വിജേതും പ്രതസ്ഥേ യദാ കാലകസ്യാ-
സുരാൻ രാവണോ മുഞ്ജമാലിപ്രവർഹാൻ .
തദാ കാമകാളീം സ തുഷ്ടാവ
വാഗ്ഭിർജിഗീഷുർമൃധേ ബാഹുവീർയ്യേണ സർവാൻ ..

മഹാവർത്തഭീമാസൃഗബ്ധ്യുത്ഥവീചീ-
പരിക്ഷാളിതാ ശ്രാന്തകന്ഥശ്മശാനേ .
ചിതിപ്രജ്വലദ്വഹ്നികീലാജടാലേ
ശിവാകാരശാവാസനേ സന്നിഷണ്ണാം ..

മഹാഭൈരവീയോഗിനീഡാകിനീഭിഃ
കരാളാഭിരാപാദലംബത്കചാഭിഃ .
ഭ്രമന്തീഭിരാപീയ മദ്യാമിഷാസ്രാന്യജസ്രം
സമം സഞ്ചരന്തീം ഹസന്തീം ..

മഹാകല്പകാലാന്തകാദംബിനീ-
ത്വിട്പരിസ്പർദ്ധിദേഹദ്യുതിം ഘോരനാദാം .
സ്ഫുരദ്ദ്വാദശാദിത്യകാലാഗ്നിരുദ്ര-
ജ്വലദ്വിദ്യുദോഘപ്രഭാദുർനിരീക്ഷ്യാം ..

ലസന്നീലപാഷാണനിർമാണവേദി-
പ്രഭശ്രോണിബിംബാം ചലത്പീവരോരും .
സമുത്തുംഗപീനായതോരോജകുംഭാം
കടിഗ്രന്ഥിതദ്വീപികൃത്ത്യുത്തരീയാം ..

സ്രവദ്രക്തവൽഗന്നൃമുണ്ഡാവനദ്ധാ-
സൃഗാബദ്ധനക്ഷത്രമാലൈകഹാരാം .
മൃതബ്രഹ്മകുല്യോപക്ലൃപ്താംഗഭൂഷാം
മഹാട്ടാട്ടഹാസൈർജഗത് ത്രാസയന്തീം ..

നിപീതാനനാന്താമിതോദ്ധൃത്തരക്തോ-
ച്ഛലദ്ധാരയാ സ്നാപിതോരോജയുഗ്മാം .
മഹാദീർഘദംഷ്ട്രായുഗന്യഞ്ചദഞ്ച-
ല്ലലല്ലേലിഹാനോഗ്രജിഹ്വാഗ്രഭാഗാം ..

ചലത്പാദപദ്മദ്വയാലംബിമുക്ത-
പ്രകമ്പാലിസുസ്നിഗ്ധസംഭുഗ്നകേശാം .
പദന്യാസസംഭാരഭീതാഹിരാജാ-
നനോദ്ഗച്ഛദാത്മസ്തുതിവ്യസ്തകർണാം ..

മഹാഭീഷണാം ഘോരവിംശാർദ്ധവക്ത്രൈ-
സ്തഥാസപ്തവിംശാന്വിതൈർലോചനൈശ്ച .
പുരോദക്ഷവാമേ ദ്വിനേത്രോജ്ജ്വലാഭ്യാം
തഥാന്യാനനേ ത്രിത്രിനേത്രാഭിരാമാം ..

ലസദ്വീപിഹർയ്യക്ഷഫേരുപ്ലവംഗ-
ക്രമേലർക്ഷതാർക്ഷദ്വിപഗ്രാഹവാഹൈഃ .
മുഖൈരീദൃശാകാരിതൈർഭ്രാജമാനാം
മഹാപിംഗളോദ്യജ്ജടാജൂടഭാരാം ..

ഭുജൈഃ സപ്തവിംശാങ്കിതൈർവാമഭാഗേ
യുതാം ദക്ഷിണേ ചാപി താവദ്ഭിരേവ .
ക്രമാദ്രത്നമാലാം കപാലം ച ശുഷ്കം
തതശ്ചർമപാശം സുദീർഘം ദധാനാം ..

തതഃ ശക്തിഖട്വാംഗമുണ്ഡം ഭുശുണ്ഡീം
ധനുശ്ചക്രഘണ്ടാശിശുപ്രേതശൈലാൻ .
തതോ നാരകങ്കാലബഭ്രൂരഗോന്മാദ-
വംശീം തഥാ മുദ്ഗരം വഹ്നികുണ്ഡം ..

അധോ ഡമ്മരും പാരിഘം ഭിന്ദിപാലം
തഥാ മൗശലം പട്ടിശം പ്രാശമേവം .
ശതഘ്നീം ശിവാപോതകം ചാഥ ദക്ഷേ
മഹാരത്നമാലാം തഥാ കർത്തുഖഡ്ഗൗ ..

ചലത്തർജ്ജനീമങ്കുശം ദണ്ഡമുഗ്രം
ലസദ്രത്നകുംഭം ത്രിശൂലം തഥൈവ .
ശരാൻ പാശുപത്യാംസ്തഥാ പഞ്ച കുന്തം
പുനഃ പാരിജാതം ഛുരീം തോമരം ച ..

പ്രസൂനസ്രജം ഡിണ്ഡിമം ഗൃധ്രരാജം
തതഃ കോരകം മാംസഖണ്ഡം ശ്രുവം ച .
ഫലം ബീജപൂരാഹ്വയം ചൈവ സൂചീം
തഥാ പർശുമേവം ഗദാം യഷ്ടിമുഗ്രാം ..

തതോ വജ്രമുഷ്ടിം കുണപ്പം സുഘോരം
തഥാ ലാലനം ധാരയന്തീം ഭുജൈസ്തൈഃ .
ജവാപുഷ്പരോചിഷ്ഫണീന്ദ്രോപക്ലൃപ്ത-
ക്വണന്നൂപുരദ്വന്ദ്വസക്താംഘ്രിപദ്മാം ..

മഹാപീതകുംഭീനസാവദ്ധനദ്ധ
സ്ഫുരത്സർവഹസ്തോജ്ജ്വലത്കങ്കണാം ച .
മഹാപാടലദ്യോതിദർവീകരേന്ദ്രാ-
വസക്താംഗദവ്യൂഹസംശോഭമാനാം ..

മഹാധൂസരത്ത്വിഡ്ഭുജംഗേന്ദ്രക്ലൃപ്ത-
സ്ഫുരച്ചാരുകാടേയസൂത്രാഭിരാമാം .
ചലത്പാണ്ഡുരാഹീന്ദ്രയജ്ഞോപവീത-
ത്വിഡുദ്ഭാസിവക്ഷഃസ്ഥലോദ്യത്കപാടാം ..

പിശംഗോരഗേന്ദ്രാവനദ്ധാവശോഭാ-
മഹാമോഹബീജാംഗസംശോഭിദേഹാം .
മഹാചിത്രിതാശീവിഷേന്ദ്രോപക്ലൃപ്ത-
സ്ഫുരച്ചാരുതാടങ്കവിദ്യോതികർണാം ..

വലക്ഷാഹിരാജാവനദ്ധോർധ്വഭാസി-
സ്ഫുരത്പിംഗലോദ്യജ്ജടാജൂടഭാരാം .
മഹാശോണഭോഗീന്ദ്രനിസ്യൂതമൂണ്ഡോ-
ല്ലസത്കിങ്കണീജാലസംശോഭിമധ്യാം ..

സദാ സംസ്മരാമീദൃശോം കാമകാളീം
ജയേയം സുരാണാം ഹിരണ്യോദ്ഭവാനാം .
സ്മരേയുർഹി യേഽന്യേഽപി തേ വൈ ജയേയു-
ര്വിപക്ഷാന്മൃധേ നാത്ര സന്ദേഹലേശഃ ..

പഠിഷ്യന്തി യേ മത്കൃതം സ്തോത്രരാജം
മുദാ പൂജയിത്വാ സദാ കാമകാളീം .
ന ശോകോ ന പാപം ന വാ ദുഃഖദൈന്യം
ന മൃത്യുർന രോഗോ ന ഭീതിർന ചാപത് ..

ധനം ദീർഘമായുഃ സുഖം ബുദ്ധിരോജോ
യശഃ ശർമഭോഗാഃ സ്ത്രിയഃ സൂനവശ്ച .
ശ്രിയോ മംഗലം ബുദ്ധിരുത്സാഹ ആജ്ഞാ
ലയഃ ശർമ സർവ വിദ്യാ ഭവേന്മുക്തിരന്തേ ..

Ramaswamy Sastry and Vighnesh Ghanapaathi