ఆనందం దిశతు శ్రీహస్తిగిరౌ స్వస్తిదా సదా మహ్యం .
యా కౌతుకం విధత్తే సాకృతేనావలోకనేన హరేః ..

యన్నామ కీర్తనీయం శ్రీరిత్యాదౌ ప్రియం హరేర్నామ్నాం .
సా మే సమస్తజననీ సంతతముదయాయ భూయసే భూయాత్ ..

శ్రీవరదేశ్వరదయితే వాంఛామి త్వాం యథామతి స్తోతుం .
స్వల్పోఽపి డింభజల్పో మాతుః ప్రీతిం కథం న సంజనయేత్ ..

మురరిపుమోహనధామ్నే మూర్తివినిర్ధూతవిష్ఫురద్ధేమ్నే .
దివిషదమేయవిభూమ్నే లక్ష్మీనామ్నే పరం నమో భుమ్నే ..

కరిగిరినాయకకాంతే దాంతజనస్వాంతపంకజనిశాంతే .
మయి భవమరణాశ్రాంతే కరుణాం శరణాగతే కురు ప్రగుణాం ..

వాచామకృత్రిమాణామపి మునిమనసామగోచరే దేవి .
త్వద్వర్ణనే మదీయాం కాంక్షాం సఫలాం కరోతు తే కరుణా ..

మాఖద్విధు వింబాస్యే మంగలసౌమ్యాకృతే గురుశ్రోణి .
భృగునందిని మందగతే రోమలతాహే జయాబ్ధికులకేతో ..

ధన్యం ప్రసూనగర్భం ధమ్మిల్లం దేవి తావకం మన్యే .
ప్రసవశరేణ న్యస్తం తూణం బాణౌఘపూర్ణమర్ణవజే ..

త్వత్కేశపాశశోభాపరిమోషాణాం ఫలం పయోదానాం .
దేవి తటిద్గుణవంధో నోదనమనిలైః పలాయనం దిక్షు ..

నిందతి నీరధికన్యే కచనిచయస్తే కలాపినం కాంత్యా .
అస్యతి బర్హం న కథం భుజంగవృత్తిశ్చ పక్షపాతీ చ ..

జయతు విపక్షం పద్మే బర్హిణవర్హం త్వదీయకేశభరం .
త్వత్కాంతస్య సపక్షం ఘనమపి కాంత్యా కథం పరాకురుతే ..

వర్హం విగర్హితాభం శస్తేనానేన కేశహస్తేన .
మత్వాభవన్మయూరా మందాశా జీవితే వృతవిషాశాః ..

దివ్యామంబుధికన్యే దృష్ట్వా కేశశ్రియం తవాంభోదాః .
ఆరుహ్యాద్రిశ్రేష్ఠం కురుతే త్రపయేవ జీవనత్యాగం ..

సిందూరసుందరీ తే పద్మే సీమంతపద్ధతిర్భాతి .
వర్షావలాహకస్థా విద్యుల్లేఖేవ వీతచాంచల్యా ..

వేణీమంబుధికన్యే భృంగశ్రేణీమివ స్ఫురంతీ తే .
శంబరవైరికృపాణీం శంకే మానాపహారిణీం శౌరేః ..

ఫాలేనాభిముఖేన ప్రతిమాకాంక్షీ తవేందురంబుధిజే .
అర్ధాకృతిః కలాభిః పూర్ణో భవతి క్రియాసమభిహారాత్ ..

కర్ణావతంసలక్ష్మీ కలయతి కమలే విశాలదృష్టిస్తే .
నీలోత్పలస్య కృత్యం కిమితి శ్రుతిమూలశాలినీ చింత్యం ..

వందీకృతం కటాక్షైరిందీవరమేతదిందిరే శ్రవసి .
న్యస్తం పునః పునస్తన్నిత్యం శంకీవ వీక్షతే చక్షుః ..

నయనముదంచత్కరుణం నానాశృంగారమంగళాకారం .
దేవి త్వదాశ్రితానాం కర్ణమతిక్రవ్య కాఇక్షితం దత్తే ..

కల్లోలినీశకన్యే త్వల్లోచనకాంతిలిప్సయా కిం వా .
ద్విజరాజపాదసేవాం జీవంజీవః కరోతి సర్వోఽపి ..

స్ఫురతి తవ శ్రుత్యంతే పతిరితి యత్ ప్రాహురంబ వేదవిదః .
శ్రుత్యంతమేతి తత్తే దృష్టిః కాంతావలోకనాసక్తా ..

