విజేతుం ప్రతస్థే యదా కాలకస్యా-
సురాన్ రావణో ముంజమాలిప్రవర్హాన్ .
తదా కామకాలీం స తుష్టావ
వాగ్భిర్జిగీషుర్మృధే బాహువీర్య్యేణ సర్వాన్ ..

మహావర్త్తభీమాసృగబ్ధ్యుత్థవీచీ-
పరిక్షాలితా శ్రాంతకంథశ్మశానే .
చితిప్రజ్వలద్వహ్నికీలాజటాలే
శివాకారశావాసనే సన్నిషణ్ణాం ..

మహాభైరవీయోగినీడాకినీభిః
కరాలాభిరాపాదలంబత్కచాభిః .
భ్రమంతీభిరాపీయ మద్యామిషాస్రాన్యజస్రం
సమం సంచరంతీం హసంతీం ..

మహాకల్పకాలాంతకాదంబినీ-
త్విట్పరిస్పర్ద్ధిదేహద్యుతిం ఘోరనాదాం .
స్ఫురద్ద్వాదశాదిత్యకాలాగ్నిరుద్ర-
జ్వలద్విద్యుదోఘప్రభాదుర్నిరీక్ష్యాం ..

లసన్నీలపాషాణనిర్మాణవేది-
ప్రభశ్రోణిబింబాం చలత్పీవరోరుం .
సముత్తుంగపీనాయతోరోజకుంభాం
కటిగ్రంథితద్వీపికృత్త్యుత్తరీయాం ..

స్రవద్రక్తవల్గన్నృముండావనద్ధా-
సృగాబద్ధనక్షత్రమాలైకహారాం .
మృతబ్రహ్మకుల్యోపక్లృప్తాంగభూషాం
మహాట్టాట్టహాసైర్జగత్ త్రాసయంతీం ..

నిపీతాననాంతామితోద్ధృత్తరక్తో-
చ్ఛలద్ధారయా స్నాపితోరోజయుగ్మాం .
మహాదీర్ఘదంష్ట్రాయుగన్యంచదంచ-
ల్లలల్లేలిహానోగ్రజిహ్వాగ్రభాగాం ..

చలత్పాదపద్మద్వయాలంబిముక్త-
ప్రకంపాలిసుస్నిగ్ధసంభుగ్నకేశాం .
పదన్యాససంభారభీతాహిరాజా-
ననోద్గచ్ఛదాత్మస్తుతివ్యస్తకర్ణాం ..

మహాభీషణాం ఘోరవింశార్ద్ధవక్త్రై-
స్తథాసప్తవింశాన్వితైర్లోచనైశ్చ .
పురోదక్షవామే ద్వినేత్రోజ్జ్వలాభ్యాం
తథాన్యాననే త్రిత్రినేత్రాభిరామాం ..

లసద్వీపిహర్య్యక్షఫేరుప్లవంగ-
క్రమేలర్క్షతార్క్షద్విపగ్రాహవాహైః .
ముఖైరీదృశాకారితైర్భ్రాజమానాం
మహాపింగలోద్యజ్జటాజూటభారాం ..

భుజైః సప్తవింశాంకితైర్వామభాగే
యుతాం దక్షిణే చాపి తావద్భిరేవ .
క్రమాద్రత్నమాలాం కపాలం చ శుష్కం
తతశ్చర్మపాశం సుదీర్ఘం దధానాం ..

తతః శక్తిఖట్వాంగముండం భుశుండీం
ధనుశ్చక్రఘంటాశిశుప్రేతశైలాన్ .
తతో నారకంకాలబభ్రూరగోన్మాద-
వంశీం తథా ముద్గరం వహ్నికుండం ..

అధో డమ్మరుం పారిఘం భిందిపాలం
తథా మౌశలం పట్టిశం ప్రాశమేవం .
శతఘ్నీం శివాపోతకం చాథ దక్షే
మహారత్నమాలాం తథా కర్త్తుఖడ్గౌ ..

చలత్తర్జ్జనీమంకుశం దండముగ్రం
లసద్రత్నకుంభం త్రిశూలం తథైవ .
శరాన్ పాశుపత్యాంస్తథా పంచ కుంతం
పునః పారిజాతం ఛురీం తోమరం చ ..

ప్రసూనస్రజం డిండిమం గృధ్రరాజం
తతః కోరకం మాంసఖండం శ్రువం చ .
ఫలం బీజపూరాహ్వయం చైవ సూచీం
తథా పర్శుమేవం గదాం యష్టిముగ్రాం ..

తతో వజ్రముష్టిం కుణప్పం సుఘోరం
తథా లాలనం ధారయంతీం భుజైస్తైః .
జవాపుష్పరోచిష్ఫణీంద్రోపక్లృప్త-
క్వణన్నూపురద్వంద్వసక్తాంఘ్రిపద్మాం ..

మహాపీతకుంభీనసావద్ధనద్ధ
స్ఫురత్సర్వహస్తోజ్జ్వలత్కంకణాం చ .
మహాపాటలద్యోతిదర్వీకరేంద్రా-
వసక్తాంగదవ్యూహసంశోభమానాం ..

మహాధూసరత్త్విడ్భుజంగేంద్రక్లృప్త-
స్ఫురచ్చారుకాటేయసూత్రాభిరామాం .
చలత్పాండురాహీంద్రయజ్ఞోపవీత-
త్విడుద్భాసివక్షఃస్థలోద్యత్కపాటాం ..

పిషంగోరగేంద్రావనద్ధావశోభా-
మహామోహబీజాంగసంశోభిదేహాం .
మహాచిత్రితాశీవిషేంద్రోపక్లృప్త-
స్ఫురచ్చారుతాటంకవిద్యోతికర్ణాం ..

వలక్షాహిరాజావనద్ధోర్ధ్వభాసి-
స్ఫురత్పింగలోద్యజ్జటాజూటభారాం .
మహాశోణభోగీంద్రనిస్యూతమూండో-
ల్లసత్కింకణీజాలసంశోభిమధ్యాం ..

సదా సంస్మరామీదృశోం కామకాలీం
జయేయం సురాణాం హిరణ్యోద్భవానాం .
స్మరేయుర్హి యేఽన్యేఽపి తే వై జయేయు-
ర్విపక్షాన్మృధే నాత్ర సందేహలేశః ..

పఠిష్యంతి యే మత్కృతం స్తోత్రరాజం
ముదా పూజయిత్వా సదా కామకాలీం .
న శోకో న పాపం న వా దుఃఖదైన్యం
న మృత్యుర్న రోగో న భీతిర్న చాపత్ ..

ధనం దీర్ఘమాయుః సుఖం బుద్ధిరోజో
యశః శర్మభోగాః స్త్రియః సూనవశ్చ .
శ్రియో మంగలం బుద్ధిరుత్సాహ ఆజ్ఞా
లయః శర్మ సర్వ విద్యా భవేన్ముక్తిరంతే ..

Ramaswamy Sastry and Vighnesh Ghanapaathi