Padmalaya Stotram

श्रीपराशर उवाच -
सिंहासनगतः शक्रस्सम्प्राप्य त्रिदिवं पुनः ।
देवराज्ये स्थितो देवीं तुष्टावाब्जकरां ततः ॥
इन्द्र उवाच -
नमस्ये सर्वलोकानां जननीमब्जसम्भवाम् ।
श्रियमुन्निद्रपद्माक्षीं विष्णुवक्षःस्थलस्थिताम् ॥
पद्मालयां पद्मकरां पद्मपत्रनिभेक्षणाम्
वन्दे पद्ममुखीं देवीं पद्मनाभप्रियामहम् ॥
त्वं सिद्धिस्त्वं स्वधा स्वाहा सुधा त्वं लोकपावनी ।
सन्ध्या रात्रिः प्रभा भूतिर्मेधा श्रद्धा सरस्वती ॥
यज्ञविद्या महाविद्या गुह्यविद्या च शोभने ।
आत्मविद्या च देवि त्वं विमुक्तिफलदायिनी ॥
आन्वीक्षिकी त्रयी वार्ता दण्डनीतिस्त्वमेव च ।
सौम्यासौम्यैर्जगद्रूपैस्त्वयैतद्देवि पूरितम् ॥
का त्वन्या त्वामृते देवि सर्वयज्ञमयं वपुः ।
अध्यास्ते देवदेवस्य योगचिन्त्यं गदाभृतः ॥
त्वया देवि परित्यक्तं सकलं भुवनत्रयम् ।
विनष्टप्रायमभवत्त्वयेदानीं समेधितम् ॥
दाराः पुत्रास्तथाऽऽगारसुहृद्धान्यधनादिकम् ।
भवत्येतन्महाभागे नित्यं त्वद्वीक्षणान्नृणाम् ॥
शरीरारोग्यमैश्वर्यमरिपक्षक्षयः सुखम् ।
देवि त्वद्दृष्टिदृष्टानां पुरुषाणां न दुर्लभम् ॥
त्वमम्बा सर्वभूतानां देवदेवो हरिः पिता ।
त्वयैतद्विष्णुना चाम्ब जगद्व्याप्तं चराचरम् ॥
मा नः कोशस्तथा गोष्ठं मा गृहं मा परिच्छदम् ।
मा शरीरं कलत्रं च त्यजेथाः सर्वपावनि ॥
मा पुत्रान्मा सुहृद्वर्गान्मा पशून्मा विभूषणम् ।
त्यजेथा मम देवस्य विष्णोर्वक्षःस्थलाश्रये ॥
सत्त्वेन सत्यशौचाभ्यां तथा शीलादिभिर्गुणैः ।
त्यज्यन्ते ते नराः सद्यः सन्त्यक्ता ये त्वयाऽमले ॥
त्वयाऽवलोकिताः सद्यः शीलाद्यैरखिलैर्गुणैः ।
कुलैश्वर्यैश्च पूज्यन्ते पुरुषा निर्गुणा अपि ॥
स श्लाघ्यः स गुणी धन्यः स कुलीनः स बुद्धिमान् ।
स शूरः स च विक्रान्तो यस्त्वया देवि वीक्षितः ॥
सद्यो वैगुण्यमायान्ति शीलाद्याः सकला गुणाः ।
पराङ्गमुखी जगद्धात्री यस्य त्वं विष्णुवल्लभे ॥
न ते वर्णयितुं शक्ता गुणाञ्जिह्वाऽपि वेधसः ।
प्रसीद देवि पद्माक्षि माऽस्मांस्त्याक्षीः कदाचन ॥
श्रीपराशर उवाच -
एवं श्रीः संस्तुता सम्यक् प्राह हृष्टा शतक्रतुम् ।
श‍ृण्वतां सर्वदेवानां सर्वभूतस्थिता द्विज ॥
श्रीरुवाच -
परितुष्टास्मि देवेश स्तोत्रेणानेन ते हरे ।
वरं वृणीष्व यस्त्विष्टो वरदाऽहं तवागता ॥
इन्द्र उवाच -
वरदा यदिमेदेवि वरार्हो यदि वाऽप्यहम् ।
त्रैलोक्यं न त्वया त्याज्यमेष मेऽस्तु वरः परः ॥
स्तोत्रेण यस्तथैतेन त्वां स्तोष्यत्यब्धिसम्भवे ।
स त्वया न परित्याज्यो द्वितीयोऽस्तु वरो मम ॥
श्रीरुवाच -
