സദേകം പരം കേവലം നിർവികാരം നിരാകാരമാനന്ദമാത്രം പവിത്രം .
സ്വയഞ്ജ്യോതിരവ്യക്തമാകാശകല്പം ശ്രുതിർബ്രഹ്മ യത്പ്രാഹ തസ്മൈ നമസ്തേ ..

യ ഏകോഽപി മായാവശാത്സർവഹേതുഃ സ്വസൃഷ്ടേഷു വിശ്വേഷു വിഷ്വക്പ്രവേശാത് .
ശ്രുതൗ ജീവ ഇത്യുച്യതേ കേവലാത്മാ തുരീയായ ശുദ്ധായ തസ്മൈ നമസ്തേ ..

ന യസ്മാദിഹ ദ്രഷ്ടൃ വിജ്ഞാതൃ ചാന്യത്ക്വചിത്സ്യാത്പരം ദ്രഷ്ടൃ വിജ്ഞാതൃ വാ യത് .
സമസ്താസു ബുദ്ധിഷ്വനുസ്യൂതമേകം നമോ ബ്രഹ്മണേ ജീവരൂപായ തസ്മൈ ..

മുഖാദ്ദർപണേ ദൃശ്യമാനോ ന ഭിന്നോ മുഖാഭാസ ഏവം ചിദാഭാസ ഈശഃ .
ചിതോ നൈവ ഭിന്നോഽസ്തി മായാസ്ഥിതോ യഃ പരേശായ തസ്മൈ നമഃ കേവലായ ..

യഥാ സൂര്യ ഏകഃ സ്ഥിതസ്തോയപാത്രേഷ്വനേകേഷു യോ നിർവികാരസ്തഥാഽഽത്മാ .
സ്ഥിതഃ സ്വീയബുദ്ധിഷ്വനേകാസു നിത്യശ്ചിദേകസ്വരൂപായ തസ്മൈ നമസ്തേ ..

സ്ഥിതോഽനേകബുദ്ധിഷ്വയം ജീവ ഏകോ വിഭുഃ കാരണേകത്വതോ നാത്ര നാനാ .
ഇതി ത്യക്തസർവൈഷണാപീഹ യസ്യ പ്രസാദാദ്വിജാനന്തി തസ്മൈ നമസ്തേ ..

മുഖൈഃ പഞ്ചഭിർഭോഗ്യവസ്തൂനി ഭുങ്ക്തേ ഹ്യഭോക്താപി ബുദ്ധിസ്ഥിതോ ബുദ്ധിതുല്യഃ .
കരോതീവ കർമാണ്യകർമാപി യോ വൈ വിചിത്രായ തസ്മൈ നമസ്തേഽസ്തു നിത്യം ..

ചിദാഭാസ ഏവാത്ര കർതേവ ഭാതി സ്വരൂപാപരിജ്ഞാനതോ യസ്യ നൂനം .
സ്വബുദ്ധേരിയം കർതൃഭോക്തൃത്വരൂപാ മൃഷാ സംസൃതിർവൈ നമസ്തേഽസ്തു തസ്മൈ ..

ചിദാഭാസചൈതന്യബുദ്ധീർവിവിച്യാത്ര വിജ്ഞായ സംസാരബന്ധാദ്വിമുക്തഃ .
യ ഏതദ്വിവേകാവധിം സ്വസ്യ മേനേ സമസ്തം ച സംസാരമസ്മൈ നമസ്തേ ..

ന കസ്യാപി സംസാരലേശോഽസ്തി കശ്ചിത്സ കർതൃത്വഭോക്തൃത്വരൂപോ ഹി മിഥ്യാ .
സമസ്തോഽപ്യയം യത്സ്വരൂപാവിവേകാന്നമസ്തേ സദാ നിത്യമുക്തായ തസ്മൈ ..

ജഡാ ബുദ്ധിരാത്മാ പരോ നിർവികാരശ്ചിദാഭാസ ഏകോഽപി മിഥ്യൈവ ജീവഃ .
യ ഏതദ്വിവേകീ സ്വതോ നിത്യമുക്തഃ സദാ നിർവികാരായ തസ്മൈ നമസ്തേ ..

ചിദാഭാസ ഏകോഽവ്യയഃ കാരണസ്ഥോ യ ഈശഃ സ ഏവേഹ കാര്യസ്ഥിതഃ സൻ .
അഭൂജ്ജീവസഞ്ജ്ഞഃ സ ഏകോ ഹി ജീവഃ സ ഭിന്നോ ന യസ്മാന്നമസ്തേഽസ്തു തസ്മൈ ..

യദജ്ഞാനതോ ജീവനാനാത്വമാഹുർമഹാമായയാ മോഹിതാ വാദദക്ഷാഃ .
വിവേകീ വദത്യേകമേവാത്ര ജീവം പരിത്യക്തവാദോ നമസ്തേഽസ്തു തസ്മൈ ..

ചിദാഭാസ ഏകോഽഥവാ നേതി സർവേ വിമുഹ്യന്തി ബേദാന്തിനോഽപ്യന്യഭക്താഃ .
തഥാപ്യേക ഏവേതി ധീദാർഢ്യദാതാ യ ആത്മാ സ്വഭക്തസ്യ തസ്മൈ നമസ്തേ ..

മുഖാദർശയോരേക ഏകൈകതായാം മുഖാഭാസ ഏവം ചിദാഭാസ ഏകഃ .
സ്വചിദ്ബ്രഹ്മബിംബൈക്യമായൈക്യതോഽയം യദംശോഽഖിലേശോ നമസ്തേഽസ്തു തസ്മൈ ..

