ऐन्द्रस्येव शरासनस्य दधती मध्ये ललाटं प्रभां
शौक्लीं कान्तिमनुष्णगोरिव शिरस्यातन्वती सर्वतः ।
एषाऽसौ त्रिपुरा हृदि द्युतिरिवोष्णांशोः सदाहःस्थिता
छिन्द्यान्नः सहसा पदैस्त्रिभिरघं ज्योतिर्मयी वाङ्मयी ॥

या मात्रा त्रपुसीलतातनुलसत्तन्तूत्थितिस्पर्द्धिनी
वाग्बीजे प्रथमे स्थिता तव सदा तां मन्महे ते वयम् ।
शक्तिः कुण्डलिनीति विश्वजननव्यापारबद्धोद्यमा
ज्ञात्वेत्थं न पुनः स्पृशन्ति जननीगर्भेऽर्भकत्वं नराः ॥

दृष्ट्वा सम्भ्रमकारि वस्तु सहसा ऐ ऐ इति व्याहृतं
येनाकूतवशादपीह वरदे बिन्दुं विनाऽप्यक्षरम् ।
तस्यापि ध्रुवमेव देवि तरसा जाते तवाऽनुग्रहे
वाचः सूक्तिसुधारसद्रवमुचो निर्यान्ति वक्त्राम्बुजात् ॥

यन्नित्ये तव कामराजमपरं मन्त्राक्षरं निष्कलं
तत् सारस्वतमित्यवैति विरलः कश्चिद् बुधश्चेद् भुवि ।
आख्यानं प्रतिपर्व सत्यतपसो यत्कीर्तयन्तो द्विजाः
प्रारम्भे प्रणवास्पदं प्रणयितां नीत्वोच्चरन्ति स्फुटम् ॥

यत्सद्यो वचसां प्रवृत्तिकरणे दृष्टप्रभावं बुधै-
स्तार्तीयीकमहं नमामि मनसा तद्बीजमिन्दुप्रभम् ।
अस्त्वौर्वोऽपि सरस्वतीमनुगतो जाड्याम्बुविच्छित्तये
गौःशब्दो गिरि वर्तते स नियतं योगं विना सिद्धिदः ॥

एकैकं तव देवि बीजमनघं सव्यञ्जनाव्यञ्जनं
कूटस्थं यदि वा पृथक्क्रमगतं यद्वा स्थितं व्युत्क्रमात् ।
यं यं काममपेक्ष्य येन विधिना केनापि वा चिन्तितं
जप्तं वा सफलीकरोति तरसा तं तं समस्तं नृणाम् ॥

वामे पुस्तकधारिणीमभयदां साक्षस्रजं दक्षिणे
भक्तेभ्यो वरदानपेशलकरां कर्पूरकुन्दोज्ज्वलाम् ।
उज्जृम्भाम्बुजपत्रकान्तनयनस्निग्धप्रभालोकिनीं
ये त्वामम्ब न शीलयन्ति मनसा तेषां कवित्वं कुतः ॥

ये त्वां पाण्डुरपुण्डरीकपटलस्पष्टाभिरामप्रभां
सिञ्चन्तीममृतद्रवैरिव शिरो ध्यायन्ति मूर्ध्नि स्थिताम् ।
अश्रान्तं विकटस्फुटाक्षरपदा निर्याति वक्त्राम्बुजात्
तेषां भारति भारती सुरसरित्कल्लोललोलोर्म्मिभिः ॥

ये सिन्दूरपरागपुञ्जपिहितां त्वत्तेजसा द्यामिमा-
मुर्वी चापि विलीनयावकरसप्रस्तारमग्नामिव ।
पश्यन्ति क्षणमप्यनन्यमनसस्तेषामनङ्गज्वर-
क्लान्तास्त्रस्तकुरङ्गशावकदृशो वश्या भवन्ति स्त्रियः ॥

चञ्चत्काञ्चनकुण्डलाङ्गदधरामाबद्धकाञ्चीस्रजं
ये त्वां चेतसि तद्गते क्षणमपि ध्यायन्ति कृत्वा स्थिरम् ।
तेषां वेश्मनि विभ्रमादहरहः स्फारी भवन्त्यश्चिराद्
माद्यत्कुञ्जरकर्णतालतरलाः स्थैर्यं भजन्ते श्रियः ॥

