ಉಮಾ ಮಹಿಮಾ ಸ್ತೋತ್ರ

ಮುನಯ ಊಚುಃ -

ಉಮಾಯಾ ಭುವನೇಶಾನ್ಯಾಸ್ಸೂತ ಸರ್ವಾರ್ಥವಿತ್ತಮ .
ಅವತಾರಂ ಸಮಾಚಕ್ಷ್ವ ಯತೋ ಜಾತಾ ಸರಸ್ವತೀ ..

ಯಾ ಗೀಯತೇ ಪರಬ್ರಹ್ಮಮೂಲಪ್ರಕೃತಿರೀಶ್ವರೀ .
ನಿರಾಕಾರಾಪಿ ಸಾಕಾರಾ ನಿತ್ಯಾನಂದಮಯೀ ಸತೀ ..

ಸೂತ ಉವಾಚ -

ತಾಪಸಾಃ ಶೃಣುತ ಪ್ರೇಮ್ಣಾ ಚರಿತ್ರಂ ಪರಮಂ ಮಹತ್ .
ಯಸ್ಯ ವಿಜ್ಞಾನಮಾತ್ರೇಣ ನರೋ ಯಾತಿ ಪರಾಂ ಗತಿಂ ..

ದೇವದಾನವಯೋರ್ಯುದ್ಧಮೇಕದಾಸೀತ್ಪರಸ್ಪರಂ .
ಮಹಾಮಾಯಾಪ್ರಭಾವೇಣಾಮರಾಣಾಂ ವಿಜಯೋಽಭವತ್ ..

ತತೋಽವಲಿಪ್ತಾ ಅಮರಾಸ್ಸ್ವಪ್ರಶಂಸಾಂ ವಿತೇನಿರೇ .
ವಯಂ ಧನ್ಯಾ ವಯಂ ಧನ್ಯಾಃ ಕಿಂ ಕರಿಷ್ಯಂತಿ ನೋಽಸುರಾಃ ..

ಯೇ ಪ್ರಭಾವಂ ಸಮಾಲೋಕ್ಯಾಸ್ಮಾಕಂ ಪರಮದುಃಸಹಂ .
ಭೀತಾ ನಾಗಾಲಯಂ ಯಾತಾ ಯಾತಯಾತೇತಿ ವಾದಿನಃ ..

ಅಹೋ ಬಲಮಹೋ ತೇಜೋ ದೈತ್ಯವಂಶಕ್ಷಯಂಕರಂ .
ಅಹೋ ಭಾಗ್ಯಂ ಸುಮನಸಾಮೇವಂ ಸರ್ವೇಽಭ್ಯವರ್ಣಯನ್ ..

ತತ ಆವಿರಭೂತ್ತೇಜಃ ಕೂಟರೂಪಂತದೈವ ಹಿ .
ಅದೃಷ್ಟಪೂರ್ವಂ ತದ್ದೃಷ್ಟ್ವಾ ವಿಸ್ಮಿತಾ ಅಭವನ್ಸುರಾಃ ..

ಕಿಮಿದಂ ಕಿಮಿದಂ ಚೇತಿ ರುದ್ಧಕಂಠಾಸ್ಸಮಬ್ರುವನ .
ಅಜಾನಂತಃ ಪರಂ ಶ್ಯಾಮಾನುಭಾವಂ ಮಾನಭಂಜನಂ ..

ತತ ಆಜ್ಞಾಪಯದ್ದೇವಾಂದೇವಾನಾಮಧಿನಾಯಕಃ .
ಯಾತ ಯೂಯಂ ಪರೀಕ್ಷಧ್ವಂ ಯಾಥಾತಥ್ಯೇನ ಕಿನ್ವಿತಿ ..

ಸುರೇಂದ್ರಪ್ರೇರಿತೋ ವಾಯುರ್ಮಹಸಃ ಸನ್ನಿಧಿಂ ಗತಃ .
ಕಸ್ತ್ವಂ ಭೋರಿತಿ ಸಂಬೋಧ್ಯಾವೋಚದೇನಂ ಚ ತನ್ಮಹಃ ..

