ಗೌರೀ ಶತಕ ಸ್ತೋತ್ರ
ಅನಂತಮಹಿಮವ್ಯಾಪ್ತವಿಶ್ವಾಂ ವೇಧಾ ನ ವೇದ ಯಾಂ .
ಯಾ ಚ ಮಾತೇವ ಭಜತೇ ಪ್ರಣತೇ ಮಾನವೇ ದಯಾಂ ..
ನತಾಪನೀತಕ್ಲೇಶಾಯಾಃ ಸುರಾರಿಜನತಾಪನೀ .
ನ ತಾಪನೀ ತನುರ್ಯಸ್ಯಾಸ್ತುಲ್ಯಾ ನಾದೀನತಾಪನೀ ..
ವಕ್ತ್ರಪದ್ಮಾ ವಿಧೇರ್ಭಾಂತಿ ಯಯಾ ಸರ್ಗಲಯೋ ದಯಾ .
ಯಾ ಸಾಕ್ಷಾದ್ಯಾ ಚ ಜನಿತಸ್ಥಿತಿಸರ್ಗಲಯೋದಯಾ ..
ಯಾಶ್ರಿತಾ ಪಾವನತಯಾ ಯಾತನಾಚ್ಛಿದನೀಚಯಾ .
ಯಾಚನೀಯಾ ಧಿಯಾ ಮಾಯಾಯಾಮಾಯಾಸಂ ಸ್ತುತಾ ಶ್ರಿಯಾ ..
ನಮಾಂಸಿ ಧ್ವಂಸಮಾಯಾಂತಿ ಅಸ್ಯಾಃ ಸ್ತುತ್ಯಾದರೇಣ ವಃ .
ತಸ್ಯಾಃ ಸಿದ್ಧ್ಯೈ ಧಿಯಾಂ ಮಾತುಃ ಕಲ್ಪಂತಾಂ ಪಾದರೇಣವಃ ..
ಋಷೀಣಾಂ ಸಾದಯಾಮಾಸ ಯಾ ತಮಾಂಸಿ ತ್ರಯೀಮಯೀ .
ಪಾಯಾದ್ವಃ ಸಾ ದಯಾಮಾಧಿಚ್ಛಿದಂ ಜಗತಿ ಬಿಭ್ರತೀ ..
ಸ್ಮರದ್ವಿಷಾ ಯಾ ಯಯಾಚೇ ಯಯಾ ಚೇಯಂ ವಿಧೇಃ ಕ್ರಿಯಾ .
ಯಾಂ ಚಾಚ್ಯುತೋಽಪಿ ತುಷ್ಟಾವ ತುಷ್ಟಾ ವಃ ಸಾಽಸ್ತು ಪಾರ್ವತೀ ..
ಯಾ ದಮಾವನಯಾಗೇನ ಸ್ವಾರಾಥಾ ನಯಸಾರಯಾ .
ಹರಿಕೈತವಹಾಸ್ಯಾಯ ಸಾಯಾಮಾ ವಿಜಿತಾ ಯಯಾ ..
ಯಾಯತಾಜಿವಿಮಯಾ ಸಾ ಯಸ್ಯಾ ಹಾ ಬತ ಕೈರಿಹ .
ಯಾ ರಸಾಯನಧಾರಾ ಸ್ವಾ ನ ಗೇಯಾನವಮಾ ದಯಾ ..
ಸಾ ಬುದ್ಧಿರುತ್ತಮಾಲೋಕಃ ಸತಾಮಾರ್ಯಾ ಪುನಾತು ವಃ .
ಯದ್ಭಕ್ತೇರುತ್ತಮಾ ಲೋಕಃ ಪ್ರಾಪ್ನೋತ್ಯೇಷ ವಿಶುದ್ಧತಾಂ ..
ಅಯುದ್ಧ ಸಾಧುತ್ರಾಣಾಯ ಸಾಮರಾ ಯಾ ಸಹಾರಿಣಾ .
ಖಡ್ಗೇನ ದೀಪ್ರಾ ದೇವಾನಾಂ ಸಾಮರಾಯಾಸಹಾರಿಣಾ ..
ಚರಣಾಘಾತನಿಹತಕಾಸರಾ ಚ ರಣಾಜಿರೇ .
ರರಾಜ ಯಾ ನಯಜಯೈರರಾಜಸಜನಾನತಾ ..
ಸಾವತಾದ್ವೋಽಮ್ಬಿಕಾಽಭ್ಯರ್ಚ್ಯನಾಮಾ ನ ನ ಯಶೋಭಿತಃ .
ತನೋತಿ ಪ್ರಣತೋ ಯಸ್ಯಾ ನಾ ಮಾನನಯಶೋಭಿತಃ ..
ಸಂಯತಂ ಯಾಚಮಾನೇನ ಯಸ್ಯಾಃ ಪ್ರಾಪಿ ದ್ವಿಷಾ ವಧಃ .
ಸಂಯತಂ ಯಾ ಚ ಮಾನೇನ ಯುನಕ್ತಿ ಪ್ರಣತಂ ಜನಂ ..
ಯಾ ದಮಾನವಮಾನಂದಪದಮಾನನಮಾನದಾ .
ದಾನಮಾನಕ್ಷಮಾನಿತ್ಯಧನಮಾನವಮಾನಿತಾ ..
