ಆನಂದಂ ದಿಶತು ಶ್ರೀಹಸ್ತಿಗಿರೌ ಸ್ವಸ್ತಿದಾ ಸದಾ ಮಹ್ಯಂ .
ಯಾ ಕೌತುಕಂ ವಿಧತ್ತೇ ಸಾಕೃತೇನಾವಲೋಕನೇನ ಹರೇಃ ..

ಯನ್ನಾಮ ಕೀರ್ತನೀಯಂ ಶ್ರೀರಿತ್ಯಾದೌ ಪ್ರಿಯಂ ಹರೇರ್ನಾಮ್ನಾಂ .
ಸಾ ಮೇ ಸಮಸ್ತಜನನೀ ಸಂತತಮುದಯಾಯ ಭೂಯಸೇ ಭೂಯಾತ್ ..

ಶ್ರೀವರದೇಶ್ವರದಯಿತೇ ವಾಂಛಾಮಿ ತ್ವಾಂ ಯಥಾಮತಿ ಸ್ತೋತುಂ .
ಸ್ವಲ್ಪೋಽಪಿ ಡಿಂಭಜಲ್ಪೋ ಮಾತುಃ ಪ್ರೀತಿಂ ಕಥಂ ನ ಸಂಜನಯೇತ್ ..

ಮುರರಿಪುಮೋಹನಧಾಮ್ನೇ ಮೂರ್ತಿವಿನಿರ್ಧೂತವಿಷ್ಫುರದ್ಧೇಮ್ನೇ .
ದಿವಿಷದಮೇಯವಿಭೂಮ್ನೇ ಲಕ್ಷ್ಮೀನಾಮ್ನೇ ಪರಂ ನಮೋ ಭುಮ್ನೇ ..

ಕರಿಗಿರಿನಾಯಕಕಾಂತೇ ದಾಂತಜನಸ್ವಾಂತಪಂಕಜನಿಶಾಂತೇ .
ಮಯಿ ಭವಮರಣಾಶ್ರಾಂತೇ ಕರುಣಾಂ ಶರಣಾಗತೇ ಕುರು ಪ್ರಗುಣಾಂ ..

ವಾಚಾಮಕೃತ್ರಿಮಾಣಾಮಪಿ ಮುನಿಮನಸಾಮಗೋಚರೇ ದೇವಿ .
ತ್ವದ್ವರ್ಣನೇ ಮದೀಯಾಂ ಕಾಂಕ್ಷಾಂ ಸಫಲಾಂ ಕರೋತು ತೇ ಕರುಣಾ ..

ಮಾಖದ್ವಿಧು ವಿಂಬಾಸ್ಯೇ ಮಂಗಲಸೌಮ್ಯಾಕೃತೇ ಗುರುಶ್ರೋಣಿ .
ಭೃಗುನಂದಿನಿ ಮಂದಗತೇ ರೋಮಲತಾಹೇ ಜಯಾಬ್ಧಿಕುಲಕೇತೋ ..

ಧನ್ಯಂ ಪ್ರಸೂನಗರ್ಭಂ ಧಮ್ಮಿಲ್ಲಂ ದೇವಿ ತಾವಕಂ ಮನ್ಯೇ .
ಪ್ರಸವಶರೇಣ ನ್ಯಸ್ತಂ ತೂಣಂ ಬಾಣೌಘಪೂರ್ಣಮರ್ಣವಜೇ ..

ತ್ವತ್ಕೇಶಪಾಶಶೋಭಾಪರಿಮೋಷಾಣಾಂ ಫಲಂ ಪಯೋದಾನಾಂ .
ದೇವಿ ತಟಿದ್ಗುಣವಂಧೋ ನೋದನಮನಿಲೈಃ ಪಲಾಯನಂ ದಿಕ್ಷು ..

ನಿಂದತಿ ನೀರಧಿಕನ್ಯೇ ಕಚನಿಚಯಸ್ತೇ ಕಲಾಪಿನಂ ಕಾಂತ್ಯಾ .
ಅಸ್ಯತಿ ಬರ್ಹಂ ನ ಕಥಂ ಭುಜಂಗವೃತ್ತಿಶ್ಚ ಪಕ್ಷಪಾತೀ ಚ ..

ಜಯತು ವಿಪಕ್ಷಂ ಪದ್ಮೇ ಬರ್ಹಿಣವರ್ಹಂ ತ್ವದೀಯಕೇಶಭರಂ .
ತ್ವತ್ಕಾಂತಸ್ಯ ಸಪಕ್ಷಂ ಘನಮಪಿ ಕಾಂತ್ಯಾ ಕಥಂ ಪರಾಕುರುತೇ ..

ವರ್ಹಂ ವಿಗರ್ಹಿತಾಭಂ ಶಸ್ತೇನಾನೇನ ಕೇಶಹಸ್ತೇನ .
ಮತ್ವಾಭವನ್ಮಯೂರಾ ಮಂದಾಶಾ ಜೀವಿತೇ ವೃತವಿಷಾಶಾಃ ..

ದಿವ್ಯಾಮಂಬುಧಿಕನ್ಯೇ ದೃಷ್ಟ್ವಾ ಕೇಶಶ್ರಿಯಂ ತವಾಂಭೋದಾಃ .
ಆರುಹ್ಯಾದ್ರಿಶ್ರೇಷ್ಠಂ ಕುರುತೇ ತ್ರಪಯೇವ ಜೀವನತ್ಯಾಗಂ ..

