ശ്രീബൃഹദംബാധിപതേ ബ്രഹ്മപുരോഗാഃ സുരാഃ സ്തുവന്തി ത്വാം .
വ്യുഷ്ടാ രജനീ ശയനാദുത്ഥായൈഷാമനുഗ്രഹഃ ക്രിയതാം ..

ഗോകർണനാഥ ഗൗര്യാ സഹസുതയാരുഹ്യ പാദുകേ ഹൈമേ .
മൗക്തികമണ്ടപമേഹി സ്നാതുമവഷ്ടഭ്യ മാമകം ഹസ്തം ..

തൈലൈഃ സപ്തമഹാർണവീപരിമിതൈസ്താവദ്ഭിരുഷ്ണോദകൈ -
രാജ്യക്ഷീരദധീക്ഷുചൂതരസസത്ക്ഷൗദ്രൈസ്തഥാന്യൈരപി .
സ്നാനാർഹൈരഭിഷേചയാമി ചതുരോ വേദാൻ പഠൻ ഭക്തിതഃ
സ്വാമിൻ ശ്രീബൃഹദംബികേശ കൃപയാ തത് സർവമംഗീകുരു ..

അണ്ഡഭിത്തിപരിവേഷ്ടനയോഗ്യാൻ ഹംസചിത്രിതദശാനുപവീതൈഃ .
അർപയാമി ഭവതേ ബൃഹദംബാധീശ ധത്സ്വ നവപീതപടാംസ്ത്വം ..

ഭസ്മോദ്ധൂലനപൂർവകം ശിവ ഭവദ്ദേഹം ത്രിപുണ്ഡ്രൈരലം-
കൃത്യാദാവനു ചന്ദനൈർമലയജൈഃ കർപൂരസംവാസിതൈഃ .
സർവാംഗം തവ ഭൂഷയാമി തിലകേനാലീകമപ്യാദരാത്
പശ്യാത്മാനമനേകമന്മഥസമച്ഛായം സ്വമാദർശഗം ..

യാവന്തസ്ത്രിജഗത്സു രത്നനികരാ യാവദ്ധിരണ്യം ച തൈ-
സ്തേനാപീശ തവാംഗകേഷു രചയാമ്യാപാദകേശം ഹൃദാ .
യോഗ്യം ഭൂഷണജാതമദ്യ ബൃഹദംബേശ ത്വയാഥാംബികാ-
പുത്രേണ പ്രതിഗൃഹ്യതാം മയി കൃപാദൃഷ്ടിശ്ച വിസ്താര്യതാം ..

നന്ദനചൈത്രരഥാദിഷു ദേവോദ്യാനേഷു യാനി പുഷ്പാണി .
തൈർഭൂഷയാമി നാഗാഭരണ ബൃഹന്നായികേശ തേ ഗാത്രം ..

കോടികോടിഗുണിതൈഃ ശിവ ബില്വൈഃ കോമലൈർവകുലവൃക്ഷവനേശ .
സ്വർണപുഷ്പസഹിതൈഃ ശ്രുതിഭിസ്ത്വാം പൂജയാമി പദയോഃ പ്രതിമന്ത്രം ..

ഗുഗ്ഗുളുഭാരസഹസ്രൈർബാഡവവഹ്നൗ പ്രധൂപിതോ ധൂപഃ .
ചകുലവനേശ സ്വാമിന്നഗരുസമേതസ്തവാസ്തു മോദായ ..

ബിസതന്തുവർതിവിഹിതാഃ സഗോഘൃതാഃ ശതകോടികോടിഗണനോപരി സ്ഥിതാഃ
പ്രഭയാധരീകൃതരവീന്ദുപാവകാ വകുലാടവീശ തവ സന്തു ദീപികാഃ ..

ശാല്യന്നം കനകാഭസൂപസഹിതം സദ്യോഘൃതൈരന്വിതം
സോഷ്ണം ഹാടകഭാജനസ്ഥമചലസ്പർധാലു സവ്യഞ്ജനം .
ഗോകർണേശ്വര ഗൃഹ്യതാം കരുണയാ സച്ഛർകരാന്നം തഥാ
മുദ്ഗാന്നം കൃസരാന്നമപ്യതിസുധം പാനീയമപ്യന്തരാ ..

കൃസരമനോഹരലഡ്ഡുകമോദകശഷ്കുല്യപൂപവടകാദീൻ .
സപ്തസമുദ്രമിതാൻ ശ്രീവകുലവനാധീശ ഭുങ്ക്ഷ്വ ഭക്ഷ്യാംസ്ത്വം ..

ക്ഷോണീസംസ്ഥൈഃ സമസ്തൈഃ പനസഫലബൃഹന്നാലികേരാമ്രരംഭാ-
ദ്രാക്ഷാഖർജൂരജംബൂബദരഫലലസന്മാതുലംഗൈഃ കപിത്യൈഃ .
നാരംഗൈരിക്ഷുഖണ്ഡൈരപി നിജജഠരം പൂര്യതാം മാമകം ചാ-
ഭീഷ്ടം ഗോകർണസഞ്ജ്ഞസ്ഥലനിലയ മഹാദേവ സർവജ്ഞ ശംഭോ ..

ക്ഷീരാംഭോധിഗതം പയസ്തദുചിതേ പാത്രേ സമര്യോപരി
പ്രക്ഷിപ്യാർജുനശർകരാശ്ചണകഗോധൂമാൻ സഹൈലാനപി .
പക്കം പായസസഞ്ജ്ഞമദ്ഭുതതമം മധ്വാജ്യസമ്മ്മിശ്രിതം
ഭക്ത്യാഹം വിതരാമി തേന ബൃഹദമ്വേശാതിസന്തുപ്യതാം ..