ശ്രുതിർഹ്യേകതാം ബ്രഹ്മണോ വക്തി നൂനം സജാതീയഭേദാദിശൂന്യം തതോഽത്ര .
സ്വമായൈകതാപ്യസ്യ യുക്ത്യാപി സിദ്ധാ നമസ്തേ സദൈകസ്വരൂപായ തസ്മൈ ..

ന മായാബഹുത്വം തദാ തത്പ്രതിഷ്ഠാ അനേകേശ്വരാഃ സംഭവേയുർഹി നൈതത് .
കചിദ്യുജ്യതേ യസ്യ മായാപ്യനേകാ നമസ്തേ ജഗദ്ധേതുഭൂതായ തസ്മൈ ..

ന മായാം വിനാ യസ്യ കർതൃത്വമസ്തി പ്രവേശോഽപി തസ്മാത്സമസ്തം മൃഷൈവ .
മഹാമായിനേ നിർവികാരായ തസ്മൈ നമോ ബ്രഹ്മരൂപായ ശുദ്ധായ തുഭ്യം ..

യ ആത്മാ ദൃഗേവാഽഽസ ദൃശ്യം ത്വനാത്മാ വിവേകാദ്ദ്വയോരാത്മദൃഷ്ടിഃ സദൃശ്യേ .
വിനഷ്ടോ ഭവേത്സാ ദൃശി സ്വസ്വരൂപേ നമസ്തേ ദൃഗാത്മസ്വരൂപായ തസ്മൈ ..

സ ദൃഗ്നിർവികാരഃ സ്വമായാ ജഡേയം ദൃഗാഭാസ ഏകോ മൃഷൈവേതി യസ്യ .
ജഗത്കർതൃതാ താത്ത്വികീ നാസ്തി തസ്മൈ നമഃ കേവലാകർതൃരൂപായ തുഭ്യം ..

അമായ്യേവ മായീ വിഭുഃ ശുദ്ധ ആത്മാ സൃജത്യത്ത്യവത്യേതദാനന്ദപൂരഃ .
ന മായാം വിനാ സ്രഷ്ടൃതാ സാക്ഷിതാ വാ വിശുദ്ധാത്മനോ യസ്യ തസ്മൈ നമസ്തേ ..

ചിതാഭാസ ഏവാഖിലോപാധിനിഷ്ഠഃ സമസ്തൈകസാക്ഷീ സ ജീവേശസഞ്ജ്ഞഃ .
ചിദംശോഽഖിലാത്മാ ന ഭിന്നോഽസ്തി യസ്മാന്നമസ്തേ വിശുദ്ധാത്മരൂപായ തസ്മൈ ..

അഹം സച്ചിദാനന്ദ ആത്മൈവ ശുദ്ധോ വിമുക്തോഽസ്മി വേദാന്തവാക്യാർഥബോധാത് .
ഇതി സ്വസ്വരൂപം വിജാനാതി വിദ്വാൻപരം യത്പരേഭ്യോഽപി തസ്മൈ നമസ്തേ ..

സ്വമായാപരിഭ്രാന്തചിത്താ അജസ്രം പരാഗ്വസ്തു പശ്യന്തി ന പ്രത്യഗർഥം .
മുമുക്ഷുസ്തു യം പശ്യതി പ്രത്യഗർഥേ പരബ്രഹ്മരൂപായ തസ്മൈ നമസ്തേ ..

ഉപാസ്യോഽന്യ ഈശോഽസ്ത്യഹം ത്വന്യ ഈശാത്പശുർവേദ നൈനം ഭജത്യത്ര യോഽസ്മാത് .
വിവേകീ സ ഏവാഹമസ്മീത്യുപാസ്തേ യമാത്മാനമീശം നമസ്തേഽസ്തു തസ്മൈ ..

ഭയം ഭേദദൃഷ്ടേർഭവത്യുൽബണം വൈ മഹാന്തോ ന ഭേദം പ്രപശ്യന്തി തസ്മാത് .
യദജ്ഞാനതോ ദൃശ്യതേ ഭേദ ഏവം ഭിദാമോഹഹന്ത്രേ നമസ്തേഽസ്തു തസ്മൈ ..

വിരിഞ്ചേന്ദ്രസൂര്യാഗ്നിരുദ്രേന്ദുവിഷ്ണൂൻപ്രകല്പ്യൈക ഏവാദ്വയഃ സർവസാക്ഷീ .
ജഗച്ചക്രവിഭ്രാന്തികർതാ യ ആത്മാ ന ദൃശ്യേത കേനാപി തസ്മൈ നമസ്തേ ..

ജഗജ്ജാഗ്രതി സ്ഥൂലമേതത്സമാനം മനോവാസിതം സ്വപ്ന ആനന്ദനിദ്രാം .
സുഷുപ്തൗ സ്വമേവാഭിപശ്യന്മുദാഽഽസ്തേ തുരീയോ യ ആത്മാ നമസ്തേഽസ്തു തസ്മൈ ..

സമസ്താദപി സ്ഥൂലസൂക്ഷ്മാച്ഛരീരാത്പരഃ കാരണാച്ചാന്യ ആത്മാ സമീപേ .
യ ഏകോ വിദൂരേഽപി തിഷ്ഠൻ ജനാനാം മഹിമ്നി സ്വകീയേ ച തസ്മൈ നമസ്തേ ..

