యా కుందేందుతుషార- హారధవలా యా శుభ్రవస్త్రావృతా
యా వీణావరదండ- మండితకరా యా శ్వేతపద్మాసనా.
యా బ్రహ్మాచ్యుతశంకర- ప్రభృతిభిర్దేవైః సదా పూజితా
సా మాం పాతు సరస్వతీ భగవతీ నిఃశేషజాడ్యాపహా.
దోర్భిర్యుక్తా చతుర్భిః స్ఫటికమణిమయీమక్షమాలాం దధానా
హస్తేనైకేన పద్మం సితమపి చ శుకం పుస్తకం చాపరేణ.
భాసా కుందేందుశంఖ- స్ఫటికమణినిభా భాసమానాఽసమానా
సా మే వాగ్దేవతేయం నివసతు వదనే సర్వదా సుప్రసన్నా.
ఆశాసు రాశీ భవదంగవల్లి-
భాసేవ దాసీకృతదుగ్ధసింధుం.
మందస్మితైర్నిందితశారదేందుం
వందేఽరవిందాసనసుందరి త్వాం.
శారదా శారదాంబోజవదనా వదనాంబుజే.
సర్వదా సర్వదాఽస్మాకం సన్నిధిం సన్నిధిం క్రియాత్.
సరస్వతీం చ తాం నౌమి వాగధిష్ఠాతృదేవతాం.
దేవత్వం ప్రతిపద్యంతే యదనుగ్రహతో జనాః.
పాతు నో నికషగ్రావా మతిహేమ్నః సరస్వతీ.
ప్రాజ్ఞేతరపరిచ్ఛేదం వచసైవ కరోతి యా.
శుద్ధాం బ్రహ్మవిచారసార- పరమామాద్యాం జగద్వ్యాపినీం
వీణాపుస్తకధారిణీమభయదాం జాడ్యాంధకారాపహాం.
హస్తే స్ఫాటికమాలికాం విదధతీం పద్మాసనే సంస్థితాం
వందే తాం పరమేశ్వరీం భగవతీం బుద్ధిప్రదాం శారదాం.
వీణాధరే విపులమంగలదానశీలే
భక్తార్తినాశిని విరించిహరీశవంద్యే.
కీర్తిప్రదేఽఖిలమనోరథదే మహార్హే
విద్యాప్రదాయిని సరస్వతి నౌమి నిత్యం.
శ్వేతాబ్జపూర్ణ- విమలాసనసంస్థితే హే
శ్వేతాంబరావృత- మనోహరమంజుగాత్రే.
ఉద్యన్మనోజ్ఞ- సితపంకజమంజులాస్యే
విద్యాప్రదాయిని సరస్వతి నౌమి నిత్యం.
మాతస్త్వదీయపద- పంకజభక్తియుక్తా
యే త్వాం భజంతి నిఖిలానపరాన్విహాయ.
తే నిర్జరత్వమిహ యాంతి కలేవరేణ
భూవహ్నివాయుగగనా- మ్బువినిర్మితేన.
మోహాంధకారభరితే హృదయే మదీయే
మాతః సదైవ కురు వాసముదారభావే.
స్వీయాఖిలావయవ- నిర్మలసుప్రభాభిః
శీఘ్రం వినాశయ మనోగతమంధకారం.
బ్రహ్మా జగత్ సృజతి పాలయతీందిరేశః
శంభుర్వినాశయతి దేవి తవ ప్రభావైః.
న స్యాత్ కృపా యది తవ ప్రకటప్రభావే
న స్యుః కథంచిదపి తే నిజకార్యదక్షాః.
లక్ష్మిర్మేధా ధరా పుష్టిర్గౌరీ తృష్టిః ప్రభా ధృతిః.
ఏతాభిః పాహి తనుభిరష్టభిర్మాం సరస్వతి.
సరస్వతి మహాభాగే విద్యే కమలలోచనే.
విద్యారూపే విశాలాక్షి విద్యాం దేహి నమోఽస్తు తే.
యదక్షరపదభ్రష్టం మాత్రాహీనం చ యద్భవేత్.
తత్సర్వం క్షమ్యతాం దేవి ప్రసీద పరమేశ్వరి.