ఉల్లంఘితశ్రుతీనాముదధిసుతే శోభనం నహీతి మృషా .
యేన తవేదం వ్యక్తం శ్రుతిపథముల్లంఘ్య శోభనం నయనం ..

శ్రుత్యంతే కృతవసతిః పాద్మరుచిం తే ప్రకాశయంత్యబ్జే .
పరమార్గదృష్టిసృష్టాం దృష్టిరియం వైష్ణవీం చ దూషయతి ..

దేవి నిమిత్తగుణస్య క్వాపి న దృష్టం హి కార్యసంక్రమణం .
అనృతమితీదం వచనం యత్వదపాంగాదనంగసద్భావః ..

ఆద్యావతారశోభామంగీకుర్వాణసాత్మనాథస్య .
నిరుపమసుషమం కో వా చక్షుస్తవ దేవి దక్షిణః స్తోతుం ..

అసృజత్ కమలం ధాతా తులనాం దేవీక్షణస్య తే వాంఛన్ .
అసదృశభావాదమునా నామ ప్రాప్తం జలజమిత్యుచితం ..

లోకజనన్యతిభాస్వల్లోచనశఫరీవిరాజమానం తే .
కాంతం నాసావంశం కేతుం మదనస్య కే న శంసంతి ..

త్వనాసికాత్తగంధస్త్రపయేవాఘోముఖస్తిలప్రసవః .
ముహురశ్రూణి ప్రాయో ముంచతి మాతర్మరందవిందుమిషాత్ ..

నాసామౌక్తికమేతన్మన్యే వారాశికన్యకే ధన్యం .
తవ ముఖతారాధిపతేః కామాదేకం కలజ్ఞమంగగతం ..

ముక్తోత్పత్తిస్థానం సరసిజమితి యత్ సమస్తకవిసిద్ధం .
తద్వయక్తీకరణం తే నాసాముక్తాఫలస్య దేవి ఫలం ..

పరిభూతకుందకుసుమం భాసా నాసాగ్రభాస్వరం పద్మే .
ముక్తాఫలం మురారేర్మోహనగుడికేవ మాన్మథీ భాతి ..

భాసా విరాజమానం నాసాముక్తాఫలం మమ స్ఫురతి .
అంబ తవాననపద్మే స్మితరుచిహంసీప్రసూతమండమివ ..

దుర్వృత్తః ఖలు లోకే కమలే కుర్యాత్ సతాం తిరస్కారం .
నిత్యసువృత్తేన కథం నాసామణినా సతాం తిరస్కారః ..

కర్ణేన తేఽబ్ధికన్యే తాటంకాదేః ప్రతీయతే శోభా .
కర్ణస్య హి స్వభావః శ్రీమంతం యత్ స్వమాశ్రయం కురుతే ..

తర్కో మమాబ్ధికన్యే హాటకతాటంకచక్రమర్క ఇతి .
యద్యేతదేష న స్యాత్ కర్ణాసక్తిః కథం భవేదస్య ..

భాతి కపోలః కమలే పత్యుః శృంగారమణిమయాదర్శః .
ప్రతిఫలితతన్ముఖోఽయం హృద ఇవ సోఽధోవికస్వరాంబురుహః ..

మధురవచోగణనాయాం మాతస్త్వద్గీరభూదియం ప్రథమా .
నైవ ద్వితీయవార్తా కోకిలవాదే కుతో ను పంచమతా ..

సామ్యాభిలాషదోషం సమ్మార్ష్టుం త్వద్విరా చిరాదిక్షోః .
చక్రే పంచశరస్తం చాపానమనాపదేశతః ప్రణతం ..

అర్ణవకన్యే ధన్యామాకర్ణయతస్త్వదీరితాం వాచం .
శుకపికవచనశ్రవణం శ్రుతిపుటకటు దేవి కస్య వా న భవేత్ ..

కస్య గిరస్తే శ్రోతుః కమలే వదనారవిందకందలితాః .
న భవేన్మహతీ ప్రీతిర్నారదమేకం వినా మునీశానం ..

మకరందాః సునరసాః శుకపికవాచోఽపి విస్వరా యేన .
వీణాః పరివాదిన్యస్తేన కిలాబ్జే తవోపమా న గిరాం ..

అంబాభిజాతవాణీధనరసమాధుర్యచౌర్యకారీ తే .
అతిమర్దనాసహిష్ణుర్ముషితరసానేష ముంచతీవేక్షుః ..

