വാണീ ശരണാഗതി സ്തോത്രം

വേണീം സിതേതരസമീരണഭോജിതുല്യാം
വാണീം ച കേകികുലഗർവഹരാം വഹന്തീം .
ശ്രോണീം ഗിരിസ്മയവിഭേദചണാം ദധാനാം
വാണീമനന്യശരണഃ ശരണം പ്രപദ്യേ ..

വാചഃ പ്രയത്നമനപേക്ഷ്യ മുഖാരവിന്ദാ-
ദ്വാതാഹതാബ്ധിലഹരീമദഹാരദക്ഷാഃ .
വാദേഷു യത്കരുണയാ പ്രഗലന്തി താം ത്വാം
വാണീമനന്യശരണഃ ശരണം പ്രപദ്യേ ..

രാകാശശാങ്കസദൃശാനനപങ്കജാതാം
ശോകാപഹാരചതുരാംഘ്രിസരോജപൂജാം .
പാകാരിമുഖ്യദിവിഷത്പ്രവരേഡ്യമാനാം
വാണീമനന്യശരണഃ ശരണം പ്രപദ്യേ ..

ബാലോഡുപപ്രവിലസത്കചമധ്യഭാഗാം
നീലോത്പലപ്രതിഭടാക്ഷിവിരാജമാനാം .
കാലോന്മിഷത്കിസലയാരുണപാദപദ്മാം
വാണീമനന്യശരണഃ ശരണം പ്രപദ്യേ ..

Ramaswamy Sastry and Vighnesh Ghanapaathi

Other stotras