ലക്ഷ്മീ ശതക സ്തോത്രം

ആനന്ദം ദിശതു ശ്രീഹസ്തിഗിരൗ സ്വസ്തിദാ സദാ മഹ്യം .
യാ കൗതുകം വിധത്തേ സാകൃതേനാവലോകനേന ഹരേഃ ..

യന്നാമ കീർതനീയം ശ്രീരിത്യാദൗ പ്രിയം ഹരേർനാമ്നാം .
സാ മേ സമസ്തജനനീ സന്തതമുദയായ ഭൂയസേ ഭൂയാത് ..

ശ്രീവരദേശ്വരദയിതേ വാഞ്ഛാമി ത്വാം യഥാമതി സ്തോതും .
സ്വല്പോഽപി ഡിംഭജല്പോ മാതുഃ പ്രീതിം കഥം ന സഞ്ജനയേത് ..

മുരരിപുമോഹനധാമ്നേ മൂർതിവിനിർധൂതവിഷ്ഫുരദ്ധേമ്നേ .
ദിവിഷദമേയവിഭൂമ്നേ ലക്ഷ്മീനാമ്നേ പരം നമോ ഭുമ്നേ ..

കരിഗിരിനായകകാന്തേ ദാന്തജനസ്വാന്തപങ്കജനിശാന്തേ .
മയി ഭവമരണാശ്രാന്തേ കരുണാം ശരണാഗതേ കുരു പ്രഗുണാം ..

വാചാമകൃത്രിമാണാമപി മുനിമനസാമഗോചരേ ദേവി .
ത്വദ്വർണനേ മദീയാം കാങ്ക്ഷാം സഫലാം കരോതു തേ കരുണാ ..

മാഖദ്വിധു വിംബാസ്യേ മംഗലസൗമ്യാകൃതേ ഗുരുശ്രോണി .
ഭൃഗുനന്ദിനി മന്ദഗതേ രോമലതാഹേ ജയാബ്ധികുലകേതോ ..

ധന്യം പ്രസൂനഗർഭം ധമ്മില്ലം ദേവി താവകം മന്യേ .
പ്രസവശരേണ ന്യസ്തം തൂണം ബാണൗഘപൂർണമർണവജേ ..

ത്വത്കേശപാശശോഭാപരിമോഷാണാം ഫലം പയോദാനാം .
ദേവി തടിദ്ഗുണവന്ധോ നോദനമനിലൈഃ പലായനം ദിക്ഷു ..

നിന്ദതി നീരധികന്യേ കചനിചയസ്തേ കലാപിനം കാന്ത്യാ .
അസ്യതി ബർഹം ന കഥം ഭുജംഗവൃത്തിശ്ച പക്ഷപാതീ ച ..

ജയതു വിപക്ഷം പദ്മേ ബർഹിണവർഹം ത്വദീയകേശഭരം .
ത്വത്കാന്തസ്യ സപക്ഷം ഘനമപി കാന്ത്യാ കഥം പരാകുരുതേ ..

വർഹം വിഗർഹിതാഭം ശസ്തേനാനേന കേശഹസ്തേന .
മത്വാഭവന്മയൂരാ മന്ദാശാ ജീവിതേ വൃതവിഷാശാഃ ..

ദിവ്യാമംബുധികന്യേ ദൃഷ്ട്വാ കേശശ്രിയം തവാംഭോദാഃ .
ആരുഹ്യാദ്രിശ്രേഷ്ഠം കുരുതേ ത്രപയേവ ജീവനത്യാഗം ..

സിന്ദൂരസുന്ദരീ തേ പദ്മേ സീമന്തപദ്ധതിർഭാതി .
വർഷാവലാഹകസ്ഥാ വിദ്യുല്ലേഖേവ വീതചാഞ്ചല്യാ ..

വേണീമംബുധികന്യേ ഭൃംഗശ്രേണീമിവ സ്ഫുരന്തീ തേ .
ശംബരവൈരികൃപാണീം ശങ്കേ മാനാപഹാരിണീം ശൗരേഃ ..

