శ్రీపరాశర ఉవాచ -
సింహాసనగతః శక్రస్సంప్రాప్య త్రిదివం పునః .
దేవరాజ్యే స్థితో దేవీం తుష్టావాబ్జకరాం తతః ..
ఇంద్ర ఉవాచ -
నమస్యే సర్వలోకానాం జననీమబ్జసంభవాం .
శ్రియమున్నిద్రపద్మాక్షీం విష్ణువక్షఃస్థలస్థితాం ..
పద్మాలయాం పద్మకరాం పద్మపత్రనిభేక్షణాం
వందే పద్మముఖీం దేవీం పద్మనాభప్రియామహం ..
త్వం సిద్ధిస్త్వం స్వధా స్వాహా సుధా త్వం లోకపావనీ .
సంధ్యా రాత్రిః ప్రభా భూతిర్మేధా శ్రద్ధా సరస్వతీ ..
యజ్ఞవిద్యా మహావిద్యా గుహ్యవిద్యా చ శోభనే .
ఆత్మవిద్యా చ దేవి త్వం విముక్తిఫలదాయినీ ..
ఆన్వీక్షికీ త్రయీ వార్తా దండనీతిస్త్వమేవ చ .
సౌమ్యాసౌమ్యైర్జగద్రూపైస్త్వయైతద్దేవి పూరితం ..
కా త్వన్యా త్వామృతే దేవి సర్వయజ్ఞమయం వపుః .
అధ్యాస్తే దేవదేవస్య యోగచింత్యం గదాభృతః ..
త్వయా దేవి పరిత్యక్తం సకలం భువనత్రయం .
వినష్టప్రాయమభవత్త్వయేదానీం సమేధితం ..
దారాః పుత్రాస్తథాఽఽగారసుహృద్ధాన్యధనాదికం .
భవత్యేతన్మహాభాగే నిత్యం త్వద్వీక్షణాన్నృణాం ..
శరీరారోగ్యమైశ్వర్యమరిపక్షక్షయః సుఖం .
దేవి త్వద్దృష్టిదృష్టానాం పురుషాణాం న దుర్లభం ..
త్వమంబా సర్వభూతానాం దేవదేవో హరిః పితా .
త్వయైతద్విష్ణునా చాంబ జగద్వ్యాప్తం చరాచరం ..
మా నః కోశస్తథా గోష్ఠం మా గృహం మా పరిచ్ఛదం .
మా శరీరం కలత్రం చ త్యజేథాః సర్వపావని ..
మా పుత్రాన్మా సుహృద్వర్గాన్మా పశూన్మా విభూషణం .
త్యజేథా మమ దేవస్య విష్ణోర్వక్షఃస్థలాశ్రయే ..
సత్త్వేన సత్యశౌచాభ్యాం తథా శీలాదిభిర్గుణైః .
త్యజ్యంతే తే నరాః సద్యః సంత్యక్తా యే త్వయాఽమలే ..
త్వయాఽవలోకితాః సద్యః శీలాద్యైరఖిలైర్గుణైః .
కులైశ్వర్యైశ్చ పూజ్యంతే పురుషా నిర్గుణా అపి ..
స శ్లాఘ్యః స గుణీ ధన్యః స కులీనః స బుద్ధిమాన్ .
స శూరః స చ విక్రాంతో యస్త్వయా దేవి వీక్షితః ..
సద్యో వైగుణ్యమాయాంతి శీలాద్యాః సకలా గుణాః .
పరాంగముఖీ జగద్ధాత్రీ యస్య త్వం విష్ణువల్లభే ..
న తే వర్ణయితుం శక్తా గుణాంజిహ్వాఽపి వేధసః .
ప్రసీద దేవి పద్మాక్షి మాఽస్మాంస్త్యాక్షీః కదాచన ..
శ్రీపరాశర ఉవాచ -
ఏవం శ్రీః సంస్తుతా సమ్యక్ ప్రాహ హృష్టా శతక్రతుం .
శృణ్వతాం సర్వదేవానాం సర్వభూతస్థితా ద్విజ ..
శ్రీరువాచ -
పరితుష్టాస్మి దేవేశ స్తోత్రేణానేన తే హరే .
వరం వృణీష్వ యస్త్విష్టో వరదాఽహం తవాగతా ..
ఇంద్ర ఉవాచ -
వరదా యదిమేదేవి వరార్హో యది వాఽప్యహం .
త్రైలోక్యం న త్వయా త్యాజ్యమేష మేఽస్తు వరః పరః ..
స్తోత్రేణ యస్తథైతేన త్వాం స్తోష్యత్యబ్ధిసంభవే .
స త్వయా న పరిత్యాజ్యో ద్వితీయోఽస్తు వరో మమ ..
శ్రీరువాచ -
త్రైలోక్యం త్రిదశశ్రేష్ఠ న సంత్యక్ష్యామి వాసవ .
దత్తో వరో మయాఽయం తే స్తోత్రారాధనతుష్టయా ..
యశ్చ సాయం తథా ప్రాతః స్తోత్రేణానేన మానవః .
స్తోష్యతే చేన్న తస్యాహం భవిష్యామి పరాంగ్ముఖీ ..
శ్రీపారాశర ఉవాచ -
ఏవం వరం దదౌ దేవీ దేవరాజాయ వై పురా .
మైత్రేయ శ్రీర్మహాభాగా స్తోత్రారాధనతోషితా ..
భృగోః ఖ్యాత్యాం సముత్పన్నా శ్రీః పూర్వముదధేః పునః .
దేవదానవయత్నేన ప్రసూతాఽమృతమంథనే ..
ఏవం యదా జగత్స్వామీ దేవరాజో జనార్దనః .
అవతారః కరోత్యేషా తదా శ్రీస్తత్సహాయినీ ..
పునశ్చపద్మా సంభూతా యదాఽదిత్యోఽభవద్ధరిః .
యదా చ భార్గవో రామస్తదాభూద్ధరణీత్వియం ..
రాఘవత్వేఽభవత్సీతా రుక్మిణీ కృష్ణజన్మని .
అన్యేషు చావతారేషు విష్ణోరేఖాఽనపాయినీ ..
దేవత్వే దేవదేహేయం మానుషత్వే చ మానుషీ .
విష్ణోర్దేహానురుపాం వై కరోత్యేషాఽఽత్మనస్తనుం ..
యశ్చైతశృణుయాజ్జన్మ లక్ష్మ్యా యశ్చ పఠేన్నరః .
శ్రియో న విచ్యుతిస్తస్య గృహే యావత్కులత్రయం ..
పఠ్యతే యేషు చైవర్షే గృహేషు శ్రీస్తవం మునే .
అలక్ష్మీః కలహాధారా న తేష్వాస్తే కదాచన ..
ఏతత్తే కథితం బ్రహ్మన్యన్మాం త్వం పరిపృచ్ఛసి .
క్షీరాబ్ధౌ శ్రీర్యథా జాతా పూర్వం భృగుసుతా సతీ ..
ఇతి సకలవిభూత్యవాప్తిహేతుః స్తుతిరియమింద్రముఖోద్గతా హి లక్ష్మ్యాః .
అనుదినమిహ పఠ్యతే నృభిర్యైర్వసతి న తేషు కదాచిదప్యలక్ష్మీః ..