ಸಾ ರಕ್ಷತಾದಪಾರಾ ತೇ ರಸಕೃದ್ಗೌರಬಾಧಿಕಾ .
ಸಾರಕ್ಷತಾದಪಾರಾತೇರಸಕೃದ್ಗೌರವಾಧಿಕಾ ..
ಅನುತ್ತಮೋಹರಾಶಯೋ ಭವಂತಿ ಯಾಮನಾಶ್ರಿತಾಃ .
ಅನುತ್ತಮೋ ಹರಾಶಯೋ ಯಯಾ ಚಿರಂ ಚ ರಂಜಿತಃ ..
ಅನಂತರಾಗತಾಪಾಯಾಸ್ತಾರಯಿತ್ರೀ ಭವಾಪದಃ .
ಅನಂತರಾಗತಾಪಾಯಾಃ ಸಾ ವೋ ಗೌರೀ ಹಿಯಾತ್ಕ್ರಿಯಾಃ ..
ಯಾಮಾಯಾಸಜಿದಾಸಕ್ತಶೋಕಜಾಲಸ್ಯ ಪಾತಿನೀ .
ಯಾ ಮಾತಾ ಸರ್ವದಾ ಭಕ್ತಲೋಕಜಾಲಸ್ಯ ಪಾಲನೀ ..
ಸಾಮರಾಗಮನಾಯಾಸಂ ತ್ಯಕ್ತ್ವಾ ಸಾರ್ಧಂ ಸುರಾರಿಭಿಃ .
ಸಾಮರಾ ಗಮನಾಯಾಸನ್ನುದ್ಯತಾ ಯುಧಿ ಯದ್ಗಣಾಃ ..
ಸಾಮೋದಯಾಜಯಾ ಶಾತೈಃ ಶಸ್ತ್ರೈಃ ಶತ್ರೌ ಹತೇ ಯಯಾ .
ಸಾಮೋದಯಾ ಜಯಾಶಾ ತೈರ್ಗೀರ್ವಾಣೈರ್ಗರ್ವತೋ ಜಹೇ ..
ಯಯಾಯಾಯಾಯ್ಯಯಾ ಯೂಯಂ ಯೋ ಯೋಽಯಂ ಯೇಯಯೈಯ ಯಾಂ .
ಯಯುಯಾಯಿಯಯೇಯಾಯ ಯಯೇಽಯಾಯಾಯ ಯಾಯಯುಕ್ ..
ಸಾಽವ್ಯಾದ್ಗೌರೀ ಸದಾ ಯುಷ್ಮಾನ್ಸದಾಯುಷ್ಮಾನ್ಸಮೃದ್ಧ್ಯತಿ .
ಶರಣಂ ಯಾಂ ನರೋ ಗಚ್ಛನ್ನ ರೋಗಚ್ಛಂದಮೇತಿ ಚ ..
ಕೃತಾಸ್ಪದಾ ಯಥಾ ಸಂಪದಘಾನಿ ಸುರವೈರಿಷು .
ಹಂತಿ ಯಾ ವಾಙ್ಮಯೀ ದೂರಾದಘಾನಿ ಸುರವೈರಿಷುಃ ..
ಜಿತಾನಯಾ ಯಾ ನತಾಜಿತಾರಸಾತತಸಾರತಾ .
ನ ಸಾವನಾ ನಾವಸಾನಯಾತನಾರಿರಿನಾ ತಯಾ ..
ಮನೋಭವಾರಾತಿಮನೋಭಿರಾಮಯಾ ಜರಾಮಯಾಪಾಕರಣೈಕದಕ್ಷಯಾ .
ಮದಕ್ಷಯಾನ್ನಿರ್ಮಲತಾಂ ದದಾನಯಾ ಸದಾ ನಯಾಸ್ಥಾ ಕ್ರಿಯತಾಂ ತವಾರ್ಯಯಾ ..
ಸಮಾಯಯಾವಿಂದ್ರಹಿತಾಯ ಯಾ ರಣೇ ಸಮಾಯಯಾ ಯಾ ನ ಜಿತಾರಿಸೇನಯಾ .
ಸ ಮಾ ಯಯಾಚೇ ಹರಮಾಶ್ರಿತಃ ಸ್ಫುಟಂ ಸಮಾ ಯಯಾ ಮುಗ್ಧತಯಾ ಮನೋಜ್ಞತಾಃ ..
ಸಾ ಭಾವಕ್ಷಾಲವರ್ಯಾ ನುತವಿಭವಿತನುರ್ಯಾ ವಲಕ್ಷಾವಭಾಸಾ
ಜಾನಾನಸ್ಯಾಶಯಪ್ರಾ ನವನಲಿನವನಪ್ರಾಯಶಸ್ಯಾನನಾಜಾ .
ಸಾತಂ ವರ್ಮಾನನಸ್ಥಾ ರಹಸಿ ರಸಿಹರಸ್ಥಾನನರ್ಮಾವತಂಸಾ
ಪಾಯಾದಕ್ತಾ ರಣತ್ರಾ ಮತನಮನತಮತ್ರಾಣರಕ್ತಾ ದಯಾಪಾ ..
ಉಪಾಸತೇ ಕೃಷ್ಟಿಕೃತೋದಯಾಂ ಯಾಂ ಜನಾ ಸದಾರಾಧನಮೀಹಮಾನಾಃ .
