பார்வத்யுவாச -
மஹாதேவமஹானந்தகருணாம்ருʼதஸாகர .
ஶ்ருதமுத்தமமாக்யானம்ʼ மஹாகாலகணஸ்ய ச ..

கிம்ʼ வான்யத் ப்ரீதிஜனகம்ʼ க்ஷேத்ரமஸ்தி மஹேஶ்வர .
க்ஷேத்ராணாம்ʼ த்வம்ʼ பதி꞉ ஶம்போ விஶிஷ்டம்ʼ வக்துமர்ஹஸி ..

ஈஶ்வர உவாச -
க்ஷேத்ரமஸ்த்யேகமுத்க்ருʼஷ்டமுத்புல்லகமலானனே .
ஓங்காரம்ʼ நாம விமலம்ʼ கலிகல்மஷநாஶனம் ..

தத்ர ஶைவவரா நித்யம்ʼ நிவஸந்தி ஸஹஸ்ரஶ꞉ .
தே ஸர்வே மம லிங்கார்சாம்ʼ குர்வந்த்யேவ ப்ரதிக்ஷணம் ..

பாஸிதாபாஸிதைர்நித்யம்ʼ ஶாந்தா தாந்தா ஜிதேந்த்ரியா꞉ .
ருத்ராக்ஷவரபூஷாட்யா பாலாக்ஷான்யஸ்தமானஸா꞉ ..

தத்ராஸ்தி ஸரிதாம்ʼ ஶ்ரேஷ்டா லிங்கஸங்கதரங்கிதா .
நர்மதா ஶர்மதா நித்யம்ʼ ஸ்னானாத்பானாவகாஹனாத் ..

பாபௌகஸங்கபங்காட்யா வாதபோதஸுஶீதலா .
தத்ராஸ்தி குண்டமுத்க்ருʼஷ்டமோங்காராக்யம்ʼ ஶுசிஸ்மிதே ..

தத்குண்டதர்ஶநாதேவ மல்லோகே நிவஸேச்சிரம் .
தத்குண்டோதகபானேன ஹ்ருʼதி லிங்கம்ʼ ப்ரஜாயதே ..

பாவா꞉ பிபந்தி தத்குண்டஜலம்ʼ ஶீதம்ʼ விமுக்தயே .
த்ருʼப்திம்ʼ ப்ரயாந்தி பிதர꞉ தத்குண்டஜலதர்பிதா꞉ ..

ஸதா தத்குண்டரக்ஷார்தம்ʼ கணா꞉ ஸம்ʼஸ்தாபிதா மயா .
குண்டதாரப்ரப்ருʼதய꞉ ஶூலமுத்கரபாணய꞉ ..

கஜேந்த்ரசர்மவஸனா ம்ருʼகேந்த்ரஸமவிக்ரமா꞉ .
ஹரீந்த்ரானபி தே ஹன்யுர்கிரீந்த்ரஸமவிக்ரஹாஹ ..

தனு꞉ஶரகரா꞉ ஸர்வே ஜடாஶோபிதமஸ்தகா꞉ .
அக்நிரித்யாதிபிர்மந்த்ரைர்பஸ்மோத்தூலிதவிக்ரஹா ..

ஸங்க்ராமமுகரா꞉ ஸர்வே கணா மேதுரவிக்ரஹா꞉ .
கதாசிதனனுஜ்ஞாப்த தான் கணான் மததர்பித꞉ ..

அப்ஸரோபி꞉ பரிவ்ருʼதோ மருதாம்ʼ பதிருத்தத꞉ .
ஆருஹ்யாப்ரமுநாதம்ʼ தம்ʼ க்ரீடிதும்ʼ நர்மதாஜலே ..

ஸமாஜகாம த்வரித꞉ ஶச்யா ஸாகம்ʼ ஶிவே ததா .
ததா தம்ʼ கணபா꞉ க்ருத்தா꞉ ஸர்வே தே ஹ்யதிமன்யவ꞉ ..

ஸகஜம்ʼ பாதயன்னப்தௌ ஶச்யா ஸாகம்ʼ ஸுரேஶ்வரம் .
ஸுராம்ʼஸ்ததா ஸவருணான் பிபிது꞉ பவனானலான் ..

நிஸ்த்ரிம்ʼஶவரதாராபி꞉ ஸுதீக்ஷ்ணாக்ரை꞉ ஶிலீமுகை꞉ .
முத்கரைர்பிபிதுஶ்சான்யே ஸவாஹாயுதபூஷணான் ..

விவாஹனாம்ʼஸ்ததா தேவான் ஸ்ரவத்ரக்தான் ஸ்கலத்பதான் .
காந்திஶீகான் முக்தகேஶான் க்ஷணாச்சக்ருர்கணேஶ்வரா꞉ ..

அப்ஸராஸ்தா விகன்னரா꞉ ருதந்த்யோ முக்தமூர்தஜா꞉ .
ஹாஹா பதேதி க்ரந்தந்த்ய꞉ ஸ்ரவத்ரக்தார்த்ரவாஸஸ꞉ ..

ததா தேவகணா꞉ ஸர்வே ஶக்ராத்யா பயகம்பிதா꞉ .
ஓங்காரம்ʼ தத்ர தல்லிங்கம்ʼ ஶரணம்ʼ ஜக்முரீஶ்வரம் ..

Ramaswamy Sastry and Vighnesh Ghanapaathi