ಇತಿ ಪೃಷ್ಟಸ್ತದಾ ವಾಯುರ್ಮಹಸಾತಿಗರೀಯಸಾ .
ವಾಯುರಸ್ಮಿ ಜಗತ್ಪ್ರಾಣಸ್ಸಾಭಿಮಾನೋಽಬ್ರವೀದಿದಂ ..

ಜಂಗಮಾಜಂಗಮಂ ಸರ್ವಮೋತಪ್ರೋತಮಿದಂ ಜಗತ್ .
ಮಯ್ಯೇವ ನಿಖಿಲಾಧಾರೇ ಚಾಲಯಾಮ್ಯಖಿಲಂ ಜಗತ್ ..

ತದೋವಾಚ ಮಹಾತೇಜಃ ಶಕ್ತೋಽಸಿ ಯದಿ ಚಾಲನೇ .
ಧೃತಮೇತತ್ತೃಣಂ ವಾಯೋ ಚಾಲಯಸ್ವ ನಿಜೇಚ್ಛಯಾ ..

ತತಃ ಸರ್ವಪ್ರಯತ್ನೇನಾಕರೋದ್ಯತ್ನಂ ಸದಾಗತಿಃ .
ನ ಚಚಾಲ ಯದಾ ಸ್ಥಾನಾತ್ತದಾಸೌ ಲಜ್ಜಿತೋಽಭವತ ..

ತೂಷ್ಣೀಂ ಭೂತ್ವಾ ತತೋ ವಾಯುರ್ಜಗಾಮೇಂದ್ರಸಭಾಂ ಪ್ರತಿ .
ಕಥಯಾಮಾಸ ತದ್ ವೃತ್ತಂ ಸ್ವಕೀಯಾಭಿಭವಾನ್ವಿತಂ ..

ಸರ್ವೇಶತ್ವಂ ವಯಂ ಸರ್ವೇ ಮೃಷೈವಾತ್ಮನಿ ಮನ್ಮಹೇ .
ನ ಪಾರಯಾಮಹೇ ಕಿಂಚಿದ್ವಿಧಾತುಂ ಕ್ಷುದ್ರವಸ್ತ್ವಪಿ ..

ತತಶ್ಚ ಪ್ರೇಷಯಾಮಾಸ ಮರುತ್ವಾನ್ಸಕಲಾನ್ಸುರಾನ್ .
ನ ಶೇಕುಸ್ತೇ ಯದಾ ಜ್ಞಾತುಂ ತದೇಂದ್ರಃ ಸ್ವಯಮಭ್ಯಗಾತ್ ..

ಮಘವಂತಮಥಾಯಾಂತಂ ದೃಷ್ಟ್ವಾ ತೇಜೋತಿದುಃಸಹಂ .
ಬಭೂವಾಂತರ್ಹಿತಂ ಸದ್ಯೋ ವಿಸ್ಮಿತೋಽಭೂಚ್ಚ ವಾಸವಃ ..

ಚರಿತ್ರಮೀದೃಶಂ ಯಸ್ಯ ತಮೇವ ಶರಣಂ ಶ್ರಯೇ .
ಇತಿ ಸಂಚಿಂತಯಾಮಾಸ ಸಹಸ್ರಾಕ್ಷಃ ಪುನಃಪುನಃ ..

ಏತಸ್ಮಿನ್ನಂತರೇ ತತ್ರ ನಿರ್ವ್ಯಾಜಕರುಣಾತನುಃ .
ತೇಷಾಮನುಗ್ರಹಂ ಕರ್ತುಂ ಹರ್ತುಂ ಗರ್ವಂ ಶಿವಾಂಗನಾ ..

ಚೈತ್ರಶುಕ್ಲನವಮ್ಯಾಂ ತು ಮಧ್ಯಾಹ್ನಸ್ಥೇ ದಿವಾಕರೇ .
ಪ್ರಾದುರಾಸೀದುಮಾ ದೇವೀ ಸಚ್ಚಿದಾನಂದರೂಪಿಣೀ ..