ഫാലേനാഭിമുഖേന പ്രതിമാകാങ്ക്ഷീ തവേന്ദുരംബുധിജേ .
അർധാകൃതിഃ കലാഭിഃ പൂർണോ ഭവതി ക്രിയാസമഭിഹാരാത് ..

കർണാവതംസലക്ഷ്മീ കലയതി കമലേ വിശാലദൃഷ്ടിസ്തേ .
നീലോത്പലസ്യ കൃത്യം കിമിതി ശ്രുതിമൂലശാലിനീ ചിന്ത്യം ..

വന്ദീകൃതം കടാക്ഷൈരിന്ദീവരമേതദിന്ദിരേ ശ്രവസി .
ന്യസ്തം പുനഃ പുനസ്തന്നിത്യം ശങ്കീവ വീക്ഷതേ ചക്ഷുഃ ..

നയനമുദഞ്ചത്കരുണം നാനാശൃംഗാരമംഗളാകാരം .
ദേവി ത്വദാശ്രിതാനാം കർണമതിക്രവ്യ കാഇക്ഷിതം ദത്തേ ..

കല്ലോലിനീശകന്യേ ത്വല്ലോചനകാന്തിലിപ്സയാ കിം വാ .
ദ്വിജരാജപാദസേവാം ജീവഞ്ജീവഃ കരോതി സർവോഽപി ..

സ്ഫുരതി തവ ശ്രുത്യന്തേ പതിരിതി യത് പ്രാഹുരംബ വേദവിദഃ .
ശ്രുത്യന്തമേതി തത്തേ ദൃഷ്ടിഃ കാന്താവലോകനാസക്താ ..

ഉല്ലംഘിതശ്രുതീനാമുദധിസുതേ ശോഭനം നഹീതി മൃഷാ .
യേന തവേദം വ്യക്തം ശ്രുതിപഥമുല്ലംഘ്യ ശോഭനം നയനം ..

ശ്രുത്യന്തേ കൃതവസതിഃ പാദ്മരുചിം തേ പ്രകാശയന്ത്യബ്ജേ .
പരമാർഗദൃഷ്ടിസൃഷ്ടാം ദൃഷ്ടിരിയം വൈഷ്ണവീം ച ദൂഷയതി ..

ദേവി നിമിത്തഗുണസ്യ ക്വാപി ന ദൃഷ്ടം ഹി കാര്യസങ്ക്രമണം .
അനൃതമിതീദം വചനം യത്വദപാംഗാദനംഗസദ്ഭാവഃ ..

ആദ്യാവതാരശോഭാമംഗീകുർവാണസാത്മനാഥസ്യ .
നിരുപമസുഷമം കോ വാ ചക്ഷുസ്തവ ദേവി ദക്ഷിണഃ സ്തോതും ..

അസൃജത് കമലം ധാതാ തുലനാം ദേവീക്ഷണസ്യ തേ വാഞ്ഛൻ .
അസദൃശഭാവാദമുനാ നാമ പ്രാപ്തം ജലജമിത്യുചിതം ..

ലോകജനന്യതിഭാസ്വല്ലോചനശഫരീവിരാജമാനം തേ .
കാന്തം നാസാവംശം കേതും മദനസ്യ കേ ന ശംസന്തി ..

ത്വനാസികാത്തഗന്ധസ്ത്രപയേവാഘോമുഖസ്തിലപ്രസവഃ .
മുഹുരശ്രൂണി പ്രായോ മുഞ്ചതി മാതർമരന്ദവിന്ദുമിഷാത് ..

നാസാമൗക്തികമേതന്മന്യേ വാരാശികന്യകേ ധന്യം .
തവ മുഖതാരാധിപതേഃ കാമാദേകം കലജ്ഞമംഗഗതം ..

മുക്തോത്പത്തിസ്ഥാനം സരസിജമിതി യത് സമസ്തകവിസിദ്ധം .
തദ്വയക്തീകരണം തേ നാസാമുക്താഫലസ്യ ദേവി ഫലം ..

