సదేకం పరం కేవలం నిర్వికారం నిరాకారమానందమాత్రం పవిత్రం .
స్వయంజ్యోతిరవ్యక్తమాకాశకల్పం శ్రుతిర్బ్రహ్మ యత్ప్రాహ తస్మై నమస్తే ..

య ఏకోఽపి మాయావశాత్సర్వహేతుః స్వసృష్టేషు విశ్వేషు విష్వక్ప్రవేశాత్ .
శ్రుతౌ జీవ ఇత్యుచ్యతే కేవలాత్మా తురీయాయ శుద్ధాయ తస్మై నమస్తే ..

న యస్మాదిహ ద్రష్టృ విజ్ఞాతృ చాన్యత్క్వచిత్స్యాత్పరం ద్రష్టృ విజ్ఞాతృ వా యత్ .
సమస్తాసు బుద్ధిష్వనుస్యూతమేకం నమో బ్రహ్మణే జీవరూపాయ తస్మై ..

ముఖాద్దర్పణే దృశ్యమానో న భిన్నో ముఖాభాస ఏవం చిదాభాస ఈశః .
చితో నైవ భిన్నోఽస్తి మాయాస్థితో యః పరేశాయ తస్మై నమః కేవలాయ ..

యథా సూర్య ఏకః స్థితస్తోయపాత్రేష్వనేకేషు యో నిర్వికారస్తథాఽఽత్మా .
స్థితః స్వీయబుద్ధిష్వనేకాసు నిత్యశ్చిదేకస్వరూపాయ తస్మై నమస్తే ..

స్థితోఽనేకబుద్ధిష్వయం జీవ ఏకో విభుః కారణేకత్వతో నాత్ర నానా .
ఇతి త్యక్తసర్వైషణాపీహ యస్య ప్రసాదాద్విజానంతి తస్మై నమస్తే ..

ముఖైః పంచభిర్భోగ్యవస్తూని భుంక్తే హ్యభోక్తాపి బుద్ధిస్థితో బుద్ధితుల్యః .
కరోతీవ కర్మాణ్యకర్మాపి యో వై విచిత్రాయ తస్మై నమస్తేఽస్తు నిత్యం ..

చిదాభాస ఏవాత్ర కర్తేవ భాతి స్వరూపాపరిజ్ఞానతో యస్య నూనం .
స్వబుద్ధేరియం కర్తృభోక్తృత్వరూపా మృషా సంసృతిర్వై నమస్తేఽస్తు తస్మై ..

చిదాభాసచైతన్యబుద్ధీర్వివిచ్యాత్ర విజ్ఞాయ సంసారబంధాద్విముక్తః .
య ఏతద్వివేకావధిం స్వస్య మేనే సమస్తం చ సంసారమస్మై నమస్తే ..

న కస్యాపి సంసారలేశోఽస్తి కశ్చిత్స కర్తృత్వభోక్తృత్వరూపో హి మిథ్యా .
సమస్తోఽప్యయం యత్స్వరూపావివేకాన్నమస్తే సదా నిత్యముక్తాయ తస్మై ..

జడా బుద్ధిరాత్మా పరో నిర్వికారశ్చిదాభాస ఏకోఽపి మిథ్యైవ జీవః .
య ఏతద్వివేకీ స్వతో నిత్యముక్తః సదా నిర్వికారాయ తస్మై నమస్తే ..

చిదాభాస ఏకోఽవ్యయః కారణస్థో య ఈశః స ఏవేహ కార్యస్థితః సన్ .
అభూజ్జీవసంజ్ఞః స ఏకో హి జీవః స భిన్నో న యస్మాన్నమస్తేఽస్తు తస్మై ..

యదజ్ఞానతో జీవనానాత్వమాహుర్మహామాయయా మోహితా వాదదక్షాః .
వివేకీ వదత్యేకమేవాత్ర జీవం పరిత్యక్తవాదో నమస్తేఽస్తు తస్మై ..

చిదాభాస ఏకోఽథవా నేతి సర్వే విముహ్యంతి బేదాంతినోఽప్యన్యభక్తాః .
తథాప్యేక ఏవేతి ధీదార్ఢ్యదాతా య ఆత్మా స్వభక్తస్య తస్మై నమస్తే ..

ముఖాదర్శయోరేక ఏకైకతాయాం ముఖాభాస ఏవం చిదాభాస ఏకః .
స్వచిద్బ్రహ్మబింబైక్యమాయైక్యతోఽయం యదంశోఽఖిలేశో నమస్తేఽస్తు తస్మై ..

