നമാമി ദേവം വിശ്വേശം വാമനം വിഷ്ണുരൂപിണം .
ബലിദർപഹരം ശാന്തം ശാശ്വതം പുരുഷോത്തമം ..

ധീരം ശൂരം മഹാദേവം ശംഖചക്രഗദാധരം .
വിശുദ്ധം ജ്ഞാനസമ്പന്നം നമാമി ഹരിമച്യുതം ..

സർവശക്തിമയം ദേവം സർവഗം സർവഭാവനം .
അനാദിമജരം നിത്യം നമാമി ഗരുഡധ്വജം ..

സുരാസുരൈർഭക്തിമദ്ഭിഃ സ്തുതോ നാരായണഃ സദാ .
പൂജിതം ച ഹൃഷീകേശം തം നമാമി ജഗദ്ഗുരും ..

ഹൃദി സങ്കല്പ്യ യദ്രൂപം ധ്യായന്തി യതയഃ സദാ .
ജ്യോതീരൂപമനൗപമ്യം നരസിംഹം നമാമ്യഹം ..

ന ജാനന്തി പരം രൂപം ബ്രഹ്മാദ്യാ ദേവതാഗണാഃ .
യസ്യാവതാരരൂപാണി സമർചന്തി നമാമി തം ..

ഏതത്സമസ്തം യേനാദൗ സൃഷ്ടം ദുഷ്ടവധാത്പുനഃ .
ത്രാതം യത്ര ജഗല്ലീനം തം നമാമി ജനാർദനം ..

ഭക്തൈരഭ്യർചിതോ യസ്തു നിത്യം ഭക്തപ്രിയോ ഹി യഃ .
തം ദേവമമലം ദിവ്യം പ്രണമാമി ജഗത്പതിം ..

ദുർലഭം ചാപി ഭക്താനാം യഃ പ്രയച്ഛതി തോഷിതഃ .
തം സർവസാക്ഷിണം വിഷ്ണും പ്രണമാമി സനാതനം ..

Ramaswamy Sastry and Vighnesh Ghanapaathi