അഞ്ജനാഗർഭജാതായ ലങ്കാകാനനവഹ്നയേ |
കപിശ്രേഷ്ഠായ ദേവായ വായുപുത്രായ മംഗളം |
ജാനകീശോകനാശായ ജനാനന്ദപ്രദായിനേ |
അമൃത്യവേ സുരേശായ രാമേഷ്ടായ സുമംഗളം |
മഹാവീരായ വേദാംഗപാരഗായ മഹൗജസേ |
മോക്ഷദാത്രേ യതീശായ ഹ്യാഞ്ജനേയായ മംഗളം |
സത്യസന്ധായ ശാന്തായ ദിവാകരസമത്വിഷേ |
മായാതീതായ മാന്യായ മനോവേഗായ മംഗളം |
ശരണാഗതസുസ്നിഗ്ധചേതസേ കർമ്മസാക്ഷിണേ |
ഭക്തിമച്ചിത്തവാസായ വജ്രകായായ മംഗളം |
അസ്വപ്നവൃന്ദവന്ദ്യായ ദുഃസ്വപ്നാദിഹരായ ച |
ജിതസർവാരയേ തുഭ്യം രാമദൂതായ മംഗളം |
അക്ഷഹന്ത്രേ ജഗദ്ധർത്രേ സുഗ്രീവാദിയുതായ ച |
വിശ്വാത്മനേ നിധീശായ രാമഭക്തായ മംഗളം |
ലംഘിതാംഭോധയേ തുഭ്യമുഗ്രരൂപായ ധീമതേ |
സതാമിഷ്ടായ സൗമ്യായ പിംഗലാക്ഷായ മംഗളം |
പുണ്യശ്ലോകായ സിദ്ധായ വ്യക്താവ്യക്തസ്വരൂപിണേ |
ജഗന്നാഥായ ധന്യായ വാഗധീശായ മംഗളം |
മംഗലാശാസനസ്തോത്രം യഃ പഠേത് പ്രത്യഹം മുദാ |
ഹനൂമദ്ഭക്തിമാപ്നോതി മുക്തിം പ്രാപ്നോത്യസംശയം |

Ramaswamy Sastry and Vighnesh Ghanapaathi