ಸಿಂದೂರಸುಂದರೀ ತೇ ಪದ್ಮೇ ಸೀಮಂತಪದ್ಧತಿರ್ಭಾತಿ .
ವರ್ಷಾವಲಾಹಕಸ್ಥಾ ವಿದ್ಯುಲ್ಲೇಖೇವ ವೀತಚಾಂಚಲ್ಯಾ ..

ವೇಣೀಮಂಬುಧಿಕನ್ಯೇ ಭೃಂಗಶ್ರೇಣೀಮಿವ ಸ್ಫುರಂತೀ ತೇ .
ಶಂಬರವೈರಿಕೃಪಾಣೀಂ ಶಂಕೇ ಮಾನಾಪಹಾರಿಣೀಂ ಶೌರೇಃ ..

ಫಾಲೇನಾಭಿಮುಖೇನ ಪ್ರತಿಮಾಕಾಂಕ್ಷೀ ತವೇಂದುರಂಬುಧಿಜೇ .
ಅರ್ಧಾಕೃತಿಃ ಕಲಾಭಿಃ ಪೂರ್ಣೋ ಭವತಿ ಕ್ರಿಯಾಸಮಭಿಹಾರಾತ್ ..

ಕರ್ಣಾವತಂಸಲಕ್ಷ್ಮೀ ಕಲಯತಿ ಕಮಲೇ ವಿಶಾಲದೃಷ್ಟಿಸ್ತೇ .
ನೀಲೋತ್ಪಲಸ್ಯ ಕೃತ್ಯಂ ಕಿಮಿತಿ ಶ್ರುತಿಮೂಲಶಾಲಿನೀ ಚಿಂತ್ಯಂ ..

ವಂದೀಕೃತಂ ಕಟಾಕ್ಷೈರಿಂದೀವರಮೇತದಿಂದಿರೇ ಶ್ರವಸಿ .
ನ್ಯಸ್ತಂ ಪುನಃ ಪುನಸ್ತನ್ನಿತ್ಯಂ ಶಂಕೀವ ವೀಕ್ಷತೇ ಚಕ್ಷುಃ ..

ನಯನಮುದಂಚತ್ಕರುಣಂ ನಾನಾಶೃಂಗಾರಮಂಗಳಾಕಾರಂ .
ದೇವಿ ತ್ವದಾಶ್ರಿತಾನಾಂ ಕರ್ಣಮತಿಕ್ರವ್ಯ ಕಾಇಕ್ಷಿತಂ ದತ್ತೇ ..

ಕಲ್ಲೋಲಿನೀಶಕನ್ಯೇ ತ್ವಲ್ಲೋಚನಕಾಂತಿಲಿಪ್ಸಯಾ ಕಿಂ ವಾ .
ದ್ವಿಜರಾಜಪಾದಸೇವಾಂ ಜೀವಂಜೀವಃ ಕರೋತಿ ಸರ್ವೋಽಪಿ ..

ಸ್ಫುರತಿ ತವ ಶ್ರುತ್ಯಂತೇ ಪತಿರಿತಿ ಯತ್ ಪ್ರಾಹುರಂಬ ವೇದವಿದಃ .
ಶ್ರುತ್ಯಂತಮೇತಿ ತತ್ತೇ ದೃಷ್ಟಿಃ ಕಾಂತಾವಲೋಕನಾಸಕ್ತಾ ..

ಉಲ್ಲಂಘಿತಶ್ರುತೀನಾಮುದಧಿಸುತೇ ಶೋಭನಂ ನಹೀತಿ ಮೃಷಾ .
ಯೇನ ತವೇದಂ ವ್ಯಕ್ತಂ ಶ್ರುತಿಪಥಮುಲ್ಲಂಘ್ಯ ಶೋಭನಂ ನಯನಂ ..

ಶ್ರುತ್ಯಂತೇ ಕೃತವಸತಿಃ ಪಾದ್ಮರುಚಿಂ ತೇ ಪ್ರಕಾಶಯಂತ್ಯಬ್ಜೇ .
ಪರಮಾರ್ಗದೃಷ್ಟಿಸೃಷ್ಟಾಂ ದೃಷ್ಟಿರಿಯಂ ವೈಷ್ಣವೀಂ ಚ ದೂಷಯತಿ ..

ದೇವಿ ನಿಮಿತ್ತಗುಣಸ್ಯ ಕ್ವಾಪಿ ನ ದೃಷ್ಟಂ ಹಿ ಕಾರ್ಯಸಂಕ್ರಮಣಂ .
ಅನೃತಮಿತೀದಂ ವಚನಂ ಯತ್ವದಪಾಂಗಾದನಂಗಸದ್ಭಾವಃ ..

ಆದ್ಯಾವತಾರಶೋಭಾಮಂಗೀಕುರ್ವಾಣಸಾತ್ಮನಾಥಸ್ಯ .
ನಿರುಪಮಸುಷಮಂ ಕೋ ವಾ ಚಕ್ಷುಸ್ತವ ದೇವಿ ದಕ್ಷಿಣಃ ಸ್ತೋತುಂ ..

ಅಸೃಜತ್ ಕಮಲಂ ಧಾತಾ ತುಲನಾಂ ದೇವೀಕ್ಷಣಸ್ಯ ತೇ ವಾಂಛನ್ .
ಅಸದೃಶಭಾವಾದಮುನಾ ನಾಮ ಪ್ರಾಪ್ತಂ ಜಲಜಮಿತ್ಯುಚಿತಂ ..

