸ್ತಸ್ಮೈ ಶ್ರೀಕೃಷ್ಣಾಯ ನಮೋ ಮಂಗಲಧಾಮ್ನೇ ..

Ramaswamy Sastry and Vighnesh Ghanapaathi

Other stotras