నీరతయేవ మరందో భావ్యశ్శ్రవణే తవాబ్ధిజే వాచాం .
స్వాదిత ఏవ సుధాయాః స్వాద్యేతి ఖ్యాతిరపి న మాధుర్యాత్ ..

అధరేణ బంధుజీవం ముఖతః ప్రాభాతికం చ రాజీవం .
దూరీకరోషి కిం వా దేవి త్వం సర్వజీవకరుణార్ద్రా ..

అంతే వసన్ ద్విజానామవదాతానామతిస్ఫురద్రూపః .
అంబ తవాధికమధరో బింబప్రతిబింబయోగ్యోఽభూత్ ..

సంతతపల్లవయోగే ముక్తిర్న శుచేరపీతి వాఙ్ మిథ్యా .
దేవి తవాధర పల్లవసంయోగేఽధ్యమలా ద్విజా ముక్తాః ..

తవ తటినీపతికంథే ద్విజపటలీ వదనశుక్తిముక్తాశ్రీః .
అతనుయశోబీజానామంకురపంక్తిః పరిస్ఫురంతీవ ..

వదనం సుధాకరస్తే వారిధికన్యే న తత్ర సందేహః .
వచనాపదేశమేతన్నో చేదమృతం కథం తతః ప్రభవేత్ ..

భ్రూయుగళం భృగుతనయే కుసుమశరస్యేవ సవ్యసాచితయా .
ఆరోపితాక్షిబాణం కోదండద్వంద్వమితి మతిం దత్తే ..

అబ్జద్వయమపి విజితం తవ కమలే వక్త్రశోభయా తత్ర .
అంబరమేకం శరణం శంబరమపరం చ సత్వరం ప్రాపత్ ..

చంద్రోఽభవద్ విషాదీ చారు ముఖం దేవి తావకం వీక్ష్య .
కుక్షిగతం గరమస్య ప్రాహుః పంకం కలంకమిత్యేకే ..

విజితస్త్వన్ముఖకాంత్యా దేవి నిరాశో నిశాకరో జీవే .
భృగుపతనం కురుతేఽసావస్తమథ వ్యాజతోఽన్వహం తూర్ణం ..

అంబ యతస్తే నితరామాననకాంత్యా తృణీకృతశ్చంద్రః .
ఆతః కిల తృణబుద్ధయా ముంచతి నైనం మృగః కదాచిదపి ..

దేవి తవాననతులనామభిలషతాం సాగసాం సరోజానాం .
మజ్జనమప్సు చ బంధః శైవలపాశేన షట్పదైః ప్రసృతిః ..

ద్విజరాజస్యాప్యబ్జే త్వద్వక్త్రేణోపమానరహితేన .
సమతాభిలాషదోషాద్దోషాకరతా విధోర్దురంతాభృత్ ..

పద్మే పరస్వహరణం దోషాయేతి ప్రభాషణం మిథ్యా .
అపహృత్య రాజలక్ష్మీమపదోషం యద్విభాతి తే వక్త్రేం ..

నిర్జిత్య నీరజాతం నిఖిలం మురవైరిసుందరి ముఖేన .
ఆసనమాకలితం తే నూనం పద్మాసనాసి తేనైవ ..

త్వద్వదనాభిభవోద్యత్తాపాతిశయం దివానిశం పద్మం .
అంభసి వాసం కురుతే నూనం తస్యాపనోదనాయాబ్జే ..

సంతతమిత్రవిరోధీ దోషాసక్తః కలంకవానిందుః .
తవ వదనేన కథం వా కమలే కల్యాణగుణభువా తుల్యః ..

దేవి తవాననచంద్రప్రసాదభిక్షాటనేన రాజాపి .
పూర్ణశ్చంద్రికయాహో జీవంజీవస్య తృప్తిమాతనుతే ..

త్వత్కంఠకాంతిభాగ్యం దృష్ట్వా శంఖాస్సహస్రశో దేవి .
తల్లాభాయ పయోధేరంతం గత్వా చిరం తపస్యంతి ..

కంఠేన తే హృతశ్రీః కమలే విమలోఽపి సంతతం కంబుః .
ఘుముఘుమునినదవ్యాజాత్ క్రోశతి రాజ్ఞాం పురః సమయదర్శీ ..

త్వత్కంఠకాంతిజనితం భంజనమాఖ్యాతుముద్యతా జలజాః .
విస్తృతజనశబ్దతయా పద్మిన్యామ్రేడయంతి భం భమితి ..

కంబుభ్రమేణ కంఠం చక్రభ్రాంత్యా నితంబబింబమపి .
పరిమృశతి తే కరాభ్యాం పతిరతిదుర్భేదశంఖచక్రాభ్యాం ..