ಮಹೋಮಧ್ಯೇ ವಿರಾಜಂತೀ ಭಾಸಯಂತೀ ದಿಶೋ ರುಚಾ .
ಬೋಧಯಂತೀ ಸುರಾನ್ಸರ್ವಾನ್ಬ್ರಹ್ಮೈವಾಹಮಿತಿ ಸ್ಫುಟಂ ..

ಚತುರ್ಭಿರ್ದಧತೀ ಹಸ್ತೈರ್ವರಪಾಶಾಂಕುಶಾಭಯಾನ್ .
ಶ್ರುತಿಭಿಸ್ಸೇವಿತಾ ರಮ್ಯಾ ನವಯೌವನಗರ್ವಿತಾ ..

ರಕ್ತಾಂಬರಪರೀಧಾನಾ ರಕ್ತಮಾಲ್ಯಾನುಲೇಪನಾ .
ಕೋಟಿಕಂದರ್ಪ್ಪಸಂಕಾಶಾ ಚಂದ್ರಕೋಟಿಸಮಪ್ರಭಾ ..

ವ್ಯಾಜಹಾರ ಮಹಾಮಾಯಾ ಸರ್ವಾಂತರ್ಯ್ಯಾಮಿರೂಪಿಣೀ .
ಸಾಕ್ಷಿಣೀ ಸರ್ವಭೂತಾನಾಂ ಪರಬ್ರಹ್ಮಸ್ವರೂಪಿಣೀ ..

ಉಮೋವಾಚ -

ನ ಬ್ರಹ್ಮಾ ನ ಮುರಾರಾತಿರ್ನ ಪುರಾರಾತಿರೀಶ್ವರಃ .
ಮದಗ್ರೇ ಗರ್ವಿತುಂ ಕಿಂಚಿತ್ಕಾ ಕಥಾನ್ಯಸುಪರ್ವಣಾಂ ..

ಪರಂ ಬ್ರಹ್ಮ ಪರಂ ಜ್ಯೋತಿಃ ಪ್ರಣವದ್ವಂದ್ವರೂಪಿಣೀ .
ಅಹಮೇವಾಸ್ಮಿ ಸಕಲಂ ಮದನ್ಯೋ ನಾಸ್ತಿ ಕಶ್ಚನ ..

ನಿರಾಕಾರಾಪಿ ಸಾಕಾರಾ ಸರ್ವತತ್ತ್ವಸ್ವರೂಪಿಣೀ .
ಅಪ್ರತರ್ಕ್ಯಗುಣಾ ನಿತ್ಯಾ ಕಾರ್ಯಕಾರಣರೂಪಿಣೀ ..

ಕದಾಚಿದ್ದಯಿತಾಕಾರಾ ಕದಾಚಿತ್ಪುರುಷಾಕೃತಿಃ .
ಕದಾಚಿದುಭಯಾಕಾರಾ ಸರ್ವಾಕಾರಾಹಮೀಶ್ವರೀ ..

ವಿರಂಚಿಃ ಸೃಷ್ಟಿಕರ್ತಾಹಂ ಜಗತ್ಪಾತಾಹಮಚ್ಯುತಃ .
ರುದ್ರಃ ಸಂಹಾರಕರ್ತಾಹಂ ಸರ್ವವಿಶ್ವವಿಮೋಹಿನೀ ..

ಕಾಲಿಕಾ ಕಮಲಾವಾಣೀ ಮುಖಾಸ್ಸರ್ವಾ ಹಿ ಶಕ್ತಯಃ .
ಮದಂಶಾದೇವ ಸಂಜಾತಾಸ್ತಥೇಮಾಸ್ಸಕಲಾಃ ಕಲಾಃ ..