आर्भट्या शशिखण्डमण्डितजटाजूटां नृमुण्डस्रजं
बन्धूकप्रसवारुणाम्बरधरां प्रेतासनाध्यासिनीम् ।
त्वां ध्यायन्ति चतुर्भुजां त्रिनयनामापीनतुङ्गस्तनीं
मध्ये निम्नवलित्रयाङ्किततनुं त्वद्रूपसम्पत्तये ॥

जातोऽप्यल्पपरिच्छदे क्षितिभृतां सामान्यमात्रे कुले
निःशेषावनिचक्रवर्तिपदवीं लब्ध्वा प्रतापोन्नतः ।
यद्विद्याधरवृन्दवन्दितपदः श्रीवत्सराजोऽभवद्
देवि त्वच्चरणाम्बुजप्रणतिजः सोऽयं प्रसादोदयः ॥

चण्डि त्वच्चरणाम्बुजार्चनकृते बिल्वीदलोल्लुण्टन-
त्रुट्यत्कण्टककोटिभिः परिचयं येषां न जग्मुः कराः ।
ते दण्डाङ्कुशचक्रचापकुलिशश्रीवत्समत्स्याङ्कितै-
र्जायन्तेपृथिवीभुजः कथमिवाम्भोजप्रभैः पाणिभिः ॥

विप्राः क्षोणिभुजो विशस्तदितरे क्षीराज्यमध्वैक्षवै
स्त्वां देवि त्रिपुरे परापरकलां सन्तर्प्य पूजाविधौ ।
यां यां प्रार्थयते मनः स्थिरधियां तेषां त एव ध्रुवं
तां तां सिद्धिमवाप्नुवन्ति तरसा विघ्नैरविघ्नीकृता ॥

शब्दानां जननी त्वमत्र भुवने वाग्वादिनीत्युच्यसे
त्वत्तः केशववासवप्रभृतयोऽप्याविर्भवन्ति ध्रुवम् ।
लीयन्ते खलु यत्र कल्पविरतौ ब्रह्मादयस्तेऽप्यमी
सा त्वं काचिदचिन्त्यरूपमहिमा शक्तिः परा गीयसे ॥

देवानां त्रितयं त्रयी हुतभुजां शक्तित्रयं त्रिस्वरा
स्त्रैलोक्यं त्रिपदी त्रिपुष्करमथ त्रिब्रह्म वर्णास्त्रयः ।
यत्किञ्चिज्जगति त्रिधा नियमितं वस्तु त्रिवर्गादिकं
तत्सर्वं त्रिपुरेति नाम भगवत्यन्वेति ते तत्त्वतः ॥

लक्ष्मीं राजकुले जयां रणमुखे क्षेमङ्करीमध्वनि
क्रव्यादद्विपसर्पभाजि शबरीं कान्तारदुर्गे गिरौ ।
भूतप्रेतपिशाचजृम्भकभये स्मृत्वा महाभैरवीं
व्यामोहे त्रिपुरां तरन्ति विपदस्तारां च तोयप्लवे ॥

माया कुण्डलिनी क्रिया मधुमती काली कलामालिनी
मातङ्गी विजया जया भगवती देवी शिवा शाम्भवी ।
शक्तिः शङ्करवल्लभा त्रिनयना वाग्वादिनी भैरवी
ह्रीङ्कारी त्रिपुरा परापरमयी माता कुमारीत्यसि ॥

आ ई पल्लवितैः परस्परयुतैर्द्वित्रिक्रमाद्यक्षरैः
काद्यैः क्षान्तगतैः स्वरादिभिरथ क्षान्तैश्च तैः सस्वरैः ।
नामानि त्रिपुरे भवन्ति खलु यान्यत्यन्तगुह्यानि ते
तेभ्यो भैरवपत्नि विंशतिसहस्रेभ्यः परेभ्यो नमः ॥