ಲೋಕಜನನ್ಯತಿಭಾಸ್ವಲ್ಲೋಚನಶಫರೀವಿರಾಜಮಾನಂ ತೇ .
ಕಾಂತಂ ನಾಸಾವಂಶಂ ಕೇತುಂ ಮದನಸ್ಯ ಕೇ ನ ಶಂಸಂತಿ ..

ತ್ವನಾಸಿಕಾತ್ತಗಂಧಸ್ತ್ರಪಯೇವಾಘೋಮುಖಸ್ತಿಲಪ್ರಸವಃ .
ಮುಹುರಶ್ರೂಣಿ ಪ್ರಾಯೋ ಮುಂಚತಿ ಮಾತರ್ಮರಂದವಿಂದುಮಿಷಾತ್ ..

ನಾಸಾಮೌಕ್ತಿಕಮೇತನ್ಮನ್ಯೇ ವಾರಾಶಿಕನ್ಯಕೇ ಧನ್ಯಂ .
ತವ ಮುಖತಾರಾಧಿಪತೇಃ ಕಾಮಾದೇಕಂ ಕಲಜ್ಞಮಂಗಗತಂ ..

ಮುಕ್ತೋತ್ಪತ್ತಿಸ್ಥಾನಂ ಸರಸಿಜಮಿತಿ ಯತ್ ಸಮಸ್ತಕವಿಸಿದ್ಧಂ .
ತದ್ವಯಕ್ತೀಕರಣಂ ತೇ ನಾಸಾಮುಕ್ತಾಫಲಸ್ಯ ದೇವಿ ಫಲಂ ..

ಪರಿಭೂತಕುಂದಕುಸುಮಂ ಭಾಸಾ ನಾಸಾಗ್ರಭಾಸ್ವರಂ ಪದ್ಮೇ .
ಮುಕ್ತಾಫಲಂ ಮುರಾರೇರ್ಮೋಹನಗುಡಿಕೇವ ಮಾನ್ಮಥೀ ಭಾತಿ ..

ಭಾಸಾ ವಿರಾಜಮಾನಂ ನಾಸಾಮುಕ್ತಾಫಲಂ ಮಮ ಸ್ಫುರತಿ .
ಅಂಬ ತವಾನನಪದ್ಮೇ ಸ್ಮಿತರುಚಿಹಂಸೀಪ್ರಸೂತಮಂಡಮಿವ ..

ದುರ್ವೃತ್ತಃ ಖಲು ಲೋಕೇ ಕಮಲೇ ಕುರ್ಯಾತ್ ಸತಾಂ ತಿರಸ್ಕಾರಂ .
ನಿತ್ಯಸುವೃತ್ತೇನ ಕಥಂ ನಾಸಾಮಣಿನಾ ಸತಾಂ ತಿರಸ್ಕಾರಃ ..

ಕರ್ಣೇನ ತೇಽಬ್ಧಿಕನ್ಯೇ ತಾಟಂಕಾದೇಃ ಪ್ರತೀಯತೇ ಶೋಭಾ .
ಕರ್ಣಸ್ಯ ಹಿ ಸ್ವಭಾವಃ ಶ್ರೀಮಂತಂ ಯತ್ ಸ್ವಮಾಶ್ರಯಂ ಕುರುತೇ ..

ತರ್ಕೋ ಮಮಾಬ್ಧಿಕನ್ಯೇ ಹಾಟಕತಾಟಂಕಚಕ್ರಮರ್ಕ ಇತಿ .
ಯದ್ಯೇತದೇಷ ನ ಸ್ಯಾತ್ ಕರ್ಣಾಸಕ್ತಿಃ ಕಥಂ ಭವೇದಸ್ಯ ..

ಭಾತಿ ಕಪೋಲಃ ಕಮಲೇ ಪತ್ಯುಃ ಶೃಂಗಾರಮಣಿಮಯಾದರ್ಶಃ .
ಪ್ರತಿಫಲಿತತನ್ಮುಖೋಽಯಂ ಹೃದ ಇವ ಸೋಽಧೋವಿಕಸ್ವರಾಂಬುರುಹಃ ..

ಮಧುರವಚೋಗಣನಾಯಾಂ ಮಾತಸ್ತ್ವದ್ಗೀರಭೂದಿಯಂ ಪ್ರಥಮಾ .
ನೈವ ದ್ವಿತೀಯವಾರ್ತಾ ಕೋಕಿಲವಾದೇ ಕುತೋ ನು ಪಂಚಮತಾ ..

ಸಾಮ್ಯಾಭಿಲಾಷದೋಷಂ ಸಮ್ಮಾರ್ಷ್ಟುಂ ತ್ವದ್ವಿರಾ ಚಿರಾದಿಕ್ಷೋಃ .
ಚಕ್ರೇ ಪಂಚಶರಸ್ತಂ ಚಾಪಾನಮನಾಪದೇಶತಃ ಪ್ರಣತಂ ..

ಅರ್ಣವಕನ್ಯೇ ಧನ್ಯಾಮಾಕರ್ಣಯತಸ್ತ್ವದೀರಿತಾಂ ವಾಚಂ .
ಶುಕಪಿಕವಚನಶ್ರವಣಂ ಶ್ರುತಿಪುಟಕಟು ದೇವಿ ಕಸ್ಯ ವಾ ನ ಭವೇತ್ ..

