കപാലിനാമധേയകം കലാപിപുര്യധീശ്വരം
കലാധരാർധശേഖരം കരീന്ദ്രചർമഭൂഷിതം .
കൃപാരസാർദ്രലോചനം കുലാചലപ്രപൂജിതം
കുബേരമിത്രമൂർജിതം ഗണേശപൂജിതം ഭജേ ..

ഭജേ ഭുജംഗഭൂഷണം ഭവാബ്ധിഭീതിഭഞ്ജനം
ഭവോദ്ഭവം ഭയാപഹം സുഖപ്രദം സുരേശ്വരം .
രവീന്ദുവഹ്നിലോചനം രമാധവാർചിതം വരം
ഹ്യുമാധവം സുമാധവീസുഭൂഷിതം മഹാഗുരും ..

ഗുരും ഗിരീന്ദ്രധന്വിനം ഗുഹപ്രിയം ഗുഹാശയം
ഗിരിപ്രിയം നഗപ്രിയാസമന്വിതം വരപ്രദം .
സുരപ്രിയം രവിപ്രഭം സുരേന്ദ്രപൂജിതം പ്രഭും
നരേന്ദ്രപീഠദായകം നമാമ്യഹം മഹേശ്വരം ..

മഹേശ്വരം സുരേശ്വരം ധനേശ്വരപ്രിയേശ്വരം
വനേശ്വരം വിശുദ്ധചിത്തവാസിനം പരാത്പരം .
പ്രമത്തവേഷധാരിണം പ്രകൃഷ്ടചിത്സ്വരൂപിണം
വിരുദ്ധകർമകാരിണം സുശിക്ഷകം സ്മരാമ്യഹം ..

സ്മരാമ്യഹം സ്മരാന്തകം മുരാരിസേവിതാംഘ്രികം
പരാരിനാശനക്ഷമം പുരാരിരൂപിണം ശുഭം .
സ്ഫുരത്സഹസ്രഭാനുതുല്യതേജസം മഹൗജസം
സുചണ്ഡികേശപൂജിതം മൃഡം സമാശ്രയേ സദാ ..

സദാ പ്രഹൃഷ്ടരൂപിണം സതാം പ്രഹർഷവർഷിണം
ഭിദാ വിനാശകാരണ പ്രമാണഗോചരം പരം .
മുദാ പ്രവൃത്തനർതനം ജഗത്പവിത്രകീർതനം
നിദാനമേകമദ്ഭുതം നിതാന്തമാശ്രയേഹ്യഹം ..

അഹമ്മമാദിദൂഷണം മഹേന്ദ്രരത്നഭൂഷണം
മഹാവൃഷേന്ദ്രവാഹനം ഹ്യഹീന്ദ്രഭൂഷണാന്വിതം .
വൃഷാകപിസ്വരൂപിണം മൃഷാപദാർഥധാരിണം
മൃകണ്ഡുസൂനുസംസ്തുതം ഹ്യഭീതിദം നമാമി തം ..

നമാമി തം മഹാമതിം നതേഷ്ടദാനചക്ഷണം
നതാർതിഭഞ്ജനോദ്യതം നഗേന്ദ്രവാസിനം വിഭും .
അഗേന്ദ്രജാസമന്വിതം മൃഗേന്ദ്രവിക്രമാന്വിതം
ഖഗേന്ദ്രവാഹനപ്രിയം സുഖസ്വരൂപമവ്യയം ..

സുകല്പകാംബികാപതിപ്രിയം ത്വിദം മനോഹരം
സുഗൂഡകാഞ്ചിരാമകൃഷ്ണയോഗിശിഷ്യസംസ്തുതം .
മഹാപ്രദോഷപുണ്യകാലകീർതനാത് ശുഭപ്രദം
ഭജാമഹേ സദാ മുദാ കപാലിമംഗളാഷ്ടകം ..

കപാലി തുഷ്ടിദായകം മഹാപദിപ്രപാലകം
ത്വഭീഷ്ടസിദ്ധിദായകം വിശിഷ്ടമംഗലാഷ്ടകം .
പഠേത്സകൃത്സുഭക്തിതഃ കപാലിസന്നിധൗ ക്രമാത്
അവാപ്യ സർവമായുരാദി മോദതേ സുമംഗളം ..

Ramaswamy Sastry and Vighnesh Ghanapaathi