बोद्धव्या निपुणं बुधैस्तुतिरियं कृत्वा मनस्तद्गतं
भारत्यास्त्रिपुरेत्यनन्यमनसो यत्राद्यवृत्ते स्फुटम् ।
एकद्वित्रिपदक्रमेण कथितस्तत्पादसङ्ख्याक्षरै-
र्मन्त्रोद्धारविधिर्विशेषसहितः सत्संप्रदायान्वितः ॥

सावद्यं निरवद्यमस्तु यदि वा किंवाऽनया चिन्तया
नूनं स्तोत्रमिदं पठिष्यति जनो यस्यास्ति भक्तिस्त्वयि ।
सञ्चिन्त्यापि लघुत्वमात्मनि दृढं सञ्जायमानं हठात्
त्वद्भक्त्या मुखरीकृतेन रचितं यस्मान्मयापि ध्रुवम् ॥

aindrasyeva sharaasanasya dadhatee madhye lalaat'am' prabhaam'
shaukleem' kaantimanushnagoriva shirasyaatanvatee sarvatah' .
eshaa'sau tripuraa hri'di dyutirivoshnaam'shoh' sadaahah'sthitaa
chhindyaannah' sahasaa padaistribhiragham' jyotirmayee vaangmayee ..

yaa maatraa trapuseelataatanulasattantootthitisparddhinee
vaagbeeje prathame sthitaa tava sadaa taam' manmahe te vayam .
shaktih' kund'alineeti vishvajananavyaapaarabaddhodyamaa
jnyaatvettham' na punah' spri'shanti jananeegarbhe'rbhakatvam' naraah' ..

dri'sht'vaa sambhramakaari vastu sahasaa ai ai iti vyaahri'tam'
yenaakootavashaadapeeha varade bindum' vinaa'pyaksharam .
tasyaapi dhruvameva devi tarasaa jaate tavaa'nugrahe
vaachah' sooktisudhaarasadravamucho niryaanti vaktraambujaat ..

yannitye tava kaamaraajamaparam' mantraaksharam' nishkalam'
tat saarasvatamityavaiti viralah' kashchid budhashched bhuvi .
aakhyaanam' pratiparva satyatapaso yatkeertayanto dvijaah'
praarambhe pranavaaspadam' pranayitaam' neetvochcharanti sphut'am ..

yatsadyo vachasaam' pravri'ttikarane dri'sht'aprabhaavam' budhai-
staarteeyeekamaham' namaami manasaa tadbeejaminduprabham .
astvaurvo'pi sarasvateemanugato jaad'yaambuvichchhittaye
gauh'shabdo giri vartate sa niyatam' yogam' vinaa siddhidah' ..

ekaikam' tava devi beejamanagham' savyanjanaavyanjanam'
koot'astham' yadi vaa pri'thakkramagatam' yadvaa sthitam' vyutkramaat .
yam' yam' kaamamapekshya yena vidhinaa kenaapi vaa chintitam'
japtam' vaa saphaleekaroti tarasaa tam' tam' samastam' nri'naam ..

vaame pustakadhaarineemabhayadaam' saakshasrajam' dakshine
bhaktebhyo varadaanapeshalakaraam' karpoorakundojjvalaam .
ujjri'mbhaambujapatrakaantanayanasnigdhaprabhaalokineem'
ye tvaamamba na sheelayanti manasaa teshaam' kavitvam' kutah' ..

ye tvaam' paand'urapund'areekapat'alaspasht'aabhiraamaprabhaam'
sinchanteemamri'tadravairiva shiro dhyaayanti moordhni sthitaam .
ashraantam' vikat'asphut'aaksharapadaa niryaati vaktraambujaat
teshaam' bhaarati bhaaratee surasaritkallolalolormmibhih' ..

ye sindooraparaagapunjapihitaam' tvattejasaa dyaamimaa-
murvee chaapi vileenayaavakarasaprastaaramagnaamiva .
pashyanti kshanamapyananyamanasasteshaamanangajvara-
klaantaastrastakurangashaavakadri'sho vashyaa bhavanti striyah' ..

chanchatkaanchanakund'alaangadadharaamaabaddhakaancheesrajam'
ye tvaam' chetasi tadgate kshanamapi dhyaayanti kri'tvaa sthiram .
teshaam' veshmani vibhramaadaharahah' sphaaree bhavantyashchiraad
maadyatkunjarakarnataalataralaah' sthairyam' bhajante shriyah' ..

