ಮೀನಾಕ್ಷೀ ಮಣಿಮಾಲಾ ಅಷ್ಟಕ ಸ್ತೋತ್ರ
ಮಧುರಾಪುರನಾಯಿಕೇ ನಮಸ್ತೇ
ಮಧುರಾಲಾಪಿಶುಕಾಭಿರಾಮಹಸ್ತೇ .
ಮಲಯಧ್ವಜಪಾಂಡ್ಯರಾಜಕನ್ಯೇ
ಮಯಿ ಮೀನಾಕ್ಷಿ ಕೃಪಾಂ ವಿಧೇಹಿ ಧನ್ಯೇ ..
ಕಚನಿರ್ಜಿತಕಾಲಮೇಘಕಾಂತೇ
ಕಮಲಾಸೇವಿತಪಾದಪಂಕಜಾಂತೇ .
ಮಧುರಾಪುರವಲ್ಲಭೇಷ್ಟಕಾಂತೇ
ಮಯಿ ಮೀನಾಕ್ಷಿ ದಯಾಂ ವಿಧೇಹಿ ಶಾಂತೇ ..
ಕುಚಯುಗ್ಮವಿಧೂತಚಕ್ರವಾಕೇ
ಕೃಪಯಾ ಪಾಲಿತಸರ್ವಜೀವಲೋಕೇ .
ಮಲಯಧ್ವಜಸಂತತೇಃ ಪತಾಕೇ
ಮಯಿ ಮೀನಾಕ್ಷಿ ಕೃಪಾಂ ನಿಧೇಹಿ ಪಾಕೇ ..
ವಿಧಿವಾಹನಜೇತೃಕೇಲಿಯಾನೇ
ವಿಮತಾಮೋಟನಪೂಜಿತಾಪದಾನೇ .
ಮಧುರೇಕ್ಷಣಭಾವಪೂತಮೀನೇ
ಮಯಿ ಮೀನಾಕ್ಷಿ ಕೃಪಾಂ ವಿಧೇಹಿ ದೀನೇ ..
ತಪನೀಯಪಯೋಜಿನೀತಟಸ್ಥೇ
ತುಹಿನಪ್ರಾಯಮಹೀಧರೋದರಸ್ಥೇ .
ಮದನಾರಿಪರಿಗ್ರಹೇ ಕೃತಾರ್ಥೇ
ಮಯಿ ಮೀನಾಕ್ಷಿ ಕೃಪಾಂ ನಿಧೇಹಿ ಸಾರ್ಥೇ ..
ಕಲಕೀರಕಲೋಕ್ತಿನಾದದಕ್ಷೇ
ಕಲಿತಾನೇಕಜಗನ್ನಿವಾಸಿರಕ್ಷೇ .
ಮದನಾಶುಗಹಲ್ಲಕಾಂತಪಾಣೇ
ಮಯಿ ಮೀನಾಕ್ಷಿ ಕೃಪಾಂ ಕುರು ಪ್ರವೀಣೇ ..
ಮಧುವೈರಿವಿರಿಂಚಿಮುಖ್ಯಸೇವ್ಯೇ
ಮನಸಾ ಭಾವಿತಚಂದ್ರಮೌಲಿಸವ್ಯೇ .
ತರಸಾ ಪರಿಪೂತಯಜ್ಞಹವ್ಯೇ
ಮಯಿ ಮೀನಾಕ್ಷಿ ಕೃಪಾಂ ವಿಧೇಹಿ ಭವ್ಯೇ ..
ಜಗದಂಬ ಕದಂಬಮೂಲವಾಸೇ
ಕಮಲಾಮೋದಮುಖೇಂದುಮಂದಹಾಸೇ .
ಮದಮಂದಿರಚಾರುದೃಗ್ವಿಲಾಸೇ
ಮಯಿ ಮೀನಾಕ್ಷಿ ಕೃಪಾಂ ನಿಧೇಹಿ ದಾಸೇ .
ಪಠತಾಮನಿಶಂ ಪ್ರಭಾತಕಾಲೇ
ಮಣಿಮಾಲಾಷ್ಟಕಮಷ್ಟಭೂತಿದಾಯಿ .
ಘಟಿಕಾಶತಚಾತುರೀಂ ಪ್ರದದ್ಯಾತ್
ಕರುಣಾಪೂರ್ಣಕಟಾಕ್ಷಸನ್ನಿವೇಶಂ ..
Other stotras