त्रैलोक्यं त्रिदशश्रेष्ठ न सन्त्यक्ष्यामि वासव ।
दत्तो वरो मयाऽयं ते स्तोत्राराधनतुष्टया ॥
यश्च सायं तथा प्रातः स्तोत्रेणानेन मानवः ।
स्तोष्यते चेन्न तस्याहं भविष्यामि पराङ्ग्मुखी ॥
श्रीपाराशर उवाच -
एवं वरं ददौ देवी देवराजाय वै पुरा ।
मैत्रेय श्रीर्महाभागा स्तोत्राराधनतोषिता ॥
भृगोः ख्यात्यां समुत्पन्ना श्रीः पूर्वमुदधेः पुनः ।
देवदानवयत्नेन प्रसूताऽमृतमन्थने ॥
एवं यदा जगत्स्वामी देवराजो जनार्दनः ।
अवतारः करोत्येषा तदा श्रीस्तत्सहायिनी ॥
पुनश्चपद्मा सम्भूता यदाऽदित्योऽभवद्धरिः ।
यदा च भार्गवो रामस्तदाभूद्धरणीत्वियम् ॥
राघवत्वेऽभवत्सीता रुक्मिणी कृष्णजन्मनि ।
अन्येषु चावतारेषु विष्णोरेखाऽनपायिनी ॥
देवत्वे देवदेहेयं मानुषत्वे च मानुषी ।
विष्णोर्देहानुरुपां वै करोत्येषाऽऽत्मनस्तनुम् ॥
यश्चैतश‍ृणुयाज्जन्म लक्ष्म्या यश्च पठेन्नरः ।
श्रियो न विच्युतिस्तस्य गृहे यावत्कुलत्रयम् ॥
पठ्यते येषु चैवर्षे गृहेषु श्रीस्तवं मुने ।
अलक्ष्मीः कलहाधारा न तेष्वास्ते कदाचन ॥
एतत्ते कथितं ब्रह्मन्यन्मां त्वं परिपृच्छसि ।
क्षीराब्धौ श्रीर्यथा जाता पूर्वं भृगुसुता सती ॥
इति सकलविभूत्यवाप्तिहेतुः स्तुतिरियमिन्द्रमुखोद्गता हि लक्ष्म्याः ।
अनुदिनमिह पठ्यते नृभिर्यैर्वसति न तेषु कदाचिदप्यलक्ष्मीः ॥

shreeparaashara uvaacha -
sim'haasanagatah' shakrassampraapya tridivam' punah' .
devaraajye sthito deveem' tusht'aavaabjakaraam' tatah' ..
indra uvaacha -
namasye sarvalokaanaam' jananeemabjasambhavaam .
shriyamunnidrapadmaaksheem' vishnuvakshah'sthalasthitaam ..
padmaalayaam' padmakaraam' padmapatranibhekshanaam
vande padmamukheem' deveem' padmanaabhapriyaamaham ..
tvam' siddhistvam' svadhaa svaahaa sudhaa tvam' lokapaavanee .
sandhyaa raatrih' prabhaa bhootirmedhaa shraddhaa sarasvatee ..
yajnyavidyaa mahaavidyaa guhyavidyaa cha shobhane .
aatmavidyaa cha devi tvam' vimuktiphaladaayinee ..
aanveekshikee trayee vaartaa dand'aneetistvameva cha .
saumyaasaumyairjagadroopaistvayaitaddevi pooritam ..
kaa tvanyaa tvaamri'te devi sarvayajnyamayam' vapuh' .
adhyaaste devadevasya yogachintyam' gadaabhri'tah' ..
tvayaa devi parityaktam' sakalam' bhuvanatrayam .
vinasht'apraayamabhavattvayedaaneem' samedhitam ..
daaraah' putraastathaa''gaarasuhri'ddhaanyadhanaadikam .
bhavatyetanmahaabhaage nityam' tvadveekshanaannri'naam ..