ಕಸ್ಯ ಗಿರಸ್ತೇ ಶ್ರೋತುಃ ಕಮಲೇ ವದನಾರವಿಂದಕಂದಲಿತಾಃ .
ನ ಭವೇನ್ಮಹತೀ ಪ್ರೀತಿರ್ನಾರದಮೇಕಂ ವಿನಾ ಮುನೀಶಾನಂ ..

ಮಕರಂದಾಃ ಸುನರಸಾಃ ಶುಕಪಿಕವಾಚೋಽಪಿ ವಿಸ್ವರಾ ಯೇನ .
ವೀಣಾಃ ಪರಿವಾದಿನ್ಯಸ್ತೇನ ಕಿಲಾಬ್ಜೇ ತವೋಪಮಾ ನ ಗಿರಾಂ ..

ಅಂಬಾಭಿಜಾತವಾಣೀಧನರಸಮಾಧುರ್ಯಚೌರ್ಯಕಾರೀ ತೇ .
ಅತಿಮರ್ದನಾಸಹಿಷ್ಣುರ್ಮುಷಿತರಸಾನೇಷ ಮುಂಚತೀವೇಕ್ಷುಃ ..

ನೀರತಯೇವ ಮರಂದೋ ಭಾವ್ಯಶ್ಶ್ರವಣೇ ತವಾಬ್ಧಿಜೇ ವಾಚಾಂ .
ಸ್ವಾದಿತ ಏವ ಸುಧಾಯಾಃ ಸ್ವಾದ್ಯೇತಿ ಖ್ಯಾತಿರಪಿ ನ ಮಾಧುರ್ಯಾತ್ ..

ಅಧರೇಣ ಬಂಧುಜೀವಂ ಮುಖತಃ ಪ್ರಾಭಾತಿಕಂ ಚ ರಾಜೀವಂ .
ದೂರೀಕರೋಷಿ ಕಿಂ ವಾ ದೇವಿ ತ್ವಂ ಸರ್ವಜೀವಕರುಣಾರ್ದ್ರಾ ..

ಅಂತೇ ವಸನ್ ದ್ವಿಜಾನಾಮವದಾತಾನಾಮತಿಸ್ಫುರದ್ರೂಪಃ .
ಅಂಬ ತವಾಧಿಕಮಧರೋ ಬಿಂಬಪ್ರತಿಬಿಂಬಯೋಗ್ಯೋಽಭೂತ್ ..

ಸಂತತಪಲ್ಲವಯೋಗೇ ಮುಕ್ತಿರ್ನ ಶುಚೇರಪೀತಿ ವಾಙ್ ಮಿಥ್ಯಾ .
ದೇವಿ ತವಾಧರ ಪಲ್ಲವಸಂಯೋಗೇಽಧ್ಯಮಲಾ ದ್ವಿಜಾ ಮುಕ್ತಾಃ ..

ತವ ತಟಿನೀಪತಿಕಂಥೇ ದ್ವಿಜಪಟಲೀ ವದನಶುಕ್ತಿಮುಕ್ತಾಶ್ರೀಃ .
ಅತನುಯಶೋಬೀಜಾನಾಮಂಕುರಪಂಕ್ತಿಃ ಪರಿಸ್ಫುರಂತೀವ ..

ವದನಂ ಸುಧಾಕರಸ್ತೇ ವಾರಿಧಿಕನ್ಯೇ ನ ತತ್ರ ಸಂದೇಹಃ .
ವಚನಾಪದೇಶಮೇತನ್ನೋ ಚೇದಮೃತಂ ಕಥಂ ತತಃ ಪ್ರಭವೇತ್ ..

ಭ್ರೂಯುಗಳಂ ಭೃಗುತನಯೇ ಕುಸುಮಶರಸ್ಯೇವ ಸವ್ಯಸಾಚಿತಯಾ .
ಆರೋಪಿತಾಕ್ಷಿಬಾಣಂ ಕೋದಂಡದ್ವಂದ್ವಮಿತಿ ಮತಿಂ ದತ್ತೇ ..

ಅಬ್ಜದ್ವಯಮಪಿ ವಿಜಿತಂ ತವ ಕಮಲೇ ವಕ್ತ್ರಶೋಭಯಾ ತತ್ರ .
ಅಂಬರಮೇಕಂ ಶರಣಂ ಶಂಬರಮಪರಂ ಚ ಸತ್ವರಂ ಪ್ರಾಪತ್ ..

ಚಂದ್ರೋಽಭವದ್ ವಿಷಾದೀ ಚಾರು ಮುಖಂ ದೇವಿ ತಾವಕಂ ವೀಕ್ಷ್ಯ .
ಕುಕ್ಷಿಗತಂ ಗರಮಸ್ಯ ಪ್ರಾಹುಃ ಪಂಕಂ ಕಲಂಕಮಿತ್ಯೇಕೇ ..

ವಿಜಿತಸ್ತ್ವನ್ಮುಖಕಾಂತ್ಯಾ ದೇವಿ ನಿರಾಶೋ ನಿಶಾಕರೋ ಜೀವೇ .
ಭೃಗುಪತನಂ ಕುರುತೇಽಸಾವಸ್ತಮಥ ವ್ಯಾಜತೋಽನ್ವಹಂ ತೂರ್ಣಂ ..

ಅಂಬ ಯತಸ್ತೇ ನಿತರಾಮಾನನಕಾಂತ್ಯಾ ತೃಣೀಕೃತಶ್ಚಂದ್ರಃ .
ಆತಃ ಕಿಲ ತೃಣಬುದ್ಧಯಾ ಮುಂಚತಿ ನೈನಂ ಮೃಗಃ ಕದಾಚಿದಪಿ ..

