లలితా హృదయ స్తోత్రం

బాలవ్యక్తవిభాకరామితనిభాం భవ్యప్రదాం భారతీ-
మీషత్ఫుల్లముఖాంబుజస్మితకరైరాశాభవాంధాపహాం .
పాశం సాభయమంకుశం చ వరదం సంబిభ్రతీం భూతిదాం
భ్రాజంతీం చతురంబుజాకృతకరైర్భక్త్యా భజే షోడశీం ..
సుందరీ సకలకల్మషాపహా కోటికంజకమనీయకాంతికా .
కోటికల్పకృతపుణ్యకర్మణా పూజనీయపదపుణ్యపుష్కరా ..
శర్వరీశసమసుందరాననా శ్రీశశక్తిసుకృతాశ్రయాశ్రితా .
సజ్జనానుశరణీయసత్పదా సంకటే సురగణైః సువందితా ..
యా సురాసురరణే జవాన్వితా హ్యాజఘాన జగదంబికాఽజితా .
తాం భజామి జననీం జగజ్జనిం యుద్ధయుక్తదితిజాన్ సుదుర్జయాన్ ..
యోగినాం హృదయసంగతాం శివాం యోగయుక్తమనసాం యతాత్మనాం .
జాగ్రతీం జగతి యత్నతో ద్విజా యాం జపంతి హృది తాం భజామ్యహం ..
కల్పకాస్తు కలయంతి కాలికాం యత్కలా కలిజనోపకారికా .
కౌలికాలికలితాంఘ్రిపంకజాం తాం భజామి కలికల్మషాపహాం ..
బాలార్కానంతశోచిర్న్నిజతనుకిరణైర్ద్దీపయంతీం దిగంతాన్
దీప్తైర్ద్దేదీప్తమానాం దనుజదలవనానల్పదావానలాభాం .
దాంతోదంతోగ్రచితాం దలితదితిసుతాం దర్శనీయాం దురంతాం
దేవీం దీనార్ద్రచిత్తాం హృది ముదితమనాః షోడశీం సంస్మరామి ..
ధీరాంధన్యాంధరిత్రీధవవిధృతశిరో ధూతధూల్యబ్జపాదాం
ఘృష్టాంధారాధరాధో వినిధృతచపలాచారుచంద్రప్రభాభాం .
ధర్మ్యాంధూతోపహారాన్ ధరణిసురధవోద్ధారిణీం ధ్యేయరూపాం
ధీమద్ధన్యాతిధన్యాంధనదధనవృతాం సుందరీం చింతయామి ..
జయతు జయతు జల్పా యోగినీ యోగయుక్తా
జయతు జయతు సౌమ్యా సుందరీ సుందరాస్యా .
జయతు జయతు పద్మా పద్మినీ కేశవస్య
జయతు జయతు కాలీ కాలినీ కాలకాంతా ..
జయతు జయతు ఖర్వా షోడశీ వేదహస్తా
జయతు జయతు ధాత్రీ ధర్మిణీ ధాతృశాంతిః .
జయతు జయతు వాణీ బ్రహ్మణో బ్రహ్మవంద్యా
జయతు జయతు దుర్గా దారిణీ దేవశత్రోః ..
దేవి త్వం సృష్టికాలే కమలభవభృతా రాజసీ రక్తరూపా
రక్షాకాలే త్వమంబా హరిహృదయధృతా సాత్వికీ శ్వేతరూపా .
భూరిక్రోధా భవాంతే భవభవనగతా తామసీ కృష్ణరూపా
ఏతాశ్చాన్యాస్త్వమేవ క్షితమనుజమలా సుందరీ కేవలాద్యా ..
సుమలశమనమేతద్దేవి గోప్యం గుణజ్ఞే
గ్రహణమననయోగ్యం షోడశీయం ఖలఘ్నం .
సురతరుసమశీలం సంప్రదం పాఠకానాం
ప్రభవతి హృదయాఖ్యం స్తోత్రమత్యంతమాన్యం ..
ఇదం త్రిపురసుందర్యాః షోడశ్యాః పరమాద్భుతం .
యః శృణోతి నరః స్తోత్రం స సదా సుఖమశ్నుతే ..