ಮಾಂಗಲ್ಯಾನಾಂ ತ್ವಮಸಿ ಜನನೀ ದೇವಿ ದುರ್ಗೇ ನಮಸ್ತೇ
ದೌರ್ಬಲ್ಯಾನಾಂ ಸಬಲಹರಣೀ ಭಕ್ತಿಮಾಲ್ಯೈರ್ವರೇಣ್ಯಾ .
ತ್ವಂ ಶಲ್ಯಾನಾಂ ಸಮುಪಶಮನೀ ಶೈಲಜಾ ಶೂಲಹಸ್ತೇ
ವಾತ್ಸಲ್ಯಾನಾಂ ಮಧುರಝರಣಾ ದೇಹಿ ಭದ್ರಂ ಶರಣ್ಯಾ ..

ತ್ವಂ ಗಾಯತ್ರೀ ನಿಖಿಲಜಗತಾಮನ್ನಪೂರ್ಣಾ ಪ್ರಸನ್ನಾ
ಮೇಧಾ ವಿದ್ಯಾ ತ್ವಮಸಿ ಶುಭದಾ ಶಾಂಭವೀ ಶಕ್ತಿರಾದ್ಯಾ .
ಮರ್ತ್ತ್ಯೇ ಲೋಕೇ ಸಕಲಕಲುಷಂ ನಾಶಯ ಸ್ವೀಯಧಾಮ್ನಾ
ಸಿಂಹಾಸೀನಾ ಕುರು ಸುಕರುಣಾಂ ಶಂಕರೀ ವಿಶ್ವವಂದ್ಯಾ ..

ಸಂಸಾರಶ್ರೀರ್ಜನಯ ಸುಖದಾಂ ಭಾವನಾಂ ಸುಪ್ರಕಾಶಾಂ
ಶಂ ಶರ್ವಾಣೀ ವಿತರ ತಮಸಾಂ ಧ್ವಂಸಿನೀ ಪಾವನೀ ತ್ವಂ .
ಪಾಪಾಚಾರೈಃ ಪ್ರಬಲಮಥಿತಾಂ ದುಷ್ಟದೈತ್ಯೈರ್ನಿರಾಶಾಂ
ಪೃಥ್ವೀಮಾರ್ತ್ತಾಂ ವ್ಯಥಿತಹೃದಯಾಂ ತ್ರಾಹಿ ಕಾತ್ಯಾಯನೀ ತ್ವಂ ..

ರುದ್ರಾಣೀ ತ್ವಂ ವಿತರ ಸುಭಗಂ ಮಾತೃಕಾ ಸನ್ಮತೀನಾಂ
ಶಾಂತಿರ್ಧರ್ಮಃ ಪ್ರಸರತು ಜನೇ ತ್ವತ್ಪ್ರಸಾದೈಃ ಶಿವಾನಿ .
ಘೋರಾ ಕಾಲೀ ಭವ ಕಲಿಯುಗೇ ಘಾತಿನೀ ದುರ್ಗತೀನಾಂ
ತ್ವಂ ಭಕ್ತಾನಾಮಭಯವರದಾ ಭೀಮಮೂರ್ತ್ತಿರ್ಭವಾನಿ ..

ವಂದೇ ಮಾತಸ್ತವ ಸುವಿಮಲಂ ಪಾದರಾಜತ್ಸರೋಜಂ
ದುರ್ಗೇ ದುಃಖಂ ಹರ ದಶಭುಜಾ ದೇಹಿ ಸಾನಂದಮೋಜಂ .
ತ್ವಂ ಪದ್ಮಾಸ್ಯಾ ಹಸಿತಮಧುರಂ ಸೌರಭಂ ತನ್ವತೀ ಸ್ವಂ
ಮೋಹಸ್ತೋಮಂ ಹರ ಸುಮನಸಾಂ ಪೂಜಿತಾ ಪಾಹಿ ವಿಶ್ವಂ ..

Ramaswamy Sastry and Vighnesh Ghanapaathi