మాతస్త్వత్పదపంకజం కల్యతాం చేతోఽమ్బుజే సంతతం
మానాథాంబుజసంభవాద్రితనయాకాంతైః సమారాధితం .
వాంఛాపూరణనిర్జితామరమహీరుడ్గర్వసర్వస్వకం
వాచః సూక్తిసుధారసద్రవముచో నిర్యాంతి వక్త్రోదరాత్ ..

మాతస్త్వత్పదపంకజం మునిమనఃకాసారవాసాదరం
మాయామోహమహాంధకారమిహిరం మానాతిగప్రాభవం .
మాతంగాభిమతిం స్వకీయగమనైర్నిర్మూలయత్కౌతుకా-
ద్వందేఽమందతపఃఫలాప్యనమనస్తోత్రార్చనాప్రక్రమం ..

మాతస్త్వత్పదపంకజం ప్రణమతామానందవారాన్నిధే
రాకాశారదపూర్ణచంద్రనికరం కామాహిపక్షీశ్వరం .
వృందం ప్రాణభృతాం స్వనామ వదతామత్యాదరాత్సత్వరం
షద్భాషాసరిదీశ్వరం ప్రతిదధత్షాణ్మాతురార్చ్యం భజే ..

కామం ఫాలతలే దురక్షరతతిర్దైవీ మమాస్తాం న భీ-
ర్మాతస్త్వత్పదపంకజోత్థరజసా లుంపామి తాం నిశ్చితం .
మార్కండేయమునిర్యథా భవపదాంభోజార్చనాప్రాభవాత్
కాలం తద్వదహం చతుర్ముఖముఖాంభోజాతసూర్యప్రభే ..

పాపాని ప్రశమం నయాశు మమతాం దేహేంద్రియప్రాణగాం
కామాదీనపి వైరిణో దృఢతరాన్మోక్షాధ్వవిఘ్నప్రదాన్ .
స్నిగ్ధాన్పోషయ సంతతం శమదమధ్యానాదిమాన్మోదతో
మాతస్త్వత్పదపంకజం హృది సదా కుర్వే గిరాం దేవతే ..

మాతస్త్వత్పదపంకజస్య మనసా వాచా క్రియాతోఽపి వా
యే కుర్వంతి ముదాన్వహం బహువిధైర్దివ్యైః సుమైరర్చనాం .
శీఘ్రం తే ప్రభవంతి భూమిపతయో నిందంతి చ స్వశ్రియా
జంభారాతిమపి ధ్రువం శతమఖీకష్టాప్తనాకశ్రియం ..

మాతస్త్వత్పదపకజం శిరసి యే పద్మాటవీమధ్యత-
శ్చంద్రాభం ప్రవిచింతయంతి పురుషాః పీయూషవర్ష్యన్యహం .
తే మృత్యుం ప్రవిజిత్య రోగరహితాః సమ్యగ్దృఢాంగాశ్చిరం
జీవంత్యేవ మృణాలకోమలవపుష్మంతః సురూపా భువి ..

మాతస్త్వత్పదపంకజం హృది ముదా ధ్యాయంతి యే మానవాః
సచ్చిద్రూపమశేషవేదశిరసాం తాత్పర్యగమ్యం ముహుః .
అత్యాగేఽపి తనోరఖండపరమానందం వహంతః సదా
సర్వం విశ్వమిదం వినాశి తరసా పశ్యంతి తే పూరుషాః ..

Ramaswamy Sastry and Vighnesh Ghanapaathi