ലലിതാ ഹൃദയ സ്തോത്രം
ബാലവ്യക്തവിഭാകരാമിതനിഭാം ഭവ്യപ്രദാം ഭാരതീ-
മീഷത്ഫുല്ലമുഖാംബുജസ്മിതകരൈരാശാഭവാന്ധാപഹാം .
പാശം സാഭയമങ്കുശം ച വരദം സംബിഭ്രതീം ഭൂതിദാം
ഭ്രാജന്തീം ചതുരംബുജാകൃതകരൈർഭക്ത്യാ ഭജേ ഷോഡശീം ..
സുന്ദരീ സകലകല്മഷാപഹാ കോടികഞ്ജകമനീയകാന്തികാ .
കോടികല്പകൃതപുണ്യകർമണാ പൂജനീയപദപുണ്യപുഷ്കരാ ..
ശർവരീശസമസുന്ദരാനനാ ശ്രീശശക്തിസുകൃതാശ്രയാശ്രിതാ .
സജ്ജനാനുശരണീയസത്പദാ സങ്കടേ സുരഗണൈഃ സുവന്ദിതാ ..
യാ സുരാസുരരണേ ജവാന്വിതാ ഹ്യാജഘാന ജഗദംബികാഽജിതാ .
താം ഭജാമി ജനനീം ജഗജ്ജനിം യുദ്ധയുക്തദിതിജാൻ സുദുർജയാൻ ..
യോഗിനാം ഹൃദയസംഗതാം ശിവാം യോഗയുക്തമനസാം യതാത്മനാം .
ജാഗ്രതീം ജഗതി യത്നതോ ദ്വിജാ യാം ജപന്തി ഹൃദി താം ഭജാമ്യഹം ..
കല്പകാസ്തു കലയന്തി കാളികാം യത്കലാ കലിജനോപകാരികാ .
കൗളികാളികലിതാംഘ്രിപങ്കജാം താം ഭജാമി കലികല്മഷാപഹാം ..
ബാലാർകാനന്തശോചിർന്നിജതനുകിരണൈർദ്ദീപയന്തീം ദിഗന്താൻ
ദീപ്തൈർദ്ദേദീപ്തമാനാം ദനുജദലവനാനല്പദാവാനലാഭാം .
ദാന്തോദന്തോഗ്രചിതാം ദലിതദിതിസുതാം ദർശനീയാം ദുരന്താം
ദേവീം ദീനാർദ്രചിത്താം ഹൃദി മുദിതമനാഃ ഷോഡശീം സംസ്മരാമി ..
ധീരാന്ധന്യാന്ധരിത്രീധവവിധൃതശിരോ ധൂതധൂല്യബ്ജപാദാം
ഘൃഷ്ടാന്ധാരാധരാധോ വിനിധൃതചപലാചാരുചന്ദ്രപ്രഭാഭാം .
ധർമ്യാന്ധൂതോപഹാരാൻ ധരണിസുരധവോദ്ധാരിണീം ധ്യേയരൂപാം
ധീമദ്ധന്യാതിധന്യാന്ധനദധനവൃതാം സുന്ദരീം ചിന്തയാമി ..
ജയതു ജയതു ജല്പാ യോഗിനീ യോഗയുക്താ
ജയതു ജയതു സൗമ്യാ സുന്ദരീ സുന്ദരാസ്യാ .
ജയതു ജയതു പദ്മാ പദ്മിനീ കേശവസ്യ
ജയതു ജയതു കാളീ കാലിനീ കാലകാന്താ ..
ജയതു ജയതു ഖർവാ ഷോഡശീ വേദഹസ്താ
ജയതു ജയതു ധാത്രീ ധർമിണീ ധാതൃശാന്തിഃ .
ജയതു ജയതു വാണീ ബ്രഹ്മണോ ബ്രഹ്മവന്ദ്യാ
ജയതു ജയതു ദുർഗാ ദാരിണീ ദേവശത്രോഃ ..
ദേവി ത്വം സൃഷ്ടികാലേ കമലഭവഭൃതാ രാജസീ രക്തരൂപാ
രക്ഷാകാലേ ത്വമംബാ ഹരിഹൃദയധൃതാ സാത്വികീ ശ്വേതരൂപാ .
ഭൂരിക്രോധാ ഭവാന്തേ ഭവഭവനഗതാ താമസീ കൃഷ്ണരൂപാ
ഏതാശ്ചാന്യാസ്ത്വമേവ ക്ഷിതമനുജമലാ സുന്ദരീ കേവലാദ്യാ ..
സുമലശമനമേതദ്ദേവി ഗോപ്യം ഗുണജ്ഞേ
ഗ്രഹണമനനയോഗ്യം ഷോഡശീയം ഖലഘ്നം .
സുരതരുസമശീലം സമ്പ്രദം പാഠകാനാം
പ്രഭവതി ഹൃദയാഖ്യം സ്തോത്രമത്യന്തമാന്യം ..
ഇദം ത്രിപുരസുന്ദര്യാഃ ഷോഡശ്യാഃ പരമാദ്ഭുതം .
യഃ ശൃണോതി നരഃ സ്തോത്രം സ സദാ സുഖമശ്നുതേ ..
Other stotras
