ബ്രഹ്മോവാച . അഥ വൃത്തേ വിവാഹേ തു ഭവസ്യാമിതതേജസഃ .

പ്രഹർഷമതുലം ഗത്വാ ദേവാഃ ശക്രപുരോഗമാഃ .

തുഷ്ടുവുർവാഗ്ഭിരാദ്യാഭിഃ പ്രണേമുസ്തേ മഹേശ്വരം ..

ദേവാ ഊചുഃ . നമഃ പർവതലിംഗായ പർവതേശായ വൈ നമഃ .

നമഃ പവനവേഗായ വിരൂപായാജിതായ ച .

നമഃ ക്ലേശവിനാശായ ദാത്രേ ച ശുഭസമ്പദാം ..

നമോ നീലശിഖണ്ഡായ അംബികാപതയേ നമഃ .

നമഃ പവനരൂപായ ശതരൂപായ വൈ നമഃ ..

നമോ ഭൈരവരൂപായ വിരൂപനയനായ ച .

നമഃ സഹസ്രനേത്രായ സഹസ്രചരണായ ച ..

നമോ ദേവവയസ്യായ വേദാംഗായ നമോ നമഃ .

വിഷ്ടംഭനായ ശക്രസ്യ ബാഹ്വോർവേദാങ്കുരായ ച ..

ചരാചരാധിപതയേ ശമനായ നമോ നമഃ .

സലിലാശയലിംഗായ യുഗാന്തായ നമോ നമഃ ..

നമഃ കപാലമാലായ കപാലസൂത്രധാരിണേ .

നമഃ കപാലഹസ്തായ ദണ്ഡിനേ ഗദിനേ നമഃ ..

നമസ്ത്രൈലോക്യനാഥായ പശുലോകരതായ ച .

നമഃ ഖട്വാംഗഹസ്തായ പ്രമഥാർതിഹരായ ച ..

നമോ യജ്ഞശിരോഹന്ത്രേ കൃഷ്ണകേശാപഹാരിണേ .

ഭഗനേത്രനിപാതായ പൂഷ്ണോ ദന്തഹരായ ച ..

നമഃ പിനാകശൂലാസിഖഡ്ഗമുദ്ഗരധാരിണേ .

നമോഽസ്തു കാലകാലായ തൃതീയനയനായ ച ..

അന്തകാന്തകൃതേ ചൈവ നമഃ പർവതവാസിനേ .

സുവർണരേതസേ ചൈവ നമഃ കുണ്ഡലധാരിണേ ..

ദൈത്യാനാം യോഗനാശായ യോഗിനാം ഗുരവേ നമഃ .

ശശാങ്കാദിത്യനേത്രായ ലലാടനയനായ ച ..

നമഃ ശ്മശാനരതയേ ശ്മശാനവരദായ ച .

നമോ ദൈവതനാഥായ ത്ര്യംബകായ നമോ നമഃ ..

ഗൃഹസ്ഥസാധവേ നിത്യം ജടിലേ ബ്രഹ്മചാരിണേ .

നമോ മുണ്ഡാർധമുണ്ഡായ പശൂനാം പതയേ നമഃ ..

സലിലേ തപ്യമാനായ യോഗൈശ്വര്യപ്രദായ ച .

നമഃ ശാന്തായ ദാന്തായ പ്രലയോത്പത്തികാരിണേ ..

നമോഽനുഗ്രഹകർത്രേ ച സ്ഥിതികർത്രേ നമോ നമഃ .

നമോ രുദ്രായ വസവ ആദിത്യായാശ്വിനേ നമഃ ..

നമഃ പിത്രേഽഥ സാംഖ്യായ വിശ്വേദേവായ വൈ നമഃ .

നമഃ ശർവായ ഉഗ്രായ ശിവായ വരദായ ച ..

നമോ ഭീമായ സേനാന്യേ പശൂനാം പതയേ നമഃ .

ശുചയേ വൈരിഹാനായ സദ്യോജാതായ വൈ നമഃ ..

മഹാദേവായ ചിത്രായ വിചിത്രായ ച വൈ നമഃ .

പ്രധാനായാപ്രമേയായ കാര്യായ കാരണായ ച ..

പുരുഷായ നമസ്തേഽസ്തു പുരുഷേച്ഛാകരായ ച .

നമഃ പുരുഷസംയോഗപ്രധാനഗുണകാരിണേ ..

പ്രവർതകായ പ്രകൃതേഃ പുരുഷസ്യ ച സർവശഃ .

കൃതാകൃതസ്യ സത്കർത്രേ ഫലസംയോഗദായ ച ..

കാലജ്ഞായ ച സർവേഷാം നമോ നിയമകാരിണേ .

നമോ വൈഷമ്യകർത്രേ ച ഗുണാനാം വൃത്തിദായ ച ..

നമസ്തേ ദേവദേവേശ നമസ്തേ ഭൂതഭാവന .

ശിവ സൗമ്യമുഖോ ദ്രഷ്ടും ഭവ സൗമ്യോ ഹി നഃ പ്രഭോ ..

ബ്രഹ്മോവാച . ഏവം സ ഭഗവാൻ ദേവോ ജഗത്പതിരുമാപതിഃ .

സ്തൂയമാനഃ സുരൈഃ സർവൈരമരാനിദമബ്രവീത് ..

ശ്രീശങ്കര ഉവാച .

ദ്രഷ്ടും സുഖശ്ച സൗമ്യശ്ച ദേവാനാമസ്മി ഭോഃ സുരാഃ .

വരം വരയത ക്ഷിപ്രം ദാതാസ്മി തമസംശയം ..

ബ്രഹ്മോവാച .

തതസ്തേ പ്രണതാഃ സർവേ സുരാ ഊചുസ്ത്രിലോചനം ..

ദേവാ ഊചുഃ .

തവൈവ ഭഗവൻ ഹസ്തേ വര ഏഷോഽവതിഷ്ഠതാം .

യദാ കാര്യം തദാ നസ്ത്വം ദാസ്യസേ വരമീപ്സിതം ..

ബ്രഹ്മോവാച .

ഏവമസ്ത്വിതി താൻ ഉക്ത്വാ വിസൃജ്യ ച സുരാൻ ഹരഃ .

ലോകാംശ്ച പ്രമഥൈഃ സാർധം വിവേശ ഭവനം സ്വകം ..

യസ്തു ഹരോത്സവമദ്ഭുതമേനം .

ഗായതി ദൈവതവിപ്രസമക്ഷം .

സോഽപ്രതിരൂപഗണേശസമാനോ .

ദേഹവിപര്യയമേത്യ സുഖീ സ്യാത് .

Ramaswamy Sastry and Vighnesh Ghanapaathi