ಮತ್ಪ್ರಭಾವಾಜ್ಜಿತಾಸ್ಸರ್ವೇ ಯುಷ್ಮಾಭಿರ್ದ್ದಿತಿನಂದನಾಃ .
ತಾಮವಿಜ್ಞಾಯ ಮಾಂ ಯೂಯಂ ವೃಥಾ ಸರ್ವೇಶಮಾನಿನಃ ..

ಯಥಾ ದಾರುಮಯೀಂ ಯೋಷಾಂ ನರ್ತಯತ್ಯೈಂದ್ರಜಾಲಿಕಃ .
ತಥೈವ ಸರ್ವಭೂತಾನಿ ನರ್ತಯಾಮ್ಯಹಮೀಶ್ವರೀ ..

ಮದ್ಭಯಾದ್ವಾತಿ ಪವನಃ ಸರ್ವಂ ದಹತಿ ಹವ್ಯಭುಕ್ .
ಲೋಕಪಾಲಾಃ ಪ್ರಕುರ್ವಂತಿ ಸ್ವಸ್ವಕರ್ಮಾಣ್ಯನಾರತಂ ..

ಕದಾಚಿದ್ದೇವವರ್ಗಾಣಾಂ ಕದಾಚಿದ್ದಿತಿಜನ್ಮ ನಾಂ .
ಕರೋಮಿ ವಿಜಯಂ ಸಮ್ಯಕ್ಸ್ವತಂತ್ರಾ ನಿಜಲೀಲಯಾ ..

ಅವಿನಾಶಿ ಪರಂ ಧಾಮ ಮಾಯಾತೀತಂ ಪರಾತ್ಪರಂ .
ಶ್ರುತಯೋ ವರ್ಣಯಂತೇ ಯತ್ತದ್ರೂಪಂತು ಮಮೈವ ಹಿ ..

ಸಗುಣಂ ನಿರ್ಗುಣಂ ಚೇತಿ ಮದ್ರೂಪಂ ದ್ವಿವಿಧಂ ಮತಂ .
ಮಾಯಾಶಬಲಿತಂ ಚೈಕಂ ದ್ವಿತೀಯಂತದನಾಶ್ರಿತಂ ..

ಏವಂ ವಿಜ್ಞಾಯ ಮಾಂ ದೇವಾಸ್ಸ್ವಂ ಸ್ವಂ ಗರ್ವಂ ವಿಹಾಯ ಚ .
ಭಜತ ಪ್ರಣಯೋಪೇತಾಃ ಪ್ರಕೃತಿಂ ಮಾಂ ಸನಾತನೀಂ ..

ಇತಿ ದೇವ್ಯಾ ವಚಃ ಶ್ರುತ್ವಾ ಕರುಣಾಗರ್ಭಿತಂ ಸುರಾಃ .
ತುಷ್ಟುವುಃ ಪರಮೇಶಾನೀಂ ಭಕ್ತಿಸನ್ನತಕಂಧರಾಃ ..

ಕ್ಷಮಸ್ವ ಜಗದೀಶಾನಿ ಪ್ರಸೀದ ಪರಮೇಶ್ವರಿ .
ಮೈವಂ ಭೂಯಾತ್ಕದಾಚಿನ್ನೋ ಗರ್ವೋ ಮಾತರ್ದ್ದಯಾಂ ಕುರು ..

ತತಃಪ್ರಭೃತಿ ತೇ ದೈವಾ ಹಿತ್ವಾ ಗರ್ವಂ ಸಮಾಹಿತಾಃ .
ಉಮಾಮಾರಾಧಯಾಮಾಸುರ್ಯಥಾಪೂರ್ವಂ ಯಥಾವಿಧಿ ..

ಇತಿ ವಃ ಕಥಿತೋ ವಿಪ್ರಾ ಉಮಾಪ್ರಾದುರ್ಭವೋ ಮಯಾ .
ಯಸ್ಯ ಶ್ರವಣಮಾತ್ರೇಣ ಪರಮಂ ಪದಮಶ್ನುತೇ ..

Ramaswamy Sastry and Vighnesh Ghanapaathi

Other stotras