अश्वतर उवाच -
जगद्धात्रीमहं देवीमारिराधयिषुः शुभाम् ।
स्तोष्ये प्रणम्य शिरसा ब्रह्मयोनिं सरस्वतीम् ॥

सदसद्देवि सत्किञ्चिन्मोक्षवच्चार्थवत्पदम् ।
तत्सर्वं त्वय्यसंयोगं योगवद्देवि संस्थितम् ॥

त्वमक्षरं परं देवि यत्र सर्वं प्रतिष्ठितम् ।
अक्षरं परमं देवि संस्थितं परमाणुवत् ॥

अक्षरं परमं ब्रह्म विश्वञ्चैतत्क्षरात्मकम् ।
दारुण्यवस्थितो वह्निर्भौमाश्च परमाणवः ॥

तथा त्वयि स्थितं ब्रह्म जगच्चेदमशेषतः ।
ओङ्काराक्षरसंस्थानं यत्तु देवि स्थिरास्थिरम् ॥

तत्र मात्रात्रयं सर्वमस्ति यद्देवि नास्ति च ।
त्रयो लोकास्त्रयो वेदास्त्रैविद्यं पावकत्रयम् ॥

त्रीणि ज्योतींषि वर्णाश्च त्रयो धर्मागमास्तथा ।
त्रयो गुणास्त्रयः शब्दस्त्रयो वेदास्तथाश्रमाः ॥

त्रयः कालास्तथावस्थाः पितरोऽहर्निशादयः ।
एतन्मात्रात्रयं देवि तव रूपं सरस्वति ॥

विभिन्नदर्शिनामाद्या ब्रह्मणो हि सनातनाः ।
सोमसंस्था हविः संस्थाः पाकसंस्थाश्च सप्त याः ॥

तास्त्वदुच्चारणाद्देवि क्रियन्ते ब्रह्मवादिभिः ।
अनिर्देश्यं तथा चान्यदर्धमात्रान्वितं परम् ॥

अविकार्यक्षयं दिव्यं परिणामविवर्जितम् ।
तवैतत्परमं रूपं यन्न शक्यं मयोदितुम् ॥

न चास्ये न च तज्जिह्वा ताम्रोष्ठादिभिरुच्यते ।
इन्द्रोऽपि वसवो ब्रह्मा चन्द्रार्कौ ज्योतिरेव च ॥

विश्वावासं विश्वरूपं विश्वेशं परमेश्वरम् ।
साङ्ख्यवेदान्तवादोक्तं बहुशाखास्थिरीकृतम् ॥

अनादिमध्यनिधनं सदसन्न सदेव यत् ।
एकन्त्वनेकं नाप्येकं भवभेदसमाश्रैतम् ॥

अनाख्यं षड्गुणाख्यञ्च वर्गाख्यं त्रिगुणाश्रयम् ।
नानाशक्तिमतामेकं शक्तिवैभविकं परम् ॥

सुखासुखं महासौख्यरूपं त्वयि विभाव्यते ।
एवं देवि  त्वया व्याप्तं सकलं निष्कलञ्च यत् ।
अद्वैतावस्थितं ब्रह्म यच्च द्वैते व्यवस्थितम् ॥

येऽर्था नित्या ये विनश्यन्ति चान्ये
ये वा स्थूला ये च सूक्ष्मातिसूक्ष्माः ।
ये वा भूमौ येऽन्तरीक्षेऽन्यतो वा
तेषां तेषां त्वत्त एवोपलब्धिः ॥

यच्चामूर्तं यच्च मूर्तं समस्तं
यद्वा भूतेष्वेकमेकञ्च किञ्चित् ।
यद्दिव्यस्ति क्ष्मातले खेऽन्यतो वा
त्वत्सम्बद्धं त्वत्स्वरैर्व्यञ्जनैश्च ॥

ashvatara uvaacha -
jagaddhaatreemaham' deveemaariraadhayishuh' shubhaam .
stoshye pranamya shirasaa brahmayonim' sarasvateem ..

sadasaddevi satkinchinmokshavachchaarthavatpadam .
tatsarvam' tvayyasam'yogam' yogavaddevi sam'sthitam ..

tvamaksharam' param' devi yatra sarvam' pratisht'hitam .
aksharam' paramam' devi sam'sthitam' paramaanuvat ..

aksharam' paramam' brahma vishvanchaitatksharaatmakam .
daarunyavasthito vahnirbhaumaashcha paramaanavah' ..

tathaa tvayi sthitam' brahma jagachchedamasheshatah' .
onkaaraaksharasam'sthaanam' yattu devi sthiraasthiram ..

tatra maatraatrayam' sarvamasti yaddevi naasti cha .
trayo lokaastrayo vedaastraividyam' paavakatrayam ..

treeni jyoteem'shi varnaashcha trayo dharmaagamaastathaa .
trayo gunaastrayah' shabdastrayo vedaastathaashramaah' ..

trayah' kaalaastathaavasthaah' pitaro'harnishaadayah' .
etanmaatraatrayam' devi tava roopam' sarasvati ..

vibhinnadarshinaamaadyaa brahmano hi sanaatanaah' .
somasam'sthaa havih' sam'sthaah' paakasam'sthaashcha sapta yaah' ..

taastvaduchchaaranaaddevi kriyante brahmavaadibhih' .
anirdeshyam' tathaa chaanyadardhamaatraanvitam' param ..

avikaaryakshayam' divyam' parinaamavivarjitam .
tavaitatparamam' roopam' yanna shakyam' mayoditum ..

na chaasye na cha tajjihvaa taamrosht'haadibhiruchyate .
indro'pi vasavo brahmaa chandraarkau jyotireva cha ..

vishvaavaasam' vishvaroopam' vishvesham' parameshvaram .
saankhyavedaantavaadoktam' bahushaakhaasthireekri'tam ..

anaadimadhyanidhanam' sadasanna sadeva yat .
ekantvanekam' naapyekam' bhavabhedasamaashraitam ..

anaakhyam' shad'gunaakhyancha vargaakhyam' trigunaashrayam .
naanaashaktimataamekam' shaktivaibhavikam' param ..

sukhaasukham' mahaasaukhyaroopam' tvayi vibhaavyate .
evam' devi  tvayaa vyaaptam' sakalam' nishkalancha yat .
advaitaavasthitam' brahma yachcha dvaite vyavasthitam ..

ye'rthaa nityaa ye vinashyanti chaanye
ye vaa sthoolaa ye cha sookshmaatisookshmaah' .
ye vaa bhoomau ye'ntareekshe'nyato vaa
teshaam' teshaam' tvatta evopalabdhih' ..

yachchaamoortam' yachcha moortam' samastam'
yadvaa bhooteshvekamekancha kinchit .
yaddivyasti kshmaatale khe'nyato vaa
tvatsambaddham' tvatsvarairvyanjanaishcha ..

Ramaswamy Sastry and Vighnesh Ghanapaathi