aarbhat'yaa shashikhand'amand'itajat'aajoot'aam' nri'mund'asrajam'
bandhookaprasavaarunaambaradharaam' pretaasanaadhyaasineem .
tvaam' dhyaayanti chaturbhujaam' trinayanaamaapeenatungastaneem'
madhye nimnavalitrayaankitatanum' tvadroopasampattaye ..

jaato'pyalpaparichchhade kshitibhri'taam' saamaanyamaatre kule
nih'sheshaavanichakravartipadaveem' labdhvaa prataaponnatah' .
yadvidyaadharavri'ndavanditapadah' shreevatsaraajo'bhavad
devi tvachcharanaambujapranatijah' so'yam' prasaadodayah' ..

chand'i tvachcharanaambujaarchanakri'te bilveedalollunt'ana-
trut'yatkant'akakot'ibhih' parichayam' yeshaam' na jagmuh' karaah' .
te dand'aankushachakrachaapakulishashreevatsamatsyaankitai-
rjaayantepri'thiveebhujah' kathamivaambhojaprabhaih' paanibhih' ..

vipraah' kshonibhujo vishastaditare ksheeraajyamadhvaikshavai
stvaam' devi tripure paraaparakalaam' santarpya poojaavidhau .
yaam' yaam' praarthayate manah' sthiradhiyaam' teshaam' ta eva dhruvam'
taam' taam' siddhimavaapnuvanti tarasaa vighnairavighneekri'taa ..

shabdaanaam' jananee tvamatra bhuvane vaagvaadineetyuchyase
tvattah' keshavavaasavaprabhri'tayo'pyaavirbhavanti dhruvam .
leeyante khalu yatra kalpaviratau brahmaadayaste'pyamee
saa tvam' kaachidachintyaroopamahimaa shaktih' paraa geeyase ..

devaanaam' tritayam' trayee hutabhujaam' shaktitrayam' trisvaraa
strailokyam' tripadee tripushkaramatha tribrahma varnaastrayah' .
yatkinchijjagati tridhaa niyamitam' vastu trivargaadikam'
tatsarvam' tripureti naama bhagavatyanveti te tattvatah' ..

lakshmeem' raajakule jayaam' ranamukhe kshemankareemadhvani
kravyaadadvipasarpabhaaji shabareem' kaantaaradurge girau .
bhootapretapishaachajri'mbhakabhaye smri'tvaa mahaabhairaveem'
vyaamohe tripuraam' taranti vipadastaaraam' cha toyaplave ..

maayaa kund'alinee kriyaa madhumatee kaalee kalaamaalinee
maatangee vijayaa jayaa bhagavatee devee shivaa shaambhavee .
shaktih' shankaravallabhaa trinayanaa vaagvaadinee bhairavee
hreenkaaree tripuraa paraaparamayee maataa kumaareetyasi ..

aa ee pallavitaih' parasparayutairdvitrikramaadyaksharaih'
kaadyaih' kshaantagataih' svaraadibhiratha kshaantaishcha taih' sasvaraih' .
naamaani tripure bhavanti khalu yaanyatyantaguhyaani te
tebhyo bhairavapatni vim'shatisahasrebhyah' parebhyo namah' ..

boddhavyaa nipunam' budhaistutiriyam' kri'tvaa manastadgatam'
bhaaratyaastripuretyananyamanaso yatraadyavri'tte sphut'am .
ekadvitripadakramena kathitastatpaadasankhyaaksharai-
rmantroddhaaravidhirvisheshasahitah' satsampradaayaanvitah' ..

saavadyam' niravadyamastu yadi vaa kim'vaa'nayaa chintayaa
noonam' stotramidam' pat'hishyati jano yasyaasti bhaktistvayi .
sanchintyaapi laghutvamaatmani dri'd'ham' sanjaayamaanam' hat'haat
tvadbhaktyaa mukhareekri'tena rachitam' yasmaanmayaapi dhruvam ..

Ramaswamy Sastry and Vighnesh Ghanapaathi