ആനന്ദരൂപേ നിജബോധരൂപേ ബ്രഹ്മസ്വരൂപേ ശ്രുതിമൂർതിരൂപേ .
ശശാങ്കരൂപേ രമണീയരൂപേ ശ്രീരംഗരൂപേ രമതാം മനോ മേ ..

കാവേരിതീരേ കരുണാവിലോലേ മന്ദാരമൂലേ ധൃതചാരുചേലേ .
ദൈത്യാന്തകാലേഽഖിലലോകലീലേ ശ്രീരംഗലീലേ രമതാം മനോ മേ ..

ലക്ഷ്മീനിവാസേ ജഗതാം നിവാസേ ഹൃത്പദ്മവാസേ രവിബിംബവാസേ .
കൃപാനിവാസേ ഗുണവൃന്ദവാസേ ശ്രീരംഗവാസേ രമതാം മനോ മേ ..

ബ്രഹ്മാദിവന്ദ്യേ ജഗദേകവന്ദ്യേ മുകുന്ദവന്ദ്യേ സുരനാഥവന്ദ്യേ .
വ്യാസാദിവന്ദ്യേ സനകാദിവന്ദ്യേ ശ്രീരംഗവന്ദ്യേ രമതാം മനോ മേ ..

ബ്രഹ്മാധിരാജേ ഗരുഡാധിരാജേ വൈകുണ്ഠരാജേ സുരരാജരാജേ .
ത്രൈലോക്യരാജേഽഖിലലോകരാജേ ശ്രീരംഗരാജേ രമതാം മനോ മേ ..

അമോഘമുദ്രേ പരിപൂർണനിദ്രേ ശ്രീയോഗനിദ്രേ സസമുദ്രനിദ്രേ .
ശ്രിതൈകഭദ്രേ ജഗദേകനിദ്രേ ശ്രീരംഗഭദ്രേ രമതാം മനോ മേ ..

സ ചിത്രശായീ ഭുജഗേന്ദ്രശായീ നന്ദാങ്കശായീ കമലാങ്കശായീ .
ക്ഷീരാബ്ധിശായീ വടപത്രശായീ ശ്രീരംഗശായീ രമതാം മനോ മേ ..

ഇദം ഹി രംഗം ത്യജതാമിഹാംഗം പുനർനചാങ്കം യദി ചാംഗമേതി .
പാണൗ രഥാംഗം ചരണേംബു ഗാംഗം യാനേ വിഹംഗം ശയനേ ഭുജംഗം ..

രംഗനാഥാഷ്ടകം പുണ്യം പ്രാതരുത്ഥായ യഃ പഠേത് .
സർവാൻ കാമാനവാപ്നോതി രംഗിസായുജ്യമാപ്നുയാത് ..

Ramaswamy Sastry and Vighnesh Ghanapaathi