ദുർഗാ പ്രണതി പഞ്ചക സ്തോത്രം
മാംഗല്യാനാം ത്വമസി ജനനീ ദേവി ദുർഗേ നമസ്തേ
ദൗർബല്യാനാം സബലഹരണീ ഭക്തിമാല്യൈർവരേണ്യാ .
ത്വം ശല്യാനാം സമുപശമനീ ശൈലജാ ശൂലഹസ്തേ
വാത്സല്യാനാം മധുരഝരണാ ദേഹി ഭദ്രം ശരണ്യാ ..
ത്വം ഗായത്രീ നിഖിലജഗതാമന്നപൂർണാ പ്രസന്നാ
മേധാ വിദ്യാ ത്വമസി ശുഭദാ ശാംഭവീ ശക്തിരാദ്യാ .
മർത്ത്യേ ലോകേ സകലകലുഷം നാശയ സ്വീയധാമ്നാ
സിംഹാസീനാ കുരു സുകരുണാം ശങ്കരീ വിശ്വവന്ദ്യാ ..
സംസാരശ്രീർജനയ സുഖദാം ഭാവനാം സുപ്രകാശാം
ശം ശർവാണീ വിതര തമസാം ധ്വംസിനീ പാവനീ ത്വം .
പാപാചാരൈഃ പ്രബലമഥിതാം ദുഷ്ടദൈത്യൈർനിരാശാം
പൃഥ്വീമാർത്താം വ്യഥിതഹൃദയാം ത്രാഹി കാത്യായനീ ത്വം ..
രുദ്രാണീ ത്വം വിതര സുഭഗം മാതൃകാ സന്മതീനാം
ശാന്തിർധർമഃ പ്രസരതു ജനേ ത്വത്പ്രസാദൈഃ ശിവാനി .
ഘോരാ കാലീ ഭവ കലിയുഗേ ഘാതിനീ ദുർഗതീനാം
ത്വം ഭക്താനാമഭയവരദാ ഭീമമൂർത്തിർഭവാനി ..
വന്ദേ മാതസ്തവ സുവിമലം പാദരാജത്സരോജം
ദുർഗേ ദുഃഖം ഹര ദശഭുജാ ദേഹി സാനന്ദമോജം .
ത്വം പദ്മാസ്യാ ഹസിതമധുരം സൗരഭം തന്വതീ സ്വം
മോഹസ്തോമം ഹര സുമനസാം പൂജിതാ പാഹി വിശ്വം ..
Other stotras
