గౌరీ శతక స్తోత్రం

అనంతమహిమవ్యాప్తవిశ్వాం వేధా న వేద యాం .
యా చ మాతేవ భజతే ప్రణతే మానవే దయాం ..

నతాపనీతక్లేశాయాః సురారిజనతాపనీ .
న తాపనీ తనుర్యస్యాస్తుల్యా నాదీనతాపనీ ..

వక్త్రపద్మా విధేర్భాంతి యయా సర్గలయో దయా .
యా సాక్షాద్యా చ జనితస్థితిసర్గలయోదయా ..

యాశ్రితా పావనతయా యాతనాచ్ఛిదనీచయా .
యాచనీయా ధియా మాయాయామాయాసం స్తుతా శ్రియా ..

నమాంసి ధ్వంసమాయాంతి అస్యాః స్తుత్యాదరేణ వః .
తస్యాః సిద్ధ్యై ధియాం మాతుః కల్పంతాం పాదరేణవః ..

ఋషీణాం సాదయామాస యా తమాంసి త్రయీమయీ .
పాయాద్వః సా దయామాధిచ్ఛిదం జగతి బిభ్రతీ ..

స్మరద్విషా యా యయాచే యయా చేయం విధేః క్రియా .
యాం చాచ్యుతోఽపి తుష్టావ తుష్టా వః సాఽస్తు పార్వతీ ..

యా దమావనయాగేన స్వారాథా నయసారయా .
హరికైతవహాస్యాయ సాయామా విజితా యయా ..

యాయతాజివిమయా సా యస్యా హా బత కైరిహ .
యా రసాయనధారా స్వా న గేయానవమా దయా ..

సా బుద్ధిరుత్తమాలోకః సతామార్యా పునాతు వః .
యద్భక్తేరుత్తమా లోకః ప్రాప్నోత్యేష విశుద్ధతాం ..

అయుద్ధ సాధుత్రాణాయ సామరా యా సహారిణా .
ఖడ్గేన దీప్రా దేవానాం సామరాయాసహారిణా ..

చరణాఘాతనిహతకాసరా చ రణాజిరే .
రరాజ యా నయజయైరరాజసజనానతా ..

సావతాద్వోఽమ్బికాఽభ్యర్చ్యనామా న న యశోభితః .
తనోతి ప్రణతో యస్యా నా మాననయశోభితః ..

సంయతం యాచమానేన యస్యాః ప్రాపి ద్విషా వధః .
సంయతం యా చ మానేన యునక్తి ప్రణతం జనం ..

యా దమానవమానందపదమాననమానదా .
దానమానక్షమానిత్యధనమానవమానితా ..

సా రక్షతాదపారా తే రసకృద్గౌరబాధికా .
సారక్షతాదపారాతేరసకృద్గౌరవాధికా ..

అనుత్తమోహరాశయో భవంతి యామనాశ్రితాః .
అనుత్తమో హరాశయో యయా చిరం చ రంజితః ..

అనంతరాగతాపాయాస్తారయిత్రీ భవాపదః .
అనంతరాగతాపాయాః సా వో గౌరీ హియాత్క్రియాః ..

యామాయాసజిదాసక్తశోకజాలస్య పాతినీ .
యా మాతా సర్వదా భక్తలోకజాలస్య పాలనీ ..

సామరాగమనాయాసం త్యక్త్వా సార్ధం సురారిభిః .
సామరా గమనాయాసన్నుద్యతా యుధి యద్గణాః ..

సామోదయాజయా శాతైః శస్త్రైః శత్రౌ హతే యయా .
సామోదయా జయాశా తైర్గీర్వాణైర్గర్వతో జహే ..

యయాయాయాయ్యయా యూయం యో యోఽయం యేయయైయ యాం .
యయుయాయియయేయాయ యయేఽయాయాయ యాయయుక్ ..

సాఽవ్యాద్గౌరీ సదా యుష్మాన్సదాయుష్మాన్సమృద్ధ్యతి .
శరణం యాం నరో గచ్ఛన్న రోగచ్ఛందమేతి చ ..

కృతాస్పదా యథా సంపదఘాని సురవైరిషు .
హంతి యా వాఙ్మయీ దూరాదఘాని సురవైరిషుః ..