പരിഭൂതകുന്ദകുസുമം ഭാസാ നാസാഗ്രഭാസ്വരം പദ്മേ .
മുക്താഫലം മുരാരേർമോഹനഗുഡികേവ മാന്മഥീ ഭാതി ..

ഭാസാ വിരാജമാനം നാസാമുക്താഫലം മമ സ്ഫുരതി .
അംബ തവാനനപദ്മേ സ്മിതരുചിഹംസീപ്രസൂതമണ്ഡമിവ ..

ദുർവൃത്തഃ ഖലു ലോകേ കമലേ കുര്യാത് സതാം തിരസ്കാരം .
നിത്യസുവൃത്തേന കഥം നാസാമണിനാ സതാം തിരസ്കാരഃ ..

കർണേന തേഽബ്ധികന്യേ താടങ്കാദേഃ പ്രതീയതേ ശോഭാ .
കർണസ്യ ഹി സ്വഭാവഃ ശ്രീമന്തം യത് സ്വമാശ്രയം കുരുതേ ..

തർകോ മമാബ്ധികന്യേ ഹാടകതാടങ്കചക്രമർക ഇതി .
യദ്യേതദേഷ ന സ്യാത് കർണാസക്തിഃ കഥം ഭവേദസ്യ ..

ഭാതി കപോലഃ കമലേ പത്യുഃ ശൃംഗാരമണിമയാദർശഃ .
പ്രതിഫലിതതന്മുഖോഽയം ഹൃദ ഇവ സോഽധോവികസ്വരാംബുരുഹഃ ..

മധുരവചോഗണനായാം മാതസ്ത്വദ്ഗീരഭൂദിയം പ്രഥമാ .
നൈവ ദ്വിതീയവാർതാ കോകിലവാദേ കുതോ നു പഞ്ചമതാ ..

സാമ്യാഭിലാഷദോഷം സമ്മാർഷ്ടും ത്വദ്വിരാ ചിരാദിക്ഷോഃ .
ചക്രേ പഞ്ചശരസ്തം ചാപാനമനാപദേശതഃ പ്രണതം ..

അർണവകന്യേ ധന്യാമാകർണയതസ്ത്വദീരിതാം വാചം .
ശുകപികവചനശ്രവണം ശ്രുതിപുടകടു ദേവി കസ്യ വാ ന ഭവേത് ..

കസ്യ ഗിരസ്തേ ശ്രോതുഃ കമലേ വദനാരവിന്ദകന്ദലിതാഃ .
ന ഭവേന്മഹതീ പ്രീതിർനാരദമേകം വിനാ മുനീശാനം ..

മകരന്ദാഃ സുനരസാഃ ശുകപികവാചോഽപി വിസ്വരാ യേന .
വീണാഃ പരിവാദിന്യസ്തേന കിലാബ്ജേ തവോപമാ ന ഗിരാം ..

അംബാഭിജാതവാണീധനരസമാധുര്യചൗര്യകാരീ തേ .
അതിമർദനാസഹിഷ്ണുർമുഷിതരസാനേഷ മുഞ്ചതീവേക്ഷുഃ ..

നീരതയേവ മരന്ദോ ഭാവ്യശ്ശ്രവണേ തവാബ്ധിജേ വാചാം .
സ്വാദിത ഏവ സുധായാഃ സ്വാദ്യേതി ഖ്യാതിരപി ന മാധുര്യാത് ..

അധരേണ ബന്ധുജീവം മുഖതഃ പ്രാഭാതികം ച രാജീവം .
ദൂരീകരോഷി കിം വാ ദേവി ത്വം സർവജീവകരുണാർദ്രാ ..

അന്തേ വസൻ ദ്വിജാനാമവദാതാനാമതിസ്ഫുരദ്രൂപഃ .
അംബ തവാധികമധരോ ബിംബപ്രതിബിംബയോഗ്യോഽഭൂത് ..