బాహూ శిరీషమాలామార్దవకీతందుమర్దనే రాహూ .
సేతూ సమగ్రశోభాసింధోర్మన్యే సముద్రకన్యే తే ..

అతిసురభిః కరపద్మో వాంఛితదానైర్న కేవలం గంధైః .
వారిధిపుత్రి వదాన్యం కవిముక్తం దేవి కల్పమాతనుతే ..

దేవి కరేణ భవత్యా దత్తసమస్తేప్సితేన భక్తానాం .
స్పర్శనదూరీకరణం సోదరగీర్వాణశాఖినాముచితం ..

దేవి తవాననభాసా పరిభూతః పర్వచంద్రమా నూనం .
తేన హి శశ్వత్ పరిధివ్యాజప్రాకారమధ్యమధ్యాస్తే ..

పద్మకులం పరిభూతం పద్మే త్వత్పాణిపద్మరాగేణ .
తత్ప్రేషితం సదైకం త్వత్పాణిం సేవతే సరోజాతం ..

అనుదినమర్కాభిముఖం వనభువి శైవాలవల్కలం కమలం .
తప్త్వా తపోఽతితీవ్రం ప్రాపత్ త్వత్పాణిపద్మసాధర్మ్యం ..

హారా విభాంతి గౌరా హరిదయితే తే ముఖోడురాజస్య .
సేవార్థమాగతానాం తారాణామివ గణాః పురోగాణాం ..

హారలతా తబ పద్మే సుకుమారస్యాంగభూకుమారస్య .
క్రీడామృణాలడోలశంకాం నాంక్రూరయత్యసౌ కస్య ..

తవ కుచగిరితటవాసీ కృతరోమాళీనకన్యకాస్నానః .
కశ్చన ముక్తాహారో యోగీవాభాతి నిత్యశుద్ధాత్మా ..

ఉన్నతిమురోజయుగ్మే పద్మే దృష్టైవ పర్వతాస్త్రపయా .
ఉదధౌ చిరం నిలీనా భీత్యా శక్రాదితి ప్రథామాత్రం ..

తవ కుచకుంభద్వంద్వే బద్ధస్పర్ధాని డాడిమఫలాని .
తులనాహీనాః కీరాస్తుండైరేతాని ఖండయంత్యబ్జే ..

కోదండస్య పురారేరుద్దండస్యాపి హంత బాణస్య .
కవలీకురుతే మానం పుగలీ కుచయోస్తవేందిరే యుగపత్ ..

సంతతముక్తాహారావపి తవ పీనౌ పయోధరౌ భాతః .
తేన కథం పీనత్వం దేవి భవేద్రాత్రిభోజనే మానం ..

కనకమహీఘరగౌరవకబలీకరణాదివాతిపీనమపి .
ముక్తాహారవదాస్తే స్తనయుగలం దేవి తావకం చిత్రం ..

ఇతి కిల దర్శనరీతిః కార్యముపాదానకారణాభిత్రం .
దేవి తవ స్తనకుంభౌ చక్రాభిన్నౌ కథం న దృశ్యేతే ..

కలయతి దండః కలశం సర్వైర్బహుశః శ్రుతం చ దృష్టం చ .
జనని తవ స్తనకలశో జనయతి మధువైరిమానదండమహో ..

సర్వారీణాం జేతా దుర్వారేణైవ దేవి చక్రేణ .
హంత కథం తే విజితః కాంతో వక్షోరుహాత్మచక్రేణ ..

కల్లోలినీశకన్యే కలయే రోమావలిప్రభేదేన .
తవ కాంతివార్ధిమధ్యే నవజలదశ్యామకో హరిః శేతే ..

నామీసరోవనాంతః క్రీడన్మదనద్విపాధిపోత్క్షితాం .
శైవాలవల్లరీం తే రోమలతాం దేవి కథయంతి ..

మధ్యః ప్రథమం మానం మహితగుణౌఘస్తవానుమానమపి .
వపురప్యుపమితిశబ్దం దూరీకురుతేఽమ్బ కేన వర్ణ్యాసి ..

తవ కుచకుంభస్య గురోరంతేవాసీ వివేకహీనస్య .
దర్శనయోగ్యో నాభూన్మధ్యస్తే దేవి నాస్తివాదరతః ..

ప్రత్యక్షావిషయత్వాదతిరిక్తత్వాదనంగజనకత్వాత్ .
దేవి వలిశ్రీభజనాన్మధ్యస్తే కాంతవిభ్రమం తనుతే ..

