ശാരദാ പദപങ്കജ സ്തോത്രം
മാതസ്ത്വത്പദപങ്കജം കല്യതാം ചേതോഽമ്ബുജേ സന്തതം
മാനാഥാംബുജസംഭവാദ്രിതനയാകാന്തൈഃ സമാരാധിതം .
വാഞ്ഛാപൂരണനിർജിതാമരമഹീരുഡ്ഗർവസർവസ്വകം
വാചഃ സൂക്തിസുധാരസദ്രവമുചോ നിര്യാന്തി വക്ത്രോദരാത് ..
മാതസ്ത്വത്പദപങ്കജം മുനിമനഃകാസാരവാസാദരം
മായാമോഹമഹാന്ധകാരമിഹിരം മാനാതിഗപ്രാഭവം .
മാതംഗാഭിമതിം സ്വകീയഗമനൈർനിർമൂലയത്കൗതുകാ-
ദ്വന്ദേഽമന്ദതപഃഫലാപ്യനമനസ്തോത്രാർചനാപ്രക്രമം ..
മാതസ്ത്വത്പദപങ്കജം പ്രണമതാമാനന്ദവാരാന്നിധേ
രാകാശാരദപൂർണചന്ദ്രനികരം കാമാഹിപക്ഷീശ്വരം .
വൃന്ദം പ്രാണഭൃതാം സ്വനാമ വദതാമത്യാദരാത്സത്വരം
ഷദ്ഭാഷാസരിദീശ്വരം പ്രതിദധത്ഷാണ്മാതുരാർച്യം ഭജേ ..
കാമം ഫാലതലേ ദുരക്ഷരതതിർദൈവീ മമാസ്താം ന ഭീ-
ര്മാതസ്ത്വത്പദപങ്കജോത്ഥരജസാ ലുമ്പാമി താം നിശ്ചിതം .
മാർകണ്ഡേയമുനിര്യഥാ ഭവപദാംഭോജാർചനാപ്രാഭവാത്
കാലം തദ്വദഹം ചതുർമുഖമുഖാംഭോജാതസൂര്യപ്രഭേ ..
പാപാനി പ്രശമം നയാശു മമതാം ദേഹേന്ദ്രിയപ്രാണഗാം
കാമാദീനപി വൈരിണോ ദൃഢതരാന്മോക്ഷാധ്വവിഘ്നപ്രദാൻ .
സ്നിഗ്ധാൻപോഷയ സന്തതം ശമദമധ്യാനാദിമാന്മോദതോ
മാതസ്ത്വത്പദപങ്കജം ഹൃദി സദാ കുർവേ ഗിരാം ദേവതേ ..
മാതസ്ത്വത്പദപങ്കജസ്യ മനസാ വാചാ ക്രിയാതോഽപി വാ
യേ കുർവന്തി മുദാന്വഹം ബഹുവിധൈർദിവ്യൈഃ സുമൈരർചനാം .
ശീഘ്രം തേ പ്രഭവന്തി ഭൂമിപതയോ നിന്ദന്തി ച സ്വശ്രിയാ
ജംഭാരാതിമപി ധ്രുവം ശതമഖീകഷ്ടാപ്തനാകശ്രിയം ..
മാതസ്ത്വത്പദപകജം ശിരസി യേ പദ്മാടവീമധ്യത-
ശ്ചന്ദ്രാഭം പ്രവിചിന്തയന്തി പുരുഷാഃ പീയൂഷവർഷ്യന്യഹം .
തേ മൃത്യും പ്രവിജിത്യ രോഗരഹിതാഃ സമ്യഗ്ദൃഢാംഗാശ്ചിരം
ജീവന്ത്യേവ മൃണാലകോമലവപുഷ്മന്തഃ സുരൂപാ ഭുവി ..
മാതസ്ത്വത്പദപങ്കജം ഹൃദി മുദാ ധ്യായന്തി യേ മാനവാഃ
സച്ചിദ്രൂപമശേഷവേദശിരസാം താത്പര്യഗമ്യം മുഹുഃ .
അത്യാഗേഽപി തനോരഖണ്ഡപരമാനന്ദം വഹന്തഃ സദാ
സർവം വിശ്വമിദം വിനാശി തരസാ പശ്യന്തി തേ പൂരുഷാഃ ..
Other stotras
