ఉమా మహిమా స్తోత్రం

మునయ ఊచుః -

ఉమాయా భువనేశాన్యాస్సూత సర్వార్థవిత్తమ .
అవతారం సమాచక్ష్వ యతో జాతా సరస్వతీ ..

యా గీయతే పరబ్రహ్మమూలప్రకృతిరీశ్వరీ .
నిరాకారాపి సాకారా నిత్యానందమయీ సతీ ..

సూత ఉవాచ -

తాపసాః శృణుత ప్రేమ్ణా చరిత్రం పరమం మహత్ .
యస్య విజ్ఞానమాత్రేణ నరో యాతి పరాం గతిం ..

దేవదానవయోర్యుద్ధమేకదాసీత్పరస్పరం .
మహామాయాప్రభావేణామరాణాం విజయోఽభవత్ ..

తతోఽవలిప్తా అమరాస్స్వప్రశంసాం వితేనిరే .
వయం ధన్యా వయం ధన్యాః కిం కరిష్యంతి నోఽసురాః ..

యే ప్రభావం సమాలోక్యాస్మాకం పరమదుఃసహం .
భీతా నాగాలయం యాతా యాతయాతేతి వాదినః ..

అహో బలమహో తేజో దైత్యవంశక్షయంకరం .
అహో భాగ్యం సుమనసామేవం సర్వేఽభ్యవర్ణయన్ ..

తత ఆవిరభూత్తేజః కూటరూపంతదైవ హి .
అదృష్టపూర్వం తద్దృష్ట్వా విస్మితా అభవన్సురాః ..

కిమిదం కిమిదం చేతి రుద్ధకంఠాస్సమబ్రువన .
అజానంతః పరం శ్యామానుభావం మానభంజనం ..

తత ఆజ్ఞాపయద్దేవాందేవానామధినాయకః .
యాత యూయం పరీక్షధ్వం యాథాతథ్యేన కిన్వితి ..

సురేంద్రప్రేరితో వాయుర్మహసః సన్నిధిం గతః .
కస్త్వం భోరితి సంబోధ్యావోచదేనం చ తన్మహః ..

ఇతి పృష్టస్తదా వాయుర్మహసాతిగరీయసా .
వాయురస్మి జగత్ప్రాణస్సాభిమానోఽబ్రవీదిదం ..

జంగమాజంగమం సర్వమోతప్రోతమిదం జగత్ .
మయ్యేవ నిఖిలాధారే చాలయామ్యఖిలం జగత్ ..

తదోవాచ మహాతేజః శక్తోఽసి యది చాలనే .
ధృతమేతత్తృణం వాయో చాలయస్వ నిజేచ్ఛయా ..

తతః సర్వప్రయత్నేనాకరోద్యత్నం సదాగతిః .
న చచాల యదా స్థానాత్తదాసౌ లజ్జితోఽభవత ..

తూష్ణీం భూత్వా తతో వాయుర్జగామేంద్రసభాం ప్రతి .
కథయామాస తద్ వృత్తం స్వకీయాభిభవాన్వితం ..

సర్వేశత్వం వయం సర్వే మృషైవాత్మని మన్మహే .
న పారయామహే కించిద్విధాతుం క్షుద్రవస్త్వపి ..

తతశ్చ ప్రేషయామాస మరుత్వాన్సకలాన్సురాన్ .
న శేకుస్తే యదా జ్ఞాతుం తదేంద్రః స్వయమభ్యగాత్ ..

మఘవంతమథాయాంతం దృష్ట్వా తేజోతిదుఃసహం .
బభూవాంతర్హితం సద్యో విస్మితోఽభూచ్చ వాసవః ..

చరిత్రమీదృశం యస్య తమేవ శరణం శ్రయే .
ఇతి సంచింతయామాస సహస్రాక్షః పునఃపునః ..

ఏతస్మిన్నంతరే తత్ర నిర్వ్యాజకరుణాతనుః .
తేషామనుగ్రహం కర్తుం హర్తుం గర్వం శివాంగనా ..

చైత్రశుక్లనవమ్యాం తు మధ్యాహ్నస్థే దివాకరే .
ప్రాదురాసీదుమా దేవీ సచ్చిదానందరూపిణీ ..