shareeraarogyamaishvaryamaripakshakshayah' sukham .
devi tvaddri'sht'idri'sht'aanaam' purushaanaam' na durlabham ..
tvamambaa sarvabhootaanaam' devadevo harih' pitaa .
tvayaitadvishnunaa chaamba jagadvyaaptam' charaacharam ..
maa nah' koshastathaa gosht'ham' maa gri'ham' maa parichchhadam .
maa shareeram' kalatram' cha tyajethaah' sarvapaavani ..
maa putraanmaa suhri'dvargaanmaa pashoonmaa vibhooshanam .
tyajethaa mama devasya vishnorvakshah'sthalaashraye ..
sattvena satyashauchaabhyaam' tathaa sheelaadibhirgunaih' .
tyajyante te naraah' sadyah' santyaktaa ye tvayaa'male ..
tvayaa'valokitaah' sadyah' sheelaadyairakhilairgunaih' .
kulaishvaryaishcha poojyante purushaa nirgunaa api ..
sa shlaaghyah' sa gunee dhanyah' sa kuleenah' sa buddhimaan .
sa shoorah' sa cha vikraanto yastvayaa devi veekshitah' ..
sadyo vaigunyamaayaanti sheelaadyaah' sakalaa gunaah' .
paraangamukhee jagaddhaatree yasya tvam' vishnuvallabhe ..
na te varnayitum' shaktaa gunaanjihvaa'pi vedhasah' .
praseeda devi padmaakshi maa'smaam'styaaksheeh' kadaachana ..
shreeparaashara uvaacha -
evam' shreeh' sam'stutaa samyak praaha hri'sht'aa shatakratum .
shri'nvataam' sarvadevaanaam' sarvabhootasthitaa dvija ..
shreeruvaacha -
paritusht'aasmi devesha stotrenaanena te hare .
varam' vri'neeshva yastvisht'o varadaa'ham' tavaagataa ..
indra uvaacha -
varadaa yadimedevi varaarho yadi vaa'pyaham .
trailokyam' na tvayaa tyaajyamesha me'stu varah' parah' ..
stotrena yastathaitena tvaam' stoshyatyabdhisambhave .
sa tvayaa na parityaajyo dviteeyo'stu varo mama ..
shreeruvaacha -
trailokyam' tridashashresht'ha na santyakshyaami vaasava .
datto varo mayaa'yam' te stotraaraadhanatusht'ayaa ..
yashcha saayam' tathaa praatah' stotrenaanena maanavah' .
stoshyate chenna tasyaaham' bhavishyaami paraangmukhee ..
shreepaaraashara uvaacha -
evam' varam' dadau devee devaraajaaya vai puraa .
maitreya shreermahaabhaagaa stotraaraadhanatoshitaa ..
bhri'goh' khyaatyaam' samutpannaa shreeh' poorvamudadheh' punah' .
devadaanavayatnena prasootaa'mri'tamanthane ..
evam' yadaa jagatsvaamee devaraajo janaardanah' .
avataarah' karotyeshaa tadaa shreestatsahaayinee ..
punashchapadmaa sambhootaa yadaa'dityo'bhavaddharih' .
yadaa cha bhaargavo raamastadaabhooddharaneetviyam ..
raaghavatve'bhavatseetaa rukminee kri'shnajanmani .
anyeshu chaavataareshu vishnorekhaa'napaayinee ..
devatve devadeheyam' maanushatve cha maanushee .
vishnordehaanurupaam' vai karotyeshaa''tmanastanum ..
yashchaitashri'nuyaajjanma lakshmyaa yashcha pat'hennarah' .
shriyo na vichyutistasya gri'he yaavatkulatrayam ..
pat'hyate yeshu chaivarshe gri'heshu shreestavam' mune .
alakshmeeh' kalahaadhaaraa na teshvaaste kadaachana ..
etatte kathitam' brahmanyanmaam' tvam' paripri'chchhasi .
ksheeraabdhau shreeryathaa jaataa poorvam' bhri'gusutaa satee ..
iti sakalavibhootyavaaptihetuh' stutiriyamindramukhodgataa hi lakshmyaah' .
anudinamiha pat'hyate nri'bhiryairvasati na teshu kadaachidapyalakshmeeh' ..