ഗർഗാചാര്യന്‍റെ വെളിപ്പെടുത്തൽ: ആരാണ് രാധ

കൃഷ്ണന്‍റെയും ബലരാമന്‍റെയും നാമകരണം നടത്താൻ ഗർഗാചാര്യൻ വൃന്ദാവനത്തിലെത്തി. ചടങ്ങിനുശേഷം, ആചാര്യൻ വളരെ സവിശേഷമായ മറ്റൊരു വീട് സന്ദർശിക്കാൻ തീരുമാനിച്ചു; രാധയുടെ പിതാവായ വൃഷഭാനുവിന്‍റെ വീട്.

വൃഷഭാനു അദ്ദേഹത്തെ ഊഷ്മളമായി സ്വാഗതം ചെയ്തു. ഗർഗാചാര്യനെപ്പോലുള്ള ഒരു ദിവ്യാത്മാവിന്‍റെ  സന്ദർശനം അനുഗ്രഹവും സമാധാനവും സന്തോഷവും കൊണ്ടുവരുമെന്ന്  അദ്ദേഹത്തിന് അറിയാമായിരുന്നു. അത്തരമൊരു സന്ദർശനം ഗൃഹത്തെ ശുദ്ധീകരിക്കും വൃഷഭാനുവിന്‍റെ ഹൃദയം നന്ദി കൊണ്ട് നിറഞ്ഞു.

വൃഷഭാനു ഗർഗാചാര്യനോട് തന്‍റെ പ്രിയപ്പെട്ട മകൾ രാധയെക്കുറിച്ച് സംസാരിച്ചു. രാധയുടെ ജനനത്തിന്‍റെ കഥ അദ്ദേഹം ഋഷിയോട് പങ്കുവെക്കുകയും അവൾക്ക് അനുയോജ്യനായ ഒരു വരനെ നിർദ്ദേശിക്കാൻ കഴിയുമോ എന്ന് ചോദിക്കുകയും ചെയ്തു. ഗർഗാചാര്യൻ പുഞ്ചിരിക്കുകയും യമുനാ നദിയുടെ തീരത്തുള്ള വിജനമായ ഒരു സ്ഥലത്തേക്ക് തന്നെ കൊണ്ടുപോകാൻ ആവശ്യപ്പെടുകയും ചെയ്തു. അവിടെ വെച്ച് ആചാര്യൻ വൃഷഭാനുവിനോട് ചില രഹസ്യങ്ങൾ പറഞ്ഞു.

പ്രപഞ്ചത്തിന്‍റെ നാഥൻ , ഭഗവാൻ ശ്രീകൃഷ്ണൻ ഭൂമിയിൽ ജനിച്ചിട്ടുണ്ട്. അത് മറ്റാരുമല്ല, നന്ദഗോപരുടെ വീട്ടിലെ കൃഷ്ണനാണ്. ഭൂമിയിലെ ദുഷ്ട രാജാക്കന്മാരെ ഉന്മൂലനം ചെയ്യാനും സ്നേഹവും സന്തോഷവും പ്രചരിപ്പിക്കാനും ബ്രഹ്മാവിന്‍റെ അഭ്യർത്ഥന മാനിച്ച് കൃഷ്ണൻ അവതാരമെടുത്തതാണ്, ഗർഗാചാര്യൻ  വിശദീകരിച്ചു. അദ്ദേഹം അതിലും അത്ഭുതകരമായ ഒരു കാര്യം പങ്കുവെച്ചു: വൃഷഭാനുവിന്‍റെ മകളായ രാധ ഒരു സാധാരണ കുട്ടിയല്ല. ഗോലോകത്തിൽ (വൈകുണ്ഠത്തിന് മുകളിലുള്ള കൃഷ്ണന്‍റെ ലോകം ) കൃഷ്ണന്‍റെ ഭാര്യയാണ് അവൾ, ആ രാധ തന്നെയാണ് വൃഷഭാനുവിന്‍റെ മകളായി അവതാരമെടുത്തിരിക്കുന്നത്.

ഇത് കേട്ടപ്പോൾ വൃഷഭാനു വികാരാധീനനായി. അദ്ദേഹം പറഞ്ഞു, 'അപ്പോൾ ഞാൻ എന്‍റെ മകളെ കൃഷ്ണന് മാത്രമേ വിവാഹം കഴിച്ചുകൊടുക്കൂ '. ഗർഗാചാര്യൻ തലയാട്ടിക്കൊണ്ട് അദ്ദേഹത്തിന് ഉറപ്പ് നൽകി, 'വൃന്ദാവനത്തിനടുത്തുള്ള മനോഹരമായ ഭാണ്ഡീര വനത്തിൽ ബ്രഹ്മാവായിരിക്കും അവരുടെ വിവാഹം നടത്തുക'. വൃന്ദാവനത്തിലെ എല്ലാ ഗോപന്മാരും  ഗോലോകത്തിലെ ഗോപന്മാരുടെ അവതാരങ്ങളാണെന്നും ഗോപികമാർ ഗോലോകത്തിലെ ഗോപികമാരുടെ അവതാരങ്ങളാണെന്നും ആചാര്യൻ വൃഷഭാനുവിനെ അറിയിച്ചു. അവരൊക്കെ ഈ ദിവ്യലീലയുടെ ഭാഗമാണ്.