ದೇವಿ ತವಾನನತುಲನಾಮಭಿಲಷತಾಂ ಸಾಗಸಾಂ ಸರೋಜಾನಾಂ .
ಮಜ್ಜನಮಪ್ಸು ಚ ಬಂಧಃ ಶೈವಲಪಾಶೇನ ಷಟ್ಪದೈಃ ಪ್ರಸೃತಿಃ ..

ದ್ವಿಜರಾಜಸ್ಯಾಪ್ಯಬ್ಜೇ ತ್ವದ್ವಕ್ತ್ರೇಣೋಪಮಾನರಹಿತೇನ .
ಸಮತಾಭಿಲಾಷದೋಷಾದ್ದೋಷಾಕರತಾ ವಿಧೋರ್ದುರಂತಾಭೃತ್ ..

ಪದ್ಮೇ ಪರಸ್ವಹರಣಂ ದೋಷಾಯೇತಿ ಪ್ರಭಾಷಣಂ ಮಿಥ್ಯಾ .
ಅಪಹೃತ್ಯ ರಾಜಲಕ್ಷ್ಮೀಮಪದೋಷಂ ಯದ್ವಿಭಾತಿ ತೇ ವಕ್ತ್ರೇಂ ..

ನಿರ್ಜಿತ್ಯ ನೀರಜಾತಂ ನಿಖಿಲಂ ಮುರವೈರಿಸುಂದರಿ ಮುಖೇನ .
ಆಸನಮಾಕಲಿತಂ ತೇ ನೂನಂ ಪದ್ಮಾಸನಾಸಿ ತೇನೈವ ..

ತ್ವದ್ವದನಾಭಿಭವೋದ್ಯತ್ತಾಪಾತಿಶಯಂ ದಿವಾನಿಶಂ ಪದ್ಮಂ .
ಅಂಭಸಿ ವಾಸಂ ಕುರುತೇ ನೂನಂ ತಸ್ಯಾಪನೋದನಾಯಾಬ್ಜೇ ..

ಸಂತತಮಿತ್ರವಿರೋಧೀ ದೋಷಾಸಕ್ತಃ ಕಲಂಕವಾನಿಂದುಃ .
ತವ ವದನೇನ ಕಥಂ ವಾ ಕಮಲೇ ಕಲ್ಯಾಣಗುಣಭುವಾ ತುಲ್ಯಃ ..

ದೇವಿ ತವಾನನಚಂದ್ರಪ್ರಸಾದಭಿಕ್ಷಾಟನೇನ ರಾಜಾಪಿ .
ಪೂರ್ಣಶ್ಚಂದ್ರಿಕಯಾಹೋ ಜೀವಂಜೀವಸ್ಯ ತೃಪ್ತಿಮಾತನುತೇ ..

ತ್ವತ್ಕಂಠಕಾಂತಿಭಾಗ್ಯಂ ದೃಷ್ಟ್ವಾ ಶಂಖಾಸ್ಸಹಸ್ರಶೋ ದೇವಿ .
ತಲ್ಲಾಭಾಯ ಪಯೋಧೇರಂತಂ ಗತ್ವಾ ಚಿರಂ ತಪಸ್ಯಂತಿ ..

ಕಂಠೇನ ತೇ ಹೃತಶ್ರೀಃ ಕಮಲೇ ವಿಮಲೋಽಪಿ ಸಂತತಂ ಕಂಬುಃ .
ಘುಮುಘುಮುನಿನದವ್ಯಾಜಾತ್ ಕ್ರೋಶತಿ ರಾಜ್ಞಾಂ ಪುರಃ ಸಮಯದರ್ಶೀ ..

ತ್ವತ್ಕಂಠಕಾಂತಿಜನಿತಂ ಭಂಜನಮಾಖ್ಯಾತುಮುದ್ಯತಾ ಜಲಜಾಃ .
ವಿಸ್ತೃತಜನಶಬ್ದತಯಾ ಪದ್ಮಿನ್ಯಾಮ್ರೇಡಯಂತಿ ಭಂ ಭಮಿತಿ ..

ಕಂಬುಭ್ರಮೇಣ ಕಂಠಂ ಚಕ್ರಭ್ರಾಂತ್ಯಾ ನಿತಂಬಬಿಂಬಮಪಿ .
ಪರಿಮೃಶತಿ ತೇ ಕರಾಭ್ಯಾಂ ಪತಿರತಿದುರ್ಭೇದಶಂಖಚಕ್ರಾಭ್ಯಾಂ ..

ಬಾಹೂ ಶಿರೀಷಮಾಲಾಮಾರ್ದವಕೀತಂದುಮರ್ದನೇ ರಾಹೂ .
ಸೇತೂ ಸಮಗ್ರಶೋಭಾಸಿಂಧೋರ್ಮನ್ಯೇ ಸಮುದ್ರಕನ್ಯೇ ತೇ ..

ಅತಿಸುರಭಿಃ ಕರಪದ್ಮೋ ವಾಂಛಿತದಾನೈರ್ನ ಕೇವಲಂ ಗಂಧೈಃ .
ವಾರಿಧಿಪುತ್ರಿ ವದಾನ್ಯಂ ಕವಿಮುಕ್ತಂ ದೇವಿ ಕಲ್ಪಮಾತನುತೇ ..