ಶಂಭೋಃ ಪ್ರಸಿದ್ಧಾ ತನುತಾಂ ವಹಂತೀ ಗೌರೀ ಹಿತಂ ಸಾ ಭವತಾಂ ವಿಧೇಯಾತ್ ..
ಯಾಂ ಸದ್ಯ ಏವ ತ್ರಿದಶೈಃ ಪುಮಾಂಸಃ ಸಮಾ ನಮಸ್ಯಂತಿ ಸದಾನಭೋಗಾಃ .
ಅಘಾನಿ ಯಸ್ಯ ಪ್ರಣತಾ ವಿಪಕ್ಷೈಃ ಸಮಾನಮಸ್ಯಂತಿ ಸದಾ ನಭೋಗಾಃ ..
ಯಸ್ಯಾಃ ಪ್ರಭಾವೋ ದ್ಯುಸದಾಂ ವಿಪಕ್ಷಸೇನಾ ವಧಾನಂದಯಿತಾಹರಸ್ಯ .
ಮನೋಂಬುಜಸ್ಯಾವಹತು ಶ್ರಿಯೈ ವಃ ಸೇನಾವಧಾನಂ ದಯಿತಾ ಹರಸ್ಯ ..
ಸುರಾ ಜಿತಾ ಭಾವಿತದೇವರಾಜದ್ವಿಪಕ್ಷಮಾ ಯಾತ ರಣಾದಭೀತಂ .
ಸ್ವಾಪಂ ನ ವೋ ಧಾಮ ಹಿತಂ ನ ನಾಮ ಸದೈವಸೇನಾ ಭವತೋಹಿತಾನಾಂ ..
ಸುರಾಜಿತಾ ಭಾವಿತದೇವರಾಜದ್ವಿಪಕ್ಷಮಾಯಾ ತರಣಾದಭೀತಂ .
ಸ್ವಾಪನ್ನಬೋಧಾಮಹಿತಂ ನನಾಮ ಸದೈವ ಸೇನಾ ಭವತೋ ಹಿತಾನಾಂ ..
ಸುರಾನಿತಿ ದ್ವೇಷಿಜನೈರಭಿದ್ರುತಾನುದಾಹರದ್ಯಾ ಸ್ವಯಮಾಹವೋದ್ಯತಾ .
ಶಿವೋಽದ್ಯ ತಾಪಪ್ರಶಮಸ್ತಯಾ ತವ ಪ್ರಶಸ್ತಯಾ ತತ್ತ್ವದೃಶಾ ವಿಧೀಯತಾಂ ..
ವಕ್ರಂ ಬಿಭ್ರತ್ಯುಪಹಿತಚಂದ್ರಾಯಾಸಂ ಯಾ ಸಂಮೋಹಪ್ರಶಮನಸೂರ್ಯಾಕಾರಾ .
ಕಾರಾನೀತಾಮರಮರಿಮಾಚಿಕ್ಷೇಪ ಕ್ಷೇಪತ್ಯಕ್ತಾ ರಣಭುವಿ ಸಾ ವಃ ಪಾಯಾತ್ ..
ಹಿತೇ ಹಿತೇಽಸ್ತು ತೇ ಸ್ತುತೇ ಜಿತಾಜಿತಾಮಿತಾಮಿತಾ .
ಜಯಾಜಯಾ ಜನೋಽಜನೋ ಯಯಾ ಯಯಾವಲಂ ಬಲಂ ..
ಯಾ ಮೂರ್ತಿಂ ಕಿಮಪಿ ಸ್ಮರಾರಿವಪುಷಾ ಧತ್ತೇ ಸಮಾಯೋಜಿತಾಂ
ಯಾಂ ದೃಷ್ಟ್ವೈವ ವಿನಾಶಮಾಪ ಸಹಸಾ ಶುಂಭಃ ಸಮಾಯೋಽಜಿತಾಂ .
ಯಾ ನಮ್ರೈಃ ಸುರಸಿದ್ಧಿಕಿಂನರನರೈಃ ಖೇದಂ ವಿನಾ ಶಸ್ಯತೇ
ಸಾ ಹೇತುರ್ಭವತಾಂ ತ್ರಿಲೋಚನವಧೂರಶ್ರೀವಿನಾಶಸ್ಯ ತೇ ..
ಸಾಯಾಸಾಯಾಸ್ತ್ರಿಲೋಕ್ಯಾಃ ಶರಣಮಕರುಣಕ್ಷುಣ್ಣದೈತ್ಯಪ್ರವೀರಾ
ಸ್ವೈರಂ ಸ್ವೈರಂಶಸರ್ಗೈರ್ಗಹನತಮಮಹಾಮೋಹಹಾರ್ದಂ ಹರಂತೀ .
ಶಸ್ಯಾಶಸ್ಯಾದಧಾನಾ ಸಕಲಮಭಿಹಿತಂ ಭಕ್ತಿಭಾಜಃ ಸ್ಮೃತೈವ
ಸ್ತಾದಸ್ತಾದಭ್ರದೋಷಾ ದ್ವಿಷದುಪಶಮನೀ ಸರ್ವತಃ ಪಾರ್ವತೀ ವಃ ..