జితానయా యా నతాజితారసాతతసారతా .
న సావనా నావసానయాతనారిరినా తయా ..

మనోభవారాతిమనోభిరామయా జరామయాపాకరణైకదక్షయా .
మదక్షయాన్నిర్మలతాం దదానయా సదా నయాస్థా క్రియతాం తవార్యయా ..

సమాయయావింద్రహితాయ యా రణే సమాయయా యా న జితారిసేనయా .
స మా యయాచే హరమాశ్రితః స్ఫుటం సమా యయా ముగ్ధతయా మనోజ్ఞతాః ..

సా భావక్షాలవర్యా నుతవిభవితనుర్యా వలక్షావభాసా
జానానస్యాశయప్రా నవనలినవనప్రాయశస్యాననాజా .
సాతం వర్మాననస్థా రహసి రసిహరస్థాననర్మావతంసా
పాయాదక్తా రణత్రా మతనమనతమత్రాణరక్తా దయాపా ..

ఉపాసతే కృష్టికృతోదయాం యాం జనా సదారాధనమీహమానాః .
శంభోః ప్రసిద్ధా తనుతాం వహంతీ గౌరీ హితం సా భవతాం విధేయాత్ ..

యాం సద్య ఏవ త్రిదశైః పుమాంసః సమా నమస్యంతి సదానభోగాః .
అఘాని యస్య ప్రణతా విపక్షైః సమానమస్యంతి సదా నభోగాః ..

యస్యాః ప్రభావో ద్యుసదాం విపక్షసేనా వధానందయితాహరస్య .
మనోంబుజస్యావహతు శ్రియై వః సేనావధానం దయితా హరస్య ..

సురా జితా భావితదేవరాజద్విపక్షమా యాత రణాదభీతం .
స్వాపం న వో ధామ హితం న నామ సదైవసేనా భవతోహితానాం ..

సురాజితా భావితదేవరాజద్విపక్షమాయా తరణాదభీతం .
స్వాపన్నబోధామహితం ననామ సదైవ సేనా భవతో హితానాం ..

సురానితి ద్వేషిజనైరభిద్రుతానుదాహరద్యా స్వయమాహవోద్యతా .
శివోఽద్య తాపప్రశమస్తయా తవ ప్రశస్తయా తత్త్వదృశా విధీయతాం ..

వక్రం బిభ్రత్యుపహితచంద్రాయాసం యా సంమోహప్రశమనసూర్యాకారా .
కారానీతామరమరిమాచిక్షేప క్షేపత్యక్తా రణభువి సా వః పాయాత్ ..

హితే హితేఽస్తు తే స్తుతే జితాజితామితామితా .
జయాజయా జనోఽజనో యయా యయావలం బలం ..

యా మూర్తిం కిమపి స్మరారివపుషా ధత్తే సమాయోజితాం
యాం దృష్ట్వైవ వినాశమాప సహసా శుంభః సమాయోఽజితాం .
యా నమ్రైః సురసిద్ధికింనరనరైః ఖేదం వినా శస్యతే
సా హేతుర్భవతాం త్రిలోచనవధూరశ్రీవినాశస్య తే ..

సాయాసాయాస్త్రిలోక్యాః శరణమకరుణక్షుణ్ణదైత్యప్రవీరా
స్వైరం స్వైరంశసర్గైర్గహనతమమహామోహహార్దం హరంతీ .
శస్యాశస్యాదధానా సకలమభిహితం భక్తిభాజః స్మృతైవ
స్తాదస్తాదభ్రదోషా ద్విషదుపశమనీ సర్వతః పార్వతీ వః ..

సురసురచితచితనవనవభవభవనానాదరాదరాయేథే .
లయలయచరణౌ చరణౌ న న మామి నతేన నమామి న తే ..

యా విస్మయం స్మరభిదా చక్రేఽఙ్కారోపితా నవం నారీణాం .
విదధే యచ్చాపస్య న చ క్రేంకారోఽపి తానవం నారీణాం ..

యా హంతాం చ ప్రయాతా విహాథసా కంసమాహ తారాతిబలేన .
కృష్ణస్తవ పరమాయా విహాయ సాకం సమాహతారాతిబలేన ..

తాం నమత యా చ సమరేష్వనేకశో భాతి భద్రకాలీ నతయా .
ఖ్యాతి యయా జనతోజ్జ్వలవివేకశోభాతిభద్రాకాలీనతయా ..

