ഉമാ മഹിമാ സ്തോത്രം

മുനയ ഊചുഃ -

ഉമായാ ഭുവനേശാന്യാസ്സൂത സർവാർഥവിത്തമ .
അവതാരം സമാചക്ഷ്വ യതോ ജാതാ സരസ്വതീ ..

യാ ഗീയതേ പരബ്രഹ്മമൂലപ്രകൃതിരീശ്വരീ .
നിരാകാരാപി സാകാരാ നിത്യാനന്ദമയീ സതീ ..

സൂത ഉവാച -

താപസാഃ ശൃണുത പ്രേമ്ണാ ചരിത്രം പരമം മഹത് .
യസ്യ വിജ്ഞാനമാത്രേണ നരോ യാതി പരാം ഗതിം ..

ദേവദാനവയോര്യുദ്ധമേകദാസീത്പരസ്പരം .
മഹാമായാപ്രഭാവേണാമരാണാം വിജയോഽഭവത് ..

തതോഽവലിപ്താ അമരാസ്സ്വപ്രശംസാം വിതേനിരേ .
വയം ധന്യാ വയം ധന്യാഃ കിം കരിഷ്യന്തി നോഽസുരാഃ ..

യേ പ്രഭാവം സമാലോക്യാസ്മാകം പരമദുഃസഹം .
ഭീതാ നാഗാലയം യാതാ യാതയാതേതി വാദിനഃ ..

അഹോ ബലമഹോ തേജോ ദൈത്യവംശക്ഷയങ്കരം .
അഹോ ഭാഗ്യം സുമനസാമേവം സർവേഽഭ്യവർണയൻ ..

തത ആവിരഭൂത്തേജഃ കൂടരൂപന്തദൈവ ഹി .
അദൃഷ്ടപൂർവം തദ്ദൃഷ്ട്വാ വിസ്മിതാ അഭവൻസുരാഃ ..

കിമിദം കിമിദം ചേതി രുദ്ധകണ്ഠാസ്സമബ്രുവന .
അജാനന്തഃ പരം ശ്യാമാനുഭാവം മാനഭഞ്ജനം ..

തത ആജ്ഞാപയദ്ദേവാന്ദേവാനാമധിനായകഃ .
യാത യൂയം പരീക്ഷധ്വം യാഥാതഥ്യേന കിന്വിതി ..

സുരേന്ദ്രപ്രേരിതോ വായുർമഹസഃ സന്നിധിം ഗതഃ .
കസ്ത്വം ഭോരിതി സംബോധ്യാവോചദേനം ച തന്മഹഃ ..

ഇതി പൃഷ്ടസ്തദാ വായുർമഹസാതിഗരീയസാ .
വായുരസ്മി ജഗത്പ്രാണസ്സാഭിമാനോഽബ്രവീദിദം ..

ജംഗമാജംഗമം സർവമോതപ്രോതമിദം ജഗത് .
മയ്യേവ നിഖിലാധാരേ ചാലയാമ്യഖിലം ജഗത് ..

തദോവാച മഹാതേജഃ ശക്തോഽസി യദി ചാലനേ .
ധൃതമേതത്തൃണം വായോ ചാലയസ്വ നിജേച്ഛയാ ..

തതഃ സർവപ്രയത്നേനാകരോദ്യത്നം സദാഗതിഃ .
ന ചചാല യദാ സ്ഥാനാത്തദാസൗ ലജ്ജിതോഽഭവത ..

തൂഷ്ണീം ഭൂത്വാ തതോ വായുർജഗാമേന്ദ്രസഭാം പ്രതി .
കഥയാമാസ തദ് വൃത്തം സ്വകീയാഭിഭവാന്വിതം ..

സർവേശത്വം വയം സർവേ മൃഷൈവാത്മനി മന്മഹേ .
ന പാരയാമഹേ കിഞ്ചിദ്വിധാതും ക്ഷുദ്രവസ്ത്വപി ..

തതശ്ച പ്രേഷയാമാസ മരുത്വാൻസകലാൻസുരാൻ .
ന ശേകുസ്തേ യദാ ജ്ഞാതും തദേന്ദ്രഃ സ്വയമഭ്യഗാത് ..

മഘവന്തമഥായാന്തം ദൃഷ്ട്വാ തേജോതിദുഃസഹം .
ബഭൂവാന്തർഹിതം സദ്യോ വിസ്മിതോഽഭൂച്ച വാസവഃ ..

ചരിത്രമീദൃശം യസ്യ തമേവ ശരണം ശ്രയേ .
ഇതി സഞ്ചിന്തയാമാസ സഹസ്രാക്ഷഃ പുനഃപുനഃ ..

ഏതസ്മിന്നന്തരേ തത്ര നിർവ്യാജകരുണാതനുഃ .
തേഷാമനുഗ്രഹം കർതും ഹർതും ഗർവം ശിവാംഗനാ ..