മല്ലീപുഷ്പസമാനകാന്തിമൃദുലാനന്നാചലാനംബുധൗ
ദഘ്നസ്തദ്വദമർത്യധേനുദധിജാൻ ഹൈയംഗവീനാചലാൻ .
ക്ഷിപ്ത്വാ ശ്രീബൃഹദംബികേശ ലവണൈഃ കിഞ്ചിത് സമേതം മയാ
ദാസ്യാമോഽപിചുമന്ദചൂർണസഹിതം ദധ്യോദനം ഭുജ്യതാം ..

അർഘ്യാം ചാചമനീയം പാനീയം ക്ഷാലനീയമപ്യംബു .
സ്വാമിൻ വകുലവനേശ സ്വഃസരിദദ്ഭിഃ സുധാഭിരപി ദദ്യാം ..

ഹർമ്യേ രത്നപരിഷ്കൃതേ മരതകസ്തംഭായുതാലങ്കൃതേ
ദീപ്യദ്ധേമഘടൈരലങ്കൃതശിരസ്യാലംബിമുക്താസരേ .
ദിവ്യൈരാസ്തരണൈർവിഭൂഷിതമഹാമഞ്ചേഽഭിതോ വാസിതേ
സാകം ശ്രീബൃഹൃദംബയാ സകുതുകം സംവിശ്യ വിശ്രമ്യതാം ..

പഞ്ചാക്ഷരേണ മനുനാ പഞ്ചമഹാപാപഭഞ്ജനപ്രഭുണാ .
പഞ്ചപരാർധ്യൈർബില്വൈർദക്ഷിണഗോകർണനായകാർചാമി ..

ഏലാക്രമുകകർപൂരജാതികാജാതിപത്രിഭിഃ .
താംബൂലം ചൂർണസംയുക്തം ഗോകർണേശ്വര ഗൃഹ്യതാം ..

ബൃഹദംബാപതേ ഹേമപാത്രയിത്വാ മഹീതലം .
കർപൂരയിത്വാ ഹേമാദ്രിം തവ നീരാജയാമ്യഹം ..

ഛത്രം തേ ശശിമണ്ഡലേന രചയാമ്യാകാശഗംഗാഝരൈഃ
ശ്വേതം ചാമരമഷ്ടദിക്കരിഘടാകർണാനിലൈർബീജനം .
ആദർശം രവിമണ്ഡലേന ജലദാരാവേണ ഭേരീരവം
ഗന്ധർവാപ്സരസാം ഗണൈർവകുലഭൂവാസേശ തൗര്യത്രികം ..

കല്യാണാചലവർചസോ രഥവരാൻ കാർതസ്വരാലങ്കൃതാൻ
കൈലാസാദ്രിനിഭാനിഭാനതിമരുദ്വേഗാംസ്തുരംഗാനപി .
കാമാഭീപ്സിതരൂപപൗരുഷജുഷഃ സംഖ്യാവിഹീനാൻ ഭടാ-
നാലോക്യാംബികയോരരീകുരു ബൃഹന്മാതുഃ പ്രിയേശാദരാത് ..

കാശ്മീരചോലദേശാനപി നിജവിഭവൈർവിനിന്ദതഃ ശശ്വത് .
സന്തതഫലദാൻ ദേശാൻ ശ്രീബൃഹദംബേശ ചിത്തജാൻ പ്രദദേ ..

സ്വർഗം ഭർത്സയതോ നിമീലിതദൃശഃ സത്യം ഹ്രിയാലോകിതും
വൈകുണ്ഠം ഹസതഃ കചാകചിജുഷഃ കൈലാസധാമ്നാ തവ .
അത്യാശ്ചര്യയുതാൻ ഗൃഹാനഭിമതാനുത്പാദ്യ ബുദ്ധയാ സ്വയാ
ഭക്ത്യാഹം വിതരാമി ദേവ വകുലാരണ്യാശ്രയാംഗീകുരു ..

വിശ്വസ്യാന്തർബഹിരപി വിഭോ വർതസേ തേന തേ സ്തഃ
തത് ത്വാം നന്തും ക്രമിതുമഭിതോഽസംഭവാന്നാസ്മി ശക്തഃ .
ഭക്താധീനസ്ത്വമസി ബകുലാടവ്യധീശോപചാരാൻ
സർവാൻ കുർവേ പ്രണമനമുഖാനാശയേനാനിശം തേ ..

ശ്രീമന്മംഗലതീർഥപശ്ചിമതടപ്രാസാദഭദ്രാസനാ-
ജസ്രാവാസകൃതാന്തരംഗമഹനീയാംഗേന്ദുഗംഗാധര .
സ്തോത്രം തേ കലയാമി ശശ്വദഖിലാമ്നായൈഃ സഹാംഗൈഃ പുനഃ
സർവൈശ്ചോപനിഷത്പുരാണകവിതാഗുംഭൈർഭവച്ഛംസിഭിഃ ..

സകലത്രപുത്രപൗത്രം സഹപരിവാരം സഹോപകരണം ച .
ആത്മാനമർപയാമി ശ്രീബൃഹദംബേശ പാഹി മാം കൃപയാ ..

കായകൃതം വചനകൃതം ഹൃദയകൃതം ചാപി മാമകം മന്തും .
പരിഹൃത്യ മാമജസ്രം ത്വയി കൃതഭാരം മഹേശ പരിപാഹി ..

Ramaswamy Sastry and Vighnesh Ghanapaathi