ಹರಿನಾಮ ಅಷ್ಟಕ ಸ್ತೋತ್ರ
ನಿಖಿಲಶ್ರುತಿಮೌಲಿರತ್ನಮಾಲಾ
ದ್ಯುತಿನೀರಾಜಿತಪಾದಪಂಕಜಾಂತ .
ಅಯಿ ಮುಕ್ತಕುಲೈರುಪಾಸ್ಯಮಾನಂ
ಪರಿತಸ್ತ್ವಾಂ ಹರಿನಾಮ ಸಂಶ್ರಯಾಮಿ ..
ಜಯ ನಾಮಧೇಯ ಮುನಿವೃಂದಗೇಯ ಹೇ
ಜನರಂಜನಾಯ ಪರಮಾಕ್ಷರಾಕೃತೇ .
ತ್ವಮನಾದರಾದಪಿ ಮನಾಗ್ ಉದೀರಿತಂ
ನಿಖಿಲೋಗ್ರತಾಪಪಟಲೀಂ ವಿಲುಂಪಸಿ ..
ಯದಾಭಾಸೋಽಪ್ಯುದ್ಯನ್ ಕವಲಿತಭವಧ್ವಾಂತವಿಭವೋ
ದೃಶಂ ತತ್ತ್ವಾಂಧಾನಾಮಪಿ ದಿಶತಿ ಭಕ್ತಿಪ್ರಣಯಿನೀಂ .
ಜನಸ್ತಸ್ಯೋದಾತ್ತಂ ಜಗತಿ ಭಗವನ್ನಾಮತರಣೇ
ಕೃತೀ ತೇ ನಿರ್ವಕ್ತುಂ ಕ ಇಹ ಮಹಿಮಾನಂ ಪ್ರಭವತಿ ..
ಯದ್ ಬ್ರಹ್ಮಸಾಕ್ಷಾತ್ಕೃತಿನಿಷ್ಠಯಾಪಿ
ವಿನಾಶಮಾಯಾತಿ ವಿನಾ ನ ಭೋಗೈಃ .
ಅಪೈತಿ ನಾಮ ಸ್ಫುರಣೇನ ತತ್ ತೇ
ಪ್ರಾರಬ್ಧಕರ್ಮೇತಿ ವಿರೌತಿ ವೇದಃ ..
ಅಘದಮನಯಶೋದಾನಂದನೌ ನಂದಸೂನೋ
ಕಮಲನಯನಗೋಪೀಚಂದ್ರವೃಂದಾವನೇಂದ್ರಾಃ .
ಪ್ರಣತಕರುಣಕೃಷ್ಣಾವಿತ್ಯನೇಕಸ್ವರೂಪೇ
ತ್ವಯಿ ಮಮ ರತಿರುಚ್ಚೈರ್ವರ್ಧತಾಂ ನಾಮಧೇಯ ..
ವಾಚ್ಯೋ ವಾಚಕಮಿತ್ಯುದೇತಿ ಭವತೋ ನಾಮ ಸ್ವರೂಪದ್ವಯಂ
ಪೂರ್ವಸ್ಮಾತ್ ಪರಮೇವ ಹಂತ ಕರುಣಾ ತತ್ರಾಪಿ ಜಾನೀಮಹೇ .
ಯಸ್ತಸ್ಮಿನ್ ವಿಹಿತಾಪರಾಧನಿವಹಃ ಪ್ರಾಣೀ ಸಮಂತಾದ್ ಭವೇದ್
ಆಸ್ಯೇನೇದಮುಪಾಸ್ಯ ಸೋಽಪಿ ಹಿ ಸದಾನಂದಾಂಬುಧೌ ಮಜ್ಜತಿ ..
ಸೂದಿತಾಶ್ರಿತಜನಾರ್ತಿರಾಶಯೇ
ರಮ್ಯಚಿದ್ಘನಸುಖಸ್ವರೂಪಿಣೇ .
ನಾಮ ಗೋಕುಲಮಹೋತ್ಸವಾಯ ತೇ
ಕೃಷ್ಣಪೂರ್ಣವಪುಷೇ ನಮೋ ನಮಃ ..
ನಾರದವೀಣೋಜ್ಜೀವನಸುಧೋರ್ಮಿನಿರ್ಯಾಸಮಾಧುರೀಪೂರ .
ತ್ವಂ ಕೃಷ್ಣನಾಮ ಕಾಮಂ ಸ್ಫುರ ಮೇ ರಸನೇ ರಸೇನ ಸದಾ ..
Other stotras