ಸುರಸುರಚಿತಚಿತನವನವಭವಭವನಾನಾದರಾದರಾಯೇಥೇ .
ಲಯಲಯಚರಣೌ ಚರಣೌ ನ ನ ಮಾಮಿ ನತೇನ ನಮಾಮಿ ನ ತೇ ..
ಯಾ ವಿಸ್ಮಯಂ ಸ್ಮರಭಿದಾ ಚಕ್ರೇಽಙ್ಕಾರೋಪಿತಾ ನವಂ ನಾರೀಣಾಂ .
ವಿದಧೇ ಯಚ್ಚಾಪಸ್ಯ ನ ಚ ಕ್ರೇಂಕಾರೋಽಪಿ ತಾನವಂ ನಾರೀಣಾಂ ..
ಯಾ ಹಂತಾಂ ಚ ಪ್ರಯಾತಾ ವಿಹಾಥಸಾ ಕಂಸಮಾಹ ತಾರಾತಿಬಲೇನ .
ಕೃಷ್ಣಸ್ತವ ಪರಮಾಯಾ ವಿಹಾಯ ಸಾಕಂ ಸಮಾಹತಾರಾತಿಬಲೇನ ..
ತಾಂ ನಮತ ಯಾ ಚ ಸಮರೇಷ್ವನೇಕಶೋ ಭಾತಿ ಭದ್ರಕಾಲೀ ನತಯಾ .
ಖ್ಯಾತಿ ಯಯಾ ಜನತೋಜ್ಜ್ವಲವಿವೇಕಶೋಭಾತಿಭದ್ರಾಕಾಲೀನತಯಾ ..
ತಾಂ ಸ್ಮರತ ಥಾ ಸ್ಮೃತೈವ ಹಿ ಮಾನವತಾಮರಸಮಾನತಾ ರಾತಿ ಬಲಾತ್ .
ಯತ್ಪ್ರಣತಂ ಶ್ರೀಃ ಶ್ರಯತೇ ಮಾನವತಾಮರಸಮಾನ ತಾರಾತಿ ಬಲಾತ್ ..
ಅನವರಾಗಸಮುದ್ಭವದೇಹತಾಮುಪಗತಾ ದದೃಶೇ ಗಿರಿಶೇನ ಯಾ .
ಅನವರಾಗಸಮುದ್ಭವದೇಹ ತಾಮವನತೋಽಸ್ಮಿ ಜಗಾತ್ಪ್ರಿಯತಾಂ ಸತೀಂ ..
ಮೇನೇ ನೂನಮನೇನ ಮಾನನಮುಮಾನಾಮ್ನಾ ನು ಮೇನೋನ್ಮನಾ
ನುನ್ನೇನೋನಮನೇ ನಿಮಾನಮಮುನಾ ನೋ ನಾಮ ನಾನಾನುಮೇ .
ಮೌನೇನಾಮಮಮಾನನಿಮ್ನಮನನಾನ್ನಾನಾಮಿನಾನೂನಿಮೇ
ಸುನ್ಮಿನ್ನಾನನಮಾ ನಮೀ ಮುನಿಮನೋಮಾನಾನನೋನ್ನಾಮಿನಿ ..
ತಾಂ ವಂದೇಽಹಂ ನವಂ ದೇಹಂ ಜ್ಞಾನರೂಪಂ ವಿಧಾಯ ಯಾ .
ಸುಘೀರಸ್ಯತಿ ಧೀರಸ್ಯ ಮಹಾಮೋಹಮಯೀಂ ತ್ವಚಂ ..
ಯಾಂ ನುತ್ವಾ ಯಾಂತಿ ಹೃದ್ಯಾರ್ಥಸಜ್ಜಾಯಾಂ ಗಿರಿ ಶಸ್ಯತಾಂ .
ನೌಮ್ಯಹಂ ಭಕ್ತಿಮಾಸ್ಥಾಯ ಸಜ್ಜಾಯಾಂ ಗಿರಿಶಸ್ಯ ತಾಂ ..
ಯದಾನತೋಽಯದಾನತೋ ನ ಯಾತ್ಯಯಂ ನಯಾತ್ಯಯಂ .
ಶಿವೇ ಹಿತಾಂ ಶಿವೇಹಿತಾಂ ಸ್ಮರಾಮಿತಾಂ ಸ್ಮರಾಮಿ ತಾಂ ..
ಸರಸ್ವತಿಪ್ರಸಾದಂ ಮೇ ಸ್ಥಿತಿ ಚಿತ್ತಸರಸ್ವತಿ .
ಸರಸ್ವತಿ ಕುರು ಕ್ಷೇತ್ರಕುರುಕ್ಷೇತ್ರಸರಸ್ವತಿ ..
ತ್ವದ್ಭಕ್ತಿಭಾವಿತಧಿಯೋ ಜಗತಾಮತ್ರ ಯೇ ತ್ರಯೇ .
ಜನ್ಮವತ್ತಾಮಹಂ ಮನ್ಯೇ ತೇಷಾಮೇವಾನೃಣಾಂ ನೃಣಾಂ ..
ಜಗತಃ ಸಾತಿರೇಕಾ ತ್ವಂ ಗತಿರಸ್ಯ ಸ್ಥಿರಾಧಿಕಾ .
ತರಸ್ಯತ್ರಾಸತಾರಾರೇಃ ಸಾಸ್ಯತ್ರಾಸರಸಸ್ಥಿತಿ ..