తాం స్మరత థా స్మృతైవ హి మానవతామరసమానతా రాతి బలాత్ .
యత్ప్రణతం శ్రీః శ్రయతే మానవతామరసమాన తారాతి బలాత్ ..

అనవరాగసముద్భవదేహతాముపగతా దదృశే గిరిశేన యా .
అనవరాగసముద్భవదేహ తామవనతోఽస్మి జగాత్ప్రియతాం సతీం ..

మేనే నూనమనేన మాననముమానామ్నా ను మేనోన్మనా
నున్నేనోనమనే నిమానమమునా నో నామ నానానుమే .
మౌనేనామమమాననిమ్నమననాన్నానామినానూనిమే
సున్మిన్నాననమా నమీ మునిమనోమానాననోన్నామిని ..

తాం వందేఽహం నవం దేహం జ్ఞానరూపం విధాయ యా .
సుఘీరస్యతి ధీరస్య మహామోహమయీం త్వచం ..

యాం నుత్వా యాంతి హృద్యార్థసజ్జాయాం గిరి శస్యతాం .
నౌమ్యహం భక్తిమాస్థాయ సజ్జాయాం గిరిశస్య తాం ..

యదానతోఽయదానతో న యాత్యయం నయాత్యయం .
శివే హితాం శివేహితాం స్మరామితాం స్మరామి తాం ..

సరస్వతిప్రసాదం మే స్థితి చిత్తసరస్వతి .
సరస్వతి కురు క్షేత్రకురుక్షేత్రసరస్వతి ..

త్వద్భక్తిభావితధియో జగతామత్ర యే త్రయే .
జన్మవత్తామహం మన్యే తేషామేవానృణాం నృణాం ..

జగతః సాతిరేకా త్వం గతిరస్య స్థిరాధికా .
తరస్యత్రాసతారారేః సాస్యత్రాసరసస్థితి ..

త్వన్నామస్మరణాదేవ న లక్ష్మీశ్చపలాయతే .
సర్వతః పార్వతి క్షిప్రమలక్ష్మీశ్చ పలాయతే ..

జయంతి భక్తా విత్తేశసమరాయస్తబాహవే .
తుభ్యన్నమస్త్రిలోక్యర్థసమరాయస్తబాహవే ..

సత్త్వం సమ్యక్త్వమున్మీల్య హృది భాసి విరాజసే .
ద్విషామరీణా త్వం సేనాం వాహినీముదకంపయః ..

దూరాగతరసా ధన్యః సేవతేయస్తవ స్తుతీః .
దూరాగత రసాధన్యః కల్పంతే తస్య సిద్ధయః ..

మోహం హత్వాస్పదం యాసి సాత్త్వమంబరవాసినా .
యా న సంస్తూయసే కేన సా త్వంబరవసినా ..

ప్రకాశ్య గృహ్యపుంసస్యఖేదచ్ఛేదాంబుదావలీ .
ప్రజ్ఞాత్మనేనవిమలా స్మితా దృశ్యసి విద్వతాం ..

భవాని యే నిరంతరం తవ ప్రణామలాలసాః .
మనస్తమోమలాలసా భవంతి నైయ తు క్వచిత్ ..

విభావనాకులా త్వయి క్రమేణ దేవి భావనా .
వపుష్పతిస్థిరేతరే నితాంతమేవ పుష్యతి ..

మహోఽదయానామవధీ రణేన మహోదయానామవధీరణేన .
మహోదయానామవ ధీరణేజమహోదయానామవధీరణేన ..

న మజ్జనేన తీర్థానాం తదిహ ప్రాప్యతే శుభం .
నమజ్జనేన తీర్థానాం సేవయా యత్తవాంబికే ..

ప్రయాతి మోహే నిఃసారభారతీవ్రతమేత్యయం .
త్వాత్ప్రాసాదాజ్జనః సారభారతీవ్రతమేత్యయం ..

శాస్త్రప్రభావహసితాః సతాం యా నిర్మలా గిరః .
శాస్త్రప్రభావహసితాస్త్వమంబతిమిరచ్ఛిదః ..

శమీహ తే సమానతో విభావితోఽత్రసన్న యః .
విభావితోఽత్ర సన్నయః శమీహతే స మానతః ..