യമാശ്രിത്യ നാസ്തീതി ചാസ്തീതി വേദേ പ്രവൃത്തോ വിരുദ്ധോഽപി വാദോഽഖിലാത്മാ .
നമസ്തേഽങ്ഘ്രിപാണ്യാദിഹീനായ നിത്യം സമസ്താംഘ്രിപാണ്യാദിയുക്തായ തസ്മൈ ..

യോഽണോരണീയാംസമാത്മാനമേകം മഹന്തം മഹദ്വസ്തുനശ്ചേതനേഭ്യഃ .
പരം ചേതനം നിത്യതോ വേദ നിത്യം യമേവേഹ വിദ്വാന്നമസ്തേഽസ്തു തസ്മൈ ..

യദാനന്ദലേശോപഭോഗേന സർവേ സദാനന്ദിനഃ സംഭവന്ത്യത്ര തസ്മൈ .
സദാനന്ദസന്ദോഹപൂർണാർണവായ പ്രസന്നായ തുഭ്യം നമഃ കേവലായ ..

യമുത്സൃജ്യ മർത്യാ ഭജത്യന്യദേവാന്ന തേഷാം വിമുക്തിഃ ഫലം കിന്തു തുച്ഛം .
ശ്വപുച്ഛം ഗൃഹീത്വാ തരിഷ്യന്തി കേ വാ സമുദ്രം ഹ്യപാരം നമസ്തേഽസ്തു തസ്മൈ ..

യഥാ വിധ്യുപാസ്തൗ ഫലം ദാസ്യതീശസ്തഥാ വിഷ്ണുരുദ്രേന്ദ്രവഹ്ന്യാദ്യുപാസ്തൗ .
ഫലം ദാസ്യതി ബ്രഹ്മ യദ്ധീശസഞ്ജ്ഞഃ സ്വകർമാനുസാരം നമസ്തേഽസ്തു തസ്മൈ ..

ന യദ്ബ്രഹ്മ മോക്ഷപ്രദം സ്യാത്കദാചിദ്വിനേഹൈവ മുക്തിപ്രദം ജ്ഞാനമേകം .
ന മോക്ഷം കൃതഃ കർമണാതഃ കൃതേന പ്രപന്നാർതിഹന്ത്രേ നമസ്തേഽസ്തു തസ്മൈ ..

ഇദം നേതിനേതീത്യമൂർതം ച മൂർതം നിരസ്യൈവ സർവം ജഗദ്ദൃശ്യമേതത് .
നിഷേധാവധി ബ്രഹ്മ യച്ഛിഷ്യതേ വൈ മനോവാഗതീതായ തസ്മൈ നമസ്തേ ..

പരിത്യജ്യ യത്തത്ത്വസമ്യഗ്വിചാരം പ്രവർതേത യസ്തീർഥയാത്രാജപാദൗ .
കരസ്ഥാന്നമുത്സൃജ്യ ലേഢീതി ഹസ്തം ന യസ്യോദയസ്തസ്യ തസ്മൈ നമസ്തേ ..

ന ചേത്പ്രാണവർഗേഷ്വയം സ്യാജ്ജഡത്വാത്കഥം പ്രാണനാഡീ ക്രിയാകാരിതൈഷാം .
അതോ യസ്യ സിദ്ധാ സ്ഥിതാ യുക്തിതോഽപി പ്രപഞ്ചപ്രകാശാച്ച തസ്മൈ നമസ്തേ ..

ഭയം യദ്വിദാം നാസ്തി മൃത്യുശ്ച നൂനം ബിഭേത്യേവ വായ്വാദി സർവേ ച യസ്മാത് .
ശരീരേഽഹമിത്യത്ര ബുദ്ധേർഭയം സ്യാന്നമസ്തേഽഭയായാശരീരായ തസ്മൈ ..

ഗുരൗ ഭക്തിയുക്തൈരിഹൈവേശ്വരോ യഃ സുവിജ്ഞേയ ആത്മാഽന്യഥാ ത്വബ്ദകോട്യാ .
അവിജ്ഞേയ ഏകഃ സ്വബുദ്ധിസ്ഥിതോഽപി പ്രിയായാഖിലേഭ്യോഽപി തസ്മൈ നമസ്തേ ..

സമസ്താത്പ്രിയോ ദേഹ ഏവാക്ഷമസ്മാത്പ്രിയം പ്രാണ ഏവാക്ഷതോഽപി പ്രിയോഽതഃ .
പ്രിയഃ പ്രത്യഗാത്മൈവ ഭോക്താ പരോ യഃ സ്വതോഽതിപ്രിയായേഹ തസ്മൈ നമസ്തേ ..

പ്രിയാദാത്മനോഽന്യന്ന വിദ്യേത കിഞ്ചിത്ക്വചിത്കാരണാന്നൈവ ഭിദ്യേത കാര്യം .
യ ആത്മാ സമസ്തസ്യ ഹേതുർനമസ്തേ നിദാനായ സർവസ്യ ദൃശ്യസ്യ തസ്മൈ ..

സമസ്തം ജഗത്കാരണാന്നൈവ ഭിന്നം സമസ്താത്മനഃ കേവലാദദ്വിതീയാത് .
പരബ്രഹ്മണോഽവ്യാകൃതേശാച്ച യസ്മാന്നമസ്തേ ക്ഷരായാക്ഷരായാപി തസ്മൈ ..