ತ್ವನ್ನಾಮಸ್ಮರಣಾದೇವ ನ ಲಕ್ಷ್ಮೀಶ್ಚಪಲಾಯತೇ .
ಸರ್ವತಃ ಪಾರ್ವತಿ ಕ್ಷಿಪ್ರಮಲಕ್ಷ್ಮೀಶ್ಚ ಪಲಾಯತೇ ..
ಜಯಂತಿ ಭಕ್ತಾ ವಿತ್ತೇಶಸಮರಾಯಸ್ತಬಾಹವೇ .
ತುಭ್ಯನ್ನಮಸ್ತ್ರಿಲೋಕ್ಯರ್ಥಸಮರಾಯಸ್ತಬಾಹವೇ ..
ಸತ್ತ್ವಂ ಸಮ್ಯಕ್ತ್ವಮುನ್ಮೀಲ್ಯ ಹೃದಿ ಭಾಸಿ ವಿರಾಜಸೇ .
ದ್ವಿಷಾಮರೀಣಾ ತ್ವಂ ಸೇನಾಂ ವಾಹಿನೀಮುದಕಂಪಯಃ ..
ದೂರಾಗತರಸಾ ಧನ್ಯಃ ಸೇವತೇಯಸ್ತವ ಸ್ತುತೀಃ .
ದೂರಾಗತ ರಸಾಧನ್ಯಃ ಕಲ್ಪಂತೇ ತಸ್ಯ ಸಿದ್ಧಯಃ ..
ಮೋಹಂ ಹತ್ವಾಸ್ಪದಂ ಯಾಸಿ ಸಾತ್ತ್ವಮಂಬರವಾಸಿನಾ .
ಯಾ ನ ಸಂಸ್ತೂಯಸೇ ಕೇನ ಸಾ ತ್ವಂಬರವಸಿನಾ ..
ಪ್ರಕಾಶ್ಯ ಗೃಹ್ಯಪುಂಸಸ್ಯಖೇದಚ್ಛೇದಾಂಬುದಾವಲೀ .
ಪ್ರಜ್ಞಾತ್ಮನೇನವಿಮಲಾ ಸ್ಮಿತಾ ದೃಶ್ಯಸಿ ವಿದ್ವತಾಂ ..
ಭವಾನಿ ಯೇ ನಿರಂತರಂ ತವ ಪ್ರಣಾಮಲಾಲಸಾಃ .
ಮನಸ್ತಮೋಮಲಾಲಸಾ ಭವಂತಿ ನೈಯ ತು ಕ್ವಚಿತ್ ..
ವಿಭಾವನಾಕುಲಾ ತ್ವಯಿ ಕ್ರಮೇಣ ದೇವಿ ಭಾವನಾ .
ವಪುಷ್ಪತಿಸ್ಥಿರೇತರೇ ನಿತಾಂತಮೇವ ಪುಷ್ಯತಿ ..
ಮಹೋಽದಯಾನಾಮವಧೀ ರಣೇನ ಮಹೋದಯಾನಾಮವಧೀರಣೇನ .
ಮಹೋದಯಾನಾಮವ ಧೀರಣೇಜಮಹೋದಯಾನಾಮವಧೀರಣೇನ ..
ನ ಮಜ್ಜನೇನ ತೀರ್ಥಾನಾಂ ತದಿಹ ಪ್ರಾಪ್ಯತೇ ಶುಭಂ .
ನಮಜ್ಜನೇನ ತೀರ್ಥಾನಾಂ ಸೇವಯಾ ಯತ್ತವಾಂಬಿಕೇ ..
ಪ್ರಯಾತಿ ಮೋಹೇ ನಿಃಸಾರಭಾರತೀವ್ರತಮೇತ್ಯಯಂ .
ತ್ವಾತ್ಪ್ರಾಸಾದಾಜ್ಜನಃ ಸಾರಭಾರತೀವ್ರತಮೇತ್ಯಯಂ ..
ಶಾಸ್ತ್ರಪ್ರಭಾವಹಸಿತಾಃ ಸತಾಂ ಯಾ ನಿರ್ಮಲಾ ಗಿರಃ .
ಶಾಸ್ತ್ರಪ್ರಭಾವಹಸಿತಾಸ್ತ್ವಮಂಬತಿಮಿರಚ್ಛಿದಃ ..
ಶಮೀಹ ತೇ ಸಮಾನತೋ ವಿಭಾವಿತೋಽತ್ರಸನ್ನ ಯಃ .
ವಿಭಾವಿತೋಽತ್ರ ಸನ್ನಯಃ ಶಮೀಹತೇ ಸ ಮಾನತಃ ..
ಮಾತರಂ ತ್ವಾ ಪದಂ ಸದ್ಯ ಆಶ್ರಿತಾಸ್ತೇ ಕಥಂ ಜನಾಃ .
ಮಾ ತರಂತ್ವಾಪದಂ ಸದ್ಯ ಆದ್ಯಂ ಶ್ರೇಯಃ ಸಮಾಶ್ರಿತಾಃ ..
ಭಾತಿ ತ್ವತ್ತನುಸಂಶ್ಲೇಷೇ ಸತ್ಯಂಬ ವಪುರನುತ್ತರಂ .
