മീനാക്ഷീ മണിമാലാ അഷ്ടക സ്തോത്രം
മധുരാപുരനായികേ നമസ്തേ
മധുരാലാപിശുകാഭിരാമഹസ്തേ .
മലയധ്വജപാണ്ഡ്യരാജകന്യേ
മയി മീനാക്ഷി കൃപാം വിധേഹി ധന്യേ ..
കചനിർജിതകാലമേഘകാന്തേ
കമലാസേവിതപാദപങ്കജാന്തേ .
മധുരാപുരവല്ലഭേഷ്ടകാന്തേ
മയി മീനാക്ഷി ദയാം വിധേഹി ശാന്തേ ..
കുചയുഗ്മവിധൂതചക്രവാകേ
കൃപയാ പാലിതസർവജീവലോകേ .
മലയധ്വജസന്തതേഃ പതാകേ
മയി മീനാക്ഷി കൃപാം നിധേഹി പാകേ ..
വിധിവാഹനജേതൃകേലിയാനേ
വിമതാമോടനപൂജിതാപദാനേ .
മധുരേക്ഷണഭാവപൂതമീനേ
മയി മീനാക്ഷി കൃപാം വിധേഹി ദീനേ ..
തപനീയപയോജിനീതടസ്ഥേ
തുഹിനപ്രായമഹീധരോദരസ്ഥേ .
മദനാരിപരിഗ്രഹേ കൃതാർഥേ
മയി മീനാക്ഷി കൃപാം നിധേഹി സാർഥേ ..
കലകീരകലോക്തിനാദദക്ഷേ
കലിതാനേകജഗന്നിവാസിരക്ഷേ .
മദനാശുഗഹല്ലകാന്തപാണേ
മയി മീനാക്ഷി കൃപാം കുരു പ്രവീണേ ..
മധുവൈരിവിരിഞ്ചിമുഖ്യസേവ്യേ
മനസാ ഭാവിതചന്ദ്രമൗലിസവ്യേ .
തരസാ പരിപൂതയജ്ഞഹവ്യേ
മയി മീനാക്ഷി കൃപാം വിധേഹി ഭവ്യേ ..
ജഗദംബ കദംബമൂലവാസേ
കമലാമോദമുഖേന്ദുമന്ദഹാസേ .
മദമന്ദിരചാരുദൃഗ്വിലാസേ
മയി മീനാക്ഷി കൃപാം നിധേഹി ദാസേ .
പഠതാമനിശം പ്രഭാതകാലേ
മണിമാലാഷ്ടകമഷ്ടഭൂതിദായി .
ഘടികാശതചാതുരീം പ്രദദ്യാത്
കരുണാപൂർണകടാക്ഷസന്നിവേശം ..
Other stotras