ದೇವಿ ಕರೇಣ ಭವತ್ಯಾ ದತ್ತಸಮಸ್ತೇಪ್ಸಿತೇನ ಭಕ್ತಾನಾಂ .
ಸ್ಪರ್ಶನದೂರೀಕರಣಂ ಸೋದರಗೀರ್ವಾಣಶಾಖಿನಾಮುಚಿತಂ ..

ದೇವಿ ತವಾನನಭಾಸಾ ಪರಿಭೂತಃ ಪರ್ವಚಂದ್ರಮಾ ನೂನಂ .
ತೇನ ಹಿ ಶಶ್ವತ್ ಪರಿಧಿವ್ಯಾಜಪ್ರಾಕಾರಮಧ್ಯಮಧ್ಯಾಸ್ತೇ ..

ಪದ್ಮಕುಲಂ ಪರಿಭೂತಂ ಪದ್ಮೇ ತ್ವತ್ಪಾಣಿಪದ್ಮರಾಗೇಣ .
ತತ್ಪ್ರೇಷಿತಂ ಸದೈಕಂ ತ್ವತ್ಪಾಣಿಂ ಸೇವತೇ ಸರೋಜಾತಂ ..

ಅನುದಿನಮರ್ಕಾಭಿಮುಖಂ ವನಭುವಿ ಶೈವಾಲವಲ್ಕಲಂ ಕಮಲಂ .
ತಪ್ತ್ವಾ ತಪೋಽತಿತೀವ್ರಂ ಪ್ರಾಪತ್ ತ್ವತ್ಪಾಣಿಪದ್ಮಸಾಧರ್ಮ್ಯಂ ..

ಹಾರಾ ವಿಭಾಂತಿ ಗೌರಾ ಹರಿದಯಿತೇ ತೇ ಮುಖೋಡುರಾಜಸ್ಯ .
ಸೇವಾರ್ಥಮಾಗತಾನಾಂ ತಾರಾಣಾಮಿವ ಗಣಾಃ ಪುರೋಗಾಣಾಂ ..

ಹಾರಲತಾ ತಬ ಪದ್ಮೇ ಸುಕುಮಾರಸ್ಯಾಂಗಭೂಕುಮಾರಸ್ಯ .
ಕ್ರೀಡಾಮೃಣಾಲಡೋಲಶಂಕಾಂ ನಾಂಕ್ರೂರಯತ್ಯಸೌ ಕಸ್ಯ ..

ತವ ಕುಚಗಿರಿತಟವಾಸೀ ಕೃತರೋಮಾಳೀನಕನ್ಯಕಾಸ್ನಾನಃ .
ಕಶ್ಚನ ಮುಕ್ತಾಹಾರೋ ಯೋಗೀವಾಭಾತಿ ನಿತ್ಯಶುದ್ಧಾತ್ಮಾ ..

ಉನ್ನತಿಮುರೋಜಯುಗ್ಮೇ ಪದ್ಮೇ ದೃಷ್ಟೈವ ಪರ್ವತಾಸ್ತ್ರಪಯಾ .
ಉದಧೌ ಚಿರಂ ನಿಲೀನಾ ಭೀತ್ಯಾ ಶಕ್ರಾದಿತಿ ಪ್ರಥಾಮಾತ್ರಂ ..

ತವ ಕುಚಕುಂಭದ್ವಂದ್ವೇ ಬದ್ಧಸ್ಪರ್ಧಾನಿ ಡಾಡಿಮಫಲಾನಿ .
ತುಲನಾಹೀನಾಃ ಕೀರಾಸ್ತುಂಡೈರೇತಾನಿ ಖಂಡಯಂತ್ಯಬ್ಜೇ ..

ಕೋದಂಡಸ್ಯ ಪುರಾರೇರುದ್ದಂಡಸ್ಯಾಪಿ ಹಂತ ಬಾಣಸ್ಯ .
ಕವಲೀಕುರುತೇ ಮಾನಂ ಪುಗಲೀ ಕುಚಯೋಸ್ತವೇಂದಿರೇ ಯುಗಪತ್ ..

ಸಂತತಮುಕ್ತಾಹಾರಾವಪಿ ತವ ಪೀನೌ ಪಯೋಧರೌ ಭಾತಃ .
ತೇನ ಕಥಂ ಪೀನತ್ವಂ ದೇವಿ ಭವೇದ್ರಾತ್ರಿಭೋಜನೇ ಮಾನಂ ..

ಕನಕಮಹೀಘರಗೌರವಕಬಲೀಕರಣಾದಿವಾತಿಪೀನಮಪಿ .
ಮುಕ್ತಾಹಾರವದಾಸ್ತೇ ಸ್ತನಯುಗಲಂ ದೇವಿ ತಾವಕಂ ಚಿತ್ರಂ ..

ಇತಿ ಕಿಲ ದರ್ಶನರೀತಿಃ ಕಾರ್ಯಮುಪಾದಾನಕಾರಣಾಭಿತ್ರಂ .
ದೇವಿ ತವ ಸ್ತನಕುಂಭೌ ಚಕ್ರಾಭಿನ್ನೌ ಕಥಂ ನ ದೃಶ್ಯೇತೇ ..

ಕಲಯತಿ ದಂಡಃ ಕಲಶಂ ಸರ್ವೈರ್ಬಹುಶಃ ಶ್ರುತಂ ಚ ದೃಷ್ಟಂ ಚ .
ಜನನಿ ತವ ಸ್ತನಕಲಶೋ ಜನಯತಿ ಮಧುವೈರಿಮಾನದಂಡಮಹೋ ..