శ్రుతిర్హ్యేకతాం బ్రహ్మణో వక్తి నూనం సజాతీయభేదాదిశూన్యం తతోఽత్ర .
స్వమాయైకతాప్యస్య యుక్త్యాపి సిద్ధా నమస్తే సదైకస్వరూపాయ తస్మై ..

న మాయాబహుత్వం తదా తత్ప్రతిష్ఠా అనేకేశ్వరాః సంభవేయుర్హి నైతత్ .
కచిద్యుజ్యతే యస్య మాయాప్యనేకా నమస్తే జగద్ధేతుభూతాయ తస్మై ..

న మాయాం వినా యస్య కర్తృత్వమస్తి ప్రవేశోఽపి తస్మాత్సమస్తం మృషైవ .
మహామాయినే నిర్వికారాయ తస్మై నమో బ్రహ్మరూపాయ శుద్ధాయ తుభ్యం ..

య ఆత్మా దృగేవాఽఽస దృశ్యం త్వనాత్మా వివేకాద్ద్వయోరాత్మదృష్టిః సదృశ్యే .
వినష్టో భవేత్సా దృశి స్వస్వరూపే నమస్తే దృగాత్మస్వరూపాయ తస్మై ..

స దృగ్నిర్వికారః స్వమాయా జడేయం దృగాభాస ఏకో మృషైవేతి యస్య .
జగత్కర్తృతా తాత్త్వికీ నాస్తి తస్మై నమః కేవలాకర్తృరూపాయ తుభ్యం ..

అమాయ్యేవ మాయీ విభుః శుద్ధ ఆత్మా సృజత్యత్త్యవత్యేతదానందపూరః .
న మాయాం వినా స్రష్టృతా సాక్షితా వా విశుద్ధాత్మనో యస్య తస్మై నమస్తే ..

చితాభాస ఏవాఖిలోపాధినిష్ఠః సమస్తైకసాక్షీ స జీవేశసంజ్ఞః .
చిదంశోఽఖిలాత్మా న భిన్నోఽస్తి యస్మాన్నమస్తే విశుద్ధాత్మరూపాయ తస్మై ..

అహం సచ్చిదానంద ఆత్మైవ శుద్ధో విముక్తోఽస్మి వేదాంతవాక్యార్థబోధాత్ .
ఇతి స్వస్వరూపం విజానాతి విద్వాన్పరం యత్పరేభ్యోఽపి తస్మై నమస్తే ..

స్వమాయాపరిభ్రాంతచిత్తా అజస్రం పరాగ్వస్తు పశ్యంతి న ప్రత్యగర్థం .
ముముక్షుస్తు యం పశ్యతి ప్రత్యగర్థే పరబ్రహ్మరూపాయ తస్మై నమస్తే ..

ఉపాస్యోఽన్య ఈశోఽస్త్యహం త్వన్య ఈశాత్పశుర్వేద నైనం భజత్యత్ర యోఽస్మాత్ .
వివేకీ స ఏవాహమస్మీత్యుపాస్తే యమాత్మానమీశం నమస్తేఽస్తు తస్మై ..

భయం భేదదృష్టేర్భవత్యుల్బణం వై మహాంతో న భేదం ప్రపశ్యంతి తస్మాత్ .
యదజ్ఞానతో దృశ్యతే భేద ఏవం భిదామోహహంత్రే నమస్తేఽస్తు తస్మై ..

విరించేంద్రసూర్యాగ్నిరుద్రేందువిష్ణూన్ప్రకల్ప్యైక ఏవాద్వయః సర్వసాక్షీ .
జగచ్చక్రవిభ్రాంతికర్తా య ఆత్మా న దృశ్యేత కేనాపి తస్మై నమస్తే ..

జగజ్జాగ్రతి స్థూలమేతత్సమానం మనోవాసితం స్వప్న ఆనందనిద్రాం .
సుషుప్తౌ స్వమేవాభిపశ్యన్ముదాఽఽస్తే తురీయో య ఆత్మా నమస్తేఽస్తు తస్మై ..

సమస్తాదపి స్థూలసూక్ష్మాచ్ఛరీరాత్పరః కారణాచ్చాన్య ఆత్మా సమీపే .
య ఏకో విదూరేఽపి తిష్ఠన్ జనానాం మహిమ్ని స్వకీయే చ తస్మై నమస్తే ..