തുടർന്ന് രാധ എന്ന പേരിന് പിന്നിലെ തത്ത്വം അദ്ദേഹം വിശദീകരിച്ചു. 'രാധ' എന്ന പേരിൽ നാല് അക്ഷരങ്ങളുണ്ട് - ര + ആ + ധ + ആ .  ഓരോ അക്ഷരത്തിനും ആഴത്തിലുള്ള അർത്ഥമുണ്ട്. സമ്പത്തിന്‍റെയും സമൃദ്ധിയുടെയും ദേവതയായ ലക്ഷ്മി ദേവിയുടെ മറ്റൊരു പേരായ 'രമ' യെ സൂചിപ്പിക്കുന്നതാണ് 'ര' എന്ന ആദ്യ അക്ഷരം. രണ്ടാമത്തെ അക്ഷരമായ 'ആ', കൃഷ്ണന്‍റെ ലീലകളുടെ ദിവ്യപ്രവർത്തനങ്ങളുടെ ഭാഗമായ ഗോപികകളെ പ്രതിനിധീകരിക്കുന്നു. മൂന്നാമത്തെ അക്ഷരം, 'ധ', 'ധര' യെ സൂചിപ്പിക്കുന്നു, അതായത് ഭൂമി, സ്ഥിരതയെയും സ്നേഹത്തെ പരിപോഷിപ്പിക്കുന്നതിനെയും പ്രതിനിധീകരിക്കുന്നു. നാലാമത്തെയും അവസാനത്തെയും അക്ഷരമായ 'ആ', ശുദ്ധവും ശാന്തവുമായ ഗോലോകത്തെ ദിവ്യനദിയായ വിരജയെ സൂചിപ്പിക്കുന്നു. കൃഷ്ണന്‍റെ ഹൃദയത്തോട് വളരെ അടുത്തിരിക്കുന്ന ഈ ദിവ്യ ഘടകങ്ങളെല്ലാം രാധയിൽ ഒത്തുചേർന്നിരിക്കുന്നു.

ഗർഗാചാര്യൻ  തുടർന്നു, 'രമയും ഗോപികമാരും ധരയും വിരജയും - ഇവരൊരുമിച്ച്‌  നിങ്ങളുടെ മകളായി  അവതാരമെടുത്തിരിക്കുന്നു , കൃഷ്ണന് പ്രിയപ്പെട്ടതെല്ലാം ഒരേ ശരീരത്തിൽ '. തന്‍റെ പ്രിയപ്പെട്ട മകളുടെ യഥാർത്ഥ മഹത്വം മനസ്സിലാക്കി വൃഷഭാനു ആശ്ചര്യചകിതനായി.

ആചാര്യന്‍റെ  വാക്കുകൾ വൃഷഭാനുവിൽ ഭക്തിയും അത്ഭുതവും നിറച്ചു. ഈ ദൈവിക പദ്ധതിയുടെ ഭാഗമാകാൻ കഴിഞ്ഞതിൽ അദ്ദേഹം സന്തോഷപ്പെട്ടു, രാധയും കൃഷ്ണനും ഗോലോകത്തിൽ ഉള്ളതുപോലെ ഭൂമിയിലും ഒന്നിക്കാൻ പോകുന്നു. അങ്ങനെ, രാധയുടെയും കൃഷ്ണന്‍റെയും കഥ - സ്നേഹം, ഭക്തി, ദിവ്യതയുടെ ഐക്യം എന്നിവയുടെ കഥ - വൃന്ദാവനത്തിലെ പുണ്യഭൂമിയിൽ വികസിക്കാൻ തുടങ്ങി.

പാഠങ്ങൾ -

1. ദൈവികമായ  ഉദ്ദേശ്യവും അവതാരവും: കൃഷ്ണനും രാധയും ദൈവിക ഉദ്ദേശ്യത്തോടെയാണ് ഭൂമിയിൽ അവതാരമെടുത്തത്. തിന്മയെ ഉന്മൂലനം ചെയ്യാനും സന്തോഷം പ്രചരിപ്പിക്കാനും കൃഷ്ണൻ വന്നപ്പോൾ രാധ കൃഷ്ണന് ഏറ്റവും പ്രിയമുള്ള നാല് കാര്യങ്ങളെ ഉൾക്കൊണ്ടുകൊണ്ട് അവതാരമെടുത്തു.
2. നാല് ദൈവിക ഘടകങ്ങളുടെ ഐക്യം: സമൃദ്ധി, ദിവ്യ സ്നേഹം, സ്ഥിരത / പോഷണം, വിശുദ്ധി എന്നീ നാല് പ്രധാന കാര്യങ്ങളുടെ ഒത്തുചേരലാണ് രാധ.

Ramaswamy Sastry and Vighnesh Ghanapaathi