ಸರ್ವಾರೀಣಾಂ ಜೇತಾ ದುರ್ವಾರೇಣೈವ ದೇವಿ ಚಕ್ರೇಣ .
ಹಂತ ಕಥಂ ತೇ ವಿಜಿತಃ ಕಾಂತೋ ವಕ್ಷೋರುಹಾತ್ಮಚಕ್ರೇಣ ..

ಕಲ್ಲೋಲಿನೀಶಕನ್ಯೇ ಕಲಯೇ ರೋಮಾವಲಿಪ್ರಭೇದೇನ .
ತವ ಕಾಂತಿವಾರ್ಧಿಮಧ್ಯೇ ನವಜಲದಶ್ಯಾಮಕೋ ಹರಿಃ ಶೇತೇ ..

ನಾಮೀಸರೋವನಾಂತಃ ಕ್ರೀಡನ್ಮದನದ್ವಿಪಾಧಿಪೋತ್ಕ್ಷಿತಾಂ .
ಶೈವಾಲವಲ್ಲರೀಂ ತೇ ರೋಮಲತಾಂ ದೇವಿ ಕಥಯಂತಿ ..

ಮಧ್ಯಃ ಪ್ರಥಮಂ ಮಾನಂ ಮಹಿತಗುಣೌಘಸ್ತವಾನುಮಾನಮಪಿ .
ವಪುರಪ್ಯುಪಮಿತಿಶಬ್ದಂ ದೂರೀಕುರುತೇಽಮ್ಬ ಕೇನ ವರ್ಣ್ಯಾಸಿ ..

ತವ ಕುಚಕುಂಭಸ್ಯ ಗುರೋರಂತೇವಾಸೀ ವಿವೇಕಹೀನಸ್ಯ .
ದರ್ಶನಯೋಗ್ಯೋ ನಾಭೂನ್ಮಧ್ಯಸ್ತೇ ದೇವಿ ನಾಸ್ತಿವಾದರತಃ ..

ಪ್ರತ್ಯಕ್ಷಾವಿಷಯತ್ವಾದತಿರಿಕ್ತತ್ವಾದನಂಗಜನಕತ್ವಾತ್ .
ದೇವಿ ವಲಿಶ್ರೀಭಜನಾನ್ಮಧ್ಯಸ್ತೇ ಕಾಂತವಿಭ್ರಮಂ ತನುತೇ ..

ಚಿಂತಾಮಣಿವಾದಸ್ತೇ ಕರಯೋರ್ದ್ದಶಿ ಕಾಮಶಾಸ್ತ್ರವಾದೋಽಬ್ಜೇ .
ಮಧ್ಯೇ ಮಾಯಾವಾದೋ ಗೌರವವಾದಃ ಪಯೋಧರದ್ವಂದ್ವೇ ..

ಮಹದಣುಪರಿಮಾಣಗತಂ ವಿಶ್ರಾಂತಂ ದೇವಿ ತಾರತಮ್ಯಂ ತೇ .
ವಕ್ಷೋರುಹೇ ಚ ಮಧ್ಯೇ ನ ವ್ಯೋಮಾದೌ ನ ಚಾಪಿ ಪರಮಾಣೌ ..

ಕಠಿನಾತ್ಮಾಘಃ ಕುರುತೇ ಸರ್ವಂ ಕಮಲೇ ಕೃಥಂ ಸನಾಮಿಗತಂ .
ದೃಷ್ಟಮಿತೀದಮುರೋಜೇ ಮಧ್ಯಂ ಕೃಶಮೇವ ಕುರ್ವತಿ ಸ್ಪಷ್ಟಂ ..

ತುಂಗಪಯೋಧರಶೈಲದ್ವಂದ್ವೋದ್ವಹನೇನ ಸಂತತಂ ದೇವಿ .
ಪಶ್ಯಾಮಿ ಕಾರ್ಯಮುಚಿತಂ ಮಧ್ಯಸ್ಯ ಶ್ರೀಮತೋಽಪಿ ತೇ ಮಾತಃ ..

ತವ ರೋಮರಾಜಿಯಮುನಾನಿತ್ಯಸ್ಫೀತೇಽಪಿ ಮಧ್ಯದೇಶೇಽಸ್ಮಿನ್ .
ಕ್ಷಾಮಕಥಾ ಕಥಮಬ್ಜೇ ನಾಭೀಸರಸೀಪರಿಷ್ಕೃತೇಽಪಿ ಸದಾ ..

ರೋಮಾಲಿಯೂಪದಂಡೇ ಚಿತಪಶುಂ ಬದ್ಧುಮಂಬ ತೇ ಪತ್ಯುಃ .
ಸಂಪಾದಿತೇವ ರಶನಾ ತ್ರಿವಲಿಮಿಷೇಣಾಂಗಜನ್ಮನಾಧ್ವರಿಣಾ ..

ಆಭಾತಿ ನಾಭಿರಬ್ಜೇ ತವ ತನುಜನುಷಾ ನಿಷಾದವೀರೇಣ .
ಪಾತಯಿತುಂ ಹರಿಚಿತ್ತಂ ಮತ್ತಭಂ ಸಂಭೃತೋ ಯಥಾ ಗರ್ತಃ ..

ಶಂಕೇ ತವಾಂಬ ನಾಭಿಂ ಶಂಬರರಿಪುಣಾ ವಿಜಿತ್ಯ ದೈತ್ಯಾರಿಂ .
ರೋಮಾಳಿನೀಲರತ್ನಸ್ತಂಭನಿಖಾತಾಯ ಸಂಭೃತಂ ವಭ್ರಂ ..