സന്തതപല്ലവയോഗേ മുക്തിർന ശുചേരപീതി വാങ് മിഥ്യാ .
ദേവി തവാധര പല്ലവസംയോഗേഽധ്യമലാ ദ്വിജാ മുക്താഃ ..

തവ തടിനീപതികന്ഥേ ദ്വിജപടലീ വദനശുക്തിമുക്താശ്രീഃ .
അതനുയശോബീജാനാമങ്കുരപങ്ക്തിഃ പരിസ്ഫുരന്തീവ ..

വദനം സുധാകരസ്തേ വാരിധികന്യേ ന തത്ര സന്ദേഹഃ .
വചനാപദേശമേതന്നോ ചേദമൃതം കഥം തതഃ പ്രഭവേത് ..

ഭ്രൂയുഗളം ഭൃഗുതനയേ കുസുമശരസ്യേവ സവ്യസാചിതയാ .
ആരോപിതാക്ഷിബാണം കോദണ്ഡദ്വന്ദ്വമിതി മതിം ദത്തേ ..

അബ്ജദ്വയമപി വിജിതം തവ കമലേ വക്ത്രശോഭയാ തത്ര .
അംബരമേകം ശരണം ശംബരമപരം ച സത്വരം പ്രാപത് ..

ചന്ദ്രോഽഭവദ് വിഷാദീ ചാരു മുഖം ദേവി താവകം വീക്ഷ്യ .
കുക്ഷിഗതം ഗരമസ്യ പ്രാഹുഃ പങ്കം കലങ്കമിത്യേകേ ..

വിജിതസ്ത്വന്മുഖകാന്ത്യാ ദേവി നിരാശോ നിശാകരോ ജീവേ .
ഭൃഗുപതനം കുരുതേഽസാവസ്തമഥ വ്യാജതോഽന്വഹം തൂർണം ..

അംബ യതസ്തേ നിതരാമാനനകാന്ത്യാ തൃണീകൃതശ്ചന്ദ്രഃ .
ആതഃ കില തൃണബുദ്ധയാ മുഞ്ചതി നൈനം മൃഗഃ കദാചിദപി ..

ദേവി തവാനനതുലനാമഭിലഷതാം സാഗസാം സരോജാനാം .
മജ്ജനമപ്സു ച ബന്ധഃ ശൈവലപാശേന ഷട്പദൈഃ പ്രസൃതിഃ ..

ദ്വിജരാജസ്യാപ്യബ്ജേ ത്വദ്വക്ത്രേണോപമാനരഹിതേന .
സമതാഭിലാഷദോഷാദ്ദോഷാകരതാ വിധോർദുരന്താഭൃത് ..

പദ്മേ പരസ്വഹരണം ദോഷായേതി പ്രഭാഷണം മിഥ്യാ .
അപഹൃത്യ രാജലക്ഷ്മീമപദോഷം യദ്വിഭാതി തേ വക്ത്രേം ..

നിർജിത്യ നീരജാതം നിഖിലം മുരവൈരിസുന്ദരി മുഖേന .
ആസനമാകലിതം തേ നൂനം പദ്മാസനാസി തേനൈവ ..

ത്വദ്വദനാഭിഭവോദ്യത്താപാതിശയം ദിവാനിശം പദ്മം .
അംഭസി വാസം കുരുതേ നൂനം തസ്യാപനോദനായാബ്ജേ ..

സന്തതമിത്രവിരോധീ ദോഷാസക്തഃ കലങ്കവാനിന്ദുഃ .
തവ വദനേന കഥം വാ കമലേ കല്യാണഗുണഭുവാ തുല്യഃ ..

ദേവി തവാനനചന്ദ്രപ്രസാദഭിക്ഷാടനേന രാജാപി .
പൂർണശ്ചന്ദ്രികയാഹോ ജീവഞ്ജീവസ്യ തൃപ്തിമാതനുതേ ..

ത്വത്കണ്ഠകാന്തിഭാഗ്യം ദൃഷ്ട്വാ ശംഖാസ്സഹസ്രശോ ദേവി .
തല്ലാഭായ പയോധേരന്തം ഗത്വാ ചിരം തപസ്യന്തി ..