మాతరం త్వా పదం సద్య ఆశ్రితాస్తే కథం జనాః .
మా తరంత్వాపదం సద్య ఆద్యం శ్రేయః సమాశ్రితాః ..

భాతి త్వత్తనుసంశ్లేషే సత్యంబ వపురనుత్తరం .
సంసారాబ్ధౌ సదాహుస్తే సత్యం వపురనుత్తరం ..

యచ్ఛ మే నిత్యసంసంగి యచ్ఛమే తదిదం మనః .
స్వచ్ఛలో భక్తియోగస్తే స్వచ్ఛలోకవివేకసూః ..

కే వలంతే వితన్వంతకృతస్త్వత్ప్రణతా భవే .
కేవలం తే వితన్వంత ఆసతే విమలాం ధియం ..

దేవి నిర్దగ్ధకామస్య త్వం నిరావరణాత్మనః .
హరస్య శుభసంతానం తేనాసౌ భ్రాజతే తథా ..

ద్విషద్భియా సపది విముచ్యతే యతస్తవానతో జనని జయాశయా న కః .
స్తవానతో జననిజయా శయానకః కరోతి తే యుధి మధుసూదనస్వసః ..

జ్యాయోనిష్ఠారివర్యాధినియమనవరస్వైరదత్తాయతాజ్ఞా
స్వారాధత్వాసమధ్యానియజనజనని జ్ఞేయసుస్థావభాసా .
నానాపుణ్యాగమస్థా జననమనమయజ్ఞాననంద్యా వరా ధీ-
ర్యాతా నవ్యా విభుత్వం నుతసరలమనస్తామసస్యావహాస్యే ..

స్యేహావ స్యా సమస్తానమలరసతను త్వం భువి వ్యానతార్యా
ధీరా వంద్యా న న జ్ఞా యమనమననజస్థామగణ్యా పునానా .
సా భావస్థా సుయజ్ఞేఽనినజనజయని ధ్యామసత్త్వాధరాస్వా
జ్ఞాతాయత్తాదరస్వైరవనమనిధిర్యా వరిష్ఠానియోజ్యా ..

అలోలకమలే చిత్తలలామకమలాలయే .
పాహి చండి మహామోహభంగభీమబలామలే ..

దుర్గాపి మాతః సులభాసి భక్త్యా భవానుకూలాపి భవం క్షిణోషి .
అధ్యేయతాం యాసి సదైవ దేవి ధ్యేయాసి చిత్రం చరితం తవైతత్ ..

మహదేసురసంధమ్మే తమవసమాసంగమాగమాహరణే .
హరబహుసరణం తం చిత్తమోహమవసర ఉమే సహసా ..

వంద్యా ప్రభాతసంధ్యేవ సూర్యాలోకప్రవర్తినీ .
నివర్తయసి దేవి త్వం మహామోహమయీం నిశాం ..

సంవాదిసారసంపత్తీసదాగోరిజయేసుదే .
తవసత్తీరదే సంతు సంసారే సుసమానదే ..

ఆగమమణిసుదమహిమసమసంమదకృదపరజస్సు .
కిర సవిభయవదితో సమయ ఉజ్జలభావసహస్సు ..

త్వం వాదే శాస్త్రసంగిన్యాం భాసి వాచి దివౌకసః .
తవాదేశాస్త్రసంస్కారాజ్జయంతి వరదే ద్విషః ..

సదావ్యాజవశిధ్యాతాః సదాత్తజపశిక్షితాః .
దదాస్యజస్రం శివతాః సూదాత్తాజదిశి స్థితాః ..

హరేః స్వసారం దేవి త్వా జనతాశ్రిత్య తత్త్వతః .
వేత్తి స్వసారం దేవిత్వా యోగేన క్షపితాశుభా ..

సదాప్నోతి యతిర్జ్యోతిస్తాదృశం స్వత్ప్రభావతః .
ప్రభావతః సమో యేన కల్పతే మోహనుత్తితః ..

త్వం సద్గతిః సితాపారా పరా విద్యోత్తితీర్షతః .
సంసారాదత్ర చాంబ త్వం సత్త్వం పాసి విపత్తితః ..