ಸಂಸಾರಾಬ್ಧೌ ಸದಾಹುಸ್ತೇ ಸತ್ಯಂ ವಪುರನುತ್ತರಂ ..
ಯಚ್ಛ ಮೇ ನಿತ್ಯಸಂಸಂಗಿ ಯಚ್ಛಮೇ ತದಿದಂ ಮನಃ .
ಸ್ವಚ್ಛಲೋ ಭಕ್ತಿಯೋಗಸ್ತೇ ಸ್ವಚ್ಛಲೋಕವಿವೇಕಸೂಃ ..
ಕೇ ವಲಂತೇ ವಿತನ್ವಂತಕೃತಸ್ತ್ವತ್ಪ್ರಣತಾ ಭವೇ .
ಕೇವಲಂ ತೇ ವಿತನ್ವಂತ ಆಸತೇ ವಿಮಲಾಂ ಧಿಯಂ ..
ದೇವಿ ನಿರ್ದಗ್ಧಕಾಮಸ್ಯ ತ್ವಂ ನಿರಾವರಣಾತ್ಮನಃ .
ಹರಸ್ಯ ಶುಭಸಂತಾನಂ ತೇನಾಸೌ ಭ್ರಾಜತೇ ತಥಾ ..
ದ್ವಿಷದ್ಭಿಯಾ ಸಪದಿ ವಿಮುಚ್ಯತೇ ಯತಸ್ತವಾನತೋ ಜನನಿ ಜಯಾಶಯಾ ನ ಕಃ .
ಸ್ತವಾನತೋ ಜನನಿಜಯಾ ಶಯಾನಕಃ ಕರೋತಿ ತೇ ಯುಧಿ ಮಧುಸೂದನಸ್ವಸಃ ..
ಜ್ಯಾಯೋನಿಷ್ಠಾರಿವರ್ಯಾಧಿನಿಯಮನವರಸ್ವೈರದತ್ತಾಯತಾಜ್ಞಾ
ಸ್ವಾರಾಧತ್ವಾಸಮಧ್ಯಾನಿಯಜನಜನನಿ ಜ್ಞೇಯಸುಸ್ಥಾವಭಾಸಾ .
ನಾನಾಪುಣ್ಯಾಗಮಸ್ಥಾ ಜನನಮನಮಯಜ್ಞಾನನಂದ್ಯಾ ವರಾ ಧೀ-
ರ್ಯಾತಾ ನವ್ಯಾ ವಿಭುತ್ವಂ ನುತಸರಲಮನಸ್ತಾಮಸಸ್ಯಾವಹಾಸ್ಯೇ ..
ಸ್ಯೇಹಾವ ಸ್ಯಾ ಸಮಸ್ತಾನಮಲರಸತನು ತ್ವಂ ಭುವಿ ವ್ಯಾನತಾರ್ಯಾ
ಧೀರಾ ವಂದ್ಯಾ ನ ನ ಜ್ಞಾ ಯಮನಮನನಜಸ್ಥಾಮಗಣ್ಯಾ ಪುನಾನಾ .
ಸಾ ಭಾವಸ್ಥಾ ಸುಯಜ್ಞೇಽನಿನಜನಜಯನಿ ಧ್ಯಾಮಸತ್ತ್ವಾಧರಾಸ್ವಾ
ಜ್ಞಾತಾಯತ್ತಾದರಸ್ವೈರವನಮನಿಧಿರ್ಯಾ ವರಿಷ್ಠಾನಿಯೋಜ್ಯಾ ..
ಅಲೋಲಕಮಲೇ ಚಿತ್ತಲಲಾಮಕಮಲಾಲಯೇ .
ಪಾಹಿ ಚಂಡಿ ಮಹಾಮೋಹಭಂಗಭೀಮಬಲಾಮಲೇ ..
ದುರ್ಗಾಪಿ ಮಾತಃ ಸುಲಭಾಸಿ ಭಕ್ತ್ಯಾ ಭವಾನುಕೂಲಾಪಿ ಭವಂ ಕ್ಷಿಣೋಷಿ .
ಅಧ್ಯೇಯತಾಂ ಯಾಸಿ ಸದೈವ ದೇವಿ ಧ್ಯೇಯಾಸಿ ಚಿತ್ರಂ ಚರಿತಂ ತವೈತತ್ ..
ಮಹದೇಸುರಸಂಧಮ್ಮೇ ತಮವಸಮಾಸಂಗಮಾಗಮಾಹರಣೇ .
ಹರಬಹುಸರಣಂ ತಂ ಚಿತ್ತಮೋಹಮವಸರ ಉಮೇ ಸಹಸಾ ..
ವಂದ್ಯಾ ಪ್ರಭಾತಸಂಧ್ಯೇವ ಸೂರ್ಯಾಲೋಕಪ್ರವರ್ತಿನೀ .
ನಿವರ್ತಯಸಿ ದೇವಿ ತ್ವಂ ಮಹಾಮೋಹಮಯೀಂ ನಿಶಾಂ ..
ಸಂವಾದಿಸಾರಸಂಪತ್ತೀಸದಾಗೋರಿಜಯೇಸುದೇ .
ತವಸತ್ತೀರದೇ ಸಂತು ಸಂಸಾರೇ ಸುಸಮಾನದೇ ..
