ജിതം ജിതം തേഽജിത യജ്ഞഭാവനാ ത്രയീം തനും സ്വാം പരിധുന്വതേ നമഃ .

യദ്രോമഗർതേഷു നിലില്യുരധ്വരാസ്തസ്മൈ നമഃ കാരണസൂകരായ തേ ..

രൂപം തവൈതന്നനു ദുഷ്കൃതാത്മനാം ദുർദർശനം ദേവ യദധ്വരാത്മകം .

ഛന്ദാംസി യസ്യ ത്വചി ബർഹിരോമസ്വാജ്യം ദൃശി ത്വംഘ്രിഷു ചാതുർഹോത്രം ..

സ്രുക്തുണ്ഡ ആസീത്സ്രുവ ഈശ നാസയോരിഡോദരേ ചമസാഃ കർണരന്ധ്രേ .

പ്രാശിത്രമാസ്യേ ഗ്രസനേ ഗ്രഹാസ്തു തേ യച്ചർവണം തേ ഭഗവന്നഗ്നിഹോത്രം ..

ദീക്ഷാനുജന്മോപസദഃ ശിരോധരം ത്വം പ്രായണീയോദയനീയദംഷ്ട്രഃ .

ജിഹ്വാ പ്രവർഗ്യസ്തവ ശീർഷകം ക്രതോഃ സഭ്യാവസഥ്യം ചിതയോഽസവോ ഹി തേ ..

സോമസ്തു രേതഃ സവനാന്യവസ്ഥിതിഃ സംസ്ഥാവിഭേദാസ്തവ ദേവ ധാതവഃ .

സത്രാണി സർവാണി ശരീരസന്ധിസ്ത്വം സർവയജ്ഞക്രതുരിഷ്ടിബന്ധനഃ ..

നമോ നമസ്തേഽഖിലയന്ത്രദേവതാദ്രവ്യായ സർവക്രതവേ ക്രിയാത്മനേ .

വൈരാഗ്യഭക്ത്യാത്മജയാനുഭാവിതജ്ഞാനായ വിദ്യാഗുരവേ നമോ നമഃ ..

ദംഷ്ട്രാഗ്രകോട്യാ ഭഗവംസ്ത്വയാ ധൃതാ വിരാജതേ ഭൂധര ഭൂഃ സഭൂധരാ .

യഥാ വനാന്നിഃസരതോ ദതാ ധൃതാ മതംഗജേന്ദ്രസ്യ സപത്രപദ്മിനീ ..

ത്രയീമയം രൂപമിദം ച സൗകരം ഭൂമണ്ഡലേനാഥ ദതാ ധൃതേന തേ .

ചകാസ്തി ശൃംഗോഢഘനേന ഭൂയസാ കുലാചലേന്ദ്രസ്യ യഥൈവ വിഭ്രമഃ ..

സംസ്ഥാപയൈനാം ജഗതാം സതസ്ഥുഷാം ലോകായ പത്നീമസി മാതരം പിതാ .

വിധേമ ചാസ്യൈ നമസാ സഹ ത്വയാ യസ്യാം സ്വതേജോഽഗ്നിമിവാരണാവധാഃ ..

കഃ ശ്രദ്ദധീതാന്യതമസ്തവ പ്രഭോ രസാം ഗതായാ ഭുവ ഉദ്വിബർഹണം .

ന വിസ്മയോഽസൗ ത്വയി വിശ്വവിസ്മയേ യോ മായയേദം സസൃജേഽതിവിസ്മയം ..

വിധുന്വതാ വേദമയം നിജം വപുർജനസ്തപഃസത്യനിവാസിനോ വയം . 

സടാശിഖോദ്ധൂതശിവാംബുബിന്ദുഭിർവിമൃജ്യമാനാ ഭൃശമീശ പാവിതാഃ ..

സ വൈ ബത ഭ്രഷ്ടമതിസ്തവൈഷ തേ യഃ കർമണാം പാരമപാരകർമണഃ .

യദ്യോഗമായാഗുണയോഗമോഹിതം വിശ്വം സമസ്തം ഭഗവൻ വിധേഹി ശം ..

Ramaswamy Sastry and Vighnesh Ghanapaathi