കണ്ഠേന തേ ഹൃതശ്രീഃ കമലേ വിമലോഽപി സന്തതം കംബുഃ .
ഘുമുഘുമുനിനദവ്യാജാത് ക്രോശതി രാജ്ഞാം പുരഃ സമയദർശീ ..

ത്വത്കണ്ഠകാന്തിജനിതം ഭഞ്ജനമാഖ്യാതുമുദ്യതാ ജലജാഃ .
വിസ്തൃതജനശബ്ദതയാ പദ്മിന്യാമ്രേഡയന്തി ഭം ഭമിതി ..

കംബുഭ്രമേണ കണ്ഠം ചക്രഭ്രാന്ത്യാ നിതംബബിംബമപി .
പരിമൃശതി തേ കരാഭ്യാം പതിരതിദുർഭേദശംഖചക്രാഭ്യാം ..

ബാഹൂ ശിരീഷമാലാമാർദവകീതന്ദുമർദനേ രാഹൂ .
സേതൂ സമഗ്രശോഭാസിന്ധോർമന്യേ സമുദ്രകന്യേ തേ ..

അതിസുരഭിഃ കരപദ്മോ വാഞ്ഛിതദാനൈർന കേവലം ഗന്ധൈഃ .
വാരിധിപുത്രി വദാന്യം കവിമുക്തം ദേവി കല്പമാതനുതേ ..

ദേവി കരേണ ഭവത്യാ ദത്തസമസ്തേപ്സിതേന ഭക്താനാം .
സ്പർശനദൂരീകരണം സോദരഗീർവാണശാഖിനാമുചിതം ..

ദേവി തവാനനഭാസാ പരിഭൂതഃ പർവചന്ദ്രമാ നൂനം .
തേന ഹി ശശ്വത് പരിധിവ്യാജപ്രാകാരമധ്യമധ്യാസ്തേ ..

പദ്മകുലം പരിഭൂതം പദ്മേ ത്വത്പാണിപദ്മരാഗേണ .
തത്പ്രേഷിതം സദൈകം ത്വത്പാണിം സേവതേ സരോജാതം ..

അനുദിനമർകാഭിമുഖം വനഭുവി ശൈവാലവൽകലം കമലം .
തപ്ത്വാ തപോഽതിതീവ്രം പ്രാപത് ത്വത്പാണിപദ്മസാധർമ്യം ..

ഹാരാ വിഭാന്തി ഗൗരാ ഹരിദയിതേ തേ മുഖോഡുരാജസ്യ .
സേവാർഥമാഗതാനാം താരാണാമിവ ഗണാഃ പുരോഗാണാം ..

ഹാരലതാ തബ പദ്മേ സുകുമാരസ്യാംഗഭൂകുമാരസ്യ .
ക്രീഡാമൃണാലഡോലശങ്കാം നാങ്ക്രൂരയത്യസൗ കസ്യ ..

തവ കുചഗിരിതടവാസീ കൃതരോമാളീനകന്യകാസ്നാനഃ .
കശ്ചന മുക്താഹാരോ യോഗീവാഭാതി നിത്യശുദ്ധാത്മാ ..

ഉന്നതിമുരോജയുഗ്മേ പദ്മേ ദൃഷ്ടൈവ പർവതാസ്ത്രപയാ .
ഉദധൗ ചിരം നിലീനാ ഭീത്യാ ശക്രാദിതി പ്രഥാമാത്രം ..

തവ കുചകുംഭദ്വന്ദ്വേ ബദ്ധസ്പർധാനി ഡാഡിമഫലാനി .
തുലനാഹീനാഃ കീരാസ്തുണ്ഡൈരേതാനി ഖണ്ഡയന്ത്യബ്ജേ ..

കോദണ്ഡസ്യ പുരാരേരുദ്ദണ്ഡസ്യാപി ഹന്ത ബാണസ്യ .
കവലീകുരുതേ മാനം പുഗലീ കുചയോസ്തവേന്ദിരേ യുഗപത് ..