ನಿವಸಂತಿ ಯೇಽಧಿಕಾಂಚಿ ಪ್ರಾಯಃ ಶುದ್ಧಾ ಭವಂತಿ ತೇ ಮುಕ್ತಾಃ .
ಇತಿ ಮಣಿರಶನಾಂ ವಿಕಸನ್ಮುಕ್ತಾವಲ್ಯಾಂಬ ದರ್ಶಯಸ್ಯದ್ಧಾ ..

ಅವನತಮೌಲಿರಿಯಂ ತ್ವಾಮಂಜಲಿಮಭಿನೀಯ ಕುಸುಮಕೋಶಮಿಷಾತ್ .
ರಂಭಾ ತವೋರುವಿಜಿತಾ ಸಂಭಾವಯತೀತಿ ಮೇ ತರ್ಕಃ ..

ಕುಂಭೀಂದ್ರಕುಂಭವೃತ್ತಂ ಜಾನುದ್ವಂದ್ವಂ ತವಾಪ್ರತಿದ್ವಂದ್ವಂ .
ಹಂತ ಹರೇರಪಿ ಧೈರ್ಯಂ ಹರತೇ ದುರ್ಧರ್ಷಮಬ್ಧಿರಾಜಸುತೇ ..

ಜಂಘಾ ನಿಷಂಗಶಂಕಾಮಂಕೂರಯತ್ಯಂಗಜೇನ್ಮನೋ ದೇವಿ .
ತತ್ ಖಲು ತದಗ್ರಭಾಗೇ ಪಶ್ಚಶರಸ್ಫೂರ್ತಿಮಂಗುಲಿವ್ಯಾಜಾತ್ ..

ತವ ಪದಭಾವಃ ಪ್ರಾಪ್ತಸ್ತಾಮರಸೇನೇತಿ ನಾತ್ರ ಸಂದೇಹಃ .
ಕಥಮನ್ಯಥಾ ಸ ಯೋಗೋ ಭಾವೀ ಕಾಂತೇನ ಹಂಸಕೇನಾಬ್ಜೇ ..

ಪಾದತಲೇ ಪರಿದೃಶ್ಯಂ ಪದ್ಮೇ ರೇಖಾತ್ಮನಾ ಸ್ವಯಂ ಗೂಢಂ .
ತವ ಚರಣಶ್ರೀಮಿಕ್ಷಾಚರಣಂ ವಿದಧಾತಿ ಸಜ್ಯಮಂಬುರುಹಂ ..

ಅರ್ಕೋಽಪಿ ಯಸ್ಯ ಭಜನಾದಜನಿ ಶ್ರೀಮಾನನೇನ ಜನಿತಶ್ರೀಃ .
ಪದ್ಮಂ ಕಥಂ ನು ತುಲನಾಮರ್ಹತಿ ಪಾದೇನ ತಾವಕೇನಾಬ್ಜೇ ..

ಜಲಜಂ ಕೃತಸಂಕೋಚಂ ದ್ವಿಜರಾಜಸ್ಥಾಪಿ ದರ್ಶನೇ ದೇವಿ .
ಮಾನಿತಮಧುಪಂ ಶಿರಸಾ ಕಥಮಧಿರೋಹೇತ್ ಪದೇನ ತೇ ತುಲನಾಂ ..

ಸಾಮ್ರಾಜ್ಯೇಽಮ್ಬುರುಹಾಣಾಂ ತವ ಪದಮೀಡೇಽಭಿಷಿಚ್ಯಮಾನಮಿವ .
ಜಾತಿಸ್ಮೃತಾಂ ಜನಾನಾಂ ಹೇತುಃ ಸಂಚಿಂತಿತಾರ್ಥಸಿದ್ಧೀನಾಂ ..

ಮದನದರೀಜನಕಬರೀನಲಿನೈರುದ್ಯನ್ಮರಂದಸಂಸಾರೇ .
ಪಾತು ಪರಾಕೃತಪದ್ಮಂ ಮಾತುರ್ಜಗತಾಂ ಪದಾಂಬುಜಾತಂ ಮಾಂ ..

ಸಂಭಾವಿತಾಪಚಾರಂ ಜ್ಞಾನಾಜ್ಞಾನಾತ್ತವ ಸ್ತುತಿವ್ಯಾಜಾತ್ .
ದೇವಿ ಸಹಸ್ವ ದಯಾಲೋ ದೇಹಿ ಮಮ ಶ್ರೀಪತೌ ಪರಾಂ ಭಕ್ತಿಂ ..

ಜಗತಿ ಖ್ಯಾತಿರಶೇಷಾತ್ತ್ವಕುಲೇಯೇತಿ ಸರ್ವಸಿದ್ಧಾಂತಂ .
ಜನನಿ ಕಥಂ ತೇ ಖ್ಯಾತೇರುತ್ಪತ್ತಿಃ ಶ್ರೂಯತೇ ಪುರಾಣಾದೌ ..

ಯಜ್ಞವರಾಹಃ ಶ್ರೀಮಾನ್ ವಾಧೂಲಂಬಾಲಜೋ ಧೀಮಾನ್ .
ಲಕ್ಷ್ಮೀ ಶತಕಮತಾನೀದಕ್ಷೀಣಾನಂದಕಂದಲೀಕಂದಂ ..

Ramaswamy Sastry and Vighnesh Ghanapaathi