नमस्ते हे स्वस्तिप्रदवरदहस्ते सुहसिते
महासिंहासीने दरदुरितसंहारणरते ।
सुमार्गे मां दुर्गे जननि तव भर्गान्वितकृपा
दहन्ती दुश्चिन्तां दिशतु विलसन्ती प्रतिदिशम् ॥

अनन्या गौरी त्वं हिमगिरि-सुकन्या सुमहिता
पराम्बा हेरम्बाकलितमुखबिम्बा मधुमती ।
स्वभावैर्भव्या त्वं मुनिमनुजसेव्या जनहिता
ममान्तःसन्तापं हृदयगतपापं हर शिवे ॥

अपर्णा त्वं स्वर्णाधिकमधुरवर्णा सुनयना
सुहास्या सल्लास्या भुवनसमुपास्या सुलपना ।
जगद्धात्री पात्री प्रगतिशुभदात्री भगवती
प्रदेहि त्वं हार्दं परमसमुदारं प्रियकरम् ॥

धरा दुष्टैर्भ्रष्टैः परधनसुपुष्टैः कवलिता
दुराचारद्वारा खिलखलबलोद्वेगदलिता ।
महाकाली त्वं वै कलुषकषणानां प्रशमनी
महेशानी हन्त्री महिषदनुजानां विजयिनी ॥

इदानीं मेदिन्या हृदयमतिदीनं प्रतिदिनं
विपद्ग्रस्तं त्रस्तं निगदति समस्तं जनपदम् ।
महाशङ्कातङ्कैर्व्यथितपृथिवीयं प्रमथिता
नराणामार्त्तिं ते हरतु रणमूर्त्तिः शरणदा ॥

समग्रे संसारे प्रसरतु तवोग्रं गुरुतरं
स्वरूपं संहर्त्तुं दनुजकुलजातं कलिमलम् ।
पुनः सौम्या रम्या निहितममतास्नेहसुतनु-
र्मनोव्योम्नि व्याप्ता जनयतु जनानां हृदि मुदम् ॥

अनिन्द्या त्वं वन्द्या जगदुरसि वृन्दारकगणैः
प्रशान्ते मे स्वान्ते विकशतु नितान्तं तव कथा ।
दयादृष्टिर्देया सकलमनसां शोकहरणी
सदुक्त्या मे भक्त्या तव चरणपद्मे प्रणतयः ॥

भवेद् गुर्वी चार्वी चिरदिवसमुर्वी गतभया
सदन्ना सम्पन्ना सरससरणी ते करुणया ।
समुत्साहं हासं प्रियदशहरापर्वसहितं
सपर्या ते पर्यावरणकृतकार्या वितनुताम् ॥

namaste he svastipradavaradahaste suhasite
mahaasim'haaseene daraduritasam'haaranarate .
sumaarge maam' durge janani tava bhargaanvitakri'paa
dahantee dushchintaam' dishatu vilasantee pratidisham ..

ananyaa gauree tvam' himagiri-sukanyaa sumahitaa
paraambaa herambaakalitamukhabimbaa madhumatee .
svabhaavairbhavyaa tvam' munimanujasevyaa janahitaa
mamaantah'santaapam' hri'dayagatapaapam' hara shive ..

aparnaa tvam' svarnaadhikamadhuravarnaa sunayanaa
suhaasyaa sallaasyaa bhuvanasamupaasyaa sulapanaa .
jagaddhaatree paatree pragatishubhadaatree bhagavatee
pradehi tvam' haardam' paramasamudaaram' priyakaram ..

dharaa dusht'airbhrasht'aih' paradhanasupusht'aih' kavalitaa
duraachaaradvaaraa khilakhalabalodvegadalitaa .
mahaakaalee tvam' vai kalushakashanaanaam' prashamanee
maheshaanee hantree mahishadanujaanaam' vijayinee ..

idaaneem' medinyaa hri'dayamatideenam' pratidinam'
vipadgrastam' trastam' nigadati samastam' janapadam .
mahaashankaatankairvyathitapri'thiveeyam' pramathitaa
naraanaamaarttim' te haratu ranamoorttih' sharanadaa ..

samagre sam'saare prasaratu tavogram' gurutaram'
svaroopam' sam'harttum' danujakulajaatam' kalimalam .
punah' saumyaa ramyaa nihitamamataasnehasutanu-
rmanovyomni vyaaptaa janayatu janaanaam' hri'di mudam ..

anindyaa tvam' vandyaa jagadurasi vri'ndaarakaganaih'
prashaante me svaante vikashatu nitaantam' tava kathaa .
dayaadri'sht'irdeyaa sakalamanasaam' shokaharanee
saduktyaa me bhaktyaa tava charanapadme pranatayah' ..

bhaved gurvee chaarvee chiradivasamurvee gatabhayaa
sadannaa sampannaa sarasasaranee te karunayaa .
samutsaaham' haasam' priyadashaharaaparvasahitam'
saparyaa te paryaavaranakri'takaaryaa vitanutaam ..

Ramaswamy Sastry and Vighnesh Ghanapaathi