ച്യവനമഹർഷിയാണ് ച്യവനപ്രാശം ഉണ്ടാക്കിയത്.  ഭൃഗുമഹർഷിയുടെ പുത്രനായിരുന്നു ച്യവനൻ. അദ്ദേഹത്തിന് ആ പേര് എങ്ങനെയാണ് വന്നതെന്നറിയണ്ടേ?

പുലോമ എന്നായിരുന്നു ഭൃഗുമഹർഷിയുടെ പത്നിയുടെ പേര്. അവർ ഗർഭിണിയായിരുന്നു. ഒരിക്കൽ മഹർഷി സ്നാനത്തിന് പോയിരുന്ന സമയത്ത് ആശ്രമത്തിൽ ഒരു രാക്ഷസൻ വന്നു കയറി.

അവൻ പണ്ടൊരിക്കൽ പുലോമയെ കണ്ട് ആകൃഷ്ടനാകുകയും മനസാ വരിക്കുകയും ചെയ്തിരുന്നു. എന്നാൽ പുലോമയെ തനിക്ക് വിവാഹം കഴിച്ചുതരണമെന്ന രാക്ഷസന്‍റെ ആവശ്യം പുലോമയുടെ അച്ഛൻ നിരസിച്ചു. പുലോമയെ ഭൃഗുമഹർഷിക്ക്  വൈദിക വിധിപ്രകാരം അഗ്നിസാക്ഷിയായി വിവാഹം കഴിച്ചുകൊടുത്തു. 

എന്നിരുന്നാലും രാക്ഷസന് പുലോമ തന്‍റെയാണ് എന്ന വിചാരം മനസ്സിൽനിന്നും പോയില്ല.

ആശ്രമത്തിൽ പുലോമയെ തനിയെ കണ്ടപ്പോൾ രാക്ഷസന് പഴയതെല്ലാം ഓർമ്മ വന്നു. പുലോമ തന്നെയാണെന്ന് ഉറപ്പാക്കാനായി രാക്ഷസൻ യാഗശാലയിലെ അഗ്നിയോട് ചോദിച്ചു. 'ഇവൾ പുലോമ തന്നെയല്ലേ?'

അഗ്നി ധർമ്മസങ്കടത്തിലായി. സത്യം പറഞ്ഞാൽ രാക്ഷസൻ പുലോമയെ ഉപദ്രവിക്കും. കള്ളം പറയുന്നത് പാപമാണ്.

അഗ്നി പറഞ്ഞു, 'ഇവൾ പുലോമ തന്നെയാണ്. പക്ഷെ ഇന്നവൾ ശാസ്ത്രവിധിപ്രകാരമുള്ള വിവാഹത്തിലൂടെ ഭൃഗുമഹർഷിയുടെ ഭാര്യയാണ്. നിനക്ക് അവളുടെ മേൽ ഒരു അവകാശവുമില്ല.

പുലോമ തന്നെയാണ് എന്നുറപ്പായതും വരാഹരൂപമെടുത്ത രാക്ഷസൻ പുലോമയെ ഉടൻ കടത്തിക്കൊണ്ടുപോയി.  ആ ആഘാതത്തിൽ പുലോമയുടെ ഗർഭമലസി താഴെ വീണു. ആ ശിശുവാണ് ച്യവനൻ. ച്യുതിയിലൂടെ (താഴെ വീഴൽ) പിറന്നതുകൊണ്ട് ച്യവനൻ എന്ന പേര് വന്നു.

താഴെ വീണ ച്യവനന്‍റെ ഉഗ്ര തേജസ്സിൽ രാക്ഷസൻ ഭസ്മമായി.

Knowledge Bank

അഭിമന്യു അന്തരിച്ച സ്ഥലം

ചക്രവ്യൂഹത്തിനുള്ളിൽ അഭിമന്യു മരിച്ച സ്ഥലം ഇപ്പോൾ അഭിമന്യുപൂർ എന്നാണ് അറിയപ്പെടുന്നത്. കുരുക്ഷേത്ര നഗരത്തിൽ നിന്ന് 8 കിലോമീറ്റർ അകലെയാണിത്. അമിൻ, അഭിമന്യു ഖേഡ, ചക്രംയു എന്നീ പേരുകളിൽ ഇത് നേരത്തെ അറിയപ്പെട്ടിരുന്നു.

ഗായത്രി മന്തസിദ്ധിക്ക് എത്ര ഉരു ജപിക്കണം?

ഗായത്രി മന്ത്രം സിദ്ധിയാകാന്‍ 24 ലക്ഷം ഉരു ജപിക്കണം.