സന്തതമുക്താഹാരാവപി തവ പീനൗ പയോധരൗ ഭാതഃ .
തേന കഥം പീനത്വം ദേവി ഭവേദ്രാത്രിഭോജനേ മാനം ..

കനകമഹീഘരഗൗരവകബലീകരണാദിവാതിപീനമപി .
മുക്താഹാരവദാസ്തേ സ്തനയുഗലം ദേവി താവകം ചിത്രം ..

ഇതി കില ദർശനരീതിഃ കാര്യമുപാദാനകാരണാഭിത്രം .
ദേവി തവ സ്തനകുംഭൗ ചക്രാഭിന്നൗ കഥം ന ദൃശ്യേതേ ..

കലയതി ദണ്ഡഃ കലശം സർവൈർബഹുശഃ ശ്രുതം ച ദൃഷ്ടം ച .
ജനനി തവ സ്തനകലശോ ജനയതി മധുവൈരിമാനദണ്ഡമഹോ ..

സർവാരീണാം ജേതാ ദുർവാരേണൈവ ദേവി ചക്രേണ .
ഹന്ത കഥം തേ വിജിതഃ കാന്തോ വക്ഷോരുഹാത്മചക്രേണ ..

കല്ലോലിനീശകന്യേ കലയേ രോമാവലിപ്രഭേദേന .
തവ കാന്തിവാർധിമധ്യേ നവജലദശ്യാമകോ ഹരിഃ ശേതേ ..

നാമീസരോവനാന്തഃ ക്രീഡന്മദനദ്വിപാധിപോത്ക്ഷിതാം .
ശൈവാലവല്ലരീം തേ രോമലതാം ദേവി കഥയന്തി ..

മധ്യഃ പ്രഥമം മാനം മഹിതഗുണൗഘസ്തവാനുമാനമപി .
വപുരപ്യുപമിതിശബ്ദം ദൂരീകുരുതേഽമ്ബ കേന വർണ്യാസി ..

തവ കുചകുംഭസ്യ ഗുരോരന്തേവാസീ വിവേകഹീനസ്യ .
ദർശനയോഗ്യോ നാഭൂന്മധ്യസ്തേ ദേവി നാസ്തിവാദരതഃ ..

പ്രത്യക്ഷാവിഷയത്വാദതിരിക്തത്വാദനംഗജനകത്വാത് .
ദേവി വലിശ്രീഭജനാന്മധ്യസ്തേ കാന്തവിഭ്രമം തനുതേ ..

ചിന്താമണിവാദസ്തേ കരയോർദ്ദശി കാമശാസ്ത്രവാദോഽബ്ജേ .
മധ്യേ മായാവാദോ ഗൗരവവാദഃ പയോധരദ്വന്ദ്വേ ..

മഹദണുപരിമാണഗതം വിശ്രാന്തം ദേവി താരതമ്യം തേ .
വക്ഷോരുഹേ ച മധ്യേ ന വ്യോമാദൗ ന ചാപി പരമാണൗ ..

കഠിനാത്മാഘഃ കുരുതേ സർവം കമലേ കൃഥം സനാമിഗതം .
ദൃഷ്ടമിതീദമുരോജേ മധ്യം കൃശമേവ കുർവതി സ്പഷ്ടം ..

തുംഗപയോധരശൈലദ്വന്ദ്വോദ്വഹനേന സന്തതം ദേവി .
പശ്യാമി കാര്യമുചിതം മധ്യസ്യ ശ്രീമതോഽപി തേ മാതഃ ..

തവ രോമരാജിയമുനാനിത്യസ്ഫീതേഽപി മധ്യദേശേഽസ്മിൻ .
ക്ഷാമകഥാ കഥമബ്ജേ നാഭീസരസീപരിഷ്കൃതേഽപി സദാ ..

രോമാലിയൂപദണ്ഡേ ചിതപശും ബദ്ധുമംബ തേ പത്യുഃ .
സമ്പാദിതേവ രശനാ ത്രിവലിമിഷേണാംഗജന്മനാധ്വരിണാ ..