യതഃ കാരണാന്നേഹ കാര്യം വിഭിന്നം തതോ ബ്രഹ്മണോ നൈവ ഭിന്നം ജഗത്സ്യാത് .
സമസ്തം ജഗദ്ബ്രഹ്മ തച്ചാസ്മി വിദ്വാനുപാസ്തേ യമേകം നമസ്തേഽസ്തു തസ്മൈ ..

യഥാ മൃദ്വികാരോ മൃതോ നൈവ ഭിന്നസ്തഥാ ചിദ്വികാരശ്ചിതോ നൈവ ഭിന്നഃ .
അതഃ സർവമേതച്ചിദേവേതി വിദ്വാന്വിജാനാതി യദ്ബ്രഹ്മ തസ്മൈ നമസ്തേ ..

ജഗദ്യസ്യ സർവം ശരീരം ജഗന്ന പ്രമാതൃപ്രമാണപ്രമേയാത്മകോ യഃ .
സമസ്താന്തരായാഖിലേശായ തസ്മൈ നമഃ സച്ചിദാനന്ദരൂപായ തുഭ്യം ..

വിദുര്യം ന സർവേഽപി യോ വേത്തി സർവം സമസ്തേഷു ഭൂതേഷു തിഷ്ഠന്ത്വയം യഃ .
സമസ്താന്തരഃ പ്രേരയത്യേവ സർവാന്നമസ്തേ സമസ്താന്തരേശായ തസ്മൈ ..

ന ദേഹേന്ദ്രിയപ്രാണധീഭൂതവൃന്ദം ന സംസാര്യഹം കിന്തു ചിന്മാത്രമേകം .
പരം ചാപരം ബ്രഹ്മവിദ്വാന്വിശുദ്ധസ്തദസ്തീതി യദ്വേദ തസ്മൈ നമസ്തേ ..

യഥാ സ്വപ്നദൃഷ്ടാ ച ഹസ്ത്യാദി മിഥ്യാ തഥാ സർവമേതജ്ജഗദ്ഭാതി മിഥ്യാ .
അധിഷ്ഠാനമാത്രം ജഗദ്ദ്രഷ്ടൃ സത്യം വിശുദ്ധം ച യദ്ബ്രഹ്മ തസ്മൈ നമസ്തേ ..

പരാ ചാപരാ യസ്യ മായാ ദ്വിധേയം ജഗത്കർതൃതാമക്രിയസ്യാതനോതി .
സ്വതോ ദ്രഷ്ടൃദൃശ്യാതിരിക്തായ തസ്മൈ നമഃ കേവലായാവ്യയായാത്മനേഽസ്തു ..

വിശുദ്ധാത്മതത്ത്വാപരിജ്ഞാനമൂലം വിശേഷാവഭാസം സുഖിത്വാദിരൂപം .
വിശുദ്ധാത്മതത്ത്വേ പരിജ്ഞാത ഏതത്ക്വചിന്നാസ്തി യസ്മിന്നമസ്തേഽന്തു തസ്മൈ ..

ന ഹി ത്വക്പരിജ്ഞാനതഃ സർപഭാനം ക്വചിദ്വിദ്യതേ സർപതാ കല്പിതാ സ്യാത് .
തഥാ കല്പിതം സർവമേതച്ച യസ്മിന്നമസ്തേ സമസ്താവഭാസായ തസ്മൈ ..

സുഷുപ്തൗ ന സംസാരലേശോഽസ്തി കശ്ചിത്പ്രബോധേഽഖിലാഹങ്കൃതൗ ദൃശ്യതേഽയം .
അതോഽഹങ്കൃതേരേവ സംസാര ഇത്ഥം ന വൈ സംസൃതിര്യസ്യ തസ്മൈ നമസ്തേ ..

ന ശാസ്താ ന ശിഷ്യോ ന ശാസ്ത്രം ന വിശ്വം നം ശാക്തം ച ശൈവം മതം വൈഷ്ണവം വാ .
സുഷുപ്തൗ തദാനീം യദസ്ത്യാത്മമാത്രം സ്വതോ നിഷ്പ്രപഞ്ചായ തസ്മൈ നമസ്തേ ..

ജഡാനാം പ്രവൃത്തിഃ സ്വതോ നാസ്തി യസ്മാദ്വിഭോശ്ചേതനാത്സാ പ്രവൃത്തിഃ പ്രവൃത്താ .
മനഃപ്രാണദേഹേന്ദ്രിയവ്യാകൃതാനാം നമസ്തേ ചിദാത്മസ്വരൂപായ തസ്മൈ ..

മനഃപ്രാണദേഹേന്ദ്രിയവ്യാകൃതാനി സ്വതഃ കാഷ്ഠതുല്യാനി യത്സന്നിധാനാത് .
സ്വയം ചേതനാനീവ ഭാന്ത്യേവ മോഹാജ്ജഡേഭ്യഃ പരസ്മൈ നമസ്തേഽസ്തു തസ്മൈ ..

ബഹിർബുധ്യതേ പ്രാണിബുദ്ധിഃ പദാർഥാന്ന യം ബുധ്യതേ പ്രാണനാഥം സ്വസംസ്ഥം .
സമസ്താന്തരാത്മാനമേകം ച തസ്മൈ നമസ്തേ വിരിഞ്ചാദിധീബോധയിത്രേ ..

