മഹാനീലമേഘാതിഭവ്യം സുഹാസം ശിവബ്രഹ്മദേവാദിഭിഃ സംസ്തുതം ച .
രമാമന്ദിരം ദേവനന്ദാപദാഹം ഭജേ രാധികാവല്ലഭം കൃഷ്ണചന്ദ്രം .. 1..

രസം വേദവേദാന്തവേദ്യം ദുരാപം സുഗമ്യം തദീയാദിഭിർദാനവഘ്നം .
ലസത്കുണ്ഡലം സോമവംശപ്രദീപം ഭജേ രാധികാവല്ലഭം കൃഷ്ണചന്ദ്രം .. 2..

യശോദാദിസംലാലിതം പൂർണകാമം ദൃശോരഞ്ജനം പ്രാകൃതസ്ഥസ്വരൂപം .
ദിനാന്തേ സമായാന്തമേകാന്തഭക്തൈർഭജേ രാധികാവല്ലഭം കൃഷ്ണചന്ദ്രം .. 3..

കൃപാദൃഷ്ടിസമ്പാതസിക്തസ്വകുഞ്ജം തദന്തഃസ്ഥിതസ്വീയസമ്യഗ്ദശാദം .
പുനസ്തത്ര തൈഃ സത്കൃതൈകാന്തലീലം ഭജേ രാധികാവല്ലഭം കൃഷ്ണചന്ദം .. 4..

ഗൃഹേ ഗോപികാഭിർധൃതേ ചൗര്യകാലേ തദക്ഷ്ണോശ്ച നിക്ഷിപ്യ ദുഗ്ധം ചലന്തം .
തദാ തദ്വിയോഗാദിസമ്പത്തികാരം ഭജേ രാധികാവല്ലഭം കൃഷ്ണചന്ദ്രം .. 5..

ചലത്കൗസ്തുഭവ്യാപ്തവക്ഷഃപ്രദേശം മഹാവൈജയന്തീലസത്പാദയുഗ്മം .
സുകസ്തൂരികാദീപ്തഭാലപ്രദേശം ഭജേ രാധികാവല്ലഭം കൃഷ്ണചന്ദ്രം .. 6..

ഗവാം ദോഹനേ ദൃഷ്ടരാധാമുഖാബ്ജം തദാനീം ച തന്മേലനവ്യഗ്രചിത്തം .
സമുത്പന്നതന്മാനസൈകാന്തഭാവം ഭജേ രാധികാവല്ലഭം കൃഷ്ണചന്ദ്രം .. 7..

അദഃ കൃഷ്ണചന്ദ്രാഷ്ടകം പ്രേമയുക്തഃ പഠേത്കൃഷ്ണസാന്നിധ്യമാപ്നോതി നിത്യം .
കലൗ യഃ സ സംസാരദുഃഖാതിരിക്തം പ്രയാത്യേവ വിഷ്ണോഃ പദം നിർഭയം തത് .. 8..

Ramaswamy Sastry and Vighnesh Ghanapaathi