ആഭാതി നാഭിരബ്ജേ തവ തനുജനുഷാ നിഷാദവീരേണ .
പാതയിതും ഹരിചിത്തം മത്തഭം സംഭൃതോ യഥാ ഗർതഃ ..

ശങ്കേ തവാംബ നാഭിം ശംബരരിപുണാ വിജിത്യ ദൈത്യാരിം .
രോമാളിനീലരത്നസ്തംഭനിഖാതായ സംഭൃതം വഭ്രം ..

നിവസന്തി യേഽധികാഞ്ചി പ്രായഃ ശുദ്ധാ ഭവന്തി തേ മുക്താഃ .
ഇതി മണിരശനാം വികസന്മുക്താവല്യാംബ ദർശയസ്യദ്ധാ ..

അവനതമൗലിരിയം ത്വാമഞ്ജലിമഭിനീയ കുസുമകോശമിഷാത് .
രംഭാ തവോരുവിജിതാ സംഭാവയതീതി മേ തർകഃ ..

കുംഭീന്ദ്രകുംഭവൃത്തം ജാനുദ്വന്ദ്വം തവാപ്രതിദ്വന്ദ്വം .
ഹന്ത ഹരേരപി ധൈര്യം ഹരതേ ദുർധർഷമബ്ധിരാജസുതേ ..

ജംഘാ നിഷംഗശങ്കാമങ്കൂരയത്യംഗജേന്മനോ ദേവി .
തത് ഖലു തദഗ്രഭാഗേ പശ്ചശരസ്ഫൂർതിമംഗുലിവ്യാജാത് ..

തവ പദഭാവഃ പ്രാപ്തസ്താമരസേനേതി നാത്ര സന്ദേഹഃ .
കഥമന്യഥാ സ യോഗോ ഭാവീ കാന്തേന ഹംസകേനാബ്ജേ ..

പാദതലേ പരിദൃശ്യം പദ്മേ രേഖാത്മനാ സ്വയം ഗൂഢം .
തവ ചരണശ്രീമിക്ഷാചരണം വിദധാതി സജ്യമംബുരുഹം ..

അർകോഽപി യസ്യ ഭജനാദജനി ശ്രീമാനനേന ജനിതശ്രീഃ .
പദ്മം കഥം നു തുലനാമർഹതി പാദേന താവകേനാബ്ജേ ..

ജലജം കൃതസങ്കോചം ദ്വിജരാജസ്ഥാപി ദർശനേ ദേവി .
മാനിതമധുപം ശിരസാ കഥമധിരോഹേത് പദേന തേ തുലനാം ..

സാമ്രാജ്യേഽമ്ബുരുഹാണാം തവ പദമീഡേഽഭിഷിച്യമാനമിവ .
ജാതിസ്മൃതാം ജനാനാം ഹേതുഃ സഞ്ചിന്തിതാർഥസിദ്ധീനാം ..

മദനദരീജനകബരീനലിനൈരുദ്യന്മരന്ദസംസാരേ .
പാതു പരാകൃതപദ്മം മാതുർജഗതാം പദാംബുജാതം മാം ..

സംഭാവിതാപചാരം ജ്ഞാനാജ്ഞാനാത്തവ സ്തുതിവ്യാജാത് .
ദേവി സഹസ്വ ദയാലോ ദേഹി മമ ശ്രീപതൗ പരാം ഭക്തിം ..

ജഗതി ഖ്യാതിരശേഷാത്ത്വകുലേയേതി സർവസിദ്ധാന്തം .
ജനനി കഥം തേ ഖ്യാതേരുത്പത്തിഃ ശ്രൂയതേ പുരാണാദൗ ..

യജ്ഞവരാഹഃ ശ്രീമാൻ വാധൂലംബാലജോ ധീമാൻ .
ലക്ഷ്മീ ശതകമതാനീദക്ഷീണാനന്ദകന്ദലീകന്ദം ..

Ramaswamy Sastry and Vighnesh Ghanapaathi

Other stotras