యమాశ్రిత్య నాస్తీతి చాస్తీతి వేదే ప్రవృత్తో విరుద్ధోఽపి వాదోఽఖిలాత్మా .
నమస్తేఽఙ్ఘ్రిపాణ్యాదిహీనాయ నిత్యం సమస్తాంఘ్రిపాణ్యాదియుక్తాయ తస్మై ..

యోఽణోరణీయాంసమాత్మానమేకం మహంతం మహద్వస్తునశ్చేతనేభ్యః .
పరం చేతనం నిత్యతో వేద నిత్యం యమేవేహ విద్వాన్నమస్తేఽస్తు తస్మై ..

యదానందలేశోపభోగేన సర్వే సదానందినః సంభవంత్యత్ర తస్మై .
సదానందసందోహపూర్ణార్ణవాయ ప్రసన్నాయ తుభ్యం నమః కేవలాయ ..

యముత్సృజ్య మర్త్యా భజత్యన్యదేవాన్న తేషాం విముక్తిః ఫలం కింతు తుచ్ఛం .
శ్వపుచ్ఛం గృహీత్వా తరిష్యంతి కే వా సముద్రం హ్యపారం నమస్తేఽస్తు తస్మై ..

యథా విధ్యుపాస్తౌ ఫలం దాస్యతీశస్తథా విష్ణురుద్రేంద్రవహ్న్యాద్యుపాస్తౌ .
ఫలం దాస్యతి బ్రహ్మ యద్ధీశసంజ్ఞః స్వకర్మానుసారం నమస్తేఽస్తు తస్మై ..

న యద్బ్రహ్మ మోక్షప్రదం స్యాత్కదాచిద్వినేహైవ ముక్తిప్రదం జ్ఞానమేకం .
న మోక్షం కృతః కర్మణాతః కృతేన ప్రపన్నార్తిహంత్రే నమస్తేఽస్తు తస్మై ..

ఇదం నేతినేతీత్యమూర్తం చ మూర్తం నిరస్యైవ సర్వం జగద్దృశ్యమేతత్ .
నిషేధావధి బ్రహ్మ యచ్ఛిష్యతే వై మనోవాగతీతాయ తస్మై నమస్తే ..

పరిత్యజ్య యత్తత్త్వసమ్యగ్విచారం ప్రవర్తేత యస్తీర్థయాత్రాజపాదౌ .
కరస్థాన్నముత్సృజ్య లేఢీతి హస్తం న యస్యోదయస్తస్య తస్మై నమస్తే ..

న చేత్ప్రాణవర్గేష్వయం స్యాజ్జడత్వాత్కథం ప్రాణనాడీ క్రియాకారితైషాం .
అతో యస్య సిద్ధా స్థితా యుక్తితోఽపి ప్రపంచప్రకాశాచ్చ తస్మై నమస్తే ..

భయం యద్విదాం నాస్తి మృత్యుశ్చ నూనం బిభేత్యేవ వాయ్వాది సర్వే చ యస్మాత్ .
శరీరేఽహమిత్యత్ర బుద్ధేర్భయం స్యాన్నమస్తేఽభయాయాశరీరాయ తస్మై ..

గురౌ భక్తియుక్తైరిహైవేశ్వరో యః సువిజ్ఞేయ ఆత్మాఽన్యథా త్వబ్దకోట్యా .
అవిజ్ఞేయ ఏకః స్వబుద్ధిస్థితోఽపి ప్రియాయాఖిలేభ్యోఽపి తస్మై నమస్తే ..

సమస్తాత్ప్రియో దేహ ఏవాక్షమస్మాత్ప్రియం ప్రాణ ఏవాక్షతోఽపి ప్రియోఽతః .
ప్రియః ప్రత్యగాత్మైవ భోక్తా పరో యః స్వతోఽతిప్రియాయేహ తస్మై నమస్తే ..

ప్రియాదాత్మనోఽన్యన్న విద్యేత కించిత్క్వచిత్కారణాన్నైవ భిద్యేత కార్యం .
య ఆత్మా సమస్తస్య హేతుర్నమస్తే నిదానాయ సర్వస్య దృశ్యస్య తస్మై ..

సమస్తం జగత్కారణాన్నైవ భిన్నం సమస్తాత్మనః కేవలాదద్వితీయాత్ .
పరబ్రహ్మణోఽవ్యాకృతేశాచ్చ యస్మాన్నమస్తే క్షరాయాక్షరాయాపి తస్మై ..