ചൈത്രശുക്ലനവമ്യാം തു മധ്യാഹ്നസ്ഥേ ദിവാകരേ .
പ്രാദുരാസീദുമാ ദേവീ സച്ചിദാനന്ദരൂപിണീ ..

മഹോമധ്യേ വിരാജന്തീ ഭാസയന്തീ ദിശോ രുചാ .
ബോധയന്തീ സുരാൻസർവാൻബ്രഹ്മൈവാഹമിതി സ്ഫുടം ..

ചതുർഭിർദധതീ ഹസ്തൈർവരപാശാങ്കുശാഭയാൻ .
ശ്രുതിഭിസ്സേവിതാ രമ്യാ നവയൗവനഗർവിതാ ..

രക്താംബരപരീധാനാ രക്തമാല്യാനുലേപനാ .
കോടികന്ദർപ്പസങ്കാശാ ചന്ദ്രകോടിസമപ്രഭാ ..

വ്യാജഹാര മഹാമായാ സർവാന്തർയ്യാമിരൂപിണീ .
സാക്ഷിണീ സർവഭൂതാനാം പരബ്രഹ്മസ്വരൂപിണീ ..

ഉമോവാച -

ന ബ്രഹ്മാ ന മുരാരാതിർന പുരാരാതിരീശ്വരഃ .
മദഗ്രേ ഗർവിതും കിഞ്ചിത്കാ കഥാന്യസുപർവണാം ..

പരം ബ്രഹ്മ പരം ജ്യോതിഃ പ്രണവദ്വന്ദ്വരൂപിണീ .
അഹമേവാസ്മി സകലം മദന്യോ നാസ്തി കശ്ചന ..

നിരാകാരാപി സാകാരാ സർവതത്ത്വസ്വരൂപിണീ .
അപ്രതർക്യഗുണാ നിത്യാ കാര്യകാരണരൂപിണീ ..

കദാചിദ്ദയിതാകാരാ കദാചിത്പുരുഷാകൃതിഃ .
കദാചിദുഭയാകാരാ സർവാകാരാഹമീശ്വരീ ..

വിരഞ്ചിഃ സൃഷ്ടികർതാഹം ജഗത്പാതാഹമച്യുതഃ .
രുദ്രഃ സംഹാരകർതാഹം സർവവിശ്വവിമോഹിനീ ..

കാലികാ കമലാവാണീ മുഖാസ്സർവാ ഹി ശക്തയഃ .
മദംശാദേവ സഞ്ജാതാസ്തഥേമാസ്സകലാഃ കലാഃ ..

മത്പ്രഭാവാജ്ജിതാസ്സർവേ യുഷ്മാഭിർദ്ദിതിനന്ദനാഃ .
താമവിജ്ഞായ മാം യൂയം വൃഥാ സർവേശമാനിനഃ ..

യഥാ ദാരുമയീം യോഷാം നർതയത്യൈന്ദ്രജാലികഃ .
തഥൈവ സർവഭൂതാനി നർതയാമ്യഹമീശ്വരീ ..

മദ്ഭയാദ്വാതി പവനഃ സർവം ദഹതി ഹവ്യഭുക് .
ലോകപാലാഃ പ്രകുർവന്തി സ്വസ്വകർമാണ്യനാരതം ..

കദാചിദ്ദേവവർഗാണാം കദാചിദ്ദിതിജന്മ നാം .
കരോമി വിജയം സമ്യക്സ്വതന്ത്രാ നിജലീലയാ ..

അവിനാശി പരം ധാമ മായാതീതം പരാത്പരം .
ശ്രുതയോ വർണയന്തേ യത്തദ്രൂപന്തു മമൈവ ഹി ..

സഗുണം നിർഗുണം ചേതി മദ്രൂപം ദ്വിവിധം മതം .
മായാശബലിതം ചൈകം ദ്വിതീയന്തദനാശ്രിതം ..

ഏവം വിജ്ഞായ മാം ദേവാസ്സ്വം സ്വം ഗർവം വിഹായ ച .
ഭജത പ്രണയോപേതാഃ പ്രകൃതിം മാം സനാതനീം ..

ഇതി ദേവ്യാ വചഃ ശ്രുത്വാ കരുണാഗർഭിതം സുരാഃ .
തുഷ്ടുവുഃ പരമേശാനീം ഭക്തിസന്നതകന്ധരാഃ ..

ക്ഷമസ്വ ജഗദീശാനി പ്രസീദ പരമേശ്വരി .
മൈവം ഭൂയാത്കദാചിന്നോ ഗർവോ മാതർദ്ദയാം കുരു ..

തതഃപ്രഭൃതി തേ ദൈവാ ഹിത്വാ ഗർവം സമാഹിതാഃ .
ഉമാമാരാധയാമാസുര്യഥാപൂർവം യഥാവിധി ..

ഇതി വഃ കഥിതോ വിപ്രാ ഉമാപ്രാദുർഭവോ മയാ .
യസ്യ ശ്രവണമാത്രേണ പരമം പദമശ്നുതേ ..

Ramaswamy Sastry and Vighnesh Ghanapaathi

Other stotras