அத ஶ்ரீமத்பகவத்கீதா
அத ப்ரதமோ(அ)த்யாய꞉ .
அர்ஜுனவிஷாதயோக꞉

த்ருʼதராஷ்ட்ர உவாச -

தர்மக்ஷேத்ரே குருக்ஷேத்ரே ஸமவேதா யுயுத்ஸவ꞉ .
மாமகா꞉ பாண்டவாஶ்சைவ கிமகுர்வத ஸஞ்ஜய ..

ஸஞ்ஜய உவாச -

த்ருʼஷ்ட்வா து பாண்டவானீகம்ʼ வ்யூடம்ʼ துர்யோதனஸ்ததா .
ஆசார்யமுபஸங்கம்ய ராஜா வசனமப்ரவீத் ..

பஶ்யைதாம்ʼ பாண்டுபுத்ராணாமாசார்ய மஹதீம்ʼ சமூம் .
வ்யூடாம்ʼ த்ருபதபுத்ரேண தவ ஶிஷ்யேண தீமதா ..

அத்ர ஶூரா மஹேஷ்வாஸா பீமார்ஜுனஸமா யுதி .
யுயுதானோ விராடஶ்ச த்ருபதஶ்ச மஹாரத꞉ ..

த்ருʼஷ்டகேதுஶ்சேகிதான꞉ காஶிராஜஶ்ச வீர்யவான் .
புருஜித்குந்திபோஜஶ்ச ஶைப்யஶ்ச நரபுங்கவ꞉ ..

யுதாமன்யுஶ்ச விக்ராந்த உத்தமௌஜாஶ்ச வீர்யவான் .
ஸௌபத்ரோ த்ரௌபதேயாஶ்ச ஸர்வ ஏவ மஹாரதா꞉ ..

அஸ்மாகம்ʼ து விஶிஷ்டா யே தாந்நிபோத த்விஜோத்தம .
நாயகா மம ஸைன்யஸ்ய ஸஞ்ஜ்ஞார்தம்ʼ தான்ப்ரவீமி தே ..

பவான்பீஷ்மஶ்ச கர்ணஶ்ச க்ருʼபஶ்ச ஸமிதிஞ்ஜய꞉ .
அஶ்வத்தாமா விகர்ணஶ்ச ஸௌமதத்திஸ்ததைவ ச ..

அன்யே ச பஹவ꞉ ஶூரா மதர்தே த்யக்தஜீவிதா꞉ .
நாநாஶஸ்த்ரப்ரஹரணா꞉ ஸர்வே யுத்தவிஶாரதா꞉ ..

அபர்யாப்தம்ʼ ததஸ்மாகம்ʼ பலம்ʼ பீஷ்மாபிரக்ஷிதம் .
பர்யாப்தம்ʼ த்விதமேதேஷாம்ʼ பலம்ʼ பீமாபிரக்ஷிதம் ..

அயனேஷு ச ஸர்வேஷு யதாபாகமவஸ்திதா꞉ .
பீஷ்மமேவாபிரக்ஷந்து பவந்த꞉ ஸர்வ ஏவ ஹி ..

தஸ்ய ஸஞ்ஜநயன்ஹர்ஷம்ʼ குருவ்ருʼத்த꞉ பிதாமஹ꞉ .
ஸிம்ʼஹநாதம்ʼ வினத்யோச்சை꞉ ஶங்கம்ʼ தத்மௌ ப்ரதாபவான் ..

தத꞉ ஶங்காஶ்ச பேர்யஶ்ச பணவானககோமுகா꞉ .
ஸஹஸைவாப்யஹன்யந்த ஸ ஶப்தஸ்துமுலோ(அ)பவத் ..

தத꞉ ஶ்வேதைர்ஹயைர்யுக்தே மஹதி ஸ்யந்தனே ஸ்திதௌ .
மாதவ꞉ பாண்டவஶ்சைவ திவ்யௌ ஶங்கௌ ப்ரதத்மது꞉ ..

பாஞ்சஜன்யம்ʼ ஹ்ருʼஷீகேஶோ தேவதத்தம்ʼ தனஞ்ஜய꞉ .
பௌண்ட்ரம்ʼ தத்மௌ மஹாஶங்கம்ʼ பீமகர்மா வ்ருʼகோதர꞉ ..

அனந்தவிஜயம்ʼ ராஜா குந்தீபுத்ரோ யுதிஷ்டிர꞉ .
நகுல꞉ ஸஹதேவஶ்ச ஸுகோஷமணிபுஷ்பகௌ ..