చింతామణివాదస్తే కరయోర్ద్దశి కామశాస్త్రవాదోఽబ్జే .
మధ్యే మాయావాదో గౌరవవాదః పయోధరద్వంద్వే ..

మహదణుపరిమాణగతం విశ్రాంతం దేవి తారతమ్యం తే .
వక్షోరుహే చ మధ్యే న వ్యోమాదౌ న చాపి పరమాణౌ ..

కఠినాత్మాఘః కురుతే సర్వం కమలే కృథం సనామిగతం .
దృష్టమితీదమురోజే మధ్యం కృశమేవ కుర్వతి స్పష్టం ..

తుంగపయోధరశైలద్వంద్వోద్వహనేన సంతతం దేవి .
పశ్యామి కార్యముచితం మధ్యస్య శ్రీమతోఽపి తే మాతః ..

తవ రోమరాజియమునానిత్యస్ఫీతేఽపి మధ్యదేశేఽస్మిన్ .
క్షామకథా కథమబ్జే నాభీసరసీపరిష్కృతేఽపి సదా ..

రోమాలియూపదండే చితపశుం బద్ధుమంబ తే పత్యుః .
సంపాదితేవ రశనా త్రివలిమిషేణాంగజన్మనాధ్వరిణా ..

ఆభాతి నాభిరబ్జే తవ తనుజనుషా నిషాదవీరేణ .
పాతయితుం హరిచిత్తం మత్తభం సంభృతో యథా గర్తః ..

శంకే తవాంబ నాభిం శంబరరిపుణా విజిత్య దైత్యారిం .
రోమాళినీలరత్నస్తంభనిఖాతాయ సంభృతం వభ్రం ..

నివసంతి యేఽధికాంచి ప్రాయః శుద్ధా భవంతి తే ముక్తాః .
ఇతి మణిరశనాం వికసన్ముక్తావల్యాంబ దర్శయస్యద్ధా ..

అవనతమౌలిరియం త్వామంజలిమభినీయ కుసుమకోశమిషాత్ .
రంభా తవోరువిజితా సంభావయతీతి మే తర్కః ..

కుంభీంద్రకుంభవృత్తం జానుద్వంద్వం తవాప్రతిద్వంద్వం .
హంత హరేరపి ధైర్యం హరతే దుర్ధర్షమబ్ధిరాజసుతే ..

జంఘా నిషంగశంకామంకూరయత్యంగజేన్మనో దేవి .
తత్ ఖలు తదగ్రభాగే పశ్చశరస్ఫూర్తిమంగులివ్యాజాత్ ..

తవ పదభావః ప్రాప్తస్తామరసేనేతి నాత్ర సందేహః .
కథమన్యథా స యోగో భావీ కాంతేన హంసకేనాబ్జే ..

పాదతలే పరిదృశ్యం పద్మే రేఖాత్మనా స్వయం గూఢం .
తవ చరణశ్రీమిక్షాచరణం విదధాతి సజ్యమంబురుహం ..

అర్కోఽపి యస్య భజనాదజని శ్రీమాననేన జనితశ్రీః .
పద్మం కథం ను తులనామర్హతి పాదేన తావకేనాబ్జే ..

జలజం కృతసంకోచం ద్విజరాజస్థాపి దర్శనే దేవి .
మానితమధుపం శిరసా కథమధిరోహేత్ పదేన తే తులనాం ..

సామ్రాజ్యేఽమ్బురుహాణాం తవ పదమీడేఽభిషిచ్యమానమివ .
జాతిస్మృతాం జనానాం హేతుః సంచింతితార్థసిద్ధీనాం ..

మదనదరీజనకబరీనలినైరుద్యన్మరందసంసారే .
పాతు పరాకృతపద్మం మాతుర్జగతాం పదాంబుజాతం మాం ..

సంభావితాపచారం జ్ఞానాజ్ఞానాత్తవ స్తుతివ్యాజాత్ .
దేవి సహస్వ దయాలో దేహి మమ శ్రీపతౌ పరాం భక్తిం ..

జగతి ఖ్యాతిరశేషాత్త్వకులేయేతి సర్వసిద్ధాంతం .
జనని కథం తే ఖ్యాతేరుత్పత్తిః శ్రూయతే పురాణాదౌ ..

యజ్ఞవరాహః శ్రీమాన్ వాధూలంబాలజో ధీమాన్ .
లక్ష్మీ శతకమతానీదక్షీణానందకందలీకందం ..

Ramaswamy Sastry and Vighnesh Ghanapaathi