പരം യത്സ്വരൂപം വിദുർനാപി ദേവാഃ കുതോഽന്യേ മനുഷ്യാദയോ ബാഹ്യചിത്താഃ .
തദേഹവാമസ്മീതി ഭക്താസ്ത്വജസ്രം ഭജന്ത്യദ്വിതീയം നമസ്തേഽസ്തു തസ്മൈ ..

സമസ്തേഷു ദേഹേഷു സൂര്യേഽപി തിഷ്ഠന്യ ഏകോഽഖിലാത്മാ സമസ്തൈകസാക്ഷീ .
സ ഏവാഹമസ്മീതി വേദാന്തവിദ്ഭിഃ സദോപാസ്യതത്ത്വായ തസ്മൈ നമസ്തേ ..

അഹം വിശ്വകസ്തൈജസഃ പ്രാജ്ഞരൂപോ വിരാട്സൂത്രമായേശരൂപാന്ന ഭിന്നഃ .
ഉപാധൗ വിഭിന്നേഽപി കിന്ത്വസ്മി സോഽഹം യമേവം ഭജന്വേദ തസ്മൈ നമസ്തേ ..

സമസ്താനി കർമാണി സന്ത്യജ്യ വിദ്വാംസ്തദേവാഹമസ്മീത്യുപാസ്തേ ഹ്യജസ്രം .
യദേവാഹ സർവാഗമാന്തൈകവേദ്യം നമസ്തേഽനിശം ചിന്തനീയായ തസ്മൈ ..

ന കൃത്യാകൃതേഃ പ്രത്യവായഃ ക്വചിത്സ്യാദഭാവാത്കഥം ഭാവ ഉത്പത്സ്യതേഽതഃ .
അഹം പ്രത്യവായീതി കൃത്യാകൃതേ സ്യാമയം യസ്യ മോഹാന്നമസ്തേഽസ്തു തസ്മൈ ..

അധർമോഽയമേവായമേവാത്ര ധർമോ ഭവേദിത്യയം മോഹ ഏവാഖിലാനാം .
യദജ്ഞാനിനാം പ്രത്യവായപ്രദം സ്യാത്ക്വചിന്ന ഹ്യഭാവോ നമസ്തേഽസ്തു തസ്മൈ ..

അധർമം ച ഹൃത്സ്ഥം വിഹായ പ്രശാന്താ ഭജന്ത്യത്ര നൂനം സ്വരൂപം യദീയം .
സ്വരൂപം വിചാര്യാ മൃതേരാ സുഷുപ്തേർനമസ്തേഽസ്തു തസ്മൈ വിമുക്തിപ്രദായ ..

ന വൈ ബദ്ധതാ മുക്തതാ വാ കദാചിത്ക്വചിന്നിത്യമുക്തസ്യ കിം ചാത്മനോഽതഃ .
ബഹിശ്ചേതസോഽന്തശ്ച ഗത്യാഗതീ തേ നമശ്ചിത്തവിക്ഷേപഹർത്രേഽസ്തു തസ്മൈ ..

യഥാ ക്ഷീണചിത്തസ്തഥൈവാത്മനിഷ്ഠഃ പുമാന്നിത്യമുക്തോ ഭവേദദ്വിതീയഃ .
യഥാ ചേതസോഽക്ഷീണതാ യത്പ്രസാദാത്തഥാ ത്വത്പ്രസാദായ തസ്മൈ നമസ്തേ ..

പ്രസന്നേ ത്വയി പ്രാണിനാം കിന്ന ലഭ്യം പരസ്ത്വത്പ്രസാദാന്ന ലാഭോഽസ്തി കശ്ചിത് .
ബുധോഽതോഽനിശം യത്പ്രസാദാഭികാങ്ക്ഷീ നമസ്തേ പ്രപന്നപ്രസന്നായ തസ്മൈ ..

പൃഥിവ്യാദിയുക്താഽപരബ്രഹ്മനിഷ്ഠാ ന മുഖ്യാ ഭവന്ത്യത്ര ജന്മാസ്തി തേഷാം .
നിരസ്താഖിലോപാധിനിഷ്ഠോ ഹി മുഖ്യോ ന യസ്യേഹ ജന്മാസ്തി തസ്മൈ നമസ്തേ ..

ന മുഖ്യം സുഷുപ്തേരധിഷ്ഠാനതോഽന്യത്സുഷുപ്തേരധിഷ്ഠാനമാത്രം ഹി മുഖ്യം .
യദജ്ഞാനതോ ദൃപ്തബാലാകിരേതന്നൃപാദ്വേദ ചൈവം നമസ്തേഽസ്തു തസ്മൈ ..

വിരിഞ്ചാദിലോകാദിഹാവൃത്തിരസ്തി ക്വചിച്ചാത്മലോകാദനാവൃത്തിരസ്മാത് .
ധ്രുവോ ഹ്യാത്മലോകോഽധ്രുവാനാത്മലോകാത്പരോ യോഽസ്തി ചൈകോ നമസ്തേഽസ്തു തസ്മൈ ..

പരം വേദ സന്മാത്ത്രമുദ്ദാലകേന സ്വപിത്രോപദിഷ്ടോ യദാ ശ്വേതകേതുഃ .
യമാത്മാനമാത്മസ്ഥമവ്യക്തമേകം നമസ്തേഽനിശം സത്സ്വരൂപായ തസ്മൈ ..

ഭൃഗുർവേദ പിത്രോപദിഷ്ടോഽന്തരേവ പ്രകൃഷ്ടഃ പരബ്രഹ്മരൂപാത്മലോകം .
അനന്താഽദ്വയാനന്ദവിജ്ഞാനസത്യം യമേകം വിശുദ്ധായ തസ്മൈ നമസ്തേ ..

