దేవా ఊచుః .
నమో దేవి మహావిద్యే సృష్టిస్థిత్యంతకారిణి .
నమః కమలపత్రాక్షి సర్వాధారే నమోఽస్తు తే ..

సవిజ్ఞతైజసప్రాజ్ఞవిరాట్సూత్రాత్మికే నమః .
నమో వ్యాకృతరూపాయై కూటస్థాయై నమో నమః ..

దుర్గే సర్గాదిరహితే దుష్టసంరోధనార్గలే .
నిరర్గలప్రేమగమ్యే భర్గే దేవి నమోఽస్తు తే ..

నమః శ్రీకాలికే మాతర్నమో నీలసరస్వతి .
ఉగ్రతారే మహోగ్రే తే నిత్యమేవ నమో నమః ..

నమః పీతాంబరే దేవి నమస్త్రిపురసుందరి .
నమో భైరవి మాతంగి ధూమావతి నమో నమః ..

ఛిన్నమస్తే నమస్తేఽస్తు క్షీరసాగరకన్యకే .
నమః శాకంభరి శివే నమస్తే రక్తదంతికే ..

నిశుంభశుంభదలని రక్తబీజవినాశిని .
ధూమ్రలోచననిర్ణాశే వృత్రాసురనిబర్హిణి ..

చండముండప్రమథిని దానవాంతకరే శివే .
నమస్తే విజయే గంగే శారదే వికచాననే ..

పృథ్వీరూపే దయారూపే తేజోరూపే నమో నమః .
ప్రాణరూపే మహారూపే భూతరూపే నమోఽస్తు తే ..

విశ్వమూర్తే దయామూర్తే ధర్మమూర్తే నమో నమః .
దేవమూర్తే జ్యోతిమూర్తే జ్ఞానమూర్తే నమోఽస్తు తే ..

గాయత్రి వరదే దేవి సావిత్రి చ సరస్వతి .
నమః స్వాహే స్వధే మాతర్దక్షిణే తే నమో నమః ..

నేతి నేతీతి వాక్యైర్యా బోధ్యతే సకలాగమైః .
సర్వప్రత్యక్స్వరూపాం తాం భజామః పరదేవతాం ..

భ్రమరైర్వేష్టితా యస్మాద్ భ్రామరీ యా తతః స్మృతా .
తస్యై దేవ్యై నమో నిత్యం నిత్యమేవ నమో నమః ..

నమస్తే పార్శ్వయోః పృష్ఠే నమస్తే పురతోఽమ్బికే .
నమ ఊర్ధ్వం నమశ్చాధః సర్వత్రైవ నమో నమః ..

కృపాం కురు మహాదేవి మణిద్వీపాధివాసిని .
అనంతకోటిబ్రహ్మాండనాయికే జగదంబికే ..

జయ దేవి జగన్మాతర్జయ దేవి పరాత్పరే .
జయ శ్రీభువనేశాని జయ సర్వోత్తమోత్తమే ..

కల్యాణగుణరత్నానామాకరే భువనేశ్వరి .
ప్రసీద పరమేశాని ప్రసీద జగతోరణే ..

Ramaswamy Sastry and Vighnesh Ghanapaathi