పరమా యా తపోవృత్తిరార్యాయాస్తం స్మృతిం జనాః .
పరమాయాత పోషాయ ధియాం శరణమాదృతాః ..

ప్రవాదిమతభేదేషు దృశ్యస్తే మహిమాశ్రయః .
భాంతి త్వత్త్రిశిఖస్యేవ శిఖానామసమాశ్రయః ..

యచ్చేష్టయా తవ స్ఫీతముదారవసు ధామతః .
యచ్చేతో యాత్యవహితముదా రవసుధామతః ..

సురదేశస్య తే కీర్తిం మండనత్వం నయంతి యైః .
వరదే శస్యతే ధీరైర్భవతీ భువి దేవతా ..

తత్త్వం వీతావతతతుత్తత్వం తతవతీ తతః .
విత్తం విత్తవ విత్తత్వం వీతావీతవతాం బత ..

తారే శరణముద్యంతీ సురేశరణముద్యమైః .
త్వం దోషాపాసినోదగ్రస్వదోషా పాసి నోదనే ..

సుమాతరక్షయాలోక రక్షయాత్తమహామనాః .
త్వం ధైర్యజననీ పాసి జననీతిగుణస్థితీః ..

ఖ్యాతికల్పనదక్షైకా త్వం సామర్గ్యజుషామితః .
సదా సరక్షసాంముఖ్యదానవానామసుస్థితిః ..

సితా సంసత్సు సత్తాస్తే స్తుతేస్తే సతతం సతః .
తతాస్తితైత్తి తస్తేతి సూతిః సూతిస్తతోఽసి సా ..

త్వదాజ్ఞయా జగత్సర్వం భాసితం మలనుద్యతః .
సదా త్వయా సగంధర్వం సమిద్ధమరినుత్తితః ..

యతో యాతి తతోఽత్యేతి యయా తాం తాయతాం యతైః .
మాతామితోత్తమతమా తమోతీతాం మతిం మమ ..

మహత్తాం త్వం శ్రితా దాసజనం మోహచ్ఛిదా వస .
యచ్ఛద్ధత్వం గతః పాపమన్యస్య ప్రసభం జయ ..

త్వాం సాజ్ఞాసు జగన్మాతః స్పష్టం జ్ఞాతా సువర్త్మసు .
ప్రజ్ఞా ముఖ్యా సముద్భాసి తత్పృథుత్వం ప్రదర్శయ ..

ఆజ్ఞాసు జగన్మాతః స్పష్టం జ్ఞాతా సువర్త్మసు ప్రజ్ఞా .
భాసి త్వం సా ముఖ్యా సముత్పృథుత్వం ప్రదర్శయ తత్ ..

హంత్ర్యో రుషః క్షమా ఏతా సందక్షోభాస్తమున్నతః .
సతేహితః సేవతే తాః సతతం యః స తే హితః ..

కరోషి తాత్స్త్వముత్ఖాతమోహస్థానే స్థిరా మతీః .
పదం యతిః సుతపసా లభతేఽతః సశుక్లిమ ..

దేవ్యా స్వప్నోద్గమాదిష్టదేవీశతకసంజ్ఞయా .
దేశితానుపమామాధాదతో నోణసుతో నుతిం ..

హార్దధ్వాంతనియంతృభాస్వరవపుః స్వర్వాసినాం సర్వతో
దుర్వారారిపరిక్షయం విదధతీ ధ్యాతైవ లర్వాణసూః .
దేహార్ధే నిహితా భవేన భువనత్రాణైకతానాత్మనా
దేవి త్వం త్వమివాపరా జగతి కా సత్కేసరీంద్రస్థితిః ..

క్లేశోన్మాథకరీ సతాం భవహరానందైకహేతో గురు-
ర్మాతా త్వం జగతాం భవంతి విధవాః సర్వే తవానుగ్రహాత్ .
దుర్గే న క్వచిదేవ సీదతి జనస్త్వద్భక్తిపూతాశయః
స్తుత్యా భర్తురభిన్నయేతి విబుధైస్త్వం స్తూయసే శ్రీరివ ..

యేనానందకథాయాం త్రిదశానందే చ లాలితా వాణీ .
తేన సుదుష్కరమేతత్స్తోత్రం దేవ్యాః కృతం భక్త్యా ..

Ramaswamy Sastry and Vighnesh Ghanapaathi

Other stotras