యతః కారణాన్నేహ కార్యం విభిన్నం తతో బ్రహ్మణో నైవ భిన్నం జగత్స్యాత్ .
సమస్తం జగద్బ్రహ్మ తచ్చాస్మి విద్వానుపాస్తే యమేకం నమస్తేఽస్తు తస్మై ..

యథా మృద్వికారో మృతో నైవ భిన్నస్తథా చిద్వికారశ్చితో నైవ భిన్నః .
అతః సర్వమేతచ్చిదేవేతి విద్వాన్విజానాతి యద్బ్రహ్మ తస్మై నమస్తే ..

జగద్యస్య సర్వం శరీరం జగన్న ప్రమాతృప్రమాణప్రమేయాత్మకో యః .
సమస్తాంతరాయాఖిలేశాయ తస్మై నమః సచ్చిదానందరూపాయ తుభ్యం ..

విదుర్యం న సర్వేఽపి యో వేత్తి సర్వం సమస్తేషు భూతేషు తిష్ఠంత్వయం యః .
సమస్తాంతరః ప్రేరయత్యేవ సర్వాన్నమస్తే సమస్తాంతరేశాయ తస్మై ..

న దేహేంద్రియప్రాణధీభూతవృందం న సంసార్యహం కింతు చిన్మాత్రమేకం .
పరం చాపరం బ్రహ్మవిద్వాన్విశుద్ధస్తదస్తీతి యద్వేద తస్మై నమస్తే ..

యథా స్వప్నదృష్టా చ హస్త్యాది మిథ్యా తథా సర్వమేతజ్జగద్భాతి మిథ్యా .
అధిష్ఠానమాత్రం జగద్ద్రష్టృ సత్యం విశుద్ధం చ యద్బ్రహ్మ తస్మై నమస్తే ..

పరా చాపరా యస్య మాయా ద్విధేయం జగత్కర్తృతామక్రియస్యాతనోతి .
స్వతో ద్రష్టృదృశ్యాతిరిక్తాయ తస్మై నమః కేవలాయావ్యయాయాత్మనేఽస్తు ..

విశుద్ధాత్మతత్త్వాపరిజ్ఞానమూలం విశేషావభాసం సుఖిత్వాదిరూపం .
విశుద్ధాత్మతత్త్వే పరిజ్ఞాత ఏతత్క్వచిన్నాస్తి యస్మిన్నమస్తేఽన్తు తస్మై ..

న హి త్వక్పరిజ్ఞానతః సర్పభానం క్వచిద్విద్యతే సర్పతా కల్పితా స్యాత్ .
తథా కల్పితం సర్వమేతచ్చ యస్మిన్నమస్తే సమస్తావభాసాయ తస్మై ..

సుషుప్తౌ న సంసారలేశోఽస్తి కశ్చిత్ప్రబోధేఽఖిలాహంకృతౌ దృశ్యతేఽయం .
అతోఽహంకృతేరేవ సంసార ఇత్థం న వై సంసృతిర్యస్య తస్మై నమస్తే ..

న శాస్తా న శిష్యో న శాస్త్రం న విశ్వం నం శాక్తం చ శైవం మతం వైష్ణవం వా .
సుషుప్తౌ తదానీం యదస్త్యాత్మమాత్రం స్వతో నిష్ప్రపంచాయ తస్మై నమస్తే ..

జడానాం ప్రవృత్తిః స్వతో నాస్తి యస్మాద్విభోశ్చేతనాత్సా ప్రవృత్తిః ప్రవృత్తా .
మనఃప్రాణదేహేంద్రియవ్యాకృతానాం నమస్తే చిదాత్మస్వరూపాయ తస్మై ..

మనఃప్రాణదేహేంద్రియవ్యాకృతాని స్వతః కాష్ఠతుల్యాని యత్సన్నిధానాత్ .
స్వయం చేతనానీవ భాంత్యేవ మోహాజ్జడేభ్యః పరస్మై నమస్తేఽస్తు తస్మై ..

బహిర్బుధ్యతే ప్రాణిబుద్ధిః పదార్థాన్న యం బుధ్యతే ప్రాణనాథం స్వసంస్థం .
సమస్తాంతరాత్మానమేకం చ తస్మై నమస్తే విరించాదిధీబోధయిత్రే ..