మహోమధ్యే విరాజంతీ భాసయంతీ దిశో రుచా .
బోధయంతీ సురాన్సర్వాన్బ్రహ్మైవాహమితి స్ఫుటం ..

చతుర్భిర్దధతీ హస్తైర్వరపాశాంకుశాభయాన్ .
శ్రుతిభిస్సేవితా రమ్యా నవయౌవనగర్వితా ..

రక్తాంబరపరీధానా రక్తమాల్యానులేపనా .
కోటికందర్ప్పసంకాశా చంద్రకోటిసమప్రభా ..

వ్యాజహార మహామాయా సర్వాంతర్య్యామిరూపిణీ .
సాక్షిణీ సర్వభూతానాం పరబ్రహ్మస్వరూపిణీ ..

ఉమోవాచ -

న బ్రహ్మా న మురారాతిర్న పురారాతిరీశ్వరః .
మదగ్రే గర్వితుం కించిత్కా కథాన్యసుపర్వణాం ..

పరం బ్రహ్మ పరం జ్యోతిః ప్రణవద్వంద్వరూపిణీ .
అహమేవాస్మి సకలం మదన్యో నాస్తి కశ్చన ..

నిరాకారాపి సాకారా సర్వతత్త్వస్వరూపిణీ .
అప్రతర్క్యగుణా నిత్యా కార్యకారణరూపిణీ ..

కదాచిద్దయితాకారా కదాచిత్పురుషాకృతిః .
కదాచిదుభయాకారా సర్వాకారాహమీశ్వరీ ..

విరంచిః సృష్టికర్తాహం జగత్పాతాహమచ్యుతః .
రుద్రః సంహారకర్తాహం సర్వవిశ్వవిమోహినీ ..

కాలికా కమలావాణీ ముఖాస్సర్వా హి శక్తయః .
మదంశాదేవ సంజాతాస్తథేమాస్సకలాః కలాః ..

మత్ప్రభావాజ్జితాస్సర్వే యుష్మాభిర్ద్దితినందనాః .
తామవిజ్ఞాయ మాం యూయం వృథా సర్వేశమానినః ..

యథా దారుమయీం యోషాం నర్తయత్యైంద్రజాలికః .
తథైవ సర్వభూతాని నర్తయామ్యహమీశ్వరీ ..

మద్భయాద్వాతి పవనః సర్వం దహతి హవ్యభుక్ .
లోకపాలాః ప్రకుర్వంతి స్వస్వకర్మాణ్యనారతం ..

కదాచిద్దేవవర్గాణాం కదాచిద్దితిజన్మ నాం .
కరోమి విజయం సమ్యక్స్వతంత్రా నిజలీలయా ..

అవినాశి పరం ధామ మాయాతీతం పరాత్పరం .
శ్రుతయో వర్ణయంతే యత్తద్రూపంతు మమైవ హి ..

సగుణం నిర్గుణం చేతి మద్రూపం ద్వివిధం మతం .
మాయాశబలితం చైకం ద్వితీయంతదనాశ్రితం ..

ఏవం విజ్ఞాయ మాం దేవాస్స్వం స్వం గర్వం విహాయ చ .
భజత ప్రణయోపేతాః ప్రకృతిం మాం సనాతనీం ..

ఇతి దేవ్యా వచః శ్రుత్వా కరుణాగర్భితం సురాః .
తుష్టువుః పరమేశానీం భక్తిసన్నతకంధరాః ..

క్షమస్వ జగదీశాని ప్రసీద పరమేశ్వరి .
మైవం భూయాత్కదాచిన్నో గర్వో మాతర్ద్దయాం కురు ..

తతఃప్రభృతి తే దైవా హిత్వా గర్వం సమాహితాః .
ఉమామారాధయామాసుర్యథాపూర్వం యథావిధి ..

ఇతి వః కథితో విప్రా ఉమాప్రాదుర్భవో మయా .
యస్య శ్రవణమాత్రేణ పరమం పదమశ్నుతే ..

Ramaswamy Sastry and Vighnesh Ghanapaathi

Other stotras