ಆಗಮಮಣಿಸುದಮಹಿಮಸಮಸಂಮದಕೃದಪರಜಸ್ಸು .
ಕಿರ ಸವಿಭಯವದಿತೋ ಸಮಯ ಉಜ್ಜಲಭಾವಸಹಸ್ಸು ..
ತ್ವಂ ವಾದೇ ಶಾಸ್ತ್ರಸಂಗಿನ್ಯಾಂ ಭಾಸಿ ವಾಚಿ ದಿವೌಕಸಃ .
ತವಾದೇಶಾಸ್ತ್ರಸಂಸ್ಕಾರಾಜ್ಜಯಂತಿ ವರದೇ ದ್ವಿಷಃ ..
ಸದಾವ್ಯಾಜವಶಿಧ್ಯಾತಾಃ ಸದಾತ್ತಜಪಶಿಕ್ಷಿತಾಃ .
ದದಾಸ್ಯಜಸ್ರಂ ಶಿವತಾಃ ಸೂದಾತ್ತಾಜದಿಶಿ ಸ್ಥಿತಾಃ ..
ಹರೇಃ ಸ್ವಸಾರಂ ದೇವಿ ತ್ವಾ ಜನತಾಶ್ರಿತ್ಯ ತತ್ತ್ವತಃ .
ವೇತ್ತಿ ಸ್ವಸಾರಂ ದೇವಿತ್ವಾ ಯೋಗೇನ ಕ್ಷಪಿತಾಶುಭಾ ..
ಸದಾಪ್ನೋತಿ ಯತಿರ್ಜ್ಯೋತಿಸ್ತಾದೃಶಂ ಸ್ವತ್ಪ್ರಭಾವತಃ .
ಪ್ರಭಾವತಃ ಸಮೋ ಯೇನ ಕಲ್ಪತೇ ಮೋಹನುತ್ತಿತಃ ..
ತ್ವಂ ಸದ್ಗತಿಃ ಸಿತಾಪಾರಾ ಪರಾ ವಿದ್ಯೋತ್ತಿತೀರ್ಷತಃ .
ಸಂಸಾರಾದತ್ರ ಚಾಂಬ ತ್ವಂ ಸತ್ತ್ವಂ ಪಾಸಿ ವಿಪತ್ತಿತಃ ..
ಪರಮಾ ಯಾ ತಪೋವೃತ್ತಿರಾರ್ಯಾಯಾಸ್ತಂ ಸ್ಮೃತಿಂ ಜನಾಃ .
ಪರಮಾಯಾತ ಪೋಷಾಯ ಧಿಯಾಂ ಶರಣಮಾದೃತಾಃ ..
ಪ್ರವಾದಿಮತಭೇದೇಷು ದೃಶ್ಯಸ್ತೇ ಮಹಿಮಾಶ್ರಯಃ .
ಭಾಂತಿ ತ್ವತ್ತ್ರಿಶಿಖಸ್ಯೇವ ಶಿಖಾನಾಮಸಮಾಶ್ರಯಃ ..
ಯಚ್ಚೇಷ್ಟಯಾ ತವ ಸ್ಫೀತಮುದಾರವಸು ಧಾಮತಃ .
ಯಚ್ಚೇತೋ ಯಾತ್ಯವಹಿತಮುದಾ ರವಸುಧಾಮತಃ ..
ಸುರದೇಶಸ್ಯ ತೇ ಕೀರ್ತಿಂ ಮಂಡನತ್ವಂ ನಯಂತಿ ಯೈಃ .
ವರದೇ ಶಸ್ಯತೇ ಧೀರೈರ್ಭವತೀ ಭುವಿ ದೇವತಾ ..
ತತ್ತ್ವಂ ವೀತಾವತತತುತ್ತತ್ವಂ ತತವತೀ ತತಃ .
ವಿತ್ತಂ ವಿತ್ತವ ವಿತ್ತತ್ವಂ ವೀತಾವೀತವತಾಂ ಬತ ..
ತಾರೇ ಶರಣಮುದ್ಯಂತೀ ಸುರೇಶರಣಮುದ್ಯಮೈಃ .
ತ್ವಂ ದೋಷಾಪಾಸಿನೋದಗ್ರಸ್ವದೋಷಾ ಪಾಸಿ ನೋದನೇ ..
ಸುಮಾತರಕ್ಷಯಾಲೋಕ ರಕ್ಷಯಾತ್ತಮಹಾಮನಾಃ .
ತ್ವಂ ಧೈರ್ಯಜನನೀ ಪಾಸಿ ಜನನೀತಿಗುಣಸ್ಥಿತೀಃ ..
ಖ್ಯಾತಿಕಲ್ಪನದಕ್ಷೈಕಾ ತ್ವಂ ಸಾಮರ್ಗ್ಯಜುಷಾಮಿತಃ .
ಸದಾ ಸರಕ್ಷಸಾಂಮುಖ್ಯದಾನವಾನಾಮಸುಸ್ಥಿತಿಃ ..
ಸಿತಾ ಸಂಸತ್ಸು ಸತ್ತಾಸ್ತೇ ಸ್ತುತೇಸ್ತೇ ಸತತಂ ಸತಃ .
ತತಾಸ್ತಿತೈತ್ತಿ ತಸ್ತೇತಿ ಸೂತಿಃ ಸೂತಿಸ್ತತೋಽಸಿ ಸಾ ..
ತ್ವದಾಜ್ಞಯಾ ಜಗತ್ಸರ್ವಂ ಭಾಸಿತಂ ಮಲನುದ್ಯತಃ .
ಸದಾ ತ್ವಯಾ ಸಗಂಧರ್ವಂ ಸಮಿದ್ಧಮರಿನುತ್ತಿತಃ ..
ಯತೋ ಯಾತಿ ತತೋಽತ್ಯೇತಿ ಯಯಾ ತಾಂ ತಾಯತಾಂ ಯತೈಃ .
ಮಾತಾಮಿತೋತ್ತಮತಮಾ ತಮೋತೀತಾಂ ಮತಿಂ ಮಮ ..
ಮಹತ್ತಾಂ ತ್ವಂ ಶ್ರಿತಾ ದಾಸಜನಂ ಮೋಹಚ್ಛಿದಾ ವಸ .
ಯಚ್ಛದ್ಧತ್ವಂ ಗತಃ ಪಾಪಮನ್ಯಸ್ಯ ಪ್ರಸಭಂ ಜಯ ..
ತ್ವಾಂ ಸಾಜ್ಞಾಸು ಜಗನ್ಮಾತಃ ಸ್ಪಷ್ಟಂ ಜ್ಞಾತಾ ಸುವರ್ತ್ಮಸು .
ಪ್ರಜ್ಞಾ ಮುಖ್ಯಾ ಸಮುದ್ಭಾಸಿ ತತ್ಪೃಥುತ್ವಂ ಪ್ರದರ್ಶಯ ..
ಆಜ್ಞಾಸು ಜಗನ್ಮಾತಃ ಸ್ಪಷ್ಟಂ ಜ್ಞಾತಾ ಸುವರ್ತ್ಮಸು ಪ್ರಜ್ಞಾ .
ಭಾಸಿ ತ್ವಂ ಸಾ ಮುಖ್ಯಾ ಸಮುತ್ಪೃಥುತ್ವಂ ಪ್ರದರ್ಶಯ ತತ್ ..
ಹಂತ್ರ್ಯೋ ರುಷಃ ಕ್ಷಮಾ ಏತಾ ಸಂದಕ್ಷೋಭಾಸ್ತಮುನ್ನತಃ .
ಸತೇಹಿತಃ ಸೇವತೇ ತಾಃ ಸತತಂ ಯಃ ಸ ತೇ ಹಿತಃ ..
ಕರೋಷಿ ತಾತ್ಸ್ತ್ವಮುತ್ಖಾತಮೋಹಸ್ಥಾನೇ ಸ್ಥಿರಾ ಮತೀಃ .
ಪದಂ ಯತಿಃ ಸುತಪಸಾ ಲಭತೇಽತಃ ಸಶುಕ್ಲಿಮ ..
ದೇವ್ಯಾ ಸ್ವಪ್ನೋದ್ಗಮಾದಿಷ್ಟದೇವೀಶತಕಸಂಜ್ಞಯಾ .
ದೇಶಿತಾನುಪಮಾಮಾಧಾದತೋ ನೋಣಸುತೋ ನುತಿಂ ..
ಹಾರ್ದಧ್ವಾಂತನಿಯಂತೃಭಾಸ್ವರವಪುಃ ಸ್ವರ್ವಾಸಿನಾಂ ಸರ್ವತೋ
ದುರ್ವಾರಾರಿಪರಿಕ್ಷಯಂ ವಿದಧತೀ ಧ್ಯಾತೈವ ಲರ್ವಾಣಸೂಃ .
ದೇಹಾರ್ಧೇ ನಿಹಿತಾ ಭವೇನ ಭುವನತ್ರಾಣೈಕತಾನಾತ್ಮನಾ
ದೇವಿ ತ್ವಂ ತ್ವಮಿವಾಪರಾ ಜಗತಿ ಕಾ ಸತ್ಕೇಸರೀಂದ್ರಸ್ಥಿತಿಃ ..
ಕ್ಲೇಶೋನ್ಮಾಥಕರೀ ಸತಾಂ ಭವಹರಾನಂದೈಕಹೇತೋ ಗುರು-
ರ್ಮಾತಾ ತ್ವಂ ಜಗತಾಂ ಭವಂತಿ ವಿಧವಾಃ ಸರ್ವೇ ತವಾನುಗ್ರಹಾತ್ .
ದುರ್ಗೇ ನ ಕ್ವಚಿದೇವ ಸೀದತಿ ಜನಸ್ತ್ವದ್ಭಕ್ತಿಪೂತಾಶಯಃ
ಸ್ತುತ್ಯಾ ಭರ್ತುರಭಿನ್ನಯೇತಿ ವಿಬುಧೈಸ್ತ್ವಂ ಸ್ತೂಯಸೇ ಶ್ರೀರಿವ ..
ಯೇನಾನಂದಕಥಾಯಾಂ ತ್ರಿದಶಾನಂದೇ ಚ ಲಾಲಿತಾ ವಾಣೀ .
ತೇನ ಸುದುಷ್ಕರಮೇತತ್ಸ್ತೋತ್ರಂ ದೇವ್ಯಾಃ ಕೃತಂ ಭಕ್ತ್ಯಾ ..
Other stotras