വിഹായൈവ കോശാത്പരം പഞ്ച വേദ സ്വരൂപം യദാനന്ദകോശസ്യ പുച്ഛം .
മുമുക്ഷുഃ സുഷുപ്തേരധിഷ്ഠാനമേകം സദാത്മസ്വരൂപായ തസ്മൈ നമസ്തേ ..

അനന്താനി ശാസ്ത്രാണ്യധീത്യാപി വിദ്വാന്ന ദുഃഖേതരോ നാരദോഽനാത്മവിത്ത്വാത് .
ഋഷിർമാനസാദ്വേദ യം ശോകഹത്യൈ നമസ്തേ സുഖൗഘായ തസ്മൈ വിഭൂമ്നേ ..

ഋഷേര്യാജ്ഞവൽക്യാദ്വിദേഹോ മഹാത്മാ യദേവാഭയം ബ്രഹ്മ സമ്യഗ്വിദിത്വാ .
സ്വമേവാഭയം തദ്ധ്യഭൂദ്വേദവേദ്യം സമസ്താഭയാപ്യായ തസ്മൈ നമസ്തേ ..

വിദിത്വാത്ര ഭൂമാനമേനശ്ഛിദേഽസ്തി പ്രവാച്യം കിമു പ്രാണവിത്പാപനാശേ .
അതഃ പ്രാണവിദ്യാമനാദൃത്യ വിദ്വാനുപാസ്തേ യമീശം നമസ്തേഽസ്തു തസ്മൈ ..

അജസ്രാന്നദാനം പരിത്യജ്യ ജാനശ്രുതിർഹ്യൈക്യമഭ്യാഗമദ്ധംസവാക്യാത് .
സ വൈ പ്രാണവിത്പ്രാണ ഉത്കർഷവാംസ്തത്പരോഽസ്മാദ്യ ആത്മാ നമസ്തേഽസ്തു തസ്മൈ ..

രവീന്ദ്വഗ്നിതേജോ ജഗദ്ഭാസകശ്ചേന്ന തസ്യാപി ചിത്സന്നിധാനേന തത്സ്യാത് .
ന യത്സന്നിധാനം വിനാ കിഞ്ചിദസ്തി ക്വചിദ്വസ്തു തസ്മൈ നമോ ജ്യാതിഷേ ച ..

പരം ജ്യോതിഷാം ജ്യോതിരാത്മാഽഽഖ്യമേതദ്രവീന്ദ്വാദിബുദ്ധ്യാദിവിദ്യോതകം യത് .
വിദിത്വൈവ നൂനം നരോ ബ്രാഹ്മണഃ സ്യാദമർത്യശ്ച തസ്മൈ നമഃ സ്വാത്മനേ തേ ..

യഥാശ്വത്ഥവൃക്ഷേ സ്വദേഹേ ച തുല്യം സ്വമേവാബ്രവീദ്വാസുദേവോഽർജുനായ ..
തഥാ യസ്യ സാമ്യം വിജാനാതി വിദ്വാന്നമസ്തേ സമസ്താത്മരൂപായ തസ്മൈ ..

ദ്വിജേ പുൽകസേ ഹസ്തിനി സ്വേ ശരീരേ സമഃ സാത്ത്വികേ രാജസേ താമസേ ച .
യ ആത്മാ ഗുണൈസ്തൈരസംസ്പൃഷ്ട ഈശോ നമസ്തേ സദാ നിഷ്കളങ്കായ തസ്മൈ ..

യമാശ്ചര്യവദ്വക്തി കശ്ചിച്ഛൃണോതി പ്രശാന്തസ്തു ജാനാതി ന ഹ്യപ്രശാന്തഃ .
വിദിത്വാഽപി സാക്ഷാത്കരോത്യത്ര നാന്യശ്ചിദസ്മീതി ദീക്ഷ്യായ തസ്മേ നമസ്തേ ..

പതീ ദേവദൈത്യൗഘയോഃ പദ്മജാദ്യം ചതുർവാരമാകർണയന്തൗ തഥാഽപി .
ന ജാനാതി കശ്ചിത്തയോർവേദ ചാന്യോ ഹ്യതോ ദുർവിതർക്യായ തസ്മേ നമസ്തേ ..

ശരീരേന്ദ്രിയപ്രാണവിജ്ഞാനശൂന്യേഷ്വിഹൈകൈകമാത്മേതി ദൃപ്താ വദന്തി .
തഥാ ബുദ്ധിസമ്യഗ്വിചാരാസമർഥാ യദജ്ഞാനമോഹാ ഹി തസ്മൈ നമസ്തേ ..

അനേകത്വകർതൃത്വഭോക്തൃത്വധർമഃ സ ആത്മാ വിഭുശ്ചിദ്ഗുണശ്ചേതി കേചിത് .
ന കർതൈവ ഭോക്താ ക്വചിച്ചേതി ചാന്യേ യദജ്ഞാ വദന്തീഹ തസ്മൈ നമസ്തേ ..

അനേകാത്മനാ പ്രേരകോഽന്യോ ന ഹീശോഽസ്ത്വിതി പ്രാഹുരേകേ ന ചാസ്തീതി ചാന്യേ .
വിവാദാസ്പദം നൈവ മായാ വിനാ യന്നമസ്തേഽസ്തു തസ്മൈ വിവാദാത്പരായ ..

വിവാദോ നിവർതേത യസ്യ പ്രസാദാത്സ്വരൂപപ്രകാശേ ജഗദ്ഭാവനസ്യ .
നിവൃത്തേ വിവാദേ പുനർനൈവ ലോകേ ഭ്രമന്ത്യദ്വിതീയായ തസ്മൈ നമസ്തേ ..

വിഭും ചിത്തനിഷ്ഠം യദംഗുഷ്ടമാത്രം പുരാണം പുമാംസം വദന്ത്യത്ര വേദാഃ .
ജനാനാം ഹൃദംഗുഷ്ഠമാത്രം യതോഽസ്മാദനംഗുഷ്ഠമാത്രായ തസ്മേ നമസ്തേ ..

ഭ്രുവോർമധ്യമേവാവിമുക്തം മുനീനാം മഹാക്ഷേത്രമിത്യത്ര ബുദ്ധേഃ ശ്രുതഞ്ച .
ന വാ വാരണാസീപുരം ഗന്തുമിച്ഛേത്സ്വരൂപേ സ്ഥിതോ യസ്യ തസ്മൈ നമസ്തേ ..

ശരീരേ യഥാഽഹംമതിഃ സർവജന്തോസ്തഥാ മുക്തിബുദ്ധിശ്ച കാശീമൃതേർവാ .
സ്വരൂപപ്രകാശം വിനാ യസ്യ മുക്തിർന വൈ സംഭവേത്കാപി തസ്മൈ നമസ്തേ ..

സ്വരൂപപ്രകാശൈകഹേതുർഹി യസ്യ പ്രകൃഷ്ടാഗമാന്താർഥസമ്യഗ്വിചാരഃ ..
അതോ യത്പ്രകാശായ വേദാന്തനിഷ്ഠോഽനിശം സ്യാദ്വിവേകീ നമസ്തേഽസ്തു തസ്മൈ ..

വദന്തശ്ച രുദ്രാദയോഽപ്യാത്മതത്ത്വം ന ജാനന്ത്യതഃ കേഽപി വേദാന്തനിഷ്ഠാഃ .
തതസ്താനിഹോത്സൃജ്യ വേദാന്തനിഷ്ഠോ ഭവേദ്യത്പ്രബോധായ തസ്മൈ നമസ്തേ ..

സുരേന്ദ്രോ വിദിത്വൈവ യസ്യ സ്വരൂപം സമസ്താദഘാദ്വൃത്രഹത്യാദിരൂപാത് .
വിമുക്തോ ഹി വേദാന്തനിഷ്ഠോ മുദാഽഽസ്തേ നിരസ്യാഭിമാനം നമസ്തേഽസ്തു തസ്മൈ ..

യദീയം സ്വരൂപം വിചാര്യൈവ തിഷ്ഠൻസദാ വന്ദനീയോഽമരൈരിന്ദ്രമുഖ്യൈഃ .
വിശുദ്ധോ ഹ്യയം ദേവവന്ദ്യത്വതോ വൈ നമസ്തേഽസ്തു തസ്മൈ വിശുദ്ധിപ്രദായ ..

സ്വയം ശുദ്ധ ഏവാന്യശുദ്ധിം ദദാതി ക്വചിന്ന ഹ്യശുദ്ധോഽന്യശുദ്ധിപ്രദഃ സ്യാത് .
സ്മൃതഃ ശുദ്ധിദഃ സർവജന്തോര്യ ആത്മാ വിശുദ്ധഃ പവിത്രായ തസ്മൈ നമസ്തേ ..

സകൃത്സംസ്മൃതശ്ചേത്സമസ്തം ച പാപം ദഹത്യഗ്നിവദ്യസ്ത്വിഹാത്യന്തദീപ്തഃ .
ചിദേവാഹമിത്യേവ ബുദ്ധൗ പ്രവേശസ്വദീപ്തിർനമസ്തേഽസ്തു തസ്മൈ മഹിമ്നേ ..

ന ഹി സ്നാനദാനാദിനാ പാപനാശേ തു തത്സംസ്കൃതിഃ ക്വാപി നശ്യേത്കദാപി .
വിനാ യത്സ്മൃതിം സ്മൃത്യുപായം ച മുക്ത്വാ സ്മരത്പാപഹന്ത്രേ നമസ്തേഽസ്തു തസ്മൈ ..

അനാത്മന്യഹന്താഭിമാനം നിരസ്യ സ്വരൂപപ്രകാശസ്തതഃ സർവപാപം .
ന സംസ്കൃത്യനാത്മാശ്രയം സ്യാദ്വിനഷ്ടം സ്മൃതേര്യത്പ്രകാശേ തു തസ്മൈ നമസ്തേ ..

അനാകർണ്യ വേദാന്തഭാഷ്യം സമഗ്രം ന കസ്യപി യത്സ്മൃത്യുപായോഽസ്തി കശ്ചിത് .
അതസ്തച്ചികീർഷാ സ്വതോ യസ്യ ജാതാ നമസ്തേ ദയാളുസ്വരൂപായ തസ്മൈ ..

സമസ്താഗമാന്താനിഹ വ്യാചികീർഷുഃ സ്വയം ശങ്കരാചാര്യരൂപാവതീർണഃ .
കൃതവ്യാസസൂത്രാദിഭാഷ്യോ യ ആത്മസ്വരൂപൈക്യധീദായ തസ്മൈ നമസ്തേ ..

ചതുർഭിഃ പ്രശാന്തൈഃ സ്വശിഷ്യൈര്യുതഃ സൻ ഭുവം പര്യടന്നാത്മനിഷ്ഠാഽഖിലാത്മാ .
സ്വഭാഷ്യപ്രചാരം സദാ കാരമന്യോ വിഭാത്യദ്വിതീയായ തസ്മൈ നമസ്തേ ..

വിരാട്സൂത്രമായേശതുര്യസ്വരൂപൈഃ ക്രമാത്തോടകാചാര്യനാമാദിസഞ്ജ്ഞൈഃ .
ചതുർവ്യൂഹവേഷൈഃ സ്വശിഷ്യൈര്യുതായാദ്വയായാത്മനേ തേ നമോ നിർഗുണായ ..

അജം കർമഠം വിശ്വരൂപം വിദിത്വാ തുരീയാശ്രമം ചാഥ തസ്മൈ പ്രദായ .
വ്യധാദൃശ്യശൃംഗാശ്രമേ ശാരദാർചാപരം തത്ത്വരക്ഷായ തസ്മൈ നമസ്തേ ..

യ ആചാര്യഭാഷ്യാണ്യധീത്യൈവ ഭക്ത്യാ ലഭന്തേ നിജാനന്ദമാത്മസ്വരൂപം ..
ഗുരുസ്തൈരയം വന്ദ്യ ആത്മാഽഽത്മവിദ്ഭിസ്തതഃ സർവവന്ദ്യായ തസ്മൈ നമസ്തേ ..

നമഃ ശങ്കരാചാര്യ തുഭ്യം പുരസ്താന്നമഃ പൃഷ്ഠതഃ പാർശ്വതശ്ചാധ ഊർധ്വം .
നമഃ സർവതഃ സർവരൂപായ തസ്മൈ വിശുദ്ധാത്മനേ ബ്രഹ്മണേ തേ നമസ്തേ ..

അഹം ദേഹബുദ്ധ്യാ തവൈവാസ്മി ദാസോ ഹ്യഹം ജീവബുദ്ധ്യാഽസ്മി തേംഽശൈകദേശഃ .
ത്വമേവാസ്മ്യഹം ത്വാത്മബുദ്ധ്യാ തഥാപി പ്രസീദാന്വഹം ദേഹബുദ്ധ്യാ നമസ്തേ ..

സ ഭാഷ്യാർഥ ആശു സ്ഫുരത്വന്തകാലേ ചിദാഭാസചൈതന്യദൃക്ത്വത്പ്രസാദാത് .
ഗതിർനാന്യഥാ മേ സമസ്താപരാധം ക്ഷമസ്വാഖിലാത്മന്നമസ്തേഽസ്തു നിത്യം ..

നമോ ഭാഷ്യവൃന്ദായ ഭാഷ്യോപദേഷ്ട്രേ നമോ ഭാഷ്യകൃദ്ഭ്യോ നമോ ഭാഷ്യവിദ്ഭ്യഃ .
നമോ ഭാഷ്യവൃന്ദാർഥഭൂതായ ഭൂമ്നേ വിശുദ്ധാത്മനേ ബ്രഹ്മണേഽസ്മൈ പരസ്മൈ ..

ശതോർധ്വാഷ്ടകശ്ലോകമേതദ്ഭുജംഗപ്രയാതം പഠേദ്യോഽത്ര ഭക്ത്യാ ത്വദീയം .
ചിദാഭാസചിദ്രൂപമേകം പദാബ്ജം സ്മരൻസ്വസ്വരൂപേണ നൂനം രമേത ..

ഭുജംഗപ്രയാതാർഥമത്യന്തഭക്ത്യാ സകൃദ്വാ സ്മരേത്പ്രത്യഹം ശ്രീഗുരോര്യഃ .
നിരസ്താന്ധകാരഃ സ ആനന്ദരൂപം വ്രജത്യച്യുതം ത്വാം ത്വദീയപ്രസാദാത് ..

അഹം ബ്രഹ്മ ഭൂത്വാപി നേതി ഭ്രമോഽഭൂത്തദീയസ്വരൂപാവബോധാപ്തുരാ മേ .
ഗുരോ ത്വത്പ്രസാദാദ്വിമുക്തോഽഹമസ്മി ചിതാഭാസചിദ്രൂപ ആത്മാ വിശുദ്ധഃ ..

അതോ ബുദ്ധിമാംസ്ത്വത്പ്രസാദായ നിത്യം ഭുജംഗപ്രയാതം പഠേദ്വാ തദർഥം .
സ്മരേദ്വാ ഗുരോ തേ പ്രണമ്യൈവ ഭൂയശ്ചിദാഭാസചിദ്രൂപമേകം പരം തത് ..

മുനീന്ദ്രൈഃ പുരാണൈരനുധ്യേയമീശം വിരിഞ്ചാദിഭിഃ സർവദേവൈശ്ച വന്ദ്യം .
കഥം ത്വാമഹം സ്തോതുമിച്ഛൻഭവന്തം ക്വ വാ സാധയേ നേഹ കിം കിം മഹേശേ ..

കൃപാ തേ കൃപാളോ വിമുഗ്ധം വിശുദ്ധം കരോതീഹ മൂകം ച വാചാലമീശം .
അതസ്ത്വത്കൃപാവൈഭവേനൈവമേതത്കൃതം മേ ചികീർഷാഖിലാത്മന്നമസ്തേ ..

Ramaswamy Sastry and Vighnesh Ghanapaathi