തവാസ്യാരാദ്ധാരഃ കതി മുനിവരാഃ കത്യപി സുരാഃ
തപസ്യാ സന്നാഹൈഃ സുചിരമമനോവാക്പഥചരൈഃ.
അമീഷാം കേഷാമപ്യസുലഭമമുഷ്മൈ പദമദാഃ
കുളീരായോദാരം ശിവ തവ ദയാ സാ ബലവതീ.
അകർതും കർതും വാ ഭുവനമഖിലം യേ കില ഭവ-
ന്ത്യലം തേ പാദാന്തേ പുരഹര വലന്തേ തവ സുരാഃ.
കുടീരം കോടീരേ ത്വമഹഹ കുളീരായ കൃതവാൻ
ഭവാൻ വിശ്വസ്യേഷ്ടേ തവ പുനരധീഷ്ടേ ഹി കരുണാ.
തവാരൂഢോ മൗലിം തദനധിഗമവ്രീലനമിതാം
ചതുർവക്ത്രീം യസ്ത്വച്ചരണസവിധേ പശ്യതി വിധേഃ.
കുളീരസ്യാസ്യായം കുലിശഭൃദലക്ഷ്യ- ശ്ശിവഭവ-
ദ്ദയാ സേയം ത്വാമപ്യധരിതവതീ കിം ന കുരൂതാം.
ശ്രുതിസ്മൃത്യഭ്യാസോ നയനിചയഭൂയഃ പരിചയഃ
തഥാ തത്തത്കർമവ്യസനമപി ശുഷ്കശ്രമകൃതേ.
ത്വയി സ്വാന്തം ലഗ്നം ന യദി യദി ലഗ്നം തദിയതാ
ജിതാ കൈവല്യശ്രീഃ പുരഹര കുളീരോഽത്ര ഗമകഃ.
തപോഭിഃ പ്രാഗ്ജന്മപ്രകരപരിനമ്രൈഃ പുരരിപോ
തനൗ യസ്യാം കസ്യാമപി സ ഹി ഭവാർതിപ്രതിഭടഃ.
ത്വയി സ്യാദ്ധീബന്ധസ്തനുരചരമാ സൈവ ചരമാ
കുളീരോ ബ്രൂതേ തന്മഹിമപഥ- വിദ്വദ്ഗുരുനയം.
ധിയോ ധാനം നാമ ത്വയി ശിവ ചിദാനന്ദ പരമോ-
ന്മിഷത്സാമ്രാജ്യശ്രീകുരല- രഭസാകർഷകുതുകം.
കുളീരേണ ജ്ഞാതം കഥമനധിഗമ്യം ദിവിഷദാം
ദയാ തേ സ്വച്ഛന്ദാ പ്രഥയതി ന കസ്മൈ കിമഥവാ.
തദുച്ചത്വം നൈച്യം ത്വിതരദിതി ലോകാഃ ശിവ മുധാ
വ്യവസ്ഥാമസ്ഥാനേ വിദധതി ച നന്ദന്തി ച മിഥഃ.
കുളീരസ്ത്വന്മൗലിസ്ഥിതി- മസുലഭാമേത്യ സ ഭവത്-
കൃപാമുച്ചത്വം തദ്വിരഹമപി നൈച്യം പ്രഥയതി.
കുളീരേശാഖ്യാതിർഗിരിശ- കൃപയോച്ചൈരുപഹൃതാ
തവേയം ഭക്തായോന്നതിവിതരണ ശ്രീഗമനികാ.
ഭവദ്ഭക്ത്യുന്മീലത്ഫല- ഗരിമടീകാസ്ഥിതിജുഷാ
കുളീരസ്യ ഖ്യാത്യാ ജഗതി സഹചര്യാ വിഹരതേ.
കുളീരേശസ്തോത്രം ത്വദനുപധികാനുഗ്രഹഭവം
പഠേയുര്യേ നിത്യം ശ്രൃണുയുരപി വാ യേ പുനരിദം.
പ്രസാദാത്തേ തേഽമീ വിധുത ദുരിതാസ്ത്വയ്യഭിരതാഃ
ഭവേയുർനിര്യത്നാധിഗത- സകലാഭീപ്സിതഫലാഃ.
കർകടകചന്ദ്രയോഗഃ കർകടകേശാന മൂർധ്നി തേ ദൃഷ്ടഃ.
കാരയ വൃഷ്ടിമമോഘാം വാരയ വർഷോപരോധദുര്യോഗം.