காஶ்யஶ்ச பரமேஷ்வாஸ꞉ ஶிகண்டீ ச மஹாரத꞉ .
த்ருʼஷ்டத்யும்னோ விராடஶ்ச ஸாத்யகிஶ்சாபராஜித꞉ ..

த்ருபதோ த்ரௌபதேயாஶ்ச ஸர்வஶ꞉ ப்ருʼதிவீபதே .
ஸௌபத்ரஶ்ச மஹாபாஹு꞉ ஶங்காந்தத்மு꞉ ப்ருʼதக்ப்ருʼதக் ..

ஸ கோஷோ தார்தராஷ்ட்ராணாம்ʼ ஹ்ருʼதயானி வ்யதாரயத் .
நபஶ்ச ப்ருʼதிவீம்ʼ சைவ துமுலோ(அ)ப்யனுநாதயன் ..

அத வ்யவஸ்திதாந்த்ருʼஷ்ட்வா தார்தராஷ்ட்ரான் கபித்வஜ꞉ .
ப்ரவ்ருʼத்தே ஶஸ்த்ரஸம்பாதே தனுருத்யம்ய பாண்டவ꞉ ..

ஹ்ருʼஷீகேஶம்ʼ ததா வாக்யமிதமாஹ மஹீபதே .

அர்ஜுன உவாச -

ஸேனயோருபயோர்மத்யே ரதம்ʼ ஸ்தாபய மே(அ)ச்யுத ..

யாவதேதாந்நிரீக்ஷே(அ)ஹம்ʼ யோத்துகாமானவஸ்திதான் .
கைர்மயா ஸஹ யோத்தவ்யமஸ்மின் ரணஸமுத்யமே ..

யோத்ஸ்யமானானவேக்ஷே(அ)ஹம்ʼ ய ஏதே(அ)த்ர ஸமாகதா꞉ .
தார்தராஷ்ட்ரஸ்ய துர்புத்தேர்யுத்தே ப்ரியசிகீர்ஷவ꞉ ..

ஸஞ்ஜய உவாச -

ஏவமுக்தோ ஹ்ருʼஷீகேஶோ குடாகேஶேன பாரத .
ஸேனயோருபயோர்மத்யே ஸ்தாபயித்வா ரதோத்தமம் ..

பீஷ்மத்ரோணப்ரமுகத꞉ ஸர்வேஷாம்ʼ ச மஹீக்ஷிதாம் .
உவாச பார்த பஶ்யைதான்ஸமவேதான்குரூனிதி ..

தத்ராபஶ்யத்ஸ்திதான்பார்த꞉ பித்ரூʼனத பிதாமஹான் .
ஆசார்யான்மாதுலான்ப்ராத்ரூʼன்புத்ரான்பௌத்ரான்ஸகீம்ʼஸ்ததா ..

ஶ்வஶுரான்ஸுஹ்ருʼதஶ்சைவ ஸேனயோருபயோரபி .
தான்ஸமீக்ஷ்ய ஸ கௌந்தேய꞉ ஸர்வான்பந்தூனவஸ்திதான் ..

க்ருʼபயா பரயாவிஷ்டோ விஷீதன்னிதமப்ரவீத் .

அர்ஜுன உவாச -

த்ருʼஷ்ட்வேமம்ʼ ஸ்வஜனம்ʼ க்ருʼஷ்ண யுயுத்ஸும்ʼ ஸமுபஸ்திதம் ..

ஸீதந்தி மம காத்ராணி முகம்ʼ ச பரிஶுஷ்யதி .
வேபதுஶ்ச ஶரீரே மே ரோமஹர்ஷஶ்ச ஜாயதே ..

காண்டீவம்ʼ ஸ்ரம்ʼஸதே ஹஸ்தாத்த்வக்சைவ பரிதஹ்யதே .
ந ச ஶக்னோம்யவஸ்தாதும்ʼ ப்ரமதீவ ச மே மன꞉ ..

நிமித்தானி ச பஶ்யாமி விபரீதானி கேஶவ .
ந ச ஶ்ரேயோ(அ)னுபஶ்யாமி ஹத்வா ஸ்வஜனமாஹவே ..

ந காங்க்ஷே விஜயம்ʼ க்ருʼஷ்ண ந ச ராஜ்யம்ʼ ஸுகானி ச .
கிம்ʼ நோ ராஜ்யேன கோவிந்த கிம்ʼ போகைர்ஜீவிதேன வா ..

யேஷாமர்தே காங்க்ஷிதம்ʼ நோ ராஜ்யம்ʼ போகா꞉ ஸுகானி ச .
த இமே(அ)வஸ்திதா யுத்தே ப்ராணாம்ʼஸ்த்யக்த்வா தனானி ச ..

ஆசார்யா꞉ பிதர꞉ புத்ராஸ்ததைவ ச பிதாமஹா꞉ .
மாதுலா꞉ ஶ்வஶுரா꞉ பௌத்ரா꞉ ஶ்யாலா꞉ ஸம்பந்தினஸ்ததா ..

ஏதான்ன ஹந்துமிச்சாமி க்னதோ(அ)பி மதுஸூதன .
அபி த்ரைலோக்யராஜ்யஸ்ய ஹேதோ꞉ கிம்ʼ நு மஹீக்ருʼதே ..

நிஹத்ய தார்தராஷ்ட்ரான்ன꞉ கா ப்ரீதி꞉ ஸ்யாஜ்ஜனார்தன .
பாபமேவாஶ்ரயேதஸ்மான்ஹத்வைதானாததாயின꞉ ..

தஸ்மான்னார்ஹா வயம்ʼ ஹந்தும்ʼ தார்தராஷ்ட்ரான்ஸ்வபாந்தவான் .
ஸ்வஜனம்ʼ ஹி கதம்ʼ ஹத்வா ஸுகின꞉ ஸ்யாம மாதவ ..

யத்யப்யேதே ந பஶ்யந்தி லோபோபஹதசேதஸ꞉ .
குலக்ஷயக்ருʼதம்ʼ தோஷம்ʼ மித்ரத்ரோஹே ச பாதகம் ..

கதம்ʼ ந ஜ்ஞேயமஸ்மாபி꞉ பாபாதஸ்மாந்நிவர்திதும் .
குலக்ஷயக்ருʼதம்ʼ தோஷம்ʼ ப்ரபஶ்யத்பிர்ஜனார்தன ..

குலக்ஷயே ப்ரணஶ்யந்தி குலதர்மா꞉ ஸனாதனா꞉ .
தர்மே நஷ்டே குலம்ʼ க்ருʼத்ஸ்னமதர்மோ(அ)பிபவத்யுத ..

அதர்மாபிபவாத்க்ருʼஷ்ண ப்ரதுஷ்யந்தி குலஸ்த்ரிய꞉ .
ஸ்த்ரீஷு துஷ்டாஸு வார்ஷ்ணேய ஜாயதே வர்ணஸங்கர꞉ ..

ஸங்கரோ நரகாயைவ குலக்னானாம்ʼ குலஸ்ய ச .
பதந்தி பிதரோ ஹ்யேஷாம்ʼ லுப்தபிண்டோதகக்ரியா꞉ ..

தோஷைரேதை꞉ குலக்னானாம்ʼ வர்ணஸங்கரகாரகை꞉ .
உத்ஸாத்யந்தே ஜாதிதர்மா꞉ குலதர்மாஶ்ச ஶாஶ்வதா꞉ ..

உத்ஸந்நகுலதர்மாணாம்ʼ மனுஷ்யாணாம்ʼ ஜனார்தன .
நரகே நியதம்ʼ வாஸோ பவதீத்யனுஶுஶ்ரும ..

அஹோ பத மஹத்பாபம்ʼ கர்தும்ʼ வ்யவஸிதா வயம் .
யத்ராஜ்யஸுகலோபேன ஹந்தும்ʼ ஸ்வஜனமுத்யதா꞉ ..

யதி மாமப்ரதீகாரமஶஸ்த்ரம்ʼ ஶஸ்த்ரபாணய꞉ .
தார்தராஷ்ட்ரா ரணே ஹன்யுஸ்தன்மே க்ஷேமதரம்ʼ பவேத் ..

ஸஞ்ஜய உவாச -

ஏவமுக்த்வார்ஜுன꞉ ஸங்க்யே ரதோபஸ்த உபாவிஶத் .
விஸ்ருʼஜ்ய ஸஶரம்ʼ சாபம்ʼ ஶோகஸம்ʼவிக்னமானஸ꞉ ..

ௐ தத்ஸதிதி ஶ்ரீமத்பகவத்கீதோபநிஷத்ஸு
ப்ரஹ்மவித்யாயாம்ʼ யோகஶாஸ்த்ரே ஶ்ரீக்ருʼஷ்ணார்ஜுனஸம்ʼவாதே
அர்ஜுனவிஷாதயோகோ நாம ப்ரதமோ(அ)த்யாய꞉ ..

Ramaswamy Sastry and Vighnesh Ghanapaathi