పరం యత్స్వరూపం విదుర్నాపి దేవాః కుతోఽన్యే మనుష్యాదయో బాహ్యచిత్తాః .
తదేహవామస్మీతి భక్తాస్త్వజస్రం భజంత్యద్వితీయం నమస్తేఽస్తు తస్మై ..

సమస్తేషు దేహేషు సూర్యేఽపి తిష్ఠన్య ఏకోఽఖిలాత్మా సమస్తైకసాక్షీ .
స ఏవాహమస్మీతి వేదాంతవిద్భిః సదోపాస్యతత్త్వాయ తస్మై నమస్తే ..

అహం విశ్వకస్తైజసః ప్రాజ్ఞరూపో విరాట్సూత్రమాయేశరూపాన్న భిన్నః .
ఉపాధౌ విభిన్నేఽపి కింత్వస్మి సోఽహం యమేవం భజన్వేద తస్మై నమస్తే ..

సమస్తాని కర్మాణి సంత్యజ్య విద్వాంస్తదేవాహమస్మీత్యుపాస్తే హ్యజస్రం .
యదేవాహ సర్వాగమాంతైకవేద్యం నమస్తేఽనిశం చింతనీయాయ తస్మై ..

న కృత్యాకృతేః ప్రత్యవాయః క్వచిత్స్యాదభావాత్కథం భావ ఉత్పత్స్యతేఽతః .
అహం ప్రత్యవాయీతి కృత్యాకృతే స్యామయం యస్య మోహాన్నమస్తేఽస్తు తస్మై ..

అధర్మోఽయమేవాయమేవాత్ర ధర్మో భవేదిత్యయం మోహ ఏవాఖిలానాం .
యదజ్ఞానినాం ప్రత్యవాయప్రదం స్యాత్క్వచిన్న హ్యభావో నమస్తేఽస్తు తస్మై ..

అధర్మం చ హృత్స్థం విహాయ ప్రశాంతా భజంత్యత్ర నూనం స్వరూపం యదీయం .
స్వరూపం విచార్యా మృతేరా సుషుప్తేర్నమస్తేఽస్తు తస్మై విముక్తిప్రదాయ ..

న వై బద్ధతా ముక్తతా వా కదాచిత్క్వచిన్నిత్యముక్తస్య కిం చాత్మనోఽతః .
బహిశ్చేతసోఽన్తశ్చ గత్యాగతీ తే నమశ్చిత్తవిక్షేపహర్త్రేఽస్తు తస్మై ..

యథా క్షీణచిత్తస్తథైవాత్మనిష్ఠః పుమాన్నిత్యముక్తో భవేదద్వితీయః .
యథా చేతసోఽక్షీణతా యత్ప్రసాదాత్తథా త్వత్ప్రసాదాయ తస్మై నమస్తే ..

ప్రసన్నే త్వయి ప్రాణినాం కిన్న లభ్యం పరస్త్వత్ప్రసాదాన్న లాభోఽస్తి కశ్చిత్ .
బుధోఽతోఽనిశం యత్ప్రసాదాభికాంక్షీ నమస్తే ప్రపన్నప్రసన్నాయ తస్మై ..

పృథివ్యాదియుక్తాఽపరబ్రహ్మనిష్ఠా న ముఖ్యా భవంత్యత్ర జన్మాస్తి తేషాం .
నిరస్తాఖిలోపాధినిష్ఠో హి ముఖ్యో న యస్యేహ జన్మాస్తి తస్మై నమస్తే ..

న ముఖ్యం సుషుప్తేరధిష్ఠానతోఽన్యత్సుషుప్తేరధిష్ఠానమాత్రం హి ముఖ్యం .
యదజ్ఞానతో దృప్తబాలాకిరేతన్నృపాద్వేద చైవం నమస్తేఽస్తు తస్మై ..

విరించాదిలోకాదిహావృత్తిరస్తి క్వచిచ్చాత్మలోకాదనావృత్తిరస్మాత్ .
ధ్రువో హ్యాత్మలోకోఽధ్రువానాత్మలోకాత్పరో యోఽస్తి చైకో నమస్తేఽస్తు తస్మై ..

పరం వేద సన్మాత్త్రముద్దాలకేన స్వపిత్రోపదిష్టో యదా శ్వేతకేతుః .
యమాత్మానమాత్మస్థమవ్యక్తమేకం నమస్తేఽనిశం సత్స్వరూపాయ తస్మై ..

భృగుర్వేద పిత్రోపదిష్టోఽన్తరేవ ప్రకృష్టః పరబ్రహ్మరూపాత్మలోకం .
అనంతాఽద్వయానందవిజ్ఞానసత్యం యమేకం విశుద్ధాయ తస్మై నమస్తే ..

విహాయైవ కోశాత్పరం పంచ వేద స్వరూపం యదానందకోశస్య పుచ్ఛం .
ముముక్షుః సుషుప్తేరధిష్ఠానమేకం సదాత్మస్వరూపాయ తస్మై నమస్తే ..

అనంతాని శాస్త్రాణ్యధీత్యాపి విద్వాన్న దుఃఖేతరో నారదోఽనాత్మవిత్త్వాత్ .
ఋషిర్మానసాద్వేద యం శోకహత్యై నమస్తే సుఖౌఘాయ తస్మై విభూమ్నే ..

ఋషేర్యాజ్ఞవల్క్యాద్విదేహో మహాత్మా యదేవాభయం బ్రహ్మ సమ్యగ్విదిత్వా .
స్వమేవాభయం తద్ధ్యభూద్వేదవేద్యం సమస్తాభయాప్యాయ తస్మై నమస్తే ..

విదిత్వాత్ర భూమానమేనశ్ఛిదేఽస్తి ప్రవాచ్యం కిము ప్రాణవిత్పాపనాశే .
అతః ప్రాణవిద్యామనాదృత్య విద్వానుపాస్తే యమీశం నమస్తేఽస్తు తస్మై ..

అజస్రాన్నదానం పరిత్యజ్య జానశ్రుతిర్హ్యైక్యమభ్యాగమద్ధంసవాక్యాత్ .
స వై ప్రాణవిత్ప్రాణ ఉత్కర్షవాంస్తత్పరోఽస్మాద్య ఆత్మా నమస్తేఽస్తు తస్మై ..

రవీంద్వగ్నితేజో జగద్భాసకశ్చేన్న తస్యాపి చిత్సన్నిధానేన తత్స్యాత్ .
న యత్సన్నిధానం వినా కించిదస్తి క్వచిద్వస్తు తస్మై నమో జ్యాతిషే చ ..

పరం జ్యోతిషాం జ్యోతిరాత్మాఽఽఖ్యమేతద్రవీంద్వాదిబుద్ధ్యాదివిద్యోతకం యత్ .
విదిత్వైవ నూనం నరో బ్రాహ్మణః స్యాదమర్త్యశ్చ తస్మై నమః స్వాత్మనే తే ..

యథాశ్వత్థవృక్షే స్వదేహే చ తుల్యం స్వమేవాబ్రవీద్వాసుదేవోఽర్జునాయ ..
తథా యస్య సామ్యం విజానాతి విద్వాన్నమస్తే సమస్తాత్మరూపాయ తస్మై ..

ద్విజే పుల్కసే హస్తిని స్వే శరీరే సమః సాత్త్వికే రాజసే తామసే చ .
య ఆత్మా గుణైస్తైరసంస్పృష్ట ఈశో నమస్తే సదా నిష్కళంకాయ తస్మై ..

యమాశ్చర్యవద్వక్తి కశ్చిచ్ఛృణోతి ప్రశాంతస్తు జానాతి న హ్యప్రశాంతః .
విదిత్వాఽపి సాక్షాత్కరోత్యత్ర నాన్యశ్చిదస్మీతి దీక్ష్యాయ తస్మే నమస్తే ..

పతీ దేవదైత్యౌఘయోః పద్మజాద్యం చతుర్వారమాకర్ణయంతౌ తథాఽపి .
న జానాతి కశ్చిత్తయోర్వేద చాన్యో హ్యతో దుర్వితర్క్యాయ తస్మే నమస్తే ..

శరీరేంద్రియప్రాణవిజ్ఞానశూన్యేష్విహైకైకమాత్మేతి దృప్తా వదంతి .
తథా బుద్ధిసమ్యగ్విచారాసమర్థా యదజ్ఞానమోహా హి తస్మై నమస్తే ..

అనేకత్వకర్తృత్వభోక్తృత్వధర్మః స ఆత్మా విభుశ్చిద్గుణశ్చేతి కేచిత్ .
న కర్తైవ భోక్తా క్వచిచ్చేతి చాన్యే యదజ్ఞా వదంతీహ తస్మై నమస్తే ..

అనేకాత్మనా ప్రేరకోఽన్యో న హీశోఽస్త్వితి ప్రాహురేకే న చాస్తీతి చాన్యే .
వివాదాస్పదం నైవ మాయా వినా యన్నమస్తేఽస్తు తస్మై వివాదాత్పరాయ ..

వివాదో నివర్తేత యస్య ప్రసాదాత్స్వరూపప్రకాశే జగద్భావనస్య .
నివృత్తే వివాదే పునర్నైవ లోకే భ్రమంత్యద్వితీయాయ తస్మై నమస్తే ..

విభుం చిత్తనిష్ఠం యదంగుష్టమాత్రం పురాణం పుమాంసం వదంత్యత్ర వేదాః .
జనానాం హృదంగుష్ఠమాత్రం యతోఽస్మాదనంగుష్ఠమాత్రాయ తస్మే నమస్తే ..

భ్రువోర్మధ్యమేవావిముక్తం మునీనాం మహాక్షేత్రమిత్యత్ర బుద్ధేః శ్రుతంచ .
న వా వారణాసీపురం గంతుమిచ్ఛేత్స్వరూపే స్థితో యస్య తస్మై నమస్తే ..

శరీరే యథాఽహంమతిః సర్వజంతోస్తథా ముక్తిబుద్ధిశ్చ కాశీమృతేర్వా .
స్వరూపప్రకాశం వినా యస్య ముక్తిర్న వై సంభవేత్కాపి తస్మై నమస్తే ..

స్వరూపప్రకాశైకహేతుర్హి యస్య ప్రకృష్టాగమాంతార్థసమ్యగ్విచారః ..
అతో యత్ప్రకాశాయ వేదాంతనిష్ఠోఽనిశం స్యాద్వివేకీ నమస్తేఽస్తు తస్మై ..

వదంతశ్చ రుద్రాదయోఽప్యాత్మతత్త్వం న జానంత్యతః కేఽపి వేదాంతనిష్ఠాః .
తతస్తానిహోత్సృజ్య వేదాంతనిష్ఠో భవేద్యత్ప్రబోధాయ తస్మై నమస్తే ..

సురేంద్రో విదిత్వైవ యస్య స్వరూపం సమస్తాదఘాద్వృత్రహత్యాదిరూపాత్ .
విముక్తో హి వేదాంతనిష్ఠో ముదాఽఽస్తే నిరస్యాభిమానం నమస్తేఽస్తు తస్మై ..

యదీయం స్వరూపం విచార్యైవ తిష్ఠన్సదా వందనీయోఽమరైరింద్రముఖ్యైః .
విశుద్ధో హ్యయం దేవవంద్యత్వతో వై నమస్తేఽస్తు తస్మై విశుద్ధిప్రదాయ ..

స్వయం శుద్ధ ఏవాన్యశుద్ధిం దదాతి క్వచిన్న హ్యశుద్ధోఽన్యశుద్ధిప్రదః స్యాత్ .
స్మృతః శుద్ధిదః సర్వజంతోర్య ఆత్మా విశుద్ధః పవిత్రాయ తస్మై నమస్తే ..

సకృత్సంస్మృతశ్చేత్సమస్తం చ పాపం దహత్యగ్నివద్యస్త్విహాత్యంతదీప్తః .
చిదేవాహమిత్యేవ బుద్ధౌ ప్రవేశస్వదీప్తిర్నమస్తేఽస్తు తస్మై మహిమ్నే ..

న హి స్నానదానాదినా పాపనాశే తు తత్సంస్కృతిః క్వాపి నశ్యేత్కదాపి .
వినా యత్స్మృతిం స్మృత్యుపాయం చ ముక్త్వా స్మరత్పాపహంత్రే నమస్తేఽస్తు తస్మై ..

అనాత్మన్యహంతాభిమానం నిరస్య స్వరూపప్రకాశస్తతః సర్వపాపం .
న సంస్కృత్యనాత్మాశ్రయం స్యాద్వినష్టం స్మృతేర్యత్ప్రకాశే తు తస్మై నమస్తే ..

అనాకర్ణ్య వేదాంతభాష్యం సమగ్రం న కస్యపి యత్స్మృత్యుపాయోఽస్తి కశ్చిత్ .
అతస్తచ్చికీర్షా స్వతో యస్య జాతా నమస్తే దయాళుస్వరూపాయ తస్మై ..

సమస్తాగమాంతానిహ వ్యాచికీర్షుః స్వయం శంకరాచార్యరూపావతీర్ణః .
కృతవ్యాససూత్రాదిభాష్యో య ఆత్మస్వరూపైక్యధీదాయ తస్మై నమస్తే ..

చతుర్భిః ప్రశాంతైః స్వశిష్యైర్యుతః సన్ భువం పర్యటన్నాత్మనిష్ఠాఽఖిలాత్మా .
స్వభాష్యప్రచారం సదా కారమన్యో విభాత్యద్వితీయాయ తస్మై నమస్తే ..

విరాట్సూత్రమాయేశతుర్యస్వరూపైః క్రమాత్తోటకాచార్యనామాదిసంజ్ఞైః .
చతుర్వ్యూహవేషైః స్వశిష్యైర్యుతాయాద్వయాయాత్మనే తే నమో నిర్గుణాయ ..

అజం కర్మఠం విశ్వరూపం విదిత్వా తురీయాశ్రమం చాథ తస్మై ప్రదాయ .
వ్యధాదృశ్యశృంగాశ్రమే శారదార్చాపరం తత్త్వరక్షాయ తస్మై నమస్తే ..

య ఆచార్యభాష్యాణ్యధీత్యైవ భక్త్యా లభంతే నిజానందమాత్మస్వరూపం ..
గురుస్తైరయం వంద్య ఆత్మాఽఽత్మవిద్భిస్తతః సర్వవంద్యాయ తస్మై నమస్తే ..

నమః శంకరాచార్య తుభ్యం పురస్తాన్నమః పృష్ఠతః పార్శ్వతశ్చాధ ఊర్ధ్వం .
నమః సర్వతః సర్వరూపాయ తస్మై విశుద్ధాత్మనే బ్రహ్మణే తే నమస్తే ..

అహం దేహబుద్ధ్యా తవైవాస్మి దాసో హ్యహం జీవబుద్ధ్యాఽస్మి తేంఽశైకదేశః .
త్వమేవాస్మ్యహం త్వాత్మబుద్ధ్యా తథాపి ప్రసీదాన్వహం దేహబుద్ధ్యా నమస్తే ..

స భాష్యార్థ ఆశు స్ఫురత్వంతకాలే చిదాభాసచైతన్యదృక్త్వత్ప్రసాదాత్ .
గతిర్నాన్యథా మే సమస్తాపరాధం క్షమస్వాఖిలాత్మన్నమస్తేఽస్తు నిత్యం ..

నమో భాష్యవృందాయ భాష్యోపదేష్ట్రే నమో భాష్యకృద్భ్యో నమో భాష్యవిద్భ్యః .
నమో భాష్యవృందార్థభూతాయ భూమ్నే విశుద్ధాత్మనే బ్రహ్మణేఽస్మై పరస్మై ..

శతోర్ధ్వాష్టకశ్లోకమేతద్భుజంగప్రయాతం పఠేద్యోఽత్ర భక్త్యా త్వదీయం .
చిదాభాసచిద్రూపమేకం పదాబ్జం స్మరన్స్వస్వరూపేణ నూనం రమేత ..

భుజంగప్రయాతార్థమత్యంతభక్త్యా సకృద్వా స్మరేత్ప్రత్యహం శ్రీగురోర్యః .
నిరస్తాంధకారః స ఆనందరూపం వ్రజత్యచ్యుతం త్వాం త్వదీయప్రసాదాత్ ..

అహం బ్రహ్మ భూత్వాపి నేతి భ్రమోఽభూత్తదీయస్వరూపావబోధాప్తురా మే .
గురో త్వత్ప్రసాదాద్విముక్తోఽహమస్మి చితాభాసచిద్రూప ఆత్మా విశుద్ధః ..

అతో బుద్ధిమాంస్త్వత్ప్రసాదాయ నిత్యం భుజంగప్రయాతం పఠేద్వా తదర్థం .
స్మరేద్వా గురో తే ప్రణమ్యైవ భూయశ్చిదాభాసచిద్రూపమేకం పరం తత్ ..

మునీంద్రైః పురాణైరనుధ్యేయమీశం విరించాదిభిః సర్వదేవైశ్చ వంద్యం .
కథం త్వామహం స్తోతుమిచ్ఛన్భవంతం క్వ వా సాధయే నేహ కిం కిం మహేశే ..

కృపా తే కృపాళో విముగ్ధం విశుద్ధం కరోతీహ మూకం చ వాచాలమీశం .
అతస్త్వత్కృపావైభవేనైవమేతత్కృతం మే చికీర్షాఖిలాత్మన్నమస్తే ..

Ramaswamy